King Taudia Iharuana 9:1-37
9 Peroveta tauna Elisaia ese peroveta taudia edia bese tauna ta ia boiria bona ia gwau: “Emu gabana dekenai dabua oi kwatua, bona kavabu mai ena dehoro oi abia bona Ramoto-gileada dekenai oi lao haraga.+
2 Unuseni oi ginidae neganai, Nimisi ena natuna Iehosapata ena natuna Iehu+ oi tahua. Ia be tuari biagudia ida ia noho bona ia oi abia bona ruma ena lalona momokani daiutuna dekenai umui vareai.
3 Bena kavabu mai ena dehoro oi abia bona ena kwarana latanai oi bubua bona oi gwau, ‘Iehova be inai bamona ia gwau: “Lau ese oi lau abia hidi Israela ena king ai oi lao.”’+ Bena daiutu oi rakatania haraga.”
4 Vadaeni unai peroveta taudia edia bese tauna be Ramoto-gileada dekenai ia lao.
5 Unuseni ia ginidae neganai, tuari biagudia idia helai noho. Ia gwau: “Biaguna e, lau be oi totona sivarai ta lau mailaia.” Iehu ia henanadai: “Daika totona?” Ia gwau: “Biaguna e, oi totona.”
6 Vadaeni Iehu ia toreisi bona ruma lalonai ia vareai. Bena peroveta taudia edia bese tauna ese iena kwarana latanai dehoro ia bubua bona ia hamaoroa, “Israela ena Dirava Iehova be inai bamona ia hereva: ‘Lau ese oi lau abia hidi, Iehova ena taunimanima, Israela taudia edia king ai oi lao.+
7 Namona be emu lohia Ahaba ena bese taudia oi hamasea ore, bona Iesebele ese egu hesiai taudia, peroveta taudia unai, bona Iehova ena hesiai taudia ibounai ia hamasea ena dika davana do lau karaia.+
8 Bona Ahaba ena bese taudia ibounai do idia ore. Bona lau ese Israela ai Ahaba ena bese amo tatau ibounai, ladana bada lasi taudia danu, do lau hamasea ore.+
9 Bona lau ese Ahaba ena bese taudia be Nebata ena natuna Ieroboama ena bese taudia+ bona Ahaisa ena natuna Basa ena bese taudia+ bamona do lau halaoa.
10 Danu Ieserele ena tano ta dekenai sisia ese Iesebele ena tauanina do idia ania,+ bona ta ese do ia guria lasi.’” Bena daiutu ia rakatania haraga.+
11 Iehu be tuari biagudia dekenai ia giroa lou neganai, idia henanadai: “Gau ibounai idia namo, a? Dahaka dainai inai kavakava tauna be oi dekenai ia mai?” Ia haere: “Unai kava tauna ena kara bona hereva daladia umui diba.”
12 To idia gwau: “Unai be momokani lasi! Mani ia vara gauna ai oi hamaoroa.” Iehu be peroveta taudia edia bese tauna ese ia gwauraia herevana be idia ia hamaoroa. Bena ma ia gwau, “Danu unai tauna ia gwau, ‘Iehova be inai bamona ia hereva: “Lau ese oi lau abia hidi Israela taudia edia king ai oi lao.”’”+
13 Vadaeni karaharaga unai tuari biagudia ta ta be edia dabua idia abia bona vadavada latanai idia atoa do ia gini totona,+ bona kibi idia hiriria bona idia gwau: “Iehu be king ai ia lao vadaeni!”+
14 Bena Nimisi ena natuna Iehosapata ena natuna Iehu+ be Iehorama hamasea dalana ia karaia.
Suria ena king Hasaele+ dainai Iehorama bona Israela taudia be Ramoto-gileada idia gimaia noho.+
15 Gabeai King Iehorama be Ieserele+ dekenai ia giroa lou ena bero ia namo totona, unai be Suria ena king Hasaele ia tuari henia neganai Suria taudia ese idia haberoa.+
Vadaeni Iehu ia gwau: “Bema umui be egu kahanai, namo lasi tau ta be inai siti ia rakatania bona ia lao Ieserele taudia dekenai inai sivarai ia hadibaia.”
16 Vadaeni Iehu be ena kariota ia hegaegaelaia bona Ieserele dekenai ia lao, badina Iehorama be ena bero dainai unuseni ia noho, bona Iuda ena king Ahasaia be Iehorama ia itaia totona unuseni ia noho.
17 Ieserele kohorona ai ia gini gima tauna ia itaia Iehu ena tatau be idia mai noho. Karaharaga ia gwau: “Lau itaia tatau haida idia mai noho.” Iehorama ia gwau: “Hosi guia tauna ta umui siaia idia ia hedavari henia totona, bona idia dekenai do ia gwau, ‘Umui be mai maino ida umui mai, a?’”
18 Unai dainai hosi guia tauna be Iehu hedavari henia totona ia lao, bona ia gwau: “King be inai bamona ia hereva, ‘Umui be mai maino ida umui mai, a?’” To Iehu ia gwau: “Oi dekenai maino ena anina be dahaka? Mai bona lau oi badinaia!”
