1, 2. Bema headava lalonai hekwakwanai oi davaria, edena henanadai oi laloa be namo?

 LAGANI 1988 ai, Italy hahinena ta ladana Lucia ia daradoko momokani. a Lagani 10 ia headava murinai edia headava idia hadokoa gwauraia. Nega momo ena tau ida maino ia karaia toho, to idia kwalimu lasi. Unai dainai ena adavana ia rakatania, badina idia noho hebou diba lasi, bona ia sibona ese ena kekeni rua do ia naria. Lucia be unai nega ia laloa, bona ia gwau: “Lau laloa gau ta ese emai headava ia hanamoa diba lasi.”

² Bema emu headava lalonai hekwakwanai oi davaria, reana Lucia ena hemami oi diba. Reana oiemu headava ia doko gwauraia bona oi laloa noho bema gau ta ese do ia hanamoa diba eiava. Bema unai be oi dekenai ia vara, inai henanadai oi laloa karana ese oi do ia durua bada: Dirava ese headava do ia namo totona Baibel lalonai ia henia sisiba ibounai lau badinaia, a?—Salamo 119:105.

3. Ena be momo ese edia headava idia hadokoa, to tahua karadia lalonai, headava hadokoa taudia bona edia ruma bese taudia momo ese dahaka idia hahedinaraia?

³ Tau bona ena hahine huanai hepapahuahu momo idia vara neganai, toana be headava idia hadokoa be dala haragana. To, ena be tano momo dekenai idia hadokoa headava edia namba ia bada ia lao, vanegai idia karaia tahua karadia ese idia hahedinaraia edia headava idia hadokoa tatau bona hahine momo idia laloa unai idia karaia be kerere. Idia momo ese gorere idauidau, tauanina bona kwarana goreredia, idia davaria momo,  to idia headava noho taudia dekenai ia vara momo lasi. Edia headava idia hadokoa taudia edia natudia be lagani momo lalodiai idia daradara bona idia moale lasi. Idia parara headava taudia edia tama sina bona turadia idia lalohisihisi danu. Bona Dirava, headava ia Havaraia Tauna, ese unai kara be edena bamona ia laloa?

4. Headava lalonai idia vara hekwakwanai be edena dala ai ita hamaoromaoroa be namo?

⁴ Karoa gunadia dekenai ita herevalaia hegeregerena, Dirava ia ura headava taudia be edia mauri laganidia ibounai do idia noho hebou. (Genese 2:24) Vadaeni, dahaka dainai headava momo idia hadokoa noho? Unai ia vara haraga lasi. Nega momo toa haida ese idia hahedinaraia dika ia vara gwauraia. Headava lalonai hekwakwanai maragidia be reana idia bada idia lao ela bona toana be idia hanaidia diba lasi. To bema unai hekwakwanai be Baibel ena heduru amo idia hamaoromaoroa haraga, reana momo ese edia headava do idia hadokoa lasi.

5. Headava iboudiai lalonai dahaka idia laloa maoromaoro be namo?

⁵ Nega haida hekwakwanai idia vara, badina tau eiava hahine eiava idia ruaosi ese headava idia laloa maoromaoro lasi. Lalokau sivaraidia, momo idia ura henia magasin, televisen program, bona muvini piksa ese lalohadai bona ura idauidau idia havaraia, to idia momo be iseda noho maurina lalonai idia vara lasi gaudia. Unai lalohadai edia anina idia vara lasi neganai, reana ta do ia laloa ia idia koia, lalona ia namo lasi, bona reana ia badu. To, edena dala ai goevadae lasi taudia rua ese headava maurina idia moalelaia diba? Hetura karana namona ia noho totona, idia hekwarahi be gau badana.

6. (a) Baibel lalonai lalohadai maorona headava dekenai be dahaka? (b) Headava lalonai lalo-tamona ia vara lasi ena badina haida be dahaka?

