1, 2. Natuna ena mauri lagani be 13 ia lao 19 negana ese dahaka hekwarahi bona moale gaudia ia mailaia?

 RUMA bese lalonai mero o kekeni badana ia noho be lagani 5 eiava lagani 10 natuna ia noho amo ia idau. Natuna ena mauri lagani be 13 ia lao 19 negana be mai ena hekwarahi, to unai lagani ese moale danu idia mailaia diba. Iosepa, Davida, Iosaia, bona Timoteo edia haheitalai ese idia hahedinaraia memero kekeni ese maduna idia huaia diba bona Iehova ida hetura karana namona idia moalelaia diba. (Genese 37:2-11; 1 Samuela 16:11-13; 2 King Taudia 22:3-7; Kara 16:1, 2) Hari inai negai memero kekeni momo ese unai idia hahedinaraia danu. Reana, idia haida oi diba.

² To, memero kekeni haida dekenai mauri lagani 13 ia lao 19 negana be auka herea. Nega haida idia moale dikadika, nega haida idia lalohisihisi bada. Reana memero kekeni idia ura gau idauidau idia sibona idia abia hidi, bona edia tama sina ese idia atoa taravatu idia ura henia lasi. To, unai bamona memero kekeni edia diba be do bada lasi bona edia tama sina ese mai edia lalokau bona hebogahisi ida idia durudia be gau badana. Oibe, unai nega ese namo ia havaraia diba, to idia ese daradara idia havaraia diba danu—tama sina bona memero kekeni dekenai. Unai nega lalonai memero kekeni be edena bamona umui durua diba?

3. Edena dala ai tama sina ese edia memero kekeni dekenai dala hereadaena idia kehoa diba?

³ Baibel ena sisiba idia badinaia tama sina ese edia memero kekeni dekenai dala hereadaena idia kehoa, unai hahetoho idauidau idia hanaia bona maduna idia huaia diba taudia badadia ai idia lao totona. Tano iboudiai bona  nega iboudiai lalonai Baibel ena hakaua herevadia idia badinaia tama sina bona memero kekeni ese namo idia davaria.—Salamo 119:1.

4. Natudia edia mauri laganidia be 13 ia lao 19 negana lalonai, dahaka dainai hereva hebou namonamo karana be mai anina bada?

⁴ Baibel ia gwau: “Hereva hebou namonamo karana be lasi neganai palani idia guguru lasi.” (Aonega Herevadia 15:22, NW) Bema natudia idia maragi neganai umui hereva hebou namonamo be mai anina bada, edia mauri laganidia be 13 ia lao 19 negana lalonai—memero kekeni be nega bada ruma dekenai idia noho lasi, to sikuli turadia eiava ma turadia haida idia bamoa momo negana ai—hereva hebou namonamo be mai anina bada herea. Bema umui hereva hebou namonamo lasi—anina be memero kekeni bona tama sina be mai momokani ida idia herevahereva namonamo lasi—ruma dekenai reana memero kekeni be vadivadi taudia bamona ai idia lao. Unai dainai, dahaka umui karaia diba, herevahereva dalana ia namo noho totona?

5. Memero kekeni be edia tama sina ida idia herevahereva karana be edena bamona idia laloa be namo?

⁵ Namona be memero kekeni bona tama sina ese unai kara lalonai edia maduna idia huaia. Momokani, reana memero kekeni idia davaria tama sina ida idia hereva be auka, idia maragi negana bamona lasi. To, namona be umui laloatao “bema bese ta be mai edia gunalaia tauna lasi neganai, unai bese taudia be do idia moru, to bema sisiba namona taudia be momo neganai, bese taudia edia noho be namo.” (Aonega Herevadia 11:14) Unai hereva be mai anina matamata taudia bona taunimanima badadia dekenai. Unai idia abia dae memero kekeni be idia lalo-parara aonega sisiba idia do abia noho be namo, badina hari idia davaria hekwakwanai idia auka, guna bamona lasi. Namona be idia lalo-parara edia abidadama tama sina be sisiba henia taudia namodia, badina mauri idia diba vadaeni bona lagani momo lalonai idia  hamomokania vadaeni edia natudia idia laloa bada mai edia lalokau ida. Unai dainai, memero kekeni mai edia aonega ese unai lagani aukadia lalonai, edia tama sina amo do idia siri lasi.