Vadaeni gima tauna ia gwau: “Gwaukau tauna be idia dekenai ia ginidae vadaeni, to ia do giroa mai lasi.”
19 Vadaeni hosi guia tauna iharuana ia siaia, bona ia lao bona ia gwau: “King be inai bamona ia hereva, ‘Umui be mai maino ida umui mai, a?’” To Iehu ia gwau: “Oi dekenai maino ena anina be dahaka? Mai bona lau oi badinaia!”
20 Bena gima tauna ia gwau: “Gwaukau tauna be idia dekenai ia ginidae vadaeni, to ia do giroa mai lasi, bona kariota ia taria tauna be Nimisi ena tubuna Iehu bamona, badina ena taria dalana be ia bamona.”
21 Iehorama ia gwau: “Egu kariota umui abia hegaegae!” Vadaeni Israela ena king Iehorama ena tuari kariota idia abia hegaegae bona ia bona Iuda ena king Ahasaia+ idia lao, bona Ieserele tauna Naboto ena tano+ dekenai Iehu idia hedavari henia.
22 Iehorama be Iehu ia itaia neganai, ia gwau: “Oi be mai maino ida oi mai, a?” To Iehu ia gwau: “Maino be edena bamona ia vara diba, bema emu sinana Iesebele+ be matabodaga karadia bona meamea karadia ia karaia noho?”+
23 Karaharaga Iehorama ia heau totona ena kariota ia hagiroa, bona Ahasaia dekenai ia gwau: “Ahasaia e, ita idia koia vadaeni!”
24 Iehu be peva ia abia bona Iehorama ena murina kahana ia pidia, diba be ena kudouna ia gwadaia bona kahana amo ia raka-lasi, bona ena tuari kariota lalonai ia moru bona ia mase.
25 Bena Iehu be ena durua tauna Bidikara dekenai ia gwau: “Ia oi abia isi bona Ieserele tauna Naboto ena tano dekenai oi negea lao.+ Laloatao, oi bona lau be ena tamana Ahaba ena murina dekenai kariota ida ita heau neganai, Iehova be ia totona inai hereva ia gwauraia:+
26 ‘Iehova ia gwau, “Varani Naboto bona ena natudia idia hamasea dalana lau itaia,”+ Iehova ma ia gwau, “Inai tano dekenai emu davana do lau henia.”’+ Vadaeni ia oi abia isi bona unai tano dekenai oi negea, Iehova ena hereva hegeregerena.”+
27 Iuda ena king Ahasaia+ be ia vara noho gauna ia itaia neganai, uma badana ta ena dala amo ia heau lao. (Gabeai Iehu ese ia lulua bona ia gwau: “Ia danu umui hamasea!” Unai dainai ia be ena kariota amo Guru, Ibileama kahirakahira ia noho hanuana ia lao henia noho lalonai, ia idia haberoa.+ To ia heau noho ela bona Megido bona unuseniai ia mase.
28 Bena ia be ena hesiai taudia ese kariota amo Ierusalema dekenai idia abia lao, bona ena sene taudia idia guria gabuna ai ia idia guria, unai be Davida Ena Siti ai.+
29 Unai be Ahaba ena natuna Iehorama ena lohia lagani namba 11 ai, Ahasaia+ be Iuda ena king ai ia lao.)
30 Iesebele+ ia kamonai Iehu be Ieserele dekenai ia mai.+ Unai dainai Iesebele be peni koremana amo ena matana ia penia bona ena huina ia hahairaia bona windo amo henunai ia itaia.
31 Iehu be geiti amo ia vareai neganai, Iesebele ia gwau: “Simiri, ena lohia ia alaia tauna, dekenai ia vara gauna oi diba, a?”+
32 Iehu be kwarana ia abia isi bona windo ia itaia, bona ia gwau: “Iniseniai ta be egu kahanai ia gini, a?”+ Ofesa taudia rua o toi be karaharaga idia roha diho ia idia itaia.
33 Iehu ia gwau: “Ia umui negea diho!” Vadaeni idia negea diho, bona ena rara be haba bona hosi latanai idia pisi daekau, bona Iehu ese ena hosi amo ia moia.
34 Unai murinai ia vareai bona ia aniani bona ia inuinu. Bena ia gwau: “Mani unai hahine dikana umui abia lao bona umui guria. Badina ia be king ta ena natuna.”+
35 To ia idia guria totona idia lao neganai, ena kwara koukou, ena imana bona aena sibona idia davaria.+
36 Idia giroa lou bona Iehu idia hamaoroa neganai, ia gwau: “Unai be Iehova ese Tisebe tauna Elia amo ia gwauraia hegeregerena ia vara,+ ia gwau, ‘Ieserele ena tano ai sisia ese Iesebele ena tauanina do idia ania.+
37 Bona Iesebele ena mase tauanina be Ieserele ena tano ai animal ena kukuri bamona do ia lao, unai amo do idia gwau lasi: “Inai be Iesebele.”’”
