Dirava ese taunimanima dekenai harihari gauna hereadaena ia henia​—ia danu ita herevahereva bona guriguri amo ia dekenai iseda hemami ita gwauraia hedinarai totona. Peroveta tauna Davida ia guriguri, ia gwau: “Badina be oi ese aiemai guriguri oi kamonai. Taunimanima ibounai be oi dekenai do idia mai.” (Salamo 65:2) To edena bamona ita guriguri unai amo Dirava ese ita ia kamonai henia bona ita ia hanamoa diba?

Emu hemami korikorina oi hahedinaraia totona, sibona emu guriguri lalonai ‘emui kudouna edia ura gaudia, be Dirava dekenai do oi hamaoroa’ diba. (Salamo 62:8) Siahu Ibounai Diravana be mai lalona ibounai ida oi gwauraia gurigurina ia ura henia.

Ena be Dirava ena dagi ladadia be momo, to iena ladana korikori be tamona sibona. “Lau sibona be [Iehova], egu ladana be unai.” (Isaia 42:8) * Dirava ena ladana be Baibel lalonai nega 7,000 bamona ia hedinarai. Peroveta taudia momo be idia guriguri neganai, mai hemataurai ida Dirava ena ladana korikori idia gwauraia. Aberahamo ia gwau: “[Iehova] e, lau ura noinoi lou.” (Genese 18:30) Ita danu, namona be ita guriguri neganai, Dirava ena ladana Iehova, ita gaukaralaia.

Herevana edena gado ai ita guriguri, to Dirava be iseda lalohadai bona hemami ia lalopararalaia. Baibel ese ita ia hagoadaia: “Dirava ese taunimanima edia toana ia laloa lasi. To bese ibounai lalonai, Dirava dekenai idia gari, bona kara maoromaoro idia karaia taudia, be Dirava ese do ia abia dae.”​—Kara 10:34, 35.

To, Dirava ese ita ia hanamoa totona, namona be ita guriguri sibona be hegeregere lasi. Atikol ma haida ai, dahaka ita karaia be namo do ita herevalaia.