6. Tama sina mai edia aonega bona lalokau ese edia memero kekeni ida idia herevahereva karana be edena bamona idia laloa?

⁶ Herevahereva namonamo ia vara dalana be mero o kekeni ia ura ia herevahereva neganai, namona be tama o sina ia hekwarahi bada unai idia karaia totona. Bema oi be tama o sina ta, namona be oi hamomokania oi ese herevahereva dalana oi kehoa. Reana unai be auka. Baibel ia gwau ‘herevahereva lasi be mai ena nega bona herevahereva be mai ena nega.’ (Hadibaia Tauna 3:7) Reana oiemu mero o kekeni ia ura ia herevahereva negana be oiemu herevahereva lasi negana. Reana oi ese unai nega oi atoa, stadi, laga-ani, eiava ruma gaukara oi karaia totona. To, bema oiemu mero o kekeni ia ura oi dekenai ia hereva, namona be oiemu palani oi haidaua toho bona ena hereva oi kamonai. Bema unai bamona oi karaia lasi, reana oi do ia noia lou lasi. Iesu ena haheitalai oi laloatao be namo. Nega ta, ia ese nega ia atoa ia laga-ani totona. To taunimanima momo be ia dekenai idia mai neganai, ena laga-ani ia hadokoa bona idia ia hadibaia matamaia. (Mareko 6:30-34) Memero kekeni momo idia lalo-parara edia tama sina idia bisi bada, to namona be idia abia dae momokani, bema gau ta idia ura tama sina dekenai idia herevalaia, do idia kamonai. Unai dainai do oi noho hegaegae bona edia hemami oi lalo-pararalaia.

7. Tama sina ese dahaka idia karaia lasi be namo?

⁷ Sibona oiemu mero o kekeni negana oi laloatao toho be namo, bona kiri karana oi laloaboio lasi! Namona be tama sina ese edia natudia edia hebamo idia moalelaia. Tama sina dekenai nega ia noho neganai, edena bamona unai nega idia gaukaralaia? Bema nega ibounai edia laga-ani negana be idia sibona idia karaia diba gaudia dekenai idia gaukaralaia, edia memero kekeni be unai do idia itaia haraga. Bema memero kekeni ese idia laloa matamaia  edia sikuli turadia ese idia lalodia bada to tama sina ese idia lalodia bada lasi, hekwakwanai badadia do idia vara.

8. Edena dala ai natudia dekenai koikoi lasi, gaukara goadagoada, bona kara maoro umui hadibaia diba?

⁸ Bema tama sina ese edia natudia idia do hadibaia goada lasi koikoi lasi karana bona gaukara goadagoada karana idia laloa bada totona, namona be natuna ena mauri lagani be 13 ia lao 19 negana lalonai do idia hadibaia. (1 Tesalonika 4:11; 2 Tesalonika 3:10) Danu, namona be idia hamomokania edia natudia ese mai edia kudouna ibounai ida idia abia dae, kara goeva bona kara maoro idia badinaia be gau badana. (Aonega Herevadia 20:11) Unai gaudia momo be tama o sina ese ena kara amo do ia hadibadia. Abidadama lasi taudia be edia adavana ena ‘kara namodia dainai edia lalona idia giroa bona Dirava idia abidadama henia’ matamaia hegeregerena, memero kekeni ese hakaua herevadia maorodia be edia tama sina edia kara amo idia dibaia diba. (1 Petero 3:1) To, haheitalai sibona be hegeregere lasi, badina ruma murimurinai natudia ese haheitalai dikadia momo idia itaia bona lalo-ani herevadia momo idia kamonai. Unai dainai, tama sina namodia be edia memero kekeni idia itaia gaudia bona idia kamonai gaudia idia laloa dalana idia dibaia be gau badana, bona unai ena  anina be idia herevahereva namonamo be namo.—Aonega Herevadia 20:5.

