Tub Txib Tes Hauj Lwm 9:1-43
9 Xolaus tseem nrhiav nrhw kev los tua tus Tswv cov thwj tim. Nws thiaj mus cuag tus tuam pov thawj hlob
2 thiab mus thov kom tus tuam pov thawj hlob ua ntawv rau nws nqa mus qhia rau cov tsev pe hawm hauv Damaxakas. Ua li no, nws thiaj muaj cai ntes cov uas coj tus Tswv Txoj Kev Cai, tsis hais poj niam txiv neej cab los rau hauv Yeluxalees.
3 Thaum Xolaus mus yuav txog Damaxakas, txawm muaj duab ci ntsa iab saum ntuj tuaj laum nkaus nws.
4 Nws thiaj vau hlo hauv pem teb thiab hnov ib lub suab hais tias, “Xolaus’os, Xolaus’e, koj tsim txom kuv ua dab tsi?”
5 Nws thiaj nug tias, “Tus Tswv, koj yog leej twg?” Lub suab ntawd teb tias, “Kuv yog Yexus, tus uas koj tsim txom ntag.
6 Cia li sawv tsees mus rau hauv nroog, luag mam qhia koj seb koj yuav ua dab tsi.”
7 Cov txiv neej uas nrog Xolaus ua ke yoob tas hais tsis taus ib los li, vim lawv hnov lub suab hais lus tiam sis tsis pom leej twg li.
8 Thaum Xolaus sawv los, nws rua hlo qhov muag tiam sis ua cas nws tsis pom kev lawm. Lawv thiaj tuav nws tes coj nws mus rau hauv Damaxakas.
9 Nws tsis pom kev tau peb hnub nkaus thiab nws tsis noj tsis haus ib yam dab tsi li.
10 Muaj ib tug thwj tim hauv Damaxakas hu ua Ananias. Tus Tswv ua yog toog rau nws thiab hais tias, “Ananias’e!” Nws teb tias, “Tus Tswv, kuv nyob ntawm no.”
11 Tus Tswv hais rau nws tias, “Cia li sawv tsees mus rau txoj kev hu ua Ncaj mas koj yuav pom ib tug yawg hauv Yudas tsev hu ua Xolaus uas yog neeg Thaxas. Nws tab tom thov Vajtswv
12 thiab nws twb ua yog toog pom kiag koj Ananias, mus saib nws thiab tsa tes npuab nws, kho nws rov pom kev.”
13 Tiam sis Ananias teb tias, “Tus Tswv, kuv twb hnov txog tus yawg ntawd lawm. Nws ua lim hiam kawg li rau koj cov tib neeg* hauv Yeluxalees.
14 Cov pov thawj hlob tseem tso cai rau nws ntes txhua tus uas tuav koj lub npe thov.”
15 Tiam sis tus Tswv hais rau nws tias, “Cia li mus xwb! Kuv twb xaiv nws los ua tus sawv cev rau kuv lawm. Nws yuav qhia kuv lub npe rau lwm haiv neeg, rau tej vaj ntxwv, thiab rau ib tsoom neeg Ixayees.
16 Kuv yuav qhia meej rau nws tias, nws yuav raug kev txom nyem npaum li cas vim nws tuav kuv lub npe.”
17 Ananias thiaj sawv kev mus rau lub tsev ntawd. Thaum nws mus txog, nws tsa tes npuab Xolaus thiab hais tias, “Kwv tij Xolaus’e, thaum koj tab tom tuaj, tus Tswv Yexus twb tshwm rau koj pom ntawm ib tog kev lawm. Nws yog tus txib kuv tuaj pab kom koj rov pom kev thiab tau txais lub hwj huam dawb huv.”
18 Tam sim ntawd txawm muaj ib yam zoo li nplai ntses poob ntawm Xolaus qhov muag los ces nws rov pom kev lawm. Nws thiaj sawv tsees ua kev cai raus dej.
19 Nws mam li noj mov thiab rov muaj zog tuaj.
Xolaus nrog cov thwj tim hauv Damaxakas nyob tau ob peb hnub ntxiv
20 thiab txawm pib tshaj tawm hauv tej tsev pe hawm tias Yexus yog Vajtswv tus Tub.
21 Cov uas hnov Xolaus qhia xav tsis thoob li thiab hais tias, “Tus yawg no twb yog tus tsim txom cov uas tuav Yexus lub npe hauv Yeluxalees los tsis yog? Nws tuaj hauv no twb yog nws tuaj ntes lawv mus rau cov pov thawj hlob los sad.”
22 Tiam sis Xolaus haj yam txawj qhia zuj zus tuaj xwb. Nws piav tau tshab tshab tias Yexus yeej yog tus Khetos mas ua rau cov Yudais hauv Damaxakas tsis muaj lus teb li lawm.
23 Thaum Xolaus ua li ntawd tau ib ntus, cov Yudais txawm tuav tswv yim yuav muab nws tua pov tseg.
24 Tiam sis Xolaus twb hnov txog tej uas lawv xav ua ntawd lawm. Lawv zov rawv cov rooj loog nruab hnub hmo ntuj, nrhiav kev nrhw muab nws tua pov tseg.
