Phau Vajlugkub qhia tias peb yuav tsum tu ntshis peb lub cev kom noj qab haus huv thiab saib taus peb tus kheej. Zoo rau peb saib peb tus kheej rau nqe. (Mathai 10:31) Tiamsis phau Vajlugkub tsis qhia kom peb xam pom peb tus kheej xwb. Peb yuav tsum xam pom lwm tus thiab.

Yuav tsum xub hlub leejtwg?

1.   Peb yuav tsum hlub Vajtswv ua ntej. Phau Vajlugkub hais tias txoj kevcai uas tseem ceeb dua ntais yog: “Koj yuav tsum hlub [Yehauvas] uas yog koj tus Vajtswv kawg siab kawg ntsws.”​—Malakau 12:28-30; Kevcai 6:5.

2.   Txojcai 2 uas tseem ceeb dua ntais hais tias: “Koj yuav tsum hlub kwvtij zej zog ib yam li koj hlub koj tus kheej.”​—Malakau 12:31; Levi Tej Kevcai 19:18.

3.   Txawm phau Vajlugkub tsis qhia tsi ntsees kom hlub yus tus kheej los, yeej muaj ib lo lus sam hwm hais tias “hlub kwvtij zej zog ib yam li koj hlub koj tus kheej.” Nqe no qhia tias peb yuav tsum hlub thiab saib taus peb tus kheej.

Yexus xub hlub leejtwg?

 Yexus hlub Vajtswv, hlub kwvtij zej zog, thiab hlub nws tus kheej. Nws tso tus qauv zoo heev rau nws cov thwjtim sawvdaws xyaum.​—Yauhas 13:34, 35.

1.   Yexus hlub Yehauvas tshaj plaws li, nws thiaj tau hau ntsoov ua Vajtswv tes haujlwm kom tiav. Nws hais tias: “Kuv ua raws li leej Txiv kom kuv ua, xwv lub ntiajteb thiaj paub tias kuv hlub leej Txiv.”​—Yauhas 14:31.

2.   Yexus kuj hlub kwvtij zej zog kawg li, nws thiaj xam pom tej uas lawv cheem tsum ua ntej. Nws tseem pub nws txojsia ua nqe txhiv lawv thiab.​—Mathai 20:28.

3.   Yexus paub hlub nws tus kheej, nws thiaj siv sijhawm los so, los noj mov, mus tsham kwv tsham tij thiab nrog nws cov thwjtim ua ke.​—Malakau 6:31, 32; Luka 5:29; Yauhas 2:1, 2; 12:2.

Yog yus xam pom luag ua ntej puas ua rau yus kaj siab?

 Yog peb hlub kwvtij zej zog peb yeej yuav muaj kev kaj siab, rau qhov Vajtswv tsim peb muaj tus yam ntxwv zoo li nws. Vajtswv yog txojkev hlub peb thiaj txawj sib hlub. (Chiv Keeb 1:27; 1 Yauhas 4:8) Peb yuav tsum hlub peb tus kheej thiab, tiamsis peb yuav tsum xam pom lwm tus ua ntej. Phau Vajlugkub hais tias “qhov uas pub rau luag ua rau yus kaj siab dua li txais luag li los.” (Tubtxib Tes Haujlwm 20:35) Yog li ntawd, yog peb hlub Vajtswv tshaj thiab ua zoo rau kwvtij zej zog peb yeej yuav kaj siab dua.

 Niaj hnub no muaj coob leej ntau tus xam pom lawv tus kheej xwb. Lawv hlub lawv tus kheej dua li hlub luag lwm tus. Lawv xav tias coj li ntawd thiaj ua rau lawv zoo siab. Tiamsis cov uas muaj kev zoo siab thiab noj qab haus huv, yog cov uas coj raws li nqe Vajlugkub no hais: “Tsis txhob cia leejtwg xam pom nws tus kheej, yuav tsum xam pom lwm tus.”​—1 Khaulee 10:24.