⁶ Baibel ena sisiba be namo. Headava maurina ena moale ia herevalaia, to sisiba ia henia danu, ia gwau “headava taudia be inai tanobada ena metau bada do idia abia.” (1 Korinto 7:28) Ita herevalaia vadaeni hegeregerena, tau bona hahine be goevadae lasi taudia bona do idia kara dika diba. Idia ruaosi edia laloa dalana, edia hemami, bona edia mauri dalana gunana be idau. Nega haida headava taudia be moni, natudia, bona ravana bona nakimi taudia dainai idia lalo-tamona lasi. Nega ia hegeregere lasi idia hebamo totona bona mahuta hebou karana ena hekwakwanai danu ese heai idia havaraia diba. b Unai hekwakwanai hanaia karana ese nega sisina bada ia abia, to umui hesiku lasi! Headava taudia momo herea be unai bamona hekwakwanai amo idia heau lasi to idia ruaosi ese idia abia dae dalana ai idia hanaia.

7, 8. Bema tau bona ena hahine huanai lalohisihisi ia vara eiava gau haida idia laloa kerere, Baibel ena sisiba be dahaka unai idia hamaoromaoroa totona?

⁷ Momo idia davaria edia lalohisihisi, edia lalohadai  kererena ta, eiava edia kara kerere be maino dalanai idia herevalaia be auka. Reana ta ena adavana be maoromaoro ia gwau lasi: “Toana be egu kara ta oi laloa kerere,” to reana ena hemami ia biagua lasi bona unai hekwakwanai ia habadaia. Momo do idia gwau: “Oi ese oi sibona oi laloa momo,” eiava, “Oi be lau oi lalokau henia lasi.” Bena adavana ia ura lasi heai ia vara dainai, gau ta ia gwauraia lasi.

⁸ Dala namona be Baibel ena sisiba umui badinaia, ia gwau: “Bema umui badu neganai, kara dika do umui karaia lasi. Bona dina do ia diho lasi neganai, emui badu do umui haorea.” (Efeso 4:26) Edia headava lalonai moale idia davaria tauna ta bona ena hahine, lagani 60 idia headava vadaeni neganai, idia nanadaia edia headava ia namo ena badina be dahaka. Tau ia gwau: “Ai dibaia karana ta be, ai mahuta lasi ela bona emai lalohisihisi ai hamaoromaoroa, herevana idia maragi.”

9. (a) Baibel ena hereva hegeregerena herevahereva ena kahana badana ta be dahaka? (b) Nega momo tau bona ena hahine be dahaka idia karaia be namo, herevana unai idia karaia totona idia manau bona idia gari lasi be namo?

⁹ Tau bona ena hahine idia lalo-tamona lasi neganai, namona be idia ruaosi be ‘idia kamonai haraga, to hereva idia gwauraia haraga lasi, bona idia badu haraga lasi.’ (Iamesi 1:19) Idia kamonai namonamo murinai, reana idia ruaosi do idia itaia sori herevana idia gwauraia be maoro. (Iamesi 5:16) Ta be mai momokani ida inai hereva, “Lau sori emu hemami lau hadikaia,” ia gwauraia totona, ia manau bona ia gari lasi be namo. To unai dala ai lalo-tamona lasi gaudia idia herevalaia karana ese headava taudia do ia durua bada, edia hekwakwanai idia hamaoromaoroa totona sibona lasi, to unai kara dainai edia hemami idia ta ta dekenai ia namo bona idia ta ta edia hebamo do idia moalelaia momokani.

10. Edena sisiba, guna Paulo ese Korinto Keristani taudia dekenai ia henia, be hari Keristani taudia ese idia badinaia diba?

¹⁰ Aposetolo Paulo be Korinto taudia dekenai ia tore henia neganai, ia gwau do idia headava be namo, ‘lebulebu  karadia idia vara garina.’ (1 Korinto 7:2) Hari inai negai tanobada ena dika be idaunegai Korinto ena dika hegeregerena, eiava ena dika ia hanaia. Tanobada taudia ese idia herevalaia matabodaga karadia, edia lebulebu dabuadia, bona magasin, buka, televisen, bona muvini piksa amo idia hahedinaraia lebulebu karadia ibounai ese mahuta hebou urana kererena idia hagoadaia. Aposetolo Paulo be unai bamona gabu dekenai idia noho Korinto taudia dekenai ia gwau: “Namona be idia headava. Namo lasi ura dikadika ese idia ia araia, lahi bamona.”—1 Korinto 7:9.

