Taunimanima Edia Kara Ia Dika

OI laloa kara maoromaoro badinaia karana be edena nega ai ia ore ia lao? Reana oiemu mauri lalonai, eiava emu buruka varavara bona turadia edia mauri negana ai, a? Taunimanima haida idia laloa, lagani 1914 ai Tanobada Tuarina Ginigunana ia vara neganai kara maoromaoro badinaia lasi karana ia bada ia lao. Histori ena profesa tauna, Robert Wohl be ena buka ladana The Generation of 1914 lalonai, inai hereva ia torea: “Unai tuari lalonai idia mauri noho taudia idia abia dae tanobada taudia edia kara namo idia ore, bona August 1914 ai, edia kara ia idau matamaia.”

Histori torea tauna, Norman Cantor ia gwau, unai nega amo “gabu iboudiai dekenai, kara maoromaoro badinaia karadia idia ore idia lao.” Ma ia gwau, “Politikol bona tuari orea edia biagudia be edia soldia taudia milioni momo be tuari dekenai idia siaidia, bona animal idia hamasea bamona idia kara henidia. Unai dainai, taunimanima edia kara be dagedage animal bamona bona tomadiho oreadia danu ese taunimanima idia koua diba lasi. . . . Tanobada Tuarina Ginigunana [1914-1918] ai, taunimanima momo herea idia mase, unai dainai taunimanima idia laloa mauri be gau badana lasi.”

H. G. Wells ese ena buka ladana The Outline of History lalonai, sivarai momo ia torea bona ia gwau, taunimanima ese evolusen ena lalohadai idia abia dae dainai, “idia laloa kara maoromaoro badinaia karana be gau badana lasi.” Dahaka dainai? Badina haida idia laloa taunimanima be animal bamona, to edia diba be animal edia diba ia hereaia. Unai tauna Wells be evolusen ia abia dae, bona lagani 1920 ai inai hereva ia torea: “Unai taudia idia laloa, taunimanima be India dekenai ia noho labana sisia oreana bamona badina unai sisia ese dagedage dalana amo sisia haida idia biagudia . . . , unai dainai idia laloa taunimanima ese haida idia dagedage henidia bona biagudia be maoro.”

Momokani, Cantor ena hereva bamona, tuari ginigunana ese taunimanima edia lalohadai kara maoromaoro karana dekenai ia haidaua momokani. Ia gwau: “Uru gunana taudia edia kara iboudiai, hegeregere politik karadia, dabua toana bona lalohadai mahuta hebou karana dekenai be unai taudia ese idia dadaraia.” Keristani dubu momo ese edia hahediba hereva lalonai evolusen lalohadai idia abia dae bona tuari heheni karana idia hagoadaia, unai dainai kara maoromaoro badinaia karana be metairametaira ia ore ia lao. British Brigadier General ladana Frank Crozier ia gwau: “Keristani Dubu gunalaia taudia momo be edia inai taudia edia rara idia bubua karana idia hagoadaia bona ai moale bada edia ura ai hagugurua totona.”

Kara Maoromaoro Taravatudia Idia Negea

Tanobada Tuarina Ginigunana ia ore bena lagani 10 ia hanaia murinai—taunimanima momo herea be sibodia edia ura karadia idia moalelaia, unai nega idia gwauraia Roaring Twenties—guna idia abia dae kara namodia bona kara maoromaoro karana idia dadaraia. Histori torea tauna, Frederick Lewis Allen ia gwau: “Tuari murinai idia ore lagani 10 idia gwauraia Decade of Bad Manners. . . . Guna idia badinaia kara namodia ese taunimanima edia mauri idia hanamoa bona ia be mai anina, to lagani 1920 murinai, unai kara namodia idia badinaia lasi dainai, edia mauri idia moalelaia namonamo lasi.”

Lagani 1930 ia lao 1940 lalonai, tanobada ibounai dekenai unai nega idia gwauraia Great Depression, bena taunimanima momo herea be ogogami ai idia lao, bona moni abia be auka herea. To, unai lagani 10 dokonai, tanobada ai tuari badana ma ta ia vara, bona tuari ginigunana ena dika ia hanaia, unai be Tuari Badana Iharuana. Unai nega amo bese momo ese dika bada idia havaraia diba tuari kohu idia karaia, bona ena be tanobada ena Depression negana ia ore, to tuari amo taunimanima be hisihisi bada bona dika bada herea idia davaria. Unai tuari lalonai, siti 100 momo idia hadikaia ore; Japan ena siti badadia rua be atomic bomu amo idia hadikaia! Danu, taunimanima milioni momo be dibura kamepa dekenai idia hamasea. Unai tuari amo idia mase tatau, hahine bona natudia iboudiai be 50 milioni bamona.

Tanobada Tuarina Iharuana lalonai, taunimanima be guna idia badinaia kara maoromaoro idia rakatania bona sibodia edia ura idia karaia. Buka ta ladana Love, Sex and War—Changing Values, 1939-45, ia gwau: “Toana be mahuta hebou karana karaia kava be taravatu lasi. . . . Bona kara maoromaoro idia badinaia lasi, badina idia laloa tuari amo do idia mase dainai idia ura do mauri noho lalonai gau momo idia karaia haraga.”

Idia laloa kahirakahira tuari ai do idia mase dainai, idia ura lalokau heheni karana idia mamia, ena be unai lalokau heheni do ia noho daudau lasi. Britain ai, headava hahine ta ia gwau, unai laganidia ai, ia laloa ma haida ida mahuta hebou kava karana be maoro, ia gwau: “Ai be ariara hahine lasi, to tuari ia do vara noho dainai ai laloa unai ai karaia be namo.” America ena soldia ta ia gwau, “Taunimanima momo idia laloa ai heudahanai taudia, to ai be tatau matamatadia bona ai laloa kerukeru do ai mase diba.”

Unai tuari amo idia roho mauri taudia ese idia itaia gau dikadia dainai idia do lalometau noho. Unai nega amo ema bona hari, idia haida bona natudia haida danu ese unai dika bada herea negana idia laloa lou neganai, edia hemami dikana idia laloaboio diba lasi. Idia momo edia abidadama Dirava dekenai bona edia kara maoromaoro karana danu idia haboioa. Dahaka be maoro bona dahaka be dika ena taravatu idia ura lasi badinaia, to sibodia edia ura idia abia hidi.

Kara Maoromaoro Taravatudia Idia Haidaua

Tanobada Tuarina Iharuana murinai, mahuta hebou karana idia stadilaia. Lagani 1940 lalonai, United States ai, stadi bukana ta ladana Kinsey Report, be mai ena rau 800 mai kahana. Unai ripoti dainai, taunimanima momo ese mahuta hebou karana idia herevalaia, guna unai bamona hereva idia gwauraia hedinarai momo lasi. Unai ripoti lalonai, ena be idia gwau tatau ida idia mahuta hebou tatau bona matabodaga karadia idia karaia taudia edia namba ena bada idia gwauraia kerere, to unai stadi amo ia hedinarai, tuari murinai taunimanima edia kara maoromaoro idia ore idia lao.

Nega sisina lalonai, idia hekwarahi kara kereredia idia hunia totona. Hegeregere, reidio, muvi, bona TV amo heudahanai karana idia kokidia. To, nega sisina murinai unai kara idia hahedinaraia lou. William Bennett, ia be guna U.S. secretary of education ia gwau: “Lagani 1960 amo, America dekenai kara maoromaoro karadia idia ore idia lao haraga.” Bona tano momo dekenai unai kara ia vara danu. Dahaka dainai lagani 1960 lalodiai kara maoromaoro karadia idia ore haraga?

Unai lagani 10 lalodiai danu, hahine idia ruhaia oreana (womens liberation movement), bona mahuta hebou ena lalohadai matamata bona kara maoromaoro taravatudia idia haidaua negana be nega tamona ia vara. Danu, hahine be do idia rogorogo lasi totona rogorogo koua muramura idia karaia matamaia. Unai dainai “mahuta hebou kava” karana bona “tau bona hahine be idia headava lasi to idia mahuta hebou karana ia bada ia lao.”

Danu unai nega lalonai, niuspepa, muvi bona TV lalonai edia kara maoromaoro lasi karadia idia hahedinaraia. Gabeai, Zbigniew Brzezinski, guna ia be U.S. National Security Council ena biaguna. Ia ese ena lalohadai TV dekenai idia hahedinaraia laulaudia ia herevalaia, ia gwau: “Idia ese sibona hamoalea karadia, dagedage bona hisihisi henia karadia idia gwauraia maoro [bona] lebulebu ura henia karana idia habadaia danu.”

Lagani 1970 lalonai, taunimanima be muvi idia ura henia bada. Taunimanima be hari edia ruma lalodiai, lebulebu bona matabodaga laulaudia idia raraia, to guna muvi piksa idia halasia ena ruma dekenai taunimanima ida unai bamona piksa dikadia raraia be hemarai gauna. Hari, tanobada ibounai lalonai, mai edia kompiuta taudia ese intanet ai ponografi laulau dikadia idia raraia.

Unai dainai dika bada herea ia vara. Vanegai, U.S. ena dibura rumana ta ai, dibura taudia edia gadi ta ia gwau, “Lagani 10 gunanai, memero kekeni matamatadia be dibura lalonai idia vareai neganai, idia dekenai dahaka be maoro bona dahaka be kerere lau hamaorodia diba. To hari, idia hadiburaia memero kekeni ese egu hadibaia hereva idia lalopararalaia diba lasi.”

Ta be Edeseniai Heduru Ia Abia Diba?

Dubu idauidau ese kara maoromaoro taravatudia idia hadibaia lasi. Dubu oreadia ese Iesu bona ena murinai idia raka Keristani taudia ginigunadia idia abia dae kara maorona idia rakatania, bona tanobada ena kara dika amo idia gini siri lasi. Toretore tauna ta ia gwau: ‘Tuari ibounai lalonai taunimanima idia laloa Dirava be edia kahanai ia noho.’ Lagani momo gunanai, New York siti ena haroro tauna ta ese Dirava ena kara maoromaoro taravatudia badinaia karana ia gwauraia neganai, ia gwau: “Tomadiho oreadia dekenai kara maoromaoro taravatudia idia atoa lasi dainai, taunimanima iboudiai idia vareai diba.”

Ia hedinarai goevagoeva inai tanobada lalonai, kara maoromaoro karadia idia ore idia lao haraga, unai dainai hanamoa dalana tahua be gau badana. To dahaka kara do idia haidaua? Daika ese do ia karaia, bona edena bamona do ia guguru?

[Blurb]

“Tanobada Tuarina Ginigunana [1914-1918] ai, taunimanima momo herea idia mase, unai dainai taunimanima idia laloa mauri be gau badana lasi.”

[Box]

EDIA URA GAUDIA ESE KARA MAOROMAORO IA INAI HENIA

Kara maoromaoro ena anina ita diba vadaeni. Ena anina be tau ta ia koikoi lasi, ia be mai ena abidadama, ia kara goeva, bona ia hemataurai. Hari, taunimanima ese edia “ura gaudia” idia atoa guna bona “kara maoromaoro” idia laloa bada lasi. To unai ese hekwakwanai ia havaraia, histori ia torea hahine ta ladana Gertrude Himmelfarb be ena buka ladana The De-Moralization of Society lalonai inai ia torea: “Kara maoromaoro badinaia karana bona taunimanima be sibodia edia ura karaia gaudia, . . . be idauidau.”

Unai hahine ia gwau, taunimanima ese idia atoa guna ura gaudia be idauidau hegeregere; “idia sibona ese idia abia dae gaudia, edia lalohadai, kara, hemami, idia manadalaia gaudia, idia ura henia gaudia, ma ta inai henia karana, ma haida amo idau karana. Unai karadia be taunimanima ta, grup ta eiava ma haida edia ura gaudia idauidau ia hahedinaraia, bona nega idauidau ai bona badina idauidau dainai unai bamona idia karaia.” Hari inai negai, taunimanima be sibodia edia ura idia abia hidi diba, hegeregere sitoa dekenai idia ura aniani idauidau idia abia hidi bamona. To bema taunimanima ese unai bamona abia hidi idia karaia, kara maoromaoro bona taravatu maorodia dekenai dahaka ia vara diba?

[Picture]

Hari, sivarai dika rohorohodia bona piksa dikadia davaria be auka lasi