Tib neeg muab Yexus tej lus qhia coj los tsa ua ntau pawg ntseeg. Txawm li ntawd los, phau Vajlugkub qhia tias cov tseem Khixatias tsuas muaj tib co xwb. Ua cas ho hais li ntawd, cia peb mus saib 3 yam nram no.

1.   Yexus hais tias tej nws qhia yog “qhov tseeb.” Cov ntseeg nyob thawj 100 xyoo yeej coj raws li “qhov tseeb.” (Yauhas 8:32; 2 Petus 2:2; 2 Yauhas 4; 3 Yauhas 3) Qhov no qhia tias pawg ntseeg twg tsis coj raws li qhov tseeb ces pawg ntawd yog cov cuav.

2.   Phau Vajlugkub qhia tias cov ntseeg yuav tsum “hais tej lus txhawb uas ua rau sawvdaws nyob sib haum xeeb.” (1 Kauleethaus 1:10) Tiam sis ntau pawg ntseeg tsis coj li ntawd, lawv tsis coj li ib tug tseem Khixatias, lawv thiaj tsis yog cov tseem.​—1 Petus 2:21.

3.   Yexus twb hais tseg lawm tias yuav muaj coob tus hais tias lawv yog ib tug ntseeg tiam sis lawv tsis coj li nws hais thiab nws yuav tsis lees yuav lawv. (Mathais 7:21-23; Lukas 6:46) Muaj ib txhia raug cov thawj coj ntxias yuam kev. Cov thawj coj ntawd tsis qhia qhov tseeb lawv tsuas ntxias kom tau noj tau haus xwb. (Mathais 7:15) Hos ib txhia mus koom kev ntseeg cuav vim lawv xav mloog tej zaj uas lawv nyiam xwb, lawv tsis xav mloog qhov tseeb hauv phau Vajlugkub.​—2 Timautes 4:3, 4.

 Hauv Yexus zaj lus piv txwv txog cov mog thiab cov txhauv, nws hais tias yuav muaj ib co fav xeeb rau qhov tseeb. (Mathais 13:24-30, 36-43) Muaj tseeb li Yexus tau hais ntawd, tom qab no thaum nws cov thwj tim tuag tas lawm cov fav xeeb txawm muaj coob zuj zus tuaj. Tib neeg thiaj cais tsis tau tias pawg twg tseem pawg twg cuav tau ntau xyoo. (Tes Haujlwm 20:29, 30) Txawm txhua txoj kev ntseeg cuav nyias qhia lawm nyias ib yam los, lawv puav leej yuam kev deb ntawm “kev ntseeg tseeb.”​—2 Timautes 2:18.

 Yexus twb qhia tseg lawm tias thaum kawg tib neeg yuav cais tau cov ntseeg tseeb ntawm cov cuav. Tiam kawg uas peb nyob no yeej muaj raws nkaus li Yexus tau hais.​—Mathais 13:30, 39.