11, 12. (a) Tau bona ena hahine be ta ta dekenai dahaka idia henia be namo, bona edena dala ai idia henia be namo? (b) Bema nega kwadogi lalonai headava karana idia koua be maoro, edena dala ai unai idia karaia be namo?

¹¹ Unai dainai, Baibel ese idia headava Keristani taudia ia hagania, ia gwau: “Tau ese iena adavana dekenai headava kara do ia henia, hahine ese danu iena adavana dekenai headava kara do ia henia.” (1 Korinto 7:3) Mani umui itaia, ia ese henia karana ia herevalaia—doria karana lasi. Unai lalokau hahedinaraia karana ese moale ia havaraia, bema tau bona hahine ese ta ta ena namo idia tahua. Hegeregere, Baibel ese tatau ia oda henia edia hahine ida idia ‘noho hebou dalana idia laloa namonamo.’ (1 Petero 3:7) Unai be momokani headava kara idia henia bona idia abia neganai. Bema tau ese mai lalokau ida ena hahine ia kara henia lasi, reana hahine ese headava karana ia moalelaia lasi.

¹² Reana nega haida tatau bona edia hahine be headava karana idia koua be namo. Unai bamona negadia haida be reana hahine ena hua gorere negana eiava ia hesiku momokani negana. (Levitiko 18:19 itaia.) Reana tau ese gaukara dekenai hekwakwanai badana ia hanaia toho dainai ena hemami ia namo lasi negana danu. Unai bamona nega kwadogi lalonai headava karana idia koua be hegeregere, bema tau bona hahine ruaosi ese unai idia herevalaia maoromaoro bona bema unai gauna dekenai idia ‘lalo-tamona.’ (1 Korinto 7:5) Unai dala ai idia ese lalohadai kereredia idia koua. To, bema hahine ia ura lasi  momokani ena tau dekenai headava karana ia henia eiava bema tau be lalokau dalanai headava kara ia henia lasi, reana adavana be hedibagani do ia davaria. Unai negana ai, headava lalonai hekwakwanai do idia vara.

13. Keristani taudia be dahaka idia karaia be namo edia lalohadai idia goeva totona?

¹³ Keristani taudia ibounai hegeregerena, Dirava ena hesiai gaukara idia karaia headava taudia ese ura dikadia bona mirodia idia havaraia lebulebu laulaudia bona toretoredia idia dadaraia be namo. (Kolose 3:5) Danu, gau badana be edia lalohadai bona edia kara tatau eiava hahine idauidau dekenai idia biagua. Iesu ia gwau: “Bema tau ta ese hahine ta do ia itaia noho matana dekenai, ela bona iena lalona dekenai do ia ura dikadika, iena kudouna dekenai unai tau be ia heudahanai vadaeni.” (Mataio 5:28) Baibel ena sisiba mahuta hebou karana dekenai idia badinaia neganai, tatau bona edia hahine be hedibagani lalonai do idia moru lasi bona do idia heudahanai lasi. Edia headava lalonai unai lalokau hahedinaraia karana do idia moalelaia diba, bona unai bamona headava lalonai idia laloa mahuta hebou karana be headava ia Havaraia Tauna, Iehova, ese ia henia harihari gauna namona.—Aonega Herevadia 5:15-19.

14. Dahaka lalohisihisi gauna be nega haida ia vara? Dahaka dainai?

¹⁴ Ita moale diba, badina Keristani headava momo lalonai, idia vara hekwakwanai idia hanaia diba. To, nega haida, unai bamona ia vara lasi. Taunimanima be goevadae lasi bona Satani ese ia gunalaia tanobadana dikana lalonai idia noho dainai, haida ese edia headava idia hadokoa gwauraia. (1 Ioane 5:19) Edena dala ai Keristani taudia ese unai hahetoho badana idia laloa diba?

15. (a) Baibel ena hereva hegeregerena ta ese ena headava ia hadokoa bena ma ta ia adavaia diba ena badina maorona tamona be dahaka? (b) Dahaka dainai haida ese edia headava idia hadokoa lasi ena be adavana ia heudahanai?

