Lauma helaga be Dirava ena gaukara siahuna. (Mika 3:8; Luka 1:35) Dirava ese ena lauma helaga be gabu idauidau dekenai ia siaia ena ura hagugurua totona.​—Salamo 104:30; 139:7.

 Baibel ai, inai hereva “lauma” be Heberu herevana ruʹach bona Greek herevana pneuʹma amo idia abia. Nega momo, unai hereva rua be Dirava ena gaukara siahuna, o lauma helaga ia herevalaia. (Genese 1:2) To Baibel ai, unai hereva rua ese gau idauidau idia herevalaia diba danu:

•   Laga.​—Habakuku 2:19; Apokalupo 13:15.

•   Lai.​—Genese 8:1; Ioane 3:8.

•   Mauri siahuna.​—Iobu 34:14, 15.

•   Ta ena laloa dalana.​—Numera 14:24.

•   Lauma taudia, Dirava bona aneru danu.​—1 King Taudia 22:21; Ioane 4:24.

 Unai hereva ibounai be taunimanima ese idia itaia diba lasi gaudia idia herevalaia. Unai hegeregerena, Dirava ena lauma, be “lai bamona, ita itaia diba lasi bona ia be mai ena siahu.”​—An Expository Dictionary of New Testament Words, by W. E. Vine.

 Danu Baibel ia gwau Dirava ena lauma helaga be iena “imana.” (Salamo 8:3; 19:1) Tau ta ese ena imana ia gaukaralaia gau idauidau ia karaia totona, unai hegeregerena Dirava ese ena lauma helaga ia gaukaralaia inai gaudia ia karaia totona:

•   Iunives.​—Salamo 33:6; Isaia 66:1, 2.

•   Baibel.​—2 Petero 1:20, 21.

•   Idaunega ena hesiai taudia ese idia karaia hoa karadia bona edia haroro goadagoada karana.​—Luka 4:18; Kara 1:8; 1 Korinto 12:4-11.

•   Ia idia kamonai henia taudia ese idia hahedinaraia kara namodia.​—Galatia 5:22, 23.

Lauma helaga be tau ta lasi

 Baibel ia gwau Dirava ena lauma be iena “imana” o “laga,” to unai ese ia hahedinaraia lasi lauma helaga be tau ta. (Esodo 15:8, 10) Tau ta ena imana be ena lalona bona tauanina ida ia gaukara hebou; unai hegeregerena, lauma helaga be Dirava ena ura hegeregerena ia gaukara. (Luka 11:13) Danu, Baibel ese Dirava ena lauma helaga be ranu ida ia hahegeregerea bona abidadama bona diba ida ia gwauraia hebou. Unai ibounai ese idia hahedinaraia lauma helaga be tau ta lasi to ia be siahu ta.​—Isaia 44:3; Kara 6:5; 2 Korinto 6:6.

 Baibel ese Iehova Dirava bona ena Natuna, Iesu Keriso edia ladana ia hatoa; to lauma helaga ena ladana ia hatoa lasi. (Isaia 42:8; Luka 1:31) Ena abidadama dainai idia hamasea Keristani tauna Stefano be matahanai ta ia itaia neganai, ia ese taunimanima rua sibona ia itaia, to toi lasi. Baibel ia gwau: “Stefano be lauma helaga amo ia honu, bona guba ia itaia noho lalonai, ia ese Dirava ena hairai bona Iesu be Dirava ena imana idibana kahanai ia gini ia itaia.” (Kara 7:55) Dirava ese lauma helaga ena siahu amo Stefano ia durua unai matahanai ia itaia totona.

 Lalohadai kererena: Lauma helaga be taunimanima ta, bona ia be Toi Tamona ena kahana ta, King James version Baibel ai 1 Ioane 5:​7, 8 ese unai ia hahedinaraia.

 Hamomokania gauna: King James version Baibel ai, inai hereva 1 Ioane 5:​7, 8 ai ia gwau, “guba ai, Tamana, Hereva, bona Lauma Helaga: bona idia toi be tamona. Bona tanobada ai hamomokania gaudia be toi.” To tahua gaukara idia karaia taudia ese idia davaria unai hereva be aposetolo Ioane ese ia torea lasi, unai dainai Baibel lalonai do ia noho lasi. Profesa Bruce M. Metzger ia gwau: “Unai hereva be kerere bona ia maoro lasi Taravatu Matamatana dekenai idia atoa.”​—A Textual Commentary on the Greek New Testament.

 Lalohadai kererena: Lauma helaga ena ladanai bapatiso abia karana ese ia hamomokania lauma helaga be tau ta.

 Hamomokania gauna: Nega haida Baibel lalonai inai hereva “ladana” idia gaukaralaia ta ena siahu o dagi idia herevalaia totona. (Deuteronomi 18:5, 19-22; Eseta 8:10) “Lauma helaga ladanai” ia bapatiso tauna ese lauma helaga ena siahu bona gaukara, Dirava ena ura hagugurua karana dekenai ia abia dae.​—Mataio 28:19.

 Lalohadai kererena: Iesu ena aposetolo taudia bona ena hahediba taudia ma haida idia abia dae lauma helaga be tau ta.

 Hamomokania gauna: Baibel bona idaunegai sivaraidia ese unai idia hamomokania lasi. Encyclopædia Britannica ia gwau: “Inai hereva Lauma Helaga be lauma tauna ta, Dirava hegeregerena . . . be lagani 381 ai Constantinople ena hebou ta dekenai idia herevalaia.” Aposetolo ginigabena ia mase bena lagani 250 murinai unai ia vara.