Lau be Tamaulipas, Mexico ena taoni mai hairaina ta ladana Ciudad Mante ai, lau vara.Unai siti ai idia noho taudia be hariharibada bona hebogahisi taudia. To madi, unai gabu ai raskol oreadia idia noho dainai, taunimanima be mai gari ida idia noho.

Memero foa amo lau be iharuana. Egu tama sina edia ura dainai lau be Catholic Dubu dekenai lau bapatiso bona gabeai parish ane abia grup lalonai lau vareai. Lau ura Dirava lau hamoalea badina lau ura lasi lau do ia hahemaoro henia bona hel lahina ai lau ia gabua hanaihanai.

Egu mauri lagani be faiv neganai, egu tamana ese ai ia rakatania. Unai dainai lau lalohisihisi bada bona lau mamia lau be anina lasi. Lau laloparara lasi dahaka dainai ai ia rakatania badina ia ai lalokau henia bada. Egu sinana be hora momo ia gaukara ai ia naria totona.

Idia vara gaudia dainai sikuli lau lao lasi to memero badadia lau bamoa. Idia ese lau dekenai hereva mirodia idia gwauraia, kuku ania, henaohenao, bona heai karana idia hadibaia. Lau ura ma haida lau biagua dainai, heatu daladia idauidau lau dibaia, bona ipidi gaukaralaia daladia danu. Lau be dagedage merona ta ai lau lao. Nega momo ipidi amo lau tuari dainai, lau idia pidia bona dala dekenai lau hekure bona kahirakahira lau mase. Egu sinana ia lalohisihisi bada badina nega momo unai bamona lau ia davaria bona hospital dekenai ia abia lao!

Egu mauri lagani be 16 neganai, egu turana ta ladana Jorge be emai ruma dekenai ia vadivadi. Ai ia hamaoroa ia be Iehova ena Witnes ta bona ia ura ai dekenai mai anina bada sivaraina ta ia gwauraia. Bena ena abidadama ia hahedinaraia totona Baibel ia gaukaralaia. Ena be Baibel lau duahia lasi, to lau moale bada Dirava ena ladana bona iena ura lau dibaia. Jorge ia ura ai ida Baibel ia stadilaia. Bona unai ai abia dae.

Hel lahina ena hahediba herevana dekenai diba maorona lau abia neganai egu lalohekwarahi ia ore badina​—ia be Baibel ena hadibaia herevana lasi. (Salamo 146:4; Hadibaia tauna 9:5) Unai lau diba neganai, egu gari karana Dirava dekenai ia ore. To, hari lau diba Dirava be lalokau Tamana ta bamona ena natudia edia namo sibona ia laloa bada.

 Baibel stadilaia karana lau goadalaia neganai, lau itaia egu kara haida lau haidaua be namo. Namona be lau hekwarahi manau karana lau hahedinaraia bona dagedage karana lau rakatania. Inai sisiba herevana 1 Korinto 15:33 ese lau ia durua. Ia gwau: “Hebamo dikadia ese kara namodia idia hadikaia diba.” Lau laloparara bema lau ura egu kara lau haidaua, lau idia hakaua kerere taudia do lau bamoa lasi be namo. Unai dainai egu tura gunadia lau rakatania bona Keristani kongrigeisen momokanina lau bamoa. Unai taudia be edia hekwakwanai idia hamoaromaoroa totona, Baibel ena hakaua herevadia idia badinaia, to heai o dagedage karadia amo lasi.

Lau ia durua bada siri ma ta be Roma 12:17-19. Ia gwau: “Tau ta ena dika davana umui haloua lasi. . . . Bema mai dalana bona bema umui karaia diba, taunimanima ibounai ida maino ai do umui noho. Ta ena dika davana do umui haloua lasi, . . . badina Toretore Helagadia ia gwau: ‘“Iehova ia gwau, dika ena davana be egu, lau ese davana do lau haloua.’” Bona lau abia dae Iehova ese kara gagevadia be iena dala bona nega maorona ai do ia hamaoromaoroa. Metairametaira egu dagedage karana lau rakatania.

Adorahi ta ruma dekenai lau giroa lou neganai ia vara gauna lau laloaboio diba lasi. Memero haida, guna ai heatu henia raskol oreana amo ese lau idia heatu henia, bona edia gunalaia tauna ese murinai amo lau ia botaia, ia boiboi, “sibona oi gimaia.” Unai negai Iehova dekenai guriguri kwadogina lau gwauraia, ia lau noia lau ia durua unai do lau haheaukalaia totona. Ena be lau ura dika davana lau henia, to unai gabu amo lau heau siri haraga. Murina dinana ai lau ese unai raskol oreana edia biaguna lau hedavari henia. Lau badu dikadika lau ura ena dika davana lau haloua, to egu kudouna ai Iehova lau noia sibona lau biagua totona. Lau hoa, badina unai raskol tauna be lau dekenai ia mai bona ia gwau: “Varani hanuaboi ia vara gauna dainai lau oi gwauatao. Lau ura oi bamona egu kara do lau haidaua. Lau ura Baibel do lau stadilaia.” Lau moale bada badina egu badu lau biagua! Lau moale bada badina ia danu Baibel ai stadilaia matamaia.

To egu ruma bese taudia be Baibel idia stadilaia noho lasi. To, egu lalona lau hadaia do lau stadi noho totona bona gau ta o tau ta ese lau do ia koua lasi totona. Lau diba Dirava ena taunimanima bamoa loulou karana ese egu lalohisihisi mamina do ia hanamoa bona idia be egu ruma bese ai idia lao. Lau goada lau lao, bona lagani 1991 ai, lau bapatiso bona Iehova ena Witnes ta ai lau lao.

Guna lau badu haraga, haida lau biagua auka, bona lau dagedage. To Baibel ese egu mauri ia haidaua momokani. Hari lau ese Baibel amo maino sivaraina be kamonai taudia dekenai lau harorolaia. Hahenamo badana be idia hanaia lagani 23 lalonai ful-taim hesiai gaukara lau karaia.

Lagani haida gunanai, Mexico ai Iehova ena Witnes taudia edia brens ofesi dekenai, volantia gaukara lau karaia. Unuseniai, lau ese Keristani hahine matamata ta Claudia lau davaria, bona lagani 1999 ai ai headava. Iehova lau tanikiu henia badina lau dekenai turana namona ia henia!

Ai gaukara hebou Mexico ena Sain Gado Kongrigeisen dekenai, taia kudima taudia ai durua Iehova idia dibaia totona. Gabeai, ai idia boiria Belize dekenai do ai lao, unai tano ai idia noho taudia dekenai Baibel ai hadibaia totona. Ena be iniseniai kohu momo lasi maurina ai noholaia, to ai ura henia gaudia ibounai idia noho dainai ai moale. Gau ta ese unai do ia haidaua lasi.

Gabeai, egu sinana be Baibel ia stadilaia lou bona ia bapatiso. Danu, egu kakana, iena hahine, bona edia natudia, be hari Iehova ena Witnes taudia ai idia lao. Egu tura gunadia haida, guna idia dekenai Basileia sivaraina lau harorolaia taudia danu, be hari Iehova idia hesiai henia noho.

To madi, egu ruma bese lalonai haida idia mase badina edia dagedage karana idia haidaua lasi. Bema unai dala tamona lau badinaia, reana lau danu be idia bamona lau mase vadaeni. Lau tanikiu bada badina Iehova ese lau ia durua Ia bona ena hesiai taudia kahirakahira lau lao, idia ese mai haheauka bona maino ida lau idia durua egu mauri lalonai Baibel ena hakaua herevadia lau badinaia totona.