¹⁵ Inai buka ena Karoa 2 lalonai ita herevalaia hegeregerena,  ta ese ena headava ia hadokoa bena ma ta ia adavaia diba ena badina maorona tamona be heudahanai. c (Mataio 19:9) Bema hamomokania gaudia korikoridia dainai oi diba oiemu adavana ia heudahanai, oi dekenai abia hidi karana aukana ia noho. Headava lalonai do oi noho eiava headava do oi hadokoa? Unai totona taravatu be lasi. Keristani taudia haida ese ena kara dika amo ia helalo-kerehai momokani adavana ena dika idia gwauatao, bona edia headava be ma ia namo. Haida be edia natudia dainai edia lalona idia hadaia headava do idia hadokoa lasi.

16. (a) Edia adavana ia heudahanai neganai, haida ese edia headava idia hadokoa ena badina haida be dahaka? (b) Ia kerere lasi adavana ese ena lalona ia hadaia ena headava ia hadokoa eiava ia hadokoa lasi neganai, dahaka dainai ma haida ese ia abia hidi gauna idia maumauraia be maoro lasi?

¹⁶ To, reana unai kara dika dainai ta ia rogorogo eiava pokese gorerena ta ia abia. Eiava reana ta ese ena natudia ia gimaia be namo ena adavana ese idia ia sihari henia dainai. Ia hedinarai goevagoeva, oiemu lalona oi do hadaia lasi neganai gau momo oi laloa namonamo guna be namo. To, bema oi diba oiemu adavana ia heudahanai bona unai murinai ia ida oi mahuta hebou, unai amo oi hahedinaraia ena dika oi gwauatao bona oi ura lasi emu headava oi hadokoa. Unai murinai emu headava oi hadokoa bona Baibel ena taravatu hegeregerena ma ta oi adavaia ena badina maorona ia noho lasi. Namo lasi ta ese oiemu kara ena badina ia tahua momo bona oi ia doria dala ta oi abia hidi totona, bona sibona emu lalona oi hadaia murinai ta ese oi abia hidi karana ia maumauraia be maoro lasi. Oi ese oi abia hidi gauna dainai idia vara gaudia do oi haheaukalaia. “Ibounai ta ta sibona ena metau, ena metau do idia huaia.”—Galatia 6:5.

17. Bema adavana ia heudahanai lasi, Baibel ese adavana rakatania eiava headava hadokoa karana dekenai dahaka taravatu ia henia?

¹⁷ Ena be ta ena adavana ia heudahanai lasi, badina maorodia haida idia noho adavana rakatania, eiava reana headava hadokoa totona, a? Oibe, to unai nega lalonai, Keristani tauna be headava totona ma ta do ia tahua lasi. (Mataio 5:32) Baibel be adavana rakatania karana ia herevalaia, to ia gwau namona be ena adavana ia rakatania tauna o hahinena ia “headava lasi . . . o do ia giroa lou iena adavana dekenai.” (1 Korinto 7:11) Dahaka gau dikadia dainai toana be adavana rakatania karana be maoro?

18, 19. Dahaka gau dikadia dainai ta ese gavamani ena taravatu hegeregerena ena adavana rakatania eiava headava hadokoa karadia ia lalohadailaia diba, herevana ma ta do ia adavaia diba lasi?

¹⁸ Reana ruma bese ia ogogami momokani, badina tau ia lahedo momokani bona ena kara ia dika momokani. d Reana ia ese ruma bese ena moni be laki gadara, drag, eiava kekero muramura dekenai ia negea kava. Baibel ia gwau: “Bema tau ta ese . . . iena ruma taudia ia ubua lasi neganai, ia ese iena abidadama Keriso dekenai ia negea vadaeni. Iena dika ese abidadama lasi murimuri tauna ena dika ia hanaia vadaeni.” (1 Timoteo 5:8) Bema unai bamona tauna ia ura lasi momokani ena kara ia haidaua, reana ena kara dikadia totona ena hahine ese ia abia moni ia gaukaralaia danu, reana ena hahine do ia laloa ia sibona bona ena natudia edia noho namo totona gavamani ena taravatu hegeregerena ena adavana ia rakatania.