9, 10. Dahaka dainai tama sina ese edia natudia dekenai mahuta hebou karana idia herevalaia be gau badana, bona edena dala ai unai idia karaia diba?

⁹ Unai be momokani mahuta hebou karana dekenai. Tama sina e, emui natudia ida mahuta hebou karana umui herevalaia dainai umui hemarai, a? Ena be umui hemarai, to namona be umui hekwarahi unai gauna umui herevalaia totona, badina emui memero kekeni be dala ta amo unai gaudia do idia dibaia. Bema umui amo idia dibaia lasi, umui diba lasi edena diba kererena do idia abia, ani? Baibel lalonai, Iehova ese mahuta hebou karana bona unai bamona gaudia ia herevalaia, bona namona be tama sina ese idia herevalaia danu.—Aonega Herevadia 4:1-4; 5:1-21.

¹⁰ Ita moale diba, badina Baibel ese mahuta hebou karana ena taravatu ia hahedinaraia goevagoeva, bona Watchtower Society ese heduru herevadia momo ia halasia bona idia hahedinaraia hari inai negai danu Baibel ena sisiba be mai anina bada. Namona be unai heduru umui gaukaralaia, ani? Hegeregere, emui mero o kekeni ida Questions Young People Ask—Answers That Work Volume 1 bona 2 ai karoa maorodia umui herevalaia be namo, ani? Unai ese namo ia havaraia dainai, reana do umui hoa mai emui moale ida.

11. Edena dala hereadaena ai, tama sina ese edia natudia dekenai Iehova hesiai henia dalana idia hadibaia diba?

¹¹ Tama sina bona natudia idia herevalaia gauna badana be dahaka? Aposetolo Paulo ese unai ia hahedinaraia, ia gwau: “Iehova ena matahakani bona lalona biagua karana ai [emui natudia] do umui naridia.” (Efeso 6:4, NW) Natudia ese Iehova dekenai edia diba idia habadaia noho be gau badana. Gau badana be ia do idia lalokau henia, bona namona be idia ura ia idia hesiai henia. Unai dekenai danu, emui kara amo gau momo umui hadibaia diba. Bema memero kekeni idia itaia edia tama sina ese Dirava idia lalokau henia ‘mai edia lalona, laumana, bona  kudouna ibounai ida’ bona unai ese edia mauri lalonai anina namona ia havaraia, reana memero kekeni danu do idia ura unai idia karaia. (Mataio 22:37) Unai hegeregerena, bema memero kekeni idia itaia edia tama sina ese kohu idia laloa maoromaoro bona Dirava ena Basileia idia tahua guna, unai ese idia do ia durua unai lalohadai idia abia totona.—Hadibaia Tauna 7:12; Mataio 6:31-33.

12, 13. Ruma bese stadi ese namo ia havaraia totona dahaka gaudia umui laloatao be namo?

¹² Pura ta ta iboudiai ruma bese ena Baibel stadi umui karaia be heduru dalana badana, lauma gaudia be memero kekeni dekenai umui hadibaia totona. (Salamo 119:33, 34; Aonega Herevadia 4:20-23) Unai bamona stadi umui karaia hanaihanai be gau badana. (Salamo 1:1-3) Namona be tama sina bona edia natudia idia lalo-parara do idia karaia gaudia idia palanilaia neganai, ruma bese stadi idia atoa guna, ma gau iboudiai be gabeai. Danu, lalohadai maorona be gau badana, ruma bese stadi ese anina namona ia havaraia totona. Tamana ta ia gwau: “Gau badana be hakaua tauna ese ruma bese stadi lalonai  laga-ani bona hemataurai mamina ia havaraia—moale mamina to kiri kava lasi mamina unai. Reana nega haida lalohadai maorona umui havaraia be sisina auka, bona natudia edia lalohadai do umui hamaoromaoroa loulou. Bema nega ta o rua stadi ia heau namonamo lasi, umui haheauka bona gabeai umui karaia stadi umui naria noho.” Unai tamana be ia gwau stadi ta ta ia hamatamaia neganai, stadi lalonai idia noho taudia iboudiai ese lalohadai maorona idia abia totona Iehova ena heduru ia noia.—Salamo 119:66.

