DOREEN ena adavana, Wesley, be ena kwara harana ai tiuma dikana ia abia neganai, Doreen ia hoa bada, ena adavana ena mauri lagani be 54 sibona. * Doketa taudia ese ia idia hamaoroa, ia be hua haida sibona lalonai do ia mauri. Doreen ia gwau, “Unai hereva lau abia dae be auka. Wiki momo lalonai lau laloa namonamo diba lasi. Unai be hegeregere ma haida dekenai ia vara, to ai dekenai lasi. Lau be ia vara gauna totona lau hegaegae lasi.”

Doreen ena hemami be momo ese idia abia hemami bamona. Unai bamona gorere be ita ibounai ese ita abia diba. Unai dainai ta be unai bamona gorere ia abia neganai, momo be mai edia ura ida edia lalokau tauna idia naria. To gorere taudia naria karana be mai ena hekwarahi bada. Ruma bese taudia ese dahaka idia karaia diba edia lalokau tauna idia naria totona? Naria taudia ese gorere taudia idia naria lalonai, idia lalohisihisi, idia taitai bona idia badu diba, to edena bamona unai do idia haheaukalaia? Gorere taudia edia mase ia kahirakahira neganai, dahaka gaudia do idia vara? Gau ginigunana be do ita itaia, dahaka dainai hari gorere bada taudia naria karana be mai ena hekwarahi.

Medikol saiens ese gau haida idia karaia dainai, taunimanima idia mase haraga lasi. Lagani 100 bamona gunanai, taga tanodia ai danu, taunimanima idia mauri daudau lasi. Idia be daihanai gorere eiava aksiden dainai idia mase haraga. Hospital dekenai heduru abia dalana ia auka dainai, gorere taudia momo be edia famili taudia ese idia naria bona idia be ruma dekenai idia mase.

Hari medikol saiens dainai, unai ese doketa taudia ia durua idia gaukara goada gorere idia koua, unai amo taunimanima idia mauri daudau diba. Idaunegai taunimanima idia hamasea haraga gorerena be hari ta ese ia abia neganai, do ia mase haraga lasi, to lagani momo do ia mauri. To unai ese ia hahedinaraia lasi, gorere tauna ena gorere be ia ore momokani. Nega  momo gorere taudia edia gorere ia bada dainai, idia hegeregere lasi sibodia idia naria totona. Unai bamona gorere taudia naria karana be ia auka bona mai ena hekwarahi bada.

Unai dainai taunimanima momo be ruma dekenai idia mase lasi to hospital dekenai idia mase. Hari momo ese taunimanima idia mase dalana idia do itaia lasi, to haida sibona ese unai idia itaia. Bema ta be ia diba lasi dahaka do ia vara dainai ia gari, unai ese ia do ia koua diba ia gorere ruma bese tauna ta ia naria namonamo totona. Dahaka ese ia ia durua diba?

Doreen ena sivarai bamona, taunimanima momo idia lalomanoka bema edia lalokau tauna ta be gorere badana ta ia davaria. Ena be oi lalohekwarahi, gari, bona lalohisihisi, to dahaka ese oi ia durua gabeai do ia vara gauna totona oi hegaegae? Dirava ia abidadama hesiai tauna ta ia guriguri: “Mani ai dekenai oi hahedinaraia edena bamona emai mauri dinadia do ai duahia, bena unai amo kudouna mai ena aonega do ai abia.” (Salamo 90:12, NW) Oibe, mai momokani ida Iehova Dirava oi guriguri henia oi ia durua mai aonega ida emu mauri dinadia oi duahia, unai amo emu lalokau tauna ia mauri noho lalonai ia oi durua namonamo diba.

Unai be palani namonamo karana amo ia vara. Bema emu lalokau tauna ia do herevahereva noho bona ia ura gau haida ia karaia, vadaeni namona be ia oi nanadaia daika be ia totona abia hidi do ia karaia bema gabeai ia hegeregere lasi unai ia karaia. Namona be ia ida ita herevahereva namonamo, unai amo bema ena laga ia doko, do ia ura ia dekenai oksijen do idia henia, o ia ura hospital dekenai ia noho, o ia dekenai muramura ta idia henia diba, bema ruma bese taudia be unai idia diba, gabeai lalohadai kererena do idia abia lasi eiava edia hemami do ia dika lasi. Bema ena ruma bese taudia danu unai idia herevalaia vadaeni, unai ese idia do ia durua ia idia naria namonamo totona. Baibel ia gwau: “Sisiba momo do oi tahua noho, bona do oi kwalimu.”​—⁠Aonega Herevadia 15:22.

