Lagani 3500 bamona gunanai, Israela taudia be kahirakahira gwauhamata tanona idia vareai gwauraia neganai, Dirava ia gwau Aigupito ai idia vara “gorere dikadia” amo idia do ia gimaia. (Deuteronomi 7:15) Unai ia karaia dalana ta be idia dekenai gorere hamaragia bona helt naria daladia ena hakaua herevadia ia henia. Hegeregere:

•   Israela besedia ese do idia badinaia taravatu ta be do idia digu bona dabua idia huria be namo.​—Levitiko 15:4-27.

•   Taunimanima idia kukuri neganai, Dirava ia gwau: “Kamepa murimuri ai gabu ta umui abia hidi, bona unuseni do umui lao umui kukuri totona. Speidi ta umui abia lao be namo. Murimuri ai umui kukuri neganai, unai speidi amo guri umui geia bona emui kukuri umui koua.”​—Deuteronomi 23:12, 13.

•   Daihanai gorere idia abia taudia be palai ruma murimuri ai do idia noho—nega sisina lalonai ma haida amo do idia noho daudau. Daihanai gorere amo idia namo taudia be kamepa lalonai idia do vareai lasi neganai, edia dabua do idia huria bona ranu lalonai do idia digu idia “goeva” totona.​—Levitiko 14:8, 9.

•  Mase tauanina ia dogoatao tauna be palai ruma murimuri ai do ia noho.​—Levitiko 5:2, 3; Numera 19:16.

 Idaunegai Israela ena taravatu ese medikol lalohadaina bona goeva karana ia hahedinaraia.

 Gabu haida dekenai, taunimanima ese helt ena taravatu badinaia karana idia laloa bada lasi. Hegeregere:

•   Momoru gaudia be dala dekenai idia negedia. Ranu be ia miro, aniani idia dika, bona gau ma haida dekenai helt ena taravatu idia badinaia lasi dainai, gorere ia bada bona beibi momo idia mase.

•   Idaunegai medikol doketa taudia ese vairas bona gorere idia havaraia gaudia idia diba namonamo lasi. Aigupito taudia be gorere hanamoa totona, vaboha ena rara, peliken ena kukuri, idia mase bita, mei, bona idia dika vadaeni beredi idia gaukaralaia. Taunimanima bona animal edia kukuri be medikol totona idia gaukaralaia danu.

•   Idaunegai Aigupito taudia idia gorere badina Naila Sinavai ranu bona uma gabu dairia totona idia geia guri ena ranu be ia miro. Danu, Aigupito ai beibi momo be aniani dikadia dainai idia kukuri ranu bona unai bamona gorere ma haida idia abia.

 To Israela taudia be unai besedia amo idia idau, badina Dirava ena Taravatu idia badinaia bona edia helt idia naria dainai idia namo.