Montreal siti ena ogogami kahana dekenai lau tubu daekau. Egu hua be 6 neganai egu tamana ia mase bona egu sinana sibona ese ruma bese maduna ia huaia. Sinagu ena natudia be 8 bona lau be dokona.

Lau tubu daekau lalonai, dina iboudiai drag, laki gadara, dagedage, bona raskol taudia bamodia karadia lau manadalaia. Egu lagani be 10 neganai, ariara hahine bona moni henia torehai taudia edia hesiai gaukara lau karaia. Nega momo lau koikoi bona dala idauidau amo taunimanima lau koidia karana lau moalelaia. Lau dekenai unai kara be drag lau ania ena moale bamona.

Egu lagani be 14 neganai, dala idauidau lau gaukaralaia namonamo diba, taunimanima lau koidia totona. Hegeregere, lau ese golo korikori lasi dina gauna, bracelet bona ring momo lau hoidia bona idia dekenai 14 karat golo stampa ena maka lau atoa, bena dala dekenai bona hoihoi sitoa badadia edia parking gabudia dekenai lau hoihoilaidia. Lau ura dikadika ia auka lasi dalanai moni lau davaria. Nega ta ai, lau ese dina tamona ai, moni $10,000 lau abia!

Egu lagani be 15 neganai matamata taudia edia dibura sikuli amo lau idia lulua. Egu noho rumana ta be lasi, unai dainai dala ai, bona uma ai eiava nega haida egu turadia edia ruma ai lau mahuta.

Taunimanima lau koidia momo dainai, nega momo pulisi ese lau idia nanadaia. Haida idia henaoa gaudia lau hoihoilaidia lasi dainai, dibura dekenai lau idia siaia lasi. To, idia dekenai davana lau henia badina taunimanima lau koidia, lau hereva maoro lasi, bona hoihoi permit lau abia lasi dainai. Tau ta lau gari henia lasi, lau ese moni idia henia torehai taudia totona lau gaukara, taunimanima dekena amo idia abitorehai monina lau gogoa. Unai gaukara amo lau mase diba, unai dainai nega haida ipidi lau abia. Danu, dagedage havaraia orea taudia ida lau gaukara.

Egu lagani be 17 neganai, Baibel lau dibaia matamaia. Lau be hahine ida lau noho hebou bona ia ese Iehova ena Witnes taudia ida Baibel stadi ia karaia matamaia. To, Baibel ena kara maoromaoro taravatudia ena sivarai lau dadaraidia, unai dainai unai hahine lau rakatania bona hahine ma ta lau tura henia bona ia ida lau noho.

To, egu hahine iharuana danu be Witnes ida ia stadi neganai, egu lalohadai lau haidaua! Ena mauri dalana haida ia haidaua bona lau hoa badina hari ia manau bona ia haheauka noho. Lau idia invait Iehova ena Witnes Kingdom Hall ena hebou dekenai. Lau lao neganai, lau idia welkam henia taudia be namo bona mai edia hebogahisi. Lau bamoa taudia amo idia be idau herea! Hanaihanai egu famili ese lau idia ura henia lasi lau mamia; lau tubu daekau lalonai, lalokau bona hebogahisi karadia lau mamia lasi. To, lau tahua bona ura henia karadia be Iehova ena Witnes taudia huanai ia noho. Witnes taudia ese lau dekenai Baibel stadi do idia hadibaia neganai, mai moale ida lau abia dae.

Baibel amo lau dibaia herevadia ese egu mauri ia durua, bema lasi reana lau mase diba. Laki Gadara dekenai lau halusia moni be $50,000 ia hanaia bona lau henia lou totona lau bona tatau rua ai hegaegae henaohenao karana amo unai moni do ai abia totona. To egu lalona lau haidaua dainai lau karaia lasi! To, unai tatau rua ese henaohenao idia karaia bena pulisi ese ta idia dogoatao bona ta ia mase.

Baibel lau stadilaia noho lalonai, lau laloparara egu kara momo do lau haidaua be namo. Hegeregere, Baibel ena hereva 1 Korinto 6:​10: “Henaohenao taudia, mataganigani taudia, kekero momo taudia, hereva dika taudia, bona koikoi dalanai kohu idia abia taudia be Dirava ena Basileia do idia abia lasi.” Unai siri lau duahia neganai, egu kara dikadia dainai lau taitai. Lau laloparara egu mauri dalana do lau haidaua momokani be namo. (Roma 12:2) Lau be dagedage bona badu haraga tauna bona egu mauri lalonai lau koikoi momo.

To, Baibel lau stadilaia amo, lau diba Iehova be lalokau bona hebogahisi Diravana. (Isaia 1:​18) Egu mauri dikana ena kara lau rakatania totona, lau ese Iehova lau guriguri henia goadagoada, lau noia ena heduru do lau abia totona. Iena heduru dainai, egu kara lau haidaua matamaia. Abia hidi badana ta be egu hahine bona lau be dala maorona ai headava.

Egu mauri lagani be 24 neganai, emai natudia be toi. Hari lau ese gaukara korikorina ta do lau tahua. To, egu edukeisen be bada lasi bona egu referens be lasi. Vadaeni, Iehova lau guriguri henia goadagoada lou. Bena lau lao gaukara ta lau tahua totona. Gaukara biagudia lau hamaorodia lau ura egu mauri lau haidaua, bona lau ura mai momokani ida gaukara namona lau karaia. Nega haida lau hamaorodia Baibel lau stadilaia bona lau ura tau namona ai do lau lao. Gaukara biagudia momo ese lau idia abiadae lasi. To, gabeai gaukara biaguna ta ese lau ia intaviu henia bona ia dekenai egu mauri dalana gunana ena hekwakwanai lau hamaoroa neganai, ia gwau: “Lau diba lasi, to lau laloa oi dekenai gaukara do lau henia be namo.” Lau diba inai be egu guriguri ena haere. Gabeai, lau bona egu adavana be ai bapatiso bona Iehova ena Witnes taudia ai lao.

Hari lau mauri noho badina Baibel ena hakaua hereva lau badinaia bona Keristani mauri dalana lau abia dae. Hari, lau be mai egu famili namona. Lau diba Iehova ese egu kara dika gunana ia gwauatao, bona egu lalomamina ia goeva.

Idia ore lagani 14 lalodiai, lau ese ful-taim haroro gaukara lau karaia, bona taunimanima lau durudia Baibel ena hadibaia hereva idia dibaia totona, bona vanegai egu adavana be lau ida ful-taim haroro gaukara ia matamaia danu. Idia ore lagani 30 lalodiai lau moale badina lau ida idia gaukara taudia 22 lau durudia Iehova idia tomadiho henia matamaia totona. Sitoa badadia dekenai lau do lao noho​—to guna bamona taunimanima koidia totona lasi. Hari, unuseniai lau lao badina lau ura haida dekenai egu abidadama lau gwauraia hedinarai totona. Lau ura gau namona lau henia: unai be tanobada matamata lalonai do idia mauri noho diba, bona unuseniai koikoi karadia do idia noho lasi.​—Salamo 37:10, 11.