¹³ Ruma bese stadi karaia be abidadama tama sina edia maduna. Momokani, reana tama sina haida edia diba ia maragi hadibaia karana dekenai, bona ruma bese stadi ena mamina ia hanamoa bona ruma bese taudia idia ura henia daladia idia davaria be auka. To, bema emui memero kekeni umui lalokau henia “mai kara, bona mai momokani danu,” mai emui manau bona momokani ida umui ura idia umui durua, lauma dalanai do idia goada totona. (1 Ioane 3:18) Reana nega haida idia maumau, to do idia diba umui ese edia namo umui tahua.

14. Memero kekeni dekenai lauma gaudia umui herevalaia neganai, edena dala ai Deuteronomi 11:18, 19 umui badinaia diba?

¹⁴ Ruma bese stadi lalonai sibona lasi, to ma nega haida danu lauma dalanai anina bada gaudia umui herevalaia be namo. Umui ese Iehova ena hahegani tama sina  dekenai umui laloatao, a? Ia gwau: “Unai dainai inai lauegu oda hereva do umui laloatao, bona emui kudouna dekenai do umui dogoatao. Inai Taravatu be do umui torea, bona toa bamona, emui imana bona baguna dekenai do umui kwatua kau. Emui natudia dekenai inai Taravatu do umui hadibaia. Lohiabada ena Taravatu do umui herevalaia noho, emui ruma dekenai umui noho neganai, dala dekenai umui raka neganai, umui laga-ani neganai, bona umui gaukara neganai danu.” (Deuteronomi 11:18, 19; mani Deuteronomi 6:6, 7 itaia.) Ita gwau lasi unai ena anina be tama sina be edia natudia idia haroro henia hanaihanai. Lasi. To ruma bese kwarana mai ena lalokau be hanaihanai dala ia tahua, ena ruma bese taudia ese lauma gaudia idia laloa bada karana ia hagoadaia totona.

15, 16. (a) Matahakani ena anina be dahaka? (b) Matahakani henia ena maduna be daika ena, bona matahakani kamonai henia ena maduna be daika ena?

¹⁵ Matahakani be ta ena kara o lalohadai hamaoromaoroa karana, bona ena kahana ta be herevahereva karana. Matahakani ena anina badana be panisia karana lasi to hamaoromaoroa karana—ena be nega haida panisi henia karana be mai anina danu. Emui natudia idia do maragi neganai umui matahakani henidia be gau badana, bona hari memero kekeni badadia ai idia lao neganai, matahakani be gau badana danu, reana hari ia be mai anina bada. Memero kekeni mai edia aonega idia diba unai be momokani.

¹⁶ Baibel ia gwau: “Bema oiemu tamana ena sisiba hereva oi kamonai henia lasi, oi be kavakava, to bema iena matakani kara oi abia dae, oi be aonega.” (Aonega Herevadia 15:5) Unai siri amo gau momo ita dibaia. Ia hahedinaraia matahakani do umui henia be namo. Mero o kekeni ese sisiba ia “abia dae” diba lasi, bema sisiba umui henia lasi. Iehova ese matahakani henia karana ena maduna be tama sina dekenai ia henia, bona unai dekenai  tamana ena maduna be bada. To, unai matahakani kamonai henia karana be mero o kekeni ena maduna. Iena diba do ia habadaia bona kerere momo do ia karaia lasi, bema ena tamana bona ena sinana edia aonega matahakanina ia kamonai henia. (Aonega Herevadia 1:8) Baibel ia gwau: “Hadibaia hereva ia kamonai lasi tauna, be do ia ogogami, bona mai ena hemarai danu, to sisiba hereva ia abia dae noho tauna, be do idia matauraia.”—Aonega Herevadia 13:18.