25 Muaj ib hmos Xolaus cov thwj tim thiaj muab nws tso hauv ib lub pob tawb dauv ntawm qhov rais mus sab nraud tus ntsa loog.
26 Thaum Xolaus mus txog hauv Yeluxalees nws xav mus koom cov thwj tim. Tiam sis sawv daws ntshai nws heev vim lawv tsis ntseeg tias nws yog Yexus ib tug thwj tim.
27 Yog li ntawd, Npananpas thiaj los pab daws Xolaus zaj thiab coj nws mus cuag cov tub txib. Npananpas mam li qhia meej rau lawv tias tus Tswv twb tshwm rau Xolaus pom ntawm ib tog kev thiab nrog nws tham lawm. Tsis tas li ntawd, Xolaus kuj ua siab tawv qhawv tshaj tawm Yexus lub npe hauv Damaxakas thiab.
28 Tom qab ntawd, Xolaus thiaj tau nrog lawv nyob thiab nws mus txhua qhov hauv Yeluxalees. Nws muaj lub siab tawv qhawv tshaj tawm tus Tswv lub npe rau sawv daws.
29 Nws kuj mus xyuas cov Yudais uas hais lus Kilis thiab nrog lawv sib cam mas lawv thiaj nrhiav kev muab nws tua ob peb zaug.
30 Thaum cov kwv tij hnov zaj no, lawv thiaj coj Xolaus mus rau Xixalias thiab xa nws mus rau lub nroog Thaxas lawm.
31 Txawm muaj ib lub caij uas tag nrho cov koom txoos hauv Yudias, Kalilais, thiab Xamalis tau nyob kaj siab lug. Tsis muaj tus tawm tsam lawv mas sawv daws ib leeg txhawb ib leeg lub zog. Lawv puav leej paub ntshai Vajtswv Yehauvas* thiab lub hwj huam dawb huv txhawb lawv tas zog mas lawv huam vam coob kawg li.
32 Lub sij hawm uas Petus mus ncig xyuas tag nrho cheeb tsam ntawd, nws kuj los saib cov thwj tim* hauv lub nroog Lidas.
33 Hauv lub nroog ntawd Petus mus ntsib ib tug yawg hu ua Ane-as uas tuag tes tuag taw pw tau yim lub xyoos.
34 Petus hais rau nws tias, “Ane-as, Yexus Khetos kho koj zoo. Cia li sawv tsees los pua koj lub txaj.” Nws txawm sawv tsees tam sid.
35 Thaum cov uas nyob hauv Lidas thiab hauv lub tiaj Saloos pom nws zoo lawm, lawv txawm los ntseeg tus Tswv.
36 Thaum ntawd hauv lub nroog Yaupas muaj ib tug thwj tim hu ua Thanpitas. Nws lub npe txhais ua lus Kilis yog “Daukhas.”* Nws yog ib tug poj niam uas ua ntau yam hauj lwm zoo thiab muaj lub siab dawb pub rau cov txom nyem.
37 Tiam sis muaj ib hnub nws mob hnyav heev ces nws txawm tuag lawm. Lawv muab nws lub cev ntxuav thiab tso nws pw hauv chav tsev txheej saud.
38 Lub nroog Lidas nyob tsis deb ntawm Yaupas. Thaum cov thwj tim hnov tias Petus tuaj txog Lidas, lawv thiaj txib ob tug txiv neej mus thov Petus tias, “Thov mus saib peb tam sim no.”
39 Petus thiaj sawv tsees nrog nkawd mus. Thaum Petus mus txog hauv Yaupas, lawv coj nws mus rau chav tsev txheej sab saud. Tag nrho cov poj ntsuam txawm los quaj zom zaws rau Petus. Lawv muab tej tsho thiab tej khaub ncaws uas Daukhas xaws pub rau lawv thaum nws tseem muaj txoj sia nyob thau los rau Petus saib.
40 Petus kom sawv daws tawm mus sab nraud ces nws txawm txhos caug thov Vajtswv. Nws mam tig los saib lub cev tuag thiab hais tias, “Thanpitas, cia li sawv tsees!” Thanpitas txawm rua hlo qhov muag mas thaum nws pom dheev Petus, nws sawv tsees los zaum.
41 Petus tuav nkaus nws tes tsa nws sawv. Petus mam li hu cov thwj tim* thiab cov poj ntsuam los mas lawv pom tias Thanpitas rov ciaj sia lawm.
42 Zaj no nrov ncha mus thoob plaws hauv Yaupas mas coob tus los ntseeg tus Tswv.
43 Petus thiaj nrog Ximoos nyob ib ntus hauv Yaupas. Ximoos yog ib tug kws luam tawv tsiaj.
Cov taw ntawv
^ Lus Kilis yog “cov dawb huv.”
^ Mus saib Cov Lus Txhais.
^ Lus Kilis yog “cov dawb huv.”
^ Lub npe Kilis yog Daukhas, hos lub npe Alamais yog Thanpitas. Ob lub npe no txhais tias tus kauv seb.
^ Lus Kilis yog “cov dawb huv.”
