1, 2. (a) Iesu ese Iuda gunalaia taudia edia kamonai lasi karana ia hahedinaraia totona dahaka haheitalai ia gwauraia? (b) Iesu ena haheitalai amo dahaka ita diba memero kekeni dekenai?

 DINA haida Iesu ia do mase lasi neganai, ia be Iuda tomadiho gunalaia taudia haida dekenai, lalohadai havaraia henanadai ta ia henia. Ia gwau: “Dahaka umui laloa? Tau ta be mai ena natuna rua. Vadaeni ia ese iena vara guna natuna dekenai ia lao, ia gwau, ‘Egu natuna e, hari dina mani oi lao, lauegu vain uma gabu dekenai do oi gaukara.’ Iena natuna ia haere, ia gwau, ‘Do lau lao lasi.’ To gabeai iena lalona ia giroa, vadaeni ia lao. Gabeai ia vara tauna danu dekenai ia lao unai bamona ma ia hamaoroa.  Vadaeni mero ia haere, ia gwau, ‘Lohia e, do lau lao.’ To ia lao lasi. Idia ruaosi, daika be edia tamana ena ura ia karaia?” Iuda gunalaia taudia idia gwau: “Guna ia vara natuna.”—Mataio 21:28-31.

² Unai amo Iesu ese Iuda gunalaia taudia edia kamonai lasi karana ia hahedinaraia. Idia be gabeai ia vara mero bamona, idia gwauhamata Dirava ena ura do idia karaia to edia gwauhamata idia hagugurua lasi. To tama sina momo idia diba Iesu ese ena haheitalai be ruma bese maurina ia lalo-pararalaia hegeregerena ia gwauraia. Ia hahedinaraia goevagoeva, nega momo memero kekeni idia laloa gaudia bona do idia karaia gaudia ita diba be auka. Reana ia tubu negana lalonai mero o kekeni ese hekwakwanai momo ia havaraia, to gabeai maduna ia huaia namonamo bona ma haida ese idia matauraia tauna o hahinena ai ia lao. Memero kekeni edia gwau-edeede karana ita herevalaia neganai, unai ita laloatao be namo.

3. Dahaka dainai tama sina be karaharaga edia natuna do idia gwauraia lasi gwau-edeede tauna?

³ Nega haida reana oi ese edia tama sina idia gwau-edeede henia memero kekeni edia sivarai oi kamonai. Reana oi diba namonamo ruma besena ta lalonai, mero o kekeni ta idia biagua be auka herea. To, natuna ta be gwau-edeede tauna korikorina eiava lasi be ita diba haraga lasi. Danu, natudia haida idia gwau-edeede bona ma haida—reana ruma bese tamona lalonai—idia gwau-edeede lasi ena badina ita lalo-pararalaia be auka. Bema tama sina idia laloa edia natuna ta be gwau-edeede tauna korikorina ai ia lao noho, dahaka idia karaia be namo? Unai ita haerelaia totona, gwau-edeede tauna be edena bamona ita kikilaia guna be namo.

4-6. (a) Gwau-edeede tauna ena kara be edena bamona? (b) Tama sina be dahaka idia laloatao be namo, bema edia mero o kekeni be nega ta ta ia kamonai lasi?

⁴ Ita gwau diba, gwau-edeede tauna be mai ena ura ida  siahu taudia ia kamonai henia lasi eiava ia dadaraia bona ia dagedage henia hanaihanai. Momokani, “maragidia ibounai ese kavakava idia karaia noho.” (Aonega Herevadia 22:15) Unai dainai natudia ibounai ese nega haida tama sina eiava ma haida edia siahu idia dadaraia. Memero kekeni be tauanina dalanai bona hemami dalanai idia tubu negana lalonai unai ia vara momo. Taunimanima iboudiai edia mauri lalonai gau haida idia senisi neganai, do idia lalo-hekwarahi, bona memero kekeni idia tubu negana lalonai gau momo idia senisi. Oiemu mero o kekeni be maragi negana ia rakatania bona tau o hahine badana ai ia lao matamaia. Unai dainai, unai lagani lalodiai, tama sina haida bona edia natudia idia noho hebou namonamo be auka. Nega momo tama sina idia ura natudia be metairametaira do idia bada, bona memero kekeni idia ura idia bada haraga.