17. Tama sina ese matahakani idia henia neganai, edena bamona idia laloa maoromaoro be namo?

¹⁷ Tama sina ese memero kekeni idia matahakani henia neganai, namona be idia laloa maoromaoro. Namo lasi idia kara auka momokani bena edia natudia idia habadua, reana edia natudia edia lalo-goada idia hadikaia. (Kolose 3:21) Bona idia ura lasi idia kara manoka momokani, bena edia memero kekeni idia hadibaia namonamo lasi dainai dika do idia davaria. Unai bamona kara manoka be dika. Aonega Herevadia 29:17 ia gwau: “Oiemu natuna tau do oi matakani henia, vadaeni ia ese laga–ani oi dekenai do ia henia. Ia ese oiemu laumana do ia hamoalea.” To, siri 21 ia gwau: “Bema tau ta ese iena hesiai tauna ia mero neganai, iena ura gaudia ibounai ia henia, dokona neganai unai tau ese unai mero dainai, hekwarahi do ia davaria.” Ena be unai siri ese hesiai tauna ia herevalaia, to ia be mai anina ruma bese lalonai idia noho memero kekeni iboudiai dekenai danu.

18. Matahakani henia karana ese dahaka ia hamomokania, bona tama sina ese dala maorona ai matahakani idia henia hanaihanai dainai dahaka dika do idia davaria lasi?

¹⁸ Momokani, matahakani maorona ese tama o sina ena lalokau ena natuna dekenai ia hamomokania. (Heberu 12:6, 11) Bema oi be tama o sina ta, oi diba matahakani be dala maorona ai oi henia hanaihanai be auka. Reana toana be maino ia noho totona ia kwara-auka mero o kekeni ena ura oi koua lasi be namo. To gabeai, unai kara ia badinaia tama o sina ta be do ia davaria ena ruma bese ia biagua diba lasi.—Aonega Herevadia 29:15; Galatia 6:9.

19, 20. Tama sina be edena bamona mai aonega ida edia memero kekeni edia moale karadia idia laloa diba?

¹⁹ Gunaguna natudia ese ruma gaukara eiava uma gaukara dekenai heduru idia henia. Hari inai negai memero kekeni dekenai nega bada ia noho kava. Unai nega idia gaukaralaia totona, bisinesi oreadia ese gau momo herea idia havaraia. Namona be oi laloa danu, hari inai tanobada ese Baibel ena kara maoromaoro taravatudia ia laloa bada lasi, bona oi itaia dika bada do ia vara diba.

²⁰ Unai dainai, ia laloa maoromaoro tama o sina ta ese ena siahu ruma bese ena moale karadia abia hidi totona ia dogoatao noho. To, namona be oi laloaboio lasi, oiemu mero o kekeni ia tubu noho. Lagani ta ta ai, ena ura, taunimanima badana bamona oi kara henia urana, ia bada ia lao. Unai dainai, namona be mero o kekeni ia bada ia lao lalonai moale karadia oi abia hidi neganai ena lalohadai oi abia dae danu—bema ia abia hidi gaudia ese idia hahedinaraia lauma dalanai ia tubu daekau. Nega haida, mero o kekeni ese ia abia hidi miusiki, turadia, bona ma gau haida be reana idia namo lasi. Unai ia vara neganai, namona be ia danu unai oi herevalaia, gabeai gau namodia do ia abia hidi diba totona.

21. Moale karadia totona umui atoa negana ena lata umui laloa maoromaoro karana ese edena dala ai memero kekeni ia durua?

²¹ Moale karadia totona do idia atoa nega ena lata be edena bamona? Tano haida dekenai memero kekeni idia laloa moale karadia idia halataia be maoro. Unai dainai, mero o kekeni ese ena nega ia palanilaia diba, bena “nega namona” ta murinai ma ta ia abia. Tama sina edia maduna be memero kekeni idia hadibaia, gau ma haida totona danu nega idia atoa be gau badana. Unai bamona gaudia haida be ruma bese, sibona edia stadi, lauma dalanai idia lo taudia edia hebamo, Keristani heboudia, bona ruma gaukara haida. Unai amo ‘tanobada ena moale’ gaudia ese Dirava ena Hereva idia koua lasi.—Luka 8:11-15.

