Hauv phau Vajlugkub muaj ntau txoj kev pab. Txawm koj yuav loj hlob zoo li cas los yeej tsis nyuaj dhau rau koj to taub phau Vajlugkub.—2 Kevcai 30:11.

Tej yam uas pab koj to taub phau Vajlugkub

1.   Txo hwj chim. Vajtswv ntxub cov neeg khav theeb. Yog li, peb yuav tsum txo hwj chim es lees tias phau Vajlugkub yog Vajtswv Txoj Lus. (1 Thexalaunikes 2:13; Yakaunpaus 4:6) Vajtswv xav kom peb tshuaj ntshis tej uas peb kawm seb puas muaj tseeb tiag, tsis yog lam tau lam ntseeg xwb.—Loos 12:1, 2.

2.   Thov Vajtswv tsav tswv yim rau koj. Pajlug 3:5 hais tias, “Tsis txhob cia siab rau koj tej kev txawj ntse.” Tiam sis “cia li thov ntawm Vajtswv, Vajtswv yuav pub tswvyim rau” koj xwv koj thiaj nkag siab phau Vajlugkub.—Yakaunpaus 1:5.

3.   Kawm Vajlugkub tsis tu ncua. Yog koj kawm Vajlugkub tsis tu ncua koj yuav to taub dua li kawm ib ntus es ncua ib ntus.—Yausuas 1:8.

4.   Kawm ib zaj zuj zus tuaj. Thaum koj kawm txog ib zaj twg, ua tib zoo tshuaj seb phau Vajlugkub hais li cas txog zaj ntawd. Yog koj ua li no, koj yuav to taub Vajlugkub zoo. Pib kawm tej hauv paus ntsiab lus tseem ceeb ua ntej tso, tom qab ntawd mam li kawm tej zaj tob tob hauv phau Vajlugkub. (Henplais 6:1, 2) Yog koj ua li no, koj yuav pom tias phau Vajlugkub sib dhos li cas thiab ib nqe piav txog ib nqe li cas txawm tias nqe ntawd “tsis tshua yooj yim to taub.”—2 Petus 3:16.

5.   Cia lwm tus pab koj. Hauv phau Vajlugkub txhawb kom peb mus cuag cov uas paub Vajlugkub zoo dua. (Tes Haujlwm 8:30, 31) Yehauvas Cov Tim Khawv qhia Vajlugkub pub dawb tib yam li cov Khixatias thawj 100 xyoo thaum ub. Lawv siv tej nqe Vajlugkub los pab lwm tus paub tias phau Vajlugkub qhia txog dab tsi tiag.—Tes Haujlwm 17:2, 3.

Koj tsis tas muaj tej yam no

1.   Kawm ntawv qeb siab los sis txawj ntse. Txawm Yexus 12 tug tub txib “tsis tau kawm ntawv” los, lawv yeej nkag siab Vajtswv Txoj Lus thiab coj mus qhia tau rau lwm tus.—Tes Haujlwm 4:13.

2.   Nyiaj txiag. Koj kawm tau phau Vajlugkub dawb xwb. Yexus hais rau nws cov thwj tim tias, “Vajtswv pub dawb dawb rau nej mas nej cia li pub dawb dawb rau lwm tus.”—Mathais 10:8.