Tub Txib Tes Hauj Lwm 4:1-37
4 Thaum Petus thiab Yauhas tseem qhia cov tib neeg mas cov pov thawj, tus thawj tub ceev xwm zov lub tuam tsev, thiab cov Xadukais txawm los rau ntawm nkawd.
2 Lawv chim heev rau ob tug tub txib ntawd vim nkawd tab tom qhia cov tib neeg thiab tshaj tawm tias Vajtswv twb tsa Yexus sawv hauv qhov tuag rov los lawm.
3 Lawv thiaj muab nkawd ntes kiag mus kaw ib hmos, rau qhov thaum ntawd twb tsaus ntuj lawm.
4 Tiam sis cov neeg uas mloog nkawd qhia los ntseeg coob heev, cov txiv neej thiaj muaj txog li 5,000 leej lawm.
5 Hnub tom qab ntawd, lawv cov thawj coj, cov txwj laus, thiab cov xib hwb* tuaj sab laj ua ke hauv Yeluxalees.
6 Tus pov thawj hlob Anas, Khayafas, Yauhas, Alexadaws, thiab tus pov thawj hlob cov txheeb ze puav leej tuaj rau ntawd thiab.
7 Lawv thiaj coj Petus thiab Yauhas nkawd los sawv tab meeg sawv daws thiab nug nkawd tias, “Leej twg pub hwj chim rau neb, thiab neb tuav leej twg npe ua tej no?”
8 Lub hwj huam dawb huv txawm ua rau Petus teb lawv tias,
“Nej cov thawj coj uas kav pej xeem thiab cov txwj laus’e,
9 hnub no nej coj wb tuaj ntawm no yog nej xav paub txog qhov uas wb tau pab tus yawg mus tsis taus kev. Thiab nej xav paub tseeb seb leej twg kho tau nws zoo lawm.
10 Kuv hais ncaj rau nej thiab ib tsoom neeg Ixayees sawv daws tias twb yog muaj Yexus Khetos uas yog tus neeg Naxales lub npe, tus yawg no thiaj zoo hlo los sawv tab meeg nej ntag. Nej muab Yexus ntsia rau saum tus ncej ntoo,* tiam sis Vajtswv twb tsa nws sawv hauv qhov tuag rov los lawm.
11 Yexus yog ‘lub pob zeb uas nej cov kws ua tsev saib tsis rau nqi, tiam sis twb muab teeb rau saum kaum tsev siab tshaj* lawm.’
12 Yeej tsis muaj lwm tus yuav cawm tau tib neeg dim li lawm. Hauv lub qab ntuj no, yeej tsis muaj dua ib lub npe uas Vajtswv pub los cawm peb dim hlo li.”
13 Thaum cov thawj coj thiab cov txwj laus hnov Petus thiab Yauhas nkawd muaj lub siab tawv teb li no, ua rau lawv xav tsis thoob li, rau qhov Petus nkawd tsis tau kawm ntawv* thiab tsuas zoo li luag tej xwb. Lawv mam nco dheev tias nkawd twb nrog Yexus ua ke ntag.
14 Thaum ntawd tus yawg uas Petus nkawd kho zoo tab tom nrog nkawd sawv ua ke. Lawv ntsia ntsoov tus yawg ntawd mas lawv teb tsis taus ib los li.
15 Lawv thiaj ntiab nkawd thiab tus yawg ntawd tawm hauv lub tsev Xahenrees* mus. Lawv mam li sab laj
16 hais tias, “Peb yuav ua li cas rau ob tug neeg no? Qhov txuj ci uas nkawd ua no yeej tshwj xeeb heev. Tag nrho ib tsoom neeg hauv Yeluxalees twb paub lawm. Txawm peb tsis lees los yeej tsis tau li.
17 Cia peb hem kom nkawd ntshai, thiab txwv tu nrho tsis pub nkawd tuav Yexus lub npe qhia tib neeg lawm, zaj no thiaj tsis ncha ntxiv.”
18 Cov thawj coj thiab cov txwj laus thiaj hu nkawd rov los thiab txwv tu nrho kom nkawd tsis txhob hais txog thiab qhia txog Yexus lub npe ntxiv li lawm.
19 Tiam sis Petus thiab Yauhas teb tias, “Nej sim xav seb qhov twg haum Vajtswv siab, mloog nej lus los mloog Vajtswv lus?
20 Txawm li cas los, wb yeej yuav qhia tej uas wb tau pom thiab tau hnov lawd.”
21 Cov thawj coj thiab cov txwj laus thiaj rov hem nkawd thiab tso nkawd mus. Lawv tsis zoo rau txim rau nkawd vim lawv nrhiav tsis tau lus nkaug, thiab lawv kuj ntshai cov tib neeg rau qhov sawv daws tab tom qhuas Vajtswv txog tej uas nkawd tau ua.
