Toana be gabu ibounai dekenai kota maoromaoro be lasi. Kota maoromaoro lasi karana dainai dibura ruma ai idia atoa taudia rua edia ekspiriens mani oi laloa:

•  January 2018 ai, United States ena diadi ese oda ia henia kahirakahira lagani 38 dibura ruma ai ia noho tauna idia ruhaia totona. DNA test ese ia hamomokania ia be kerere ta ia karaia lasi.

•  September 1994 ema bona September 2020, Africa tano ai tatau matamata toi idia hadiburaia, badina idia ura lasi tuari lalonai idia vareai. Idia be lagani 26 dibura ruma ai idia noho, ena be keis ta be lasi idia kota henia totona.

 Bema kota maoromaoro lasi karana ese oi ia hahisia, reana emu hemami be Baibel ese ia gwauraia tauna Iobu ena bamona, ia gwau: “Lau be kota maoromaoro totona lau taitai, to heduru be lasi.” (Iobu 19:7) Ena be oi laloa kota maoromaoro karana be nihi ta sibona, to Baibel ia gwauhamata nega ta do ia mai kota maoromaoro do ia vara. Danu, Baibel ena aonega ese oi ia durua diba kota maoromaoro lasi karana oi haheaukalaia totona.

 Taunimanima be Dirava ena hakaua dalana idia dadaraia dainai kota maoromaoro lasi karana ia vara. Baibel ese ia hahedinaraia hahemaoro maoromaoro karana be Dirava amo ia mai. (Isaia 51:4) Baibel lalonai inai hereva “kota maoromaoro” bona “kara maoromaoro” be idia hegeregere. (Salamo 33:5) Bema Dirava ena taravatu hegeregerena maoro karadia o kara maoromaoro ita karaia, unai ese kota maoromaoro ia havaraia. To, kota maoromaoro lasi karana be kara dika amo ia mai, Dirava ena taravatu utua karana amo ia vara. Inai haheitalai mani oi laloa:

•   Ta be Sibona ena namo ia laloa karana. Sibona ena namo laloa karana be kara dika ida ia hegeregere. (Iamesi 1:14, 15) Haida be idia ura henia gauna abia totona, ma haida dekenai kota maorona idia karaia lasi. To, Dirava ia ura haida edia namo ita atoa guna.​—1 Korinto 10:24.

•   Idia laloa lasi dahaka idia karaia. Ma haida be haida dekenai kota maorona idia karaia lasi to unai idia lalopararalaia lasi, Dirava vairanai unai danu be kara dikana. (Roma 10:3) Oibe, unai bamona kara dainai taunimanima be kota maoromaoro idia karaia lasi, bona Iesu Keriso idia hamasea.​—Kara 3:15, 17.

•   Taunimanima be hegeregere lasi. Politikol, bisinesi, bona tomadiho oreadia idia laloa, taunimanima be maka tamona dekenai idia kara henia bona kota maoromaoro idia karaia noho. To momokani, idia ese kerere momo, korapsen, inai heheni karana, mataganigani, moni ena hekwakwanai, bona ma haida laloa bada lasi karana idia havaraia, unai ibounai dainai kota maoromaoro lasi karana ia vara noho. Unai bamona orea idia durua taudia haida idia ura dala maorona idia badinaia. To, momo be Dirava ena hakaua daladia idia dadaraia dainai edia hekwarahi ibounai ese anina namona ta do ia havaraia lasi.​—Hadibaia Tauna 8:9; Ieremia 10:23.

 Dirava ese kota maoromaoro lasi karana idia havaraia karadia bona lalohadai ia inai henia. (Aonega Herevadia 6:16-18) Peroveta tauna Isaia ia hadibaia inai hereva ia torea totona, ia gwau: “Lau, Iehova, a be kota maoromaoro lau ura henia, henaohenao bona koikoi karadia lau inai henia.”​—Isaia 61:8.

 Dirava be idaunegai Israela taudia dekenai ia henia Taravatu ese ia hahedinaraia, ia ura taunimanima ese kota maoromaoro idia karaia. Edia diadi taudia ia oda henia laloani moni eiava kota maoromaoro ia hadikaia karadia do idia dadaraia. (Deuteronomi 16:18-20) Israela taudia ese ogogami bona ladana maragi taudia edia kohu idia abia kava karana ia gwauraia dika, bona ena taravatu idia badinaia lasi dainai idia ia dadaraia.​—Isaia 10:1-3.

 Oibe. Dirava ese Iesu Keriso amo, kara dika, bona kota maoromaoro ia havaraia lasi karadia do ia haorea, bona tanobada besedia be goevadae taudia ai do ia halaoa. (Ioane 1:29; Roma 6:23) Danu, ia ese Basileia ta ia haginia vadaeni kara maoromaoro tanobada matamatana ai kota maoromaoro do ia havaraia totona. (Isaia 32:1; 2 Petero 3:13) Guba Basileia oi diba totona, inai vidio itaia, Dirava Ena Basileia be Dahaka?

 Tanobada ibounai ai kota maoromaoro ia vara neganai, maino bona noho namo be ibounai dekenai do ia vara. (Isaia 32:16-18) Dirava ese taunimanima ibounai edia mauri ia laloa bada dainai, ibounai be maka tamona ai do ia kara henidia. Kota maoromaoro lasi karana dainai idia vara lalohisihisi, taitai bona hisihisi be do idia ore vaitani, bona kota maoromaoro lasi karana ese ia havaraia memori dikadia be do idia ore. (Isaia 65:17; Apokalupo 21:3, 4) Diba ma haida totona, inai atikol itaia, “Dirava Ena Basileia ese Dahaka Do Ia Hagugurua?”

 Oibe. Peroveta herevadia idauidau, histori bona saiens ese idia davaria gaudia be Baibel ena hereva idia hamomokania, bona unai ese ia hahedinaraia Baibel ena gwauhamata herevadia oi abidadama henia diba. Inai atikol haida ese unai ia herevalaia danu:

•   How Can We Be Sure the Bible Is True? (vidio)

•   “Idaunegai Peroveta Herevadia Idia Guguru”

•   “Prophecy—A Perfect Record”

•   “Reasons to Trust the Bible”

 Baibel negadiai, taunimanima namodia ese kota maoromaoro lasi karadia idia dadaraia. Hegeregere, aposetolo Paulo idia kota henia kava bona kahirakahira idia hamasea. Unai kota maoromaoro lasi karana ia dadaraia totona, ia ese taravatu hegeregerena Kaisara dekenai apil ia karaia.​—Kara 25:8-12.

 Ena be hari, kota maoromaoro lasi karana hamaoromaoroa totona taunimanima idia hekwarahi, to do idia kwalimu lasi. (Hadibaia Tauna 1:15) To momo be Dirava ena gwauhamata dekenai edia abidadama idia hagoadaia, ia ese kara maoromaoro tanobada matamatana do ia havaraia. Unai ese idia ia durua lalomaino idia abia, ena be idia dekenai kota maoromaoro lasi karana idia vara.