U.S. Centers for Disease Control and Prevention Report ese memero bona kekeni lagani 15 ia lao19 idia henanadai henidia, oral sex (seks uduna amo) idia karaia eiava lasi? Kahirakahira 50 pesen idia gwau, oibe. Sharlene Azam ese buka ta ladana Oral Sex Is the New Goodnight Kiss ia torea bona ia gwau: “Bema matamata memero bona kekeni unai gauna [oral sex] oi herevalaia neganai do idia gwau unai be gau maragina ta. Idia laloa unai be seks lasi.”

•  Dahaka oi laloa?

•  Hereva maorona be dahaka?

•  Dahaka dainai ita herevalaia?

 Henanadai oi haerelaia, oibe o lasi.

1.   Oral sex karana amo, kekeni ta be bogana ia abia diba, a?

   1.   Oibe

   2.   Lasi

2.   Oral sex karana amo, gorere oi davaria diba, a?

   1.   Oibe

   2.   Lasi

3.   Oral sex be mahuta hebou karana ta, a?

   1.   Oibe

   2.   Lasi

 Oiemu haere bona henunai idia noho haere oi hahegeregerea.

1.   Oral sex karana amo, kekeni ta be bogana ia abia diba, a?

    Haere: Lasi. Unai dainai taunimanima momo​—idia laloa kerere​—bona idia gwau oral sex be kara dikana lasi.

2.   Oral sex karana amo, gorere oi davaria diba, a?

    Haere: Oibe. Oral sex ia karaia tauna be gorere idauidau ia davaria diba. Hegeregere hepatitis (A eiava B), kopina ena hehuni kahana ai toto ia vara, gonorrhea, herpes, HIV, bona syphilis.

3.   Oral sex be mahuta hebou karana ta, a?

    Haere: Oibe. Mahuta hebou karana be ma ta ena kopina ena hehuni kahadia ia dogoatao bona gaukaralaia​—hegeregere oral sex, anal sex (seks kununa amo) bona ta ese ma ta ena kopina ena hehuni kahadia ia gadaralaia (masturbation)​—ibounai be mahuta hebou karadia.

 Oral sex idia herevalaia Baibel siri haida ita lalohadailaia.

 Baibel ia gwau: “Dirava ena ura be inai, namona be . . . matabodaga karadia umui dadaraia.”​—1 Tesalonika 4:​3.

 Inai hereva “matabodaga karadia” ena gado ginigunana idia hahanaia neganai, ena anina be headava murimuri ai idia karaia seks karadia idauidau ibounai, hegeregere mahuta hebou, oral sex, anal sex, bona tau eiava hahine be ma ta ena kopina ena hehuni kahana ia gadaralaia. Kara bodagadia ia karaia tau eiava hahine be dika idauidau ia davaria diba, bona ena hetura karana Dirava ida ia hadikaia.​—1 Petero 3:12.

 Baibel ia gwau: “Matabodaga karana ia karaia noho tauna be sibona ena tauanina dekenai ia kara dika.”​—1 Korinto 6:18.

 Oral sex karana ese taunimanima edia tauanina bona Dirava tura henia karana ia hadikaia diba. Ta ena hemami ia hadikaia diba. Buka ta ladana Talking Seks With Your Kids ia gwau: “Headava lasi taudia ese seks idia karaia neganai edia hemami ia dika, idia lalohisihisi, bona idia gari. Seks idauidau idia karaia neganai, hemami dikadia bona hemarai idia ekspiriens danu. Ena be seks karadia be idauidau to ena anina be tamona.”

 Baibel ia gwau: “Lau, Iehova, be emui Dirava. Lau ese umui lau hadibaia noho, namo umui davaria totona.”​—Isaia 48:​17.

 Dirava ese taravatu ia atoa seks karana dekenai be oiemu namo totona, oi abiadae, a? Eiava oi laloa idia be taravatu aukana? Mani haheitalai ta oi laloa. Haiwei badinai sain idauidau idia atoa, sipidi ena hetoana, trafik signal, bona stopu sain. Dahaka oi laloa unai sain idauidau be taravatu aukana eiava oi do ia gimaia totona, a? Dahaka do ia vara bema oi,​— bona draiva ma haida​— ese unai sain umui laloa lasi?

 Dirava ena taravatu be unai hegeregerena, bema oi matauraia lasi, oi hadoa gauna hegeregerena do oi abia lou. (Galatia 6:17) Buka ta ladana Sex Smart ia gwau: “Bema emu abidadama bona oi badinaia kara namodia oi dadaraia bona hemarai karadia oi karaia emu ladana oi hadikaia unai.” To, bema Dirava ena taravatu hegeregerena oi noho, kara namona do oi hahedinaraia. To unai sibona lasi, lalomamina namona do oi dogoatao noho.​—1 Petero 3:16.