⁵ Gwau-edeede mero o kekeni ese tama sina edia taravatu ia dadaraia momokani. To, namona be oi laloatao, nega ta ta ia kamonai lasi karana ese ia hamomokania lasi ia be gwau-edeede merona o kekenina. Bona lauma gaudia bema ita laloa, ita itaia ena be natudia haida ese Baibel ena hereva momokani idia ura henia sisina sibona eiava idia ura henia lasi, to reana idia be gwau-edeede taudia lasi. Oi tama o sina, namo lasi karaharaga emu natuna oi gwauraia gwau-edeede tauna.

⁶ Memero kekeni iboudiai idia tubu lagani lalodiai, tama sina edia siahu idia dadaraia goadagoada, a? Lasi. Hamomokania gaudia dainai ita laloa diba memero kekeni haida sibona be unai lagani lalodiai gwau-edeede karana idia hahedinaraia goadagoada. To, bema natuna be mai ena lalona ibounai ida ia gwau-edeede hanaihanai be edena bamona? Dahaka ese unai bamona gwau-edeede karana ia havaraia?

7. Satani ese ia havaraia siahuna be edena dala ai natuna ia veria diba ia gwau-edeede totona?

⁷ Gwau-edeede karana ena badina badana ta be Satani  ese tanobada dekenai ia havaraia siahuna. “Satani ese tanobada taudia ibounai ia gunalaia noho.” (1 Ioane 5:19) Satani ese ia biagua tanobadana lalonai dika idia havaraia karadia be momo bona Keristani taudia be unai kara idauidau dainai idia hekwarahi. (Ioane 17:15) Hari inai negai unai kara idia dika momokani, dika bada idia havaraia diba, bona edia siahu be bada herea, guna bamona lasi. (2 Timoteo 3:1-5, 13) Bema tama sina ese edia natudia idia hadibaia lasi, idia sisiba henidia lasi, bona idia hakaudia lasi, ‘Dirava idia kamonai henia lasi taudia edia lalona dekenai harihari ia gaukara noho lauma dikana’ ese memero kekeni do ia hamorua diba. (Efeso 2:2) Turadia edia lalo-ani karana be unai bamona karana ta. Baibel ia gwau: “Kavakava taudia danu oi turana karaia neganai, dika do oi davaria.” (Aonega Herevadia 13:20) Unai hegeregerena, inai tanobada ena lalohadai amo idia honu taudia ia bamoa tauna be unai lauma ese ia veria haraga. Bema oi ura emu natuna maragidia idia lalo-parara Dirava ena hakaua herevadia kamonai henia karana be mauri dala hereadaena ena badina, namona be idia oi durua hanaihanai.—Isaia 48:17, 18.

8. Reana dahaka gaudia dainai natuna ia gwau-edeede?

⁸ Gwau-edeede karana ia havaraia gauna iharuana be reana ruma bese maurina. Hegeregere, bema tama o sina be kekero muramura ia manadalaia, drag ia ania kava, eiava ena adavana ia dagedage henia, reana mero o kekeni ena lalohadai mauri dekenai be do ia maoro lasi. Maino ai idia noho ruma bese lalodiai danu, natuna ia gwau-edeede diba, bema ia mamia ena tama sina ese ia idia laloa bada lasi. To, memero kekeni edia gwau-edeede karana be murimuri gaudia dainai ia vara sibona lasi. Natudia haida ese tama sina edia taravatu idia dadaraia, herevana tama sina ese Dirava ena hakaua herevadia idia badinaia bona tanobada ena dika amo edia natudia idia gimaia. Dahaka dainai? Reana iseda hekwakwanai edia badina badana ma ta dainai—taunimanima lalonai kara dika ia noho. Paulo ia gwau: “Tau tamona  [Adamu] dekena amo kara dika ia vareai mai tanobada dekenai, bona iena kara dika ese mase ia mailaia. Unai dainai mase be taunimanima ibounai ese idia abia, badina ibounai be mai edia kara dika.” (Roma 5:12) Adamu be sibona ena namo ia tahua gwau-edeede tauna, bona ia ese ena natudia ibounai dekenai ahuna dikana ia henia. Memero kekeni haida be gwau-edeede karana idia abia hidi, edia tamana ginigunana ia karaia hegeregerena.