22. Emui mero o kekeni ena mauri lalonai, moale karadia sibona lasi to dahaka danu be gau badana?

²² King Solomona be ia gwau: “Unai dainai lau diba  taunimanima edia dala namona tamona be inai: Do idia moale, bona idia edia mauri dina ibounai lalonai, kara namodia do idia karaia. Ita ibounai ese iseda gaukara ena anina do ita moalelaia, do ita aniani bona inuinu. Inai be Dirava ena harihari gauna.” (Hadibaia Tauna 3:12, 13) Oibe, moale be mauri dala maorona ena kahana ta. To gaukara danu be mauri ena kahana ta. Hari inai negai memero kekeni momo ese gaukara amo ia mai moalena idia dibaia lasi eiava hekwakwanai ta lalohadailaia bona hanaia dalana amo ia mai lalo-namo mamina idia dibaia lasi. Haida dekenai dala be lasi, gaukara ta idia dibaia bona gabeai mauri durua gaudia idia abia totona. Unai be tama sina edia maduna badana. Do umui hamomokania emui mero o kekeni be gaukara ta do ia dibaia, a? Bema emui mero o kekeni dekenai gaukara laloa bada bona moalelaia dalana umui hadibaia diba, do ia laloa maoromaoro bona ena mauri ibounai lalonai do ia moale.

23. Tama sina ese edia memero kekeni be edena bamona idia hagoadaia diba?

²³ Emui memero kekeni ese hekwakwanai idia havaraia neganai danu, inai siri ia momokani, ia gwau: “Lalokau be do ia noho hanaihanai doko lasi.” (1 Korinto 13:8) Hanaihanai oi mamia lalokauna do oi hahedinaraia. Sibona oi nanadaia, ‘Natuna ta ta be hekwakwanai hanaia dalana ai ia kwalimu neganai lau hanamoa, a? Dala idia kehoa neganai, egu natudia dekenai egu lalokau lau hahedinaraia, unai dala idia do kehoa noho lalonai, a?’ Ena be nega haida reana umui lalo-parara heheni namonamo lasi, to bema memero kekeni idia mamia oi ese idia oi lalokau henia, idia ese oi do idia lalokau henia danu.

24. Edena Baibel ena hakaua herevana be nega momo ia momokani natuna naridia lalonai, to dahaka umui laloatao be namo?

²⁴ To momokani, natudia be taunimanima badadia ai idia lao neganai, idia ese gau badadia danu do idia abia hidi. Reana nega haida tama sina be idia abia hidi gaudia  dainai idia moale lasi. Bema edia natuna ese ena lalona ia hadaia Iehova Dirava do ia hesiai henia lasi totona be edena bamona? Unai ia vara diba. Iehova ena lauma natudia haida danu ese ena sisiba idia dadaraia bona idia gwau-edeede. (Genese 6:2; Iuda 6) Natudia be kompiuta bamona lasi, iseda ura gaudia sibona do idia karaia lasi. Idia be ura-kwalimu taudia, edia kara ena badina be Iehova vairanai do idia gwauraia. To, nega momo Aonega Herevadia 22:6 ena hereva ia momokani, ia gwau: “Mero dekenai mauri dala maorona do oi hadibaia, vadaeni ia buruka neganai, unai dala do ia rakatania lasi.”

25. Tama sina ese natudia idia abia dainai edena kara be dala hereadaena Iehova dekenai edia lalo-moale idia hahedinaraia totona?

²⁵ Unai dainai, namona be emui natudia dekenai lalokau bada umui hahedinaraia. Umui hekwarahi bada, idia umui naria lalonai Baibel ena hakaua herevadia umui badinaia totona. Dirava ena kara umui tohotohoa amo haheitalai namona umui hahedinaraia. Unai amo emui natudia dekenai dala namona umui kehoa, maduna idia huaia diba bona Dirava gari henia taudia badadia ai do idia lao totona. Unai be dala hereadaena tama sina ese natudia idia abia dainai Iehova dekenai edia lalo-moale idia hahedinaraia totona.