Mesia Totona Idia Perovetalaia Herevadia ese Idia Hamomokania Iesu be Mesia, A?

PLAY

Baibel ena haere

Oibe. Iesu be tanobada ai ia noho neganai, ia ese “Mesia, Gunalaia Tauna,” totona idia perovetalaia herevadia momo ia hagugurua, ia be “tanobada ena hamauria tauna.” (Daniela 9:25; 1 Ioane 4:14) Bona ena mase murinai Iesu be, Mesia totona idia gwauraia peroveta herevadia ia hagugurua noho.—Salamo 110:1; Kara 2:34-36.

“Mesia” ena anina be dahaka?

Inai Heberu herevana Ma·shiʹach (Mesia) bona Greek herevana Khri·stos (Keriso) edia anina be “Horoa Tauna.” Unai dainai, “Iesu Keriso” ena anina be “Iesu be Horoa Tauna,” eiava “Iesu be Mesia.”

Baibel negadia ai, ta idia hora totona ena kwarana latanai dehoro idia bubua karana ese ia hahedinaraia ia idia abia hidi mai anina bada gaukara ia karaia totona. (Levitiko 8:12; 1 Samuela 16:13) Dirava ese Iesu ia abia hidi Mesia ai do ia lao, unai gaukara totona siahu bada ia abia. (Kara 2:36) To, Dirava ese Iesu be dehoro amo ia horoa lasi, lauma helaga amo ia horoa.—Mataio 3:16.

Taunimanima momo ese Mesia totona idia perovetalaia herevadia idia hagugurua diba, a?

Lasi. Baibel ena peroveta herevadia ese tau tamona sibona ia hahedinaraia, Mesia eiava Keriso sibona ese unai ia hagugurua. To, Baibel ia gwau, “Keriso koikoidia bona peroveta taudia koikoi do idia hedinarai, bona hoa kara badadia do idia karaia, bona bema mai dalana Dirava ese ia abia hidi taudia do idia hakaua kerere.”—Mataio 24:24.

Mesia be vaira nega ai do ia mai, a?

Lasi. Baibel ia peroveta Mesia be King Davida ena bese amo do ia mai. (Salamo 89:3, 4) To lagani 70 C.E. a ai, Ruma tuari taudia ese Ierusalema idia hadikaia neganai, Iuda taudia edia bese ena rekodi gunadia momo idia boio, Davida ena bese edia rekodi danu ia boio. Unai nega amo, ta ese ia hamomokania diba lasi Iesu be King Davida ena lohia besena amo ia mai. To, Iesu ena nega ai, unai rekodi gunadia idia noho, ena inai taudia idia hegeregere lasi idia hunia, ia be Davida ena bese amo ia mai.—Mataio 22:41-46.

Baibel lalonai Mesia totona idia perovetalaia herevadia be hida?

Mesia totona idia perovetalaia herevadia edia numba korikorina ita gwauraia diba lasi. Hegeregere, Baibel lalonai Mesia idia perovetalaia herevadia be idauidau, to ia hahedinaraia goevagoeva unai be Mesia ena peroveta herevadia. Isaia 53:2-7 lalonai Mesia ena perovetalaia herevadia haida ia gwauraia. Reana haida do idia gwau unai be peroveta herevana tamona, to ma haida idia laloa unai peroveta herevadia be idauidau tamona lasi.