¹⁹ Gavamani ena taravatu hegeregerena unai bamona ia karaia diba danu, bema ena adavana ia dagedage bada, reana ia dadabaia hanaihanai bona ena tauanina ia hadikaia momokani diba eiava reana ia hamasea diba. Danu, bema ta ese dala ta ai Dirava ena taravatu utua  totona ena adavana ia doria hanaihanai, dika ia davaria diba adavana ese do ia rakatania karana ia laloa diba, bona bema lauma dalanai dika ia davaria gwauraia, reana unai ia laloa badabada diba. Reana dika ia davaria diba adavana ia laloa ‘Dirava ia kamonai henia, to taunimanima ia kamonai henia lasi’ dalana tamona be gavamani ena taravatu hegeregerena ena adavana do ia rakatania.—Kara 5:29.

20. (a) Ruma bese ia parara neganai, lo turadia bona elda taudia ese dahaka idia henia diba, to dahaka idia karaia lasi be namo? (b) Headava taudia ese Baibel ena hereva adavana rakatania bona headava hadokoa karadia dekenai be dahaka totona idia gaukaralaia lasi be namo?

²⁰ Adavana dagedage henia dika herea karadia ibounai lalonai, namona be ta ese kerere lasi adavana ia doria lasi ena adavana ia rakatania totona eiava ia ida do ia noho totona. Ena be lo turadia bona elda taudia ese heduru bona Baibel amo sisiba idia henia, to idia be tau bona ena hahine huanai idia vara gaudia ibounai idia diba lasi. Iehova sibona ese unai gaudia ia itaia. To momokani, Keristani hahine ese Dirava ia havaraia headava dalana ia matauraia lasi bema badina manokadia ia gaukaralaia ena headava amo ia siri diba totona. To bema dika bada herea ia davaria diba dainai ena adavana ia rakatania, ta ese ia gwauraia dika be maoro lasi. Ena adavana ia ura rakatania Keristani tauna danu be unai bamona. “Ita ibounai Dirava ena Kota henia gabuna ena vairana dekenai do ita gini.”—Roma 14:10.

21. Edena haheitalai ese ia hahedinaraia Baibel ena sisiba headava totona ese namo ia havaraia?

²¹ Lucia, guna ita herevalaia hahinena, ese ena tau ia rakatania bena hua toi murinai, ia be Iehova ena Witness taudia ia davaria bona idia ida Baibel ia stadilaia matamaia. Ia gwau: “Lau hoa bada, badina Baibel ese egu hekwakwanai hanaia daladia namodia ia hahedinaraia. Pura tamona sibona lau stadi murinai, lau ura egu tau ida maino lau karaia haraga. Hari lau gwau diba Iehova be  headava mauri dikadia hanamoa daladia ia diba, badina ia hadibaia gaudia ese headava taudia ia durua, idia ta ta idia laloa bada dalana idia diba totona. Ena be haida idia gwau Iehova ena Witness taudia ese ruma bese idia hapararadia, to unai be momokani lasi. Lauegu ruma bese be idia ese idia hatamonaia.” Lucia ese ena mauri lalonai Baibel ena hakaua herevadia badinaia dalana ia dibaia.

22. Namona be headava taudia iboudiai ese dahaka idia abia dae momokani?

²² Unai gauna be Lucia dekenai sibona ia vara lasi. Headava be hahenamo ta, namo lasi ia be metau gauna ta ai ia lao. Unai ia vara totona, Iehova ese headava sisibalaia bukana hereadaena—ena Hereva mai anina bada—ia henia. Baibel ena hereva ese “aonega lasi taudia dekenai, aonega idia henia.” (Salamo 19:7-11) Baibel ese idia hadokoa gwauraia headava momo ia hanamoa bona hekwakwanai badadia dainai idia hekwarahi taudia momo edia headava ia hagoadaia. Namona be headava taudia iboudiai ese headava totona Iehova Dirava ese ia henia sisiba idia abia dae momokani. Unai sisiba ese idia do ia durua momokani!