Aonega Herevadia 7:1-27
7 Egu natuna e, egu hereva oi badinaia,Bona egu oda herevadia oi laloa bada.+
2 Egu oda herevadia oi badinaia bona oi mauri,+Egu hakaua herevadia* oi gimaia, emu matana nadinadi oi gimaia bamona.
3 Emu ima kwakikwaki ai oi kwatudia,Bona emu kudouna ai oi torea.+
4 Aonega dekenai oi gwau, “Oi be egu taihuna,”
Bona laloparara dekenai oi gwau, “Oi be egu varavara,”
5 Unai amo dika karaia hahine* amo oi ia gimaia,+Bona matabodaga hahine bona ena hereva digaradia* amo oi ia gimaia.+
6 Egu ruma ena windo amoEgu matana lau negea diho,
7 Bona idia laloa namonamo lasi taudia* lau itaia noho,Bona matamata taudia huanai mero ta lau itaia, ia be kavakava.*+
8 Ia be hanua ena dala dekenai ia raka lao,Bona hahine ena ruma ia lao henia,
9 Dina ia diho, adorahi momokani ai,+Hanuaboi ia mai bona gabu ia dibura.
10 Vadaeni lau itaia lalonai, hahine ta ese unai mero ia hedavari henia,Unai hahine ena dabua toana be ariara hahine bamona,+ bona ena kudouna be ia dika.
11 Unai hahine be ia hereva momo bona sibona ena ura ia badinaia.+
Ia be ruma ai ia noho diba lasi.
12 Ia be gabu ibounai dekenai ia loaloa,Nega haida gabu idauna ta dekenai, ma nega haida ariara gabudia dekenai.+
13 Unai hahine ese mero matamata ia rosia bona ia kisi henia.Bona mai hemarai lasi ida ia gwau:
14 “Lau ese maino karaia boubou lau henia vadaeni,+
Hari dina egu gwauhamata ena davana lau henia.
15 Unai dainai oi tahua totona lau mai,Bona oi lau davaria!
16 Egu bedi ai dabua namo hereana lau atoa,Unai dabua mai ena kala idauidau be Aigupito amo.+
17 Lau ese bedi latanai muro,* aloe,* bona sinamon* lau negea lao mai vadaeni.+
18 Oi mai, namona be iseda ura ita hagugurua ela bona daba rere.Namona be ita ura heheni bona ita moale hebou,
19 Badina egu adavana be ruma ai ia noho lasi,Ia be gabu daudau dekenai ia lao.
20 Ia be moni puse ia abia lao danu,Bona do ia giroa mai lasi ela bona hua ena dina namba 14.”
21 Hahine be lalona veria herevadia amo mero matamata ia hakaua kerere.+Bona hereva digaradia amo ia koia.
22 Bena mero be hahine murinai ia lao haraga, boromakau be hamasea gabuna dekenai ia lao bamona,Kavakava tauna be panisia totona seini ai idia kwatua bamona,+
23 Ela bona diba ta ese ena asena ia gwadaia,Ia diba lasi unai ese ena mauri do ia hadikaia, manu be tarapu lalonai ia vareai haraga bamona.+
24 Egu natuna e, lau oi kamonai henia,Lau gwauraia herevadia oi kamonai namonamo.
25 Namo lasi emu kudouna ese hahine ena dala ia badinaia.Namo lasi ena dala ai oi raka,+
26 Badina ia dainai momo idia mase vadaeni,+Bona ia hamasea taudia be momo herea.+
27 Iena ruma be Mase Gurina* ena dala,Unai be mase taudia edia gabu dekenai ia diho lao dalana.
Futnout
^ Eiava “taravatu.”
^ Eiava “lalona veria herevadia.”
^ Eiava “diba bada lasi taudia.”
^ Eiava “ia laloa namonamo lasi.”
^ Inai be au ta mai ena bonana namona, Baibel negadiai pefium totona idia gaukaralaia.
^ Au ta ena kopina mai ena bonana namo herea, nanadu totona idia gaukaralaia danu.