9. Natuna naria lalonai, edena bamona karadia dainai reana do ia gwau-edeede?

⁹ Memero kekeni haida idia gwau-edeede, badina edia tama sina ese natudia hadibaia karana idia laloa maoromaoro lasi. (Kolose 3:21) Edia lalona ena mamina idia badinaia goadagoada tama sina haida ese natudia idia koua bona idia matahakani henia auka. Ma haida idia kara manoka, edia diba bada lasi memero kekeni dekenai hakaua bona gimaia herevadia idia henia lasi. Nega haida unai kara idaudia rua oi laloa maoromaoro be auka. Bona natudia be idauidau dainai edia manoka gaudia be idauidau. Reana ta ena kara oi naria namonamo be namo to ma ta be idau. To, Baibel ena haheitalai rua ese oi idia durua, bena do oi itaia kara auka momokani bona kara manoka momokani ese dika do idia havaraia.

10. Toana be Eli ese ena hahelaga gaukarana ia karaia mai kamonai ida, to dahaka dainai ia be tamana namona lasi?

¹⁰ Idaunegai Israela ena hahelaga tauna badana Eli be tamana ta. Ia be lagani 40 lalonai ena gaukara ia karaia, bona Dirava ena Taravatu ia diba namonamo. Toana be Eli ese ena hahelaga gaukarana ia karaia mai ena kamonai ida bona reana ena natuna memero, Hopini bona Pineha, dekenai Dirava ena Taravatu ia hadibaia namonamo. To, Eli be ena memero amo gau ta ia koua lasi. Hopini bona Pineha ese hahelaga gaukara haida idia karaia, to idia be “lebulebu taudia,” aniani bona matabodaga karadia sibona idia laloa bada. To, helaga gabuna ai dika idia karaia neganai, Eli ia gari bona edia gaukara amo  idia ia kokia lasi. Idia ia sisiba henia sibona. Ena kara manoka amo, Eli ese idia ia matauraia bada to Dirava ia matauraia lasi. Unai dainai, ena memero ese Iehova ena tomadiho goevana idia hadikaia bona Eli ena ruma bese ibounai ese dika ia davaria.—1 Samuela 2:12-17, 22-25, 29; 3:13, 14; 4:11-22.

11. Tama sina ese Eli ena haheitalai dikana amo dahaka idia diba?

¹¹ Unai gaudia idia vara neganai, Eli ena natudia be tatau badadia vadaeni, to unai sivarai ese ia hahedinaraia matahakani henia lasi karana ese dika ia havaraia. (Aonega Herevadia 29:21 itaia.) Tama sina haida idia laloa kara manoka be lalokau karana, bona idia ese taravatu goevagoeva bona maoromaoro idia atoa lasi, natudia ese idia badinaia totona. Ena be natudia ese Dirava ena hakaua herevadia idia utua, to idia ese matahakani be mai lalokau ida idia henia lasi. Unai bamona kara manoka dainai, reana edia natudia ese tama sina eiava ma haida edia siahu do idia matauraia lasi.—Hadibaia Tauna 8:11 itaia.

12. Rehoboama ese ena siahu ia gaukaralaia lalonai, dahaka kerere ia karaia?

¹² Rehoboama ese siahu gaukaralaia auka momokani dalana ia hahedinaraia. Ia be Israela basileiana ibounai ena king ginigabena, to ia be king namona lasi. Rehoboama ia abia tanona ena taunimanima idia moale lasi, badina ena tamana, Solomona, ese idia dekenai metau bada ia atoa. Rehoboama ese lalo-parara karana ia hahedinaraia, a? Lasi. Taunimanima haida idia mai bona taravatu metaudia kokia totona ia idia noia neganai, lo taudia edia sisiba ia kamonai henia lasi bona hahegani ia henia taunimanima edia metau do idia habadaia. Ena hekokoroku karana dainai, not kahana ena iduhu ten idia gwau-edeede, bona basileia be ia parara kahana rua.—1 King Taudia 12:1-21; 2 Sivarai 10:19.

