Yav thaum ub, Vajtswv muab 10 Txoj Kev Cai rau cov Ixayees. Kaum Txoj Kev cai los sis Kaum Nqe Kev Cai no lus Henplais hu ua axawles has deb vas vee (ʽaseʹreth had·deva·rimʹ.) Lo lus no tshwm 3 zaug hauv phau ntawv Pheebthathus (Pentateuch) los sis Thaula (Torah) uas yog thawj 5 phau ntawv hauv phau Vajlugkub. (Khiav Dim 34:28; 2 Kevcai 4:13; 10:4) Lo lus no lus Kilis hais tias debkha (deʹka) txhais tias kaum thiab lo khub (loʹgous) txhais tias cov lus. Yog muab ob lo lus no sib txuas ua lus Askiv ces hais tias “Debkhalos” (Decalogue.)

 Vajtswv muab 10 Txoj Kev Cai sau rau ntawm 2 daim txiag zeb thiab muab rau Mauxes thaum Mauxes nyob saum Roob Xinais. (Khiav Dim 24:12-18) Kaum Txoj Kev Cai ntawd nyob hauv phau Khiav Dim 20:1-17 thiab 2 Kevcai 5:6-21.

•  Kaum Txoj Kev Cai muaj li no

•  Ua cas 10 Txoj Kev Cai nyias tso lawm nyias ib yam?

•  Ua cas muaj 10 Txoj Kev Cai?

•  Cov ntseeg puas coj 10 Txoj Kev Cai lawm?

•  Kaum Txoj Kev Cai puas tseem siv tau rau peb tiam no?

•  Kaum Txoj Kev Cai tej ntsiab lus uas nyob hauv Vajtswv txoj lus Phau Tshiab

1.   Teev tiam Vajtswv Yehauvas tib leej xwb.​—Khiav Dim 20:3.

2.   Tsis txhob pe dab mlom.​—Khiav Dim 20:4-6.

3.   Tsis txhob saib tsis taus Vajtswv lub npe.​—Khiav Dim 20:7.

4.   Ceev hnub Xanpataus.​—Khiav Dim 20:8-11.

5.   Hwm niam hwm txiv.​—Khiav Dim 20:12.

6.   Tsis txhob tua neeg.​—Khiav Dim 20:13.

7.   Tsis txhob deev luag poj luag txiv.​—Khiav Dim 20:14.

8.   Tsis txhob ua tub sab.​—Khiav Dim 20:15.

9.   Tsis txhob ua tim khawv tsis tseeb.​—Khiav Dim 20:16.

10.   Tsis txhob ua siab hlob.​—Khiav Dim 20:17.

 Feem ntau neeg muab 10 Txoj Kev Cai tso li saum toj no. Vim 10 Txoj Kev Cai hauv phau Vajlugkub tsis muaj zauv qhia seb txoj twg ua ntej txoj twg ua qab. Yog li ntawd, tib neeg thiaj muab nyias tso nyob lawm nyias ib yam, xws li txoj 1, 2 thiab txoj kawg. a

 Kaum Txoj Kev Cai yog ib feem ntawm 600 tawm txoj kev cai uas Vajtswv muab rau Mauxes coj mus qhia cov Ixayees. Tej kev cai ntawd yog Vajtswv tej lus cog tseg rau cov Ixayees. (Khiav Dim 34:27) Vajtswv cog lus tias yog cov Ixayees ua raws li Nws tej kev cai uas muab rau Mauxes ces lawv yuav tau koob hmoov nplua mias. (2 Kevcai 28:1-14) Tiam sis qhov tseem ceeb tshaj plaws yog npaj cov Ixayees tos txais tus Mexiyas los sis Yexus Khetos tus uas Vajtswv cog lus tseg.​—Kalatias 3:24.

 Cov ntseeg tsis coj 10 Txoj Kev Cai lawm, vim Vajtswv tsuas muab 10 Txoj Kev Cai rau cov Ixayees yav thaud xwb. (2 Kevcai 5:2, 3; Phau Ntawv Nkauj 147:19, 20) Txawm yog cov Yudais los sis cov uas los ntseeg Vajtswv tsis coj txoj kev cai no lawm. (Loos 7:6) b Rau qhov “Yexus Khetos txoj kevcai” twb los hloov Mauxes txoj lawm uas yog tej lus sam hwm uas Yexus hais rau cov thwj tim.​⁠— Kalatias 6:2; Mathais 28:19, 20.

 Kaum Txoj Kev Cai yeej tseem siv tau rau tiam uas peb nyob no. Rau qhov tej ntsiab lus hauv 10 Txoj Kev Cai yeej tso siab tau thiab kav txhua tiam neeg. (Phau Ntawv Nkauj 111:7, 8) Yog peb ua tib zoo los kawm ces yuav pab tau peb paub txog Vajtswv txoj kev xav thiab paub ua qhov zoo qhov yog. (2 Timautes 3:16, 17) Tseeb tiag, Vajtswv txoj lus Phau Tshiab yeej muaj 10 Txoj Kev Cai tej ntsiab lus nyob rau hauv.​—Saib “ Kaum Txoj Kev Cai tej ntsiab lus uas nyob hauv Vajtswv txoj lus Phau Tshiab.”

 Yexus qhia tias tag nrho Mauxes Tej Kev Cai thiab 10 Txoj Kev Cai puav leej nyob tag nrho hauv 2 txoj kev cai no. Nws hais tias: “‘Koj yuav tsum hlub Yehauvas uas yog koj tus Vajtswv kawg siab kawg ntsws, kawg dag kawg zog, kawg laj lim tswv yim.’ Nqe no yog thawj nqes uas tseem ceeb tshaj plaws. Ib yam li ntawd, nqe ob kuj qhia tias, ‘Hlub kwv tij zej zog ib yam li koj hlub koj tus kheej.’ Tag nrho Mauxes Txoj Kev Cai thiab cov cev Vajtswv lus tej lus qhia puav leej cog rau ob nqes no.” (Mathais 22:34-40) Yog li ntawd, cov ntseeg tsis coj Mauxes Txoj Kev Cai lawm tiam sis lawv coj txoj kev cai uas hlub Vajtswv thiab hlub kwv tij zej zog.​—Yauhas 13:34; 1 Yauhas 4:20, 21.