Mesia totona idia perovetalaia herevadia haida be Iesu ese ia hagugurua

Peroveta herevana	Davaria gabuna	Guguru negana
Aberahamo ena bese	Genese 22:17, 18	Mataio 1:1
Aberahamo ena natuna Isako ena bese	Genese 17:19	Mataio 1:2
Israela ena Iuda iduhu ai ia vara	Genese 49:10	Mataio 1:1, 3
King Davida ena lohia besena amo	Isaia 9:7	Mataio 1:1
Rami-hebou kekeni amo ia vara	Isaia 7:14	Mataio 1:18, 22, 23
Betelehema ai ia vara	Mika 5:2	Mataio 2:1, 5, 6
Ena ladana idia hatoa Emanuela b	Isaia 7:14	Mataio 1:21-23
Momo idia diba lasi ia vara	Isaia 53:2	Luka 2:7
Ia vara murinai, natu maragidia idia hamasea	Ieremia 31:15	Mataio 2:16-18
Aigupito amo ia boiria mai	Hosea 11:1	Mataio 2:13-15
Idia gwauraia Nasareta tauna c	Isaia 11:1	Mataio 2:23
Hereva gwauraia taudia ese ia idia herevalaia	Malaki 3:1	Mataio 11:7-10
Lagani 29 C.E ai, Dirava ese ia horoa Mesia d	Daniela 9:25	Mataio 3:13-17
Dirava ese ia gwauraia Ena Natuna	Salamo 2:7	Kara 13:33, 34
Dirava ena ruma ia ura henia bada	Salamo 69:9	Ioane 2:13-17
Sivarai namona ia harorolaia tauna	Isaia 61:1	Luka 4:16-21
Galilea ai pablik haroro gaukara ese diari badana ia hahedinaraia	Isaia 9:1, 2	Mataio 4:13-16
Mose hegeregerena hoa karadia ia karaia	Deuteronomi 18:15	Kara 2:22
Mose hegeregerena, Dirava ena lalohadai ia gwauraia	Deuteronomi 18:18, 19	Ioane 12:49
Gorere idauidau momo ia hanamoa	Isaia 53:4	Mataio 8:16, 17
Sibona ena ladana ia abia isi lasi	Isaia 42:2	Mataio 12:17, 19
Hisihisi idia davaria taudia ia hebogahisi henia	Isaia 42:3	Mataio 12:9-20; Mareko 6:34
Dirava ena kota maoromaoro ia hahedinaraia	Isaia 42:1, 4	Mataio 12:17-20
Sisiba Henia Tauna Hereadaena	Isaia 9:6, 7	Ioane 6:68
Iehova ena ladana ia harorolaia	Salamo 22:22	Ioane 17:6
Parabole amo ia hadibaia	Salamo 78:2	Mataio 13:34, 35
Gunalaia Tauna	Daniela 9:25	Mataio 23:10
Momo ese ia idia abidadama henia lasi	Isaia 53:1	Ioane 12:37, 38
Hahekwakwanaia nadi	Isaia 8:14, 15	Mataio 21:42-44
Taunimanima ese ia idia dadaraia	Salamo 118:22, 23	Kara 4:10, 11
Ia idia inai henia kava	Salamo 69:4	Ioane 15:24, 25
Mai kwalimu ida doniki latanai ia helai bona Ierusalema ai ia lao	Sekaraia 9:9	Mataio 21:4-9
Natudia ese ia idia hanamoa	Salamo 8:2	Mataio 21:15, 16
Iehova ena ladanai ia mai	Salamo 118:26	Ioane 12:12, 13
Ia abidadama henia tauna be ena inai tauna ai ia lao	Salamo 41:9	Ioane 13:18
Siliva moni 30 dainai lau ia koia e	Sekaraia 11:12, 13	Mataio 26:14-16; 27:3-10
Ena turadia ese ia idia rakatania	Sekaraia 13:7	Mataio 26:31, 56
Ia idia samania koikoi	Salamo 35:11	Mataio 26:59-61
Ia idia samania taudia dekenai hereva ta ia gwauraia lasi	Isaia 53:7	Mataio 27:12-14
Ia idia kanudia	Isaia 50:6	Mataio 26:67; 27:27, 30
Ena kwarana idia botaia	Mika 5:1	Mareko 15:19
Idia dadabaia	Isaia 50:6	Ioane 19:1
Ia idia botaia neganai idia ia koua lasi	Isaia 50:6	Ioane 18:22, 23
Gavamani ena gunalaia taudia be ia hadikaia palani idia karaia	Salamo 2:2	Luka 23:10-12
Au dekenai ena imana bona aena idia kokoa kau	Salamo 22:16	Mataio 27:35; Ioane 20:25
Taunimanima ese (laki) gadara ta amo ena dabu idia haria	Salamo 22:18	Ioane 19:23, 24
Ia be kara dika taudia ida idia atoa	Isaia 53:12	Mataio 27:38
Idia hereva dika henia, hevasehalaia	Salamo 22:7, 8	Mataio 27:39-43
Kara dika taudia dainai hisihisi ia abia	Isaia 53:5, 6	1 Petero 2:23-25
Toana be Dirava ese ia rakatania	Salamo 22:1	Mareko 15:34
Viniga bona wain iditana idia henia ia inua totona	Salamo 69:21	Mataio 27:34
Ia do mase lasi neganai ia gwau lau ranu mase	Salamo 22:15	Ioane 19:28, 29
Dirava ena imana dekenai ena mauri ia atoa	Salamo 31:5	Luka 23:46
Ena mauri ia atoa diho	Isaia 53:12	Mareko 15:37
Mauri davana amo kara dika ia kokia	Isaia 53:12	Mataio 20:28
Turia ta idia makohia lasi	Salamo 34:20	Ioane 19:31-33, 36
Idia gwadaia	Sekaraia 12:10	Ioane 19:33-35, 37
Taga tauna ida idia guria	Isaia 53:9	Mataio 27:57-60
Mase amo ia toreisi lou	Salamo 16:10	Kara 2:29-31
Samania tauna ena gaukara be ma ta dekenai idia henia	Salamo 109:8	Kara 1:15-20
Dirava ena imana idiba kahanai ia helai	Salamo 110:1	Kara 2:34-36

a McClintock and Strong’s Cyclopedia ia gwau: “Ieruselama idia hadikaia neganai, idia diba Iuda iduhu bona edia bese ena rijista idia hadikaia, to unai rekodi be guna idia noho.”

b Heberu gado ai inai ladana Emanuela ena anina be “Dirava be Ita ida Ia Noho,” unai ese Iesu’ eiava Mesia ena gaukara ia hahedinaraia namo herea. Tanobada ai ia mai bona ia karaia gaukara ese ia hamomokania Dirava be ia idia tomadiho henia taudia ida ia noho.—Luka 2:27-32; 7:12-16.

c Inai hereva “Nasareta” be Heberu gado herevana neʹtser amo idia abia ena anina be “rigi.”

d Baibel ena chronology ese lagani 29 C.E. ia gwauraia Mesia ia hedinarai laganina, unai oi diba totona inai atikol “Daniela Ena Peroveta Herevana ese Mesia Ena Mai Ia Perovetalaia Dalana,” itaia.

e Inai peroveta herevana be Sekaraia ena buka ai ia noho, to Baibel torea tauna Mataio ia gwau unai be “peroveta tauna Ieremia ena hereva.” (Mataio 27:9) Toana be Ieremia ena buka be Baibel ese ia gwauraia “peroveta taudia” edia buka ida idia atoa hebou neganai, Ieremia buka be kahana ginigunana ai idia atoa. (Luka 24:44) Mataio be “Ieremia”ena ladana ia gaukaralaia idia habou buka ibounai ia herevalaia totona, Sekaraia ena buka danu.

Reana Inai Danu Oi Ura

BAIBEL HAHEDIBA HEREVADIA

Emai Baibel Kosi Oi Tohoa

Davana lasi Baibel stadi oi karaia ta ida.

BAIBEL HENANADAI EDIA HAERE