22 Twb yog qhov txuj ci no, tus yawg ntawd thiaj zoo hlo. Nws twb muaj 40 tawm xyoo lawm.
23 Tom qab tso nkawd tawm, nkawd mus rau ntawm cov thwj tim thiab qhia tej uas cov pov thawj hlob thiab cov txwj laus tau hais rau nkawd.
24 Thaum lawv hnov tej no, lawv sawv daws koom ib lub siab tsa ncauj thov Vajtswv tias,
“Tus Tswv uas kav ib puas tsav yam, koj yog tus tsim lub ntuj, lub ntiaj teb, dej hiav txwv thiab txhua yam uas muaj nyob rau hauv.
25 Koj kom lub hwj huam dawb huv tshoov peb yawg koob Daviv uas yog koj tus tub qhe hais lawm tias, ‘Ua cas ib tsoom teb chaws ho npau taws ua luaj thiab ib tsoom neeg xav txog tej yam tsis muaj qab hau xwb?
26 Tej vaj ntxwv hauv ntiaj teb sawv tawm tsam thiab tej nom tswv sib sau ua ke los twv Vajtswv Yehauvas* thiab tus uas nws xaiv tseg.’
27 Yeej muaj tseeb li no tiag, rau qhov Helauj thiab Phauthi-as Philaj tau nrog ib tsoom teb chaws thiab ib tsoom neeg Ixayees koom tes hauv lub nroog no los tawm tsam Yexus uas yog koj tus tub qhe dawb huv uas koj xaiv tseg.
28 Lawv ua txhua yam tiav raws li koj twb hais tseg lawd. Tej no muaj tshwm sim vim yog koj lub hwj chim* thiab koj tau teem tseg lawm.
29 Vajtswv Yehauvas* nim no thov koj pom txog tej uas lawv hem peb, thov pab kom koj cov tub qhe ua siab loj siab tawv tshaj tawm koj txoj lus tsis tseg.
30 Thov koj cev tes kho tib neeg tej mob thiab ua txuj ci tseem ceeb los ntawm Yexus uas yog koj tus tub qhe dawb huv lub npe.”
31 Thaum lawv taij thov Vajtswv tas, lub tsev uas lawv nyob ntawd txawm ua zog koog. Lub hwj huam dawb huv txawm los rau saum lawv txhua leej txhua tus, lawv thiaj ua taus siab loj siab tawv tshaj tawm Vajtswv txoj lus.
32 Tsis tas li ntawd xwb, cov neeg coob coob uas los ntseeg ntawd koom ua ib lub siab.* Tsis muaj ib tug hais tias nws tej qhov txhia chaw yog nws li ntiag tug. Tiam sis lawv muab lawv tej qhov txhia chaw los sib faib siv.
33 Cov tub txib niaj hnub ua tim khawv qhia tias Vajtswv twb tsa Tswv Yexus ciaj sawv rov los lawm. Lawv qhia muaj ceem kawg li mas Vajtswv foom koob hmoov nplua mias rau sawv daws.
34 Tsis muaj leej twg tu ncua ib yam dab tsi li. Cov uas muaj liaj muaj teb, muaj vaj muaj tsev kuj muab tej ntawd muag
35 thiab nqa cov nyiaj tuaj rau cov tub txib tuav.* Cov tub txib mam li muab faib rau cov uas cheem tsum.
36 Muaj ib tug yawg hu ua Yauxej uas cov tub txib muab hu ua Npananpas (lub npe ntawd txhais tias tus uas txhawb zog*). Nws yog ib tug Levis uas yug hauv Xaipas.
37 Nws muab nws daim teb muag thiab coj cov nyiaj tuaj rau cov tub txib tuav.*
Cov taw ntawv
^ Los sis “cov xib hwb qhia Vajtswv kev cai.” Mus saib Cov Lus Txhais.
^ Mus saib Cov Lus Txhais.
^ Los sis “twb yog lub pob zeb tseem ceeb tshaj.”
^ Uas yog tsis tau mus kawm hauv cov Lanpis tej tsev kawm ntawv.
^ Mus saib Cov Lus Txhais.
^ Mus saib Cov Lus Txhais.
^ Lus Kilis yog “koj txhais tes.”
^ Mus saib Cov Lus Txhais.
^ Lus Kilis yog “xakis.” Mus saib Cov Lus Txhais.
^ Lus Kilis yog “tso rau ntawm cov tub txib ko taw.”
^ Lus Kilis yog “Tub Nplig Siab.”
^ Lus Kilis yog “tso rau ntawm cov tub txib ko taw.”
