Oibe, Diabolo ia noho momokani. Ia be “tanobada ena lohia” tauna, ia be aneru dikana ai ia lao bona Dirava ia gwau-edeede henia. (Ioane 14:30; Efeso 6:11, 12) Baibel ese inai ladadia bona edia anina amo Diabolo ena kara ia herevalaia, hegeregere:

•   Satani, ena anina be “Gwau-Edeede Tauna.”​—⁠Iobu 1:6

•   Diabolo, ena anina be “Ladana Hadikaia Tauna.”​—⁠Apokalupo 12:9.

•   Gaigai Badana, Baibel ese inai ladana ia gaukaralaia “Koikoi Tauna” ia herevalaia totona​—⁠2 Korinto 11:3.

•   Hedibagani Tauna.​—⁠Mataio 4:3.

•   Koikoi Tauna.​—⁠Ioane 8:44.

Ia be lalohadai eiava kara dika ta ia herevalaia lasi

 Haida idia gwau Satani Diabolo be iseda lalona ai ia noho lalohadai eiava kara dika gauna ta sibona. To Bibel ese Dirava bona Satani huanai ia vara herevahereva karana ia gwauraia hedinarai. Dirava be goeavadae tauna, unai dainai ita gwau diba lasi Dirava be mai ena kara dika kahana ta ia noho ia hereva henia totona. (Deuteronomi 32:4; Iobu 2:1-6) Danu, Satani ese Iesu, gaoevadae tauna ia dibagania. (Mataio 4:8-10; 1 Ioane 3:5) Unai dainai, Baibel ese ia hahedinaraia Diabolo ia noho momokani bona ia be laloahadai eiava kara dika ta ia herevalaia lasi.

 Taunimanima momo idia abia dae lasi Diabolo ia noho momokani, unai lalohadai dainai ita hoa, a? Lasi, Baibel ia gwau, Satani ese koikoi daladia amo unai bamona lalohadai kereredia ia havaraia diba. (2 Tesalonika 2:9, 10) Satani ena koikoi karana ta be, taunimanima momo edia lalona ia hadiburaia bona do idia laloa Satani be ia noho momokani lasi.​—⁠2 Korinto 4:4.

 Lalohadai maorona: Baibel haida ai Heberu herevana idia hahanai “Lucifer” ena anina be “diari tauna”. (Isaia 14:12) Unai ladana ese famili tamona amo idia mai Babulonia edia lohia taudia eiava king ia herevalaia, bona edia hekokoroku karana dainai Dirava ese idia ia hahemaraia diba. (Isaia 14:4, 13-20) Babulonia idia hadikaia ore murinai inai hereva “diari tauna” idia gaukaralaia Babulonia edia lohia taudia idia hevasealaia totona.

 Lalohadai maorona: Diabolo be Dirava ena inai tauna, ena gaukara hebou tauna lasi. Satani ese Dirava idia hesiai henia taudia ia samania koikoi.​​—⁠1 Petero 5:8; Apokalupo 12:10.