13. Tama sina ese Rehoboama ena kerere idia karaia lasi totona, dahaka idia karaia be namo?

¹³ Rehoboama ena sivarai Baibel lalonai ese tama sina dekenai gau badadia haida ia hadibaia diba. Namona be  guriguri amo ‘Iehova dekenai idia lao’ bona edia natudia hadibaia daladia idia laloa namonamo, idia be Baibel ena hakaua herevadia hegeregerena eiava lasi. (Salamo 105:4) Hadibaia Tauna 7:7 (NW) ia gwau: “Kara auka dainai aonega tauna be kavakava kara ia karaia diba, bona harihari gauna ese kudouna ia hadikaia diba.” Tama sina ese idia laloa namonamo hetoadia idia atoa neganai, dika amo memero kekeni idia gimaia bona idia tubu namonamo diba. To, namo lasi natudia edia mauri oi biagua auka momokani, bena sibona idia naria diba karana maorona bona edia lalo-goada do idia habadaia lasi. Bema tama sina ese ura-kwalimu namona idia henia bona idia hedinarai goevagoeva hetoadia idia atoa, memero kekeni momo be do idia gwau-edeede lasi.

14, 15. Tama sina ese edia natuna ena tubu dalana be edena bamona idia laloa be namo?

¹⁴ Ena be tama sina idia moale edia natuna be beibi amo ia tubu ela bona tau o hahine badana ai ia lao, to tama sina dekenai ia tabekau karana ia rakatania matamaia  bona sibona ia naria diba karana maorona ia hahedinaraia neganai, reana idia lalo-hekwarahi. Emu mero o kekeni ia tubu negana lalonai, bema nega haida ia lalo-auka eiava oi ida ia gaukara hebou namonamo lasi, oi hoa lasi. Namona be oi laloatao, Keristani tama sina idia ura edia natuna be ia gini goada bona maduna ia huaia diba Keristani lo tauna o hahinena ai do ia lao.—Mani 1 Korinto 13:11; Efeso 4:13, 14 itaia.

¹⁵ Ena be reana tama sina dekenai ia auka, to edia mero o kekeni be sibona ena mauri gaudia ia ura ia abia hidi neganai, unai idia koua hanaihanai lasi be namo. Natuna ese dala namona ai sibona ena mauri biagua karana ia dibaia be namo. Momokani, idia do matamata neganai, memero kekeni haida ese taunimanima badadia edia lalohadai idia abia vadaeni. Hegeregere, Baibel ese King matamata Iosaia ia herevalaia, ia gwau: “Ia be do  mero [ena mauri lagani be 15 bamona] neganai, ia ese iena sene tauna king Davida ena Dirava ia tahua hamatamaia.” Ia hedinarai goevagoeva unai mero namona be maduna ia huaia diba tauna ta.—2 Sivarai 34:1-3.

16. Natudia edia maduna ia bada ia lao neganai, dahaka idia mamia be namo?

¹⁶ To, ta ese ura-kwalimu ia abia neganai, maduna ia huaia danu. Unai dainai, ia bada ia lao natuna ta ese ia abia hidi dalana bona ena kara haida edia davana ia mamia danu be namo. Inai hakaua herevana, “bema tau ta aniani uhena ia hadoa, vadaeni unai bamona aniani sibona be do ia abia,” be mai anina bada memero kekeni dekenai bona taunimanima badadia dekenai. (Galatia 6:7) Natudia be do oi gimaia diba lasi ela bona hanaihanai. To, bema oiemu natuna ia ura kara dikana ta ia karaia be edena bamona? Oi be maduna ia huaia tama o sina dainai, gau badana be do oi gwau, “Lasi.” Bona, ena be emu hereva ena badina oi hahedinaraia diba, to oiemu hereva do oi haidaua lasi. (Mataio 5:37 itaia.) To, namona be unai hereva “Lasi” be mai emu lalo-manau bona laloa maoromaoro ida oi gwauraia, badina “mai manau danu ia haere tauna, ese badu ia koua noho.”—Aonega Herevadia 15:1.

17. Tama sina ese memero kekeni dekenai dahaka heduru gaudia idia henia be namo?

¹⁷ Oi atoa taravatu hegeregerena matahakani oi henia karana ese memero kekeni do ia gimaia bona idia dekenai unai be gau badana, herevana idia ese edia kara idia koua taravatudia idia ura henia lasi. Bema tama o sina ese sibona ena hemami hegeregerena taravatu ia haidaua hanaihanai, unai ese badu ia havaraia. Danu, bema memero kekeni ese edia manoka gaudia hegeregerena heduru idia abia, idia lalo-goada totona eiava hemarai karana idia hanaia totona, idia be gini goada taudia ai do idia lao. Bona memero kekeni do idia moale, bema kara namo idia badinaia dainai tama sina ese idia abidadama henidia.—Mani Isaia 35:3, 4; Luka 16:10; 19:17 itaia.

18. Tama sina idia hagoadaia diba hereva momokanidia memero kekeni edia mauri dalana dekenai be dahaka?

 ¹⁸ Tama sina ia hagoadaia diba lalohadaina be inai, bema ruma bese be maino, noho namo, bona lalokau ai ia noho, natudia do idia tubu namonamo. (Efeso 4:31, 32; Iamesi 3:17, 18) Oibe, kekero muramura manadalaia, dagedage, eiava dika havaraia gaudia ma haida idia noho ruma besedia lalonai danu, memero kekeni momo be taunimanima namodia ai idia lao. Unai dainai, bema oi ese oi havaraia ruma bese lalonai oiemu memero kekeni idia noho namo bona bema idia diba oi ese idia oi lalokau henia, oi ura henia, bona oi laloa bada—ena be unai heduru oi henia lalonai Baibel ena hakaua herevadia hegeregerena taravatu bona matahakani oi henia danu—idia be taunimanima namodia ai do idia lao bona idia dainai do oi moale diba.—Aonega Herevadia 27:11 itaia.

19. Ena be tama sina ese mero dekenai dala maorona idia hadibaia be gau badana, to natuna ena maduna be dahaka?

¹⁹ Tama sina edia naria karana namona ese natudia ia durua bada. Aonega Herevadia 22:6 ia gwau: “Mero dekenai mauri dala maorona do oi hadibaia, vadaeni ia buruka neganai, unai dala do ia rakatania lasi.” To, ena be tama sina ese natudia idia naria namonamo, bema natudia ese kerere idia karaia be edena bamona? Unai ia vara diba, a? Oibe. Unai aonega herevana ita lalo-pararalaia totona siri ma haida ita laloa danu, idia hahedinaraia natuna ena maduna be tama sina ia “kamonai henia” bona edia hereva ia badinaia. (Aonega Herevadia 1:8) Ruma bese lalonai maino ia noho totona tama sina bona natudia ese Baibel ena hakaua herevadia idia badinaia hebou be gau badana. Bema tama sina bona natudia idia gaukara hebou namonamo lasi, hekwakwanai do idia davaria.

20. Natudia idia laloa namonamo lasi dainai idia kerere neganai, tama sina ese edena aonega dalana idia badinaia be namo?

²⁰ Mero o kekeni ia kerere bona hekwakwanai ia davaria  neganai, tama sina be dahaka idia karaia be namo? Unai neganai, unai mero o kekeni ese heduru ia abia be gau badana. Bema tama sina idia laloatao edia mero o kekeni ena diba be bada lasi, badu bada do idia koua diba. Paulo ese kongregesen lalonai idia noho lo taudia ia sisiba henia, ia gwau: “Bema Keristani tauna ta ia kerere neganai, umui Lauma Helaga umui kamonai henia taudia ese unai tau do umui hakaua lou, mai manau danu.” (Galatia 6:1) Tama sina ese unai dala idia badinaia diba bema mero o kekeni ia laloa namonamo lasi dainai ia kerere. Namona be tama sina ese idia hahedinaraia goevagoeva dahaka dainai ena kara be kerere bona dahaka do ia karaia be namo unai kerere ia karaia lou lasi totona, to danu, namona be idia hahedinaraia goevagoeva unai mero o kekeni lasi, to ena kara idia gwauraia dika.—Iuda 22, 23 itaia.

21. Bema natudia ese kerere badana idia karaia, tama sina ese Keristani kongregesen ena kara hegeregerena dahaka do idia karaia?

²¹ Bema unai mero o kekeni ese kerere bada hereana ia karaia be edena bamona? Unai neganai, tama sina ese natuna do idia durua bada bona mai edia aonega ida idia hakaua be namo. Kongregesen tauna ta ese kerere badana ia karaia neganai, idia hagoadaia do ia helalo-kerehai bona heduru abia totona elda taudia ia itaia. (Iamesi 5:14-16) Ia helalo-kerehai neganai, elda taudia be ia ida idia gaukara hebou lauma dalanai do ia goada lou totona. Ruma bese lalonai ia kerere mero o kekeni durua karana be tama sina edia maduna, ena be reana elda taudia ida unai gauna idia herevalaia be namo. Namo lasi elda oreana amo edia natuna ta ese ia karaia kerere badana idia hunia.

22. Bema natuna ta ese kerere badana ia karaia, tama sina ese Iehova ena kara idia tohotohoa dainai edena bamona do idia kara?

²² Tama sina dekenai ia auka bema idia edia natudia ese hekwakwanai badana idia havaraia. Idia lalo-hisihisi bada dainai, reana tama sina idia ura ia kerere natuna idia gwau henia mai edia badu ida; to reana unai kara ese natuna do ia habadua sibona. Namona be oi laloatao,  unai nega aukana lalonai unai mero o kekeni oi kara henia dalana be reana mai anina bada ena vaira negana dekenai. Danu, namona be umui laloatao, Iehova ena taunimanima be kara namo amo idia siri neganai, ia ura edia kara dika ia gwauatao—bema idia helalo-kerehai. Mani ena lalokau herevadia oi kamonai: “Lohiabada ma ia hereva, ia gwau, ‘Harihari umui mai, ita hereva hebou. Momokani, umui emui dika be bada, rara ia kakakaka momokani bamona, to lau ese umui do lau huria, vadaeni do umui goeva, sinou ia kurokuro bamona. Momokani emui miro be kakakaka herea, to lau huria neganai ia be kurokuro, mamoe ena huina hegeregerena.’ ” (Isaia 1:18) Unai be haheitalai namona tama sina dekenai!

23. Edia natuna ta ese kerere badana ia karaia neganai, tama sina ese dahaka idia karaia be namo, bona dahaka idia karaia lasi be namo?

²³ Unai dainai, namona be ia kerere natuna oi hagoadaia toho, ena dala ia haidaua totona. Diba bada tama sina ma haida bona kongregesen elda taudia amo heduru namona oi tahua. (Aonega Herevadia 11:14) Namona be oiemu hemami oi biagua, bena emu hereva eiava kara ta amo natuna ia giroa lou dalana do oi koua lasi. Oiemu badu bona lalohisihisi oi koua. (Kolose 3:8) Oi haheauka noho, hesiku haraga lasi. (1 Korinto 13:4, 7) Ena be kara dika oi inai henia, to emu natuna oi kara auka henia lasi bona oi badu henia lasi. Gau badana be, tama sina ese haheitalai namona idia hahedinaraia bona Iehova idia abidadama henia goada.

24. Nega haida edena gau dikana ia vara Keristani ruma bese lalonai, bona tama sina be dahaka idia karaia be namo?

²⁴ Nega haida ia hedinarai goevagoeva mero o kekeni be mai ena lalona ibounai ida ia gwau-edeede bona Keristani mauri dalana ia rakatania. Unai neganai namona be idia do noho ruma bese taudia oi hagoadaia. Oi naria namonamo oiemu goada ibounai be unai gwau-edeede  natuna dekenai oi haorea bona natudia ma haida oi laloaboio garina. Ruma bese taudia ma haida amo unai hekwakwanai oi hunia toho lasi, to namona be idia ida dala maorona ai oi herevalaia.—Aonega Herevadia 20:18 itaia.

25. (a) Bema natuna ta be mai ena lalona ibounai ida ia gwau-edeede, Keristani kongregesen ena kara hegeregerena tama sina ese dahaka idia karaia be namo? (b) Natuna ta ia gwau-edeede neganai, tama sina be dahaka idia laloatao be namo?

²⁵ Aposetolo Ioane ese kongregesen ai ia helalo-kerehai lasi gwau-edeede tauna ia herevalaia, ia gwau: “Emui ruma dekenai do umui abia dae lasi.” (2 Ioane 10) Reana tama sina idia laloa edia natuna dekenai unai bamona idia karaia danu be gau badana, bema ia bada vadaeni bona ia gwau-edeede momokani. Unai bamona kara ese lalo-hisihisi bada ia havaraia, to reana idia karaia be namo, ruma bese taudia oredia idia gimaia totona. Oiemu ruma bese oi gimaia bona oi hakaua noho be gau badana. Unai dainai, namona be oi laloa maoromaoro bona idia hedinarai goevagoeva taravatudia oi atoa noho. Natudia ma haida ida oi herevahereva hebou. Edia gaukara sikuli dekenai bona kongregesen dekenai oi laloa bada. Danu, namona be idia diba, ena be oi ese ia gwau-edeede natuna ena kara oi abia dae lasi, oi ese unai natuna oi inai henia lasi. Unai natuna lasi to ena kara oi gwauraia dika. Iakobo ena natuna memero rua ese edia kara dikana amo ruma bese lalonai kerere idia mailaia neganai, Iakobo ese unai memero lasi, to edia badu dikana ia gwauraia dika.—Genese 34:1-31; 49:5-7.

26. Bema natuna ta ia gwau-edeede, dahaka ese tama sina namodia edia lalona ia hagoadaia diba?

²⁶ Reana oi laloa oiemu kara dainai ruma bese lalonai kerere ia vara. To bema oi karaia diba gaudia ibounai oi karaia mai guriguri ida, bona oi karaia diba hegeregerena Iehova ena sisiba oi kamonai henia, ia vara gauna be oiemu kerere oi gwauraia be mai badina lasi. Namona be oi laloatao ta be tama o sina goevadaena lasi, to oiemu diba hegeregerena tama o sina namona ena kara oi karaia toho. (Kara 20:26 itaia.) Ruma bese tauna ta ia gwau-edeede  momokani ese lalo-hisihisi ia havaraia, to bema unai be oi dekenai ia vara, namona be oi laloatao Dirava ese emu mauri ia lalo-pararalaia bona ia ese ena kamonai hesiai taudia do ia rakatania lasi. (Salamo 27:10) Unai dainai namona be oiemu lalona oi hadaia natudia oredia ese oiemu ruma lalonai lauma dalanai noho namo do idia davaria diba.

27. Ia boio merona ena parabole idia laloatao neganai, gwau-edeede natuna ena tama sina be dahaka idia laloa diba?

²⁷ Danu, oi lalo-goada noho be namo. Guna oi hadibaia namonamo karana ese gabeai ia boio natuna ena kudouna ia hamarerea diba, bena do ia lalo-parara bona ia aonega. (Hadibaia Tauna 11:6) Keristani ruma bese momo lalonai unai bamona ia vara, bona idia haida ese idia itaia edia gwau-edeede natudia idia giroa mai, Iesu ena haheitalai lalonai tamana ese ia boio merona ia itaia bamona. (Luka 15:11-32) Unai be oi dekenai do ia vara diba danu.