Lau kiri badina egu turana be guriguri tauna lasi. Lau nanadaia: “Baibel dekenai emu diba be dahaka?” Ia haere haraga lasi, to gabeai ia gwau iena sinana be Iehova ena Witnes ta bona ia amo gau haida ia dibaia. Lau ura diba dainai lau noia gau haida do ia herevalaia.

Ai herevahereva ela bona hanuaboi momokani. Egu turana ese lau ia hadibaia Baibel ia gwau Satani ese tanobada ia lohiaia. (Ioane 14:30) Reana emu mauri ibounai lalonai unai oi diba, to lau dekenai unai be hereva matamata bona lau hoa. Nega momo lau kamonai lalokau bona hariharibada Diravana ese tanobada ia biagua. To lau itaia gaudia ese unai ia hamomokania lasi. Ena be egu mauri lagani be 26 sibona, to lau itaia gaudia momo dainai lau lalohisihisi.

Guna egu tamana be United States Air Force ena pailot ta. Unai dainai lau be mero maragi neganai, lau laloparara niuklia tuari be ia vara diba. Ami taudia be idia hegaegae niuklia bomu idia hapoua totona. Vietnam tuarina negana ai, lau be California ai koledi dekenai lau sikuli. Stiuden edia protest lalonai lau vareai. Pulisi be au danu ai idia lulua bona ai heau, ma tiagesi ese emai gadona ia araia bona emai matana ia hadikaia. Unai be gwau-edeede bona hekwakwanai negana, minista taudia idia pididia, protest karadia bona heatu idia vara. Unai tuari hamaoromaoroa totona taunimanima edia lalohadai be idauidau. Daradara be bada herea.

Lagani 1970 lalonai, Alaska ena not kahana ai, moni gaukara lau abia bona moni momo lau haboua. Bena London dekenai lau lao bona motabaik ta lau hoia bona saut kahana dekenai lau lao. Gabu ta lau laloa lasi to lau heau sibona. Hua haida murinai Africa dekenai lau ginidae. Egu loaloa gabudia ai, taunimanima momo lau hedavari henia bona idia danu idia ura edia hekwakwanai idia rakatania bona gabu ta dekenai idia lao.

Tanobada dekenai idia vara hekwakwanai lau itaia bona kamonai dainai, Baibel ena hahediba  herevana, lauma dikana ta ese tanobada ia biagua noho herevana lau abia dae. To lau ura diba, Dirava be dahaka ia karaia noho?

Hua haida murinai, haere lau davaria. Bona lagani momo lalonai, lau ese tatau bona hahine momo lau hedavari henia, herevana dahaka hekwakwanai idia davaria to Dirava momokanina tamona idia abidadama henia noho.

London dekenai lau giroa lou neganai, egu turana ena sinana lau hedavari henia bona lau dekenai Baibel ta ia henia. Gabeai, Netherlands ena siti Amsterdam dekenai lau lao, bona dala ena lamepa ai Baibel lau duahia noho lalonai, Witnes tauna ta ese lau ia itaia bona lau ia durua diba ma haida lau abia totona. Gabeai, Ireland ena siti Dublin dekenai lau lao, bona unuseniai Iehova ena Witnes taudia edia brens ofesi lau davaria. Edia iduara dekenai lau pidipidi. Unuseniai, mai ena aonega bona lo tadikaka ta, Arthur Matthews lau hedavari henia. Baibel stadi totona lau noia, bona ia gwau lau ida do ia stadi.

Mai egu ura ibounai ida Baibel lau stadilaia bona lau ura bada Witnes taudia ese idia halasia buka bona magasin lau duahia. Bona Baibel lau duahia danu. Lau moale bada! Kongrigeisen heboudia ai lau itaia natudia danu be diba bada taudia ese idia laloa momo henanadai edia haere idia diba: ‘Dahaka dainai kara dika ia noho? Dirava be daika? Ta ia mase neganai dahaka ia vara?’ Netherlands ai tau ta lau diba lasi dainai, lau be Witnes taudia sibona lau bamoa. Lau idia durua Iehova lau lalokau henia bona iena ura lau karaia totona.

Lagani 1972 ai lau bapatiso. Lagani ta murinai painia gaukara lau hamatamaia bona Northern Ireland ai, Newry ena kongrigeisen lau bamoa. Ororo gabana ai nadi ruma maragina ta lau rentaia. Unuseniai boromakau idia noho bona idia vairanai egu tok lau praktis. Idia aniani to egu tok idia kamonai. Sisiba idia henia lasi, to lau idia durua tok lau henia neganai, taunimanima do lau itaia totona. Lagani 1974 ai, lau idia abia hidi spesel painia gaukara lau karaia totona, bona Nigel Pitt be lau ia bamoa. Ia be egu turana namona ai ia lao.

Unai nega ai Northern Ireland dekenai hekwakwanai momo idia vara. Unai dainai haida idia gwau Northern Ireland be “bomu bona buleti gabuna.” Dala dekenai vaia taunimanima idia heai, ipidi amo ma haida idia pidia, bona motuka  idia gabudia. Politikol bona tomadiho karadia dainai hekwakwanai momo idia vara. To Protestan bona Katolik dubu taudia idia laloparara Witnes taudia be politikol karana ta idia durua lasi dainai, emai haroro gaukara ai karaia diba bona dika ta ai davaria lasi. Nega momo ruma taudia idia diba edena negai bona edeseniai heai do ia vara bona ai idia hadibaia unai gabu ai lao lasi totona.

To, dika ai davaria diba. Dina ta painia tadikaka ta, Denis Carrigan bona lau be Witnes lasi taoni ta dekenai ai haroro, unai be nega iharuana unai gabu dekenai ai lao. Hahine ta ia gwau ai be Britain ena tuari taudia, to ai hunia noho. Reana ai be Irish taudia bamona ai hereva lasi dainai, unai bamona ia hereva. Iena hereva ese ai ia hagaria. Bema soldia tauna ta oi gado namo henia, oi ia pidia mase eiava emu tuina ia pidia diba. Murimuri dekenai ai gini bona ai keru bada, to basi ai naria lalonai, ai itaia motuka ta ia mai bona ai ia samania koikoi hahine ena gaukara gabuna ai ia stopu. Ia raka-lasi bona motuka ai idia mai tatau rua ia hereva henidia, bona ai dekenai ia poinia. Unai tatau be metairametaira motuka amo idia mai bona basi edia heau negana totona idia henanadai. Basi ia ginidae neganai, draiva idia hereva henia. Idia herevalaia gauna ai kamonai lasi. Pasendia haida be lasi dainai, ai laloa idia be