Nega momo naria taudia edia gaukara badana be gorere tauna do idia hagoadaia. Namona be ia mase noho tauna ita hamaoroa ia ita lalokau henia bona ia be sibona ia noho lasi. Edena bamona unai ita karaia diba? Gorere tauna dekenai oi duahiduahi o ane oi abia, namona be ia moalelaia buka bona ane oi abia hidi. Taunimanima momo idia ura edia ruma bese tauna ta ese edia imana do ia dogoatao bona ia hereva henia.

Namona be ia idia vadivadi henia taudia edia ladana be ia dekenai ita gwauraia. Ripoti ta ia gwau: “Iseda sense ibounai faiv amo, ita haboioa gauna ginigabena  be iseda kamonai karana. Ena be [gorere taudia] idia mahuta to idia do kamonai noho, unai dainai idia noga noho lalonai idia dekenai oi gwauraia lasi herevadia be idia mahuta neganai oi gwauraia lasi.”

Bema hegeregere, umui guriguri hebou. Baibel ia gwau nega ta, aposetolo Paulo bona ena bamodia be idia lalohekwarahi bada bona idia laloa edia mauri do idia haboioa. Dahaka heduru idia tahua? Paulo ese ena bamodia ia noidia, ia gwau: “Umui ese ai do umui durua noho emui guriguri dekena amo.” (2 Korinto 1:8-11) Lalohekwarahi bona gorere bada negana lalonai, mai kudouna ibounai ida ita guriguri be gau badana.

Iseda lalokau tauna ta ia mase neganai unai ita lalohisihisilaia. Badina Dirava ese ita ia karaia lasi ita mase totona, unai dainai ita mase be maoro lasi. (Roma 5:12) Dirava ena Hereva Baibel ia gwau, mase be “iseda inai tauna.” (1 Korinto 15:26) Unai dainai ita ura lasi iseda lalokau tauna ta ena mase ita lalohadailaia, bona unai ita lalopararalaia diba, vaia unai be ita abia hemami.

To, bema ruma bese taudia idia diba dahaka do ia vara, unai ese edia gari do ia hamaragia bona idia do ia durua gorere tauna do idia durua namonamo totona. Do idia vara gaudia haida be maua ladana “ Ta Ia Mase Gwauraia Ena Wiki Ginigabedia” ai oi itaia diba. Unai maua ese ia herevalaia gaudia be gorere taudia ibounai dekenai ia vara lasi, eiava lista ai idia torea dalana hegeregerena ia vara lasi. To gorere taudia momo ese unai gaudia haida idia mamia.

Iseda lalokau tauna ta ia mase murinai, reana emu turana namona oi rini henia diba, guna oi ia hamaoroa oi do ia durua. Naria taudia bona edia famili ita hamaoroa edia lalokau tauna be hari ia hisihisi noho lasi. Iseda Havaraia Tauna ese ita ia hadibaia, “mase taudia be gau ta idia diba lasi.”​—⁠Hadibaia Tauna 9:5.

Dirava dekenai ita tabekau be mai anina bada, iseda lalokau tauna ia gorere negana sibona lasi, to ena mase ita lalohisihisi negana lalonai danu. Ia ese ita do ia durua haida edia hereva bona kara namodia amo. Doreen ia gwau, “Lau dibaia gauna be inai, bema ta ia ura heduru ia henia unai ita koua lasi. Badina idia amo ita abia heduru ese ita do ia hagoadaia diba. Lau bona egu adavana ai diba momokani, inai be hegeregere Iehova ia gwau, lau be umui ida bona inai ibounai lalonai umui do lau durua.”

Oibe Iehova Dirava be Naria Tauna hereadaena. Ia be ita ia Havaraia Tauna dainai, iseda hisihisi bona lalohisihisi ia diba. Ia be ia noho hegaegae mai ura ida ita ia durua bona hagoadaia, unai amo lalogoada ita abia. Ma danu, ia gwauhamata kahirakahira mase do ia haorea momokani bona ia laloatao taudia bilioni momo do ia hatorea isi lou. (Ioane 5:28, 29; Apokalupo 21:3, 4) Unai dainai, ita ibounai ese aposetolo Paulo ena hereva bamona do ita gwau: “Mase e, oiemu kwalimu be edeseni? Mase e, oiemu hisihisi ena siahu be edeseni?”​—⁠1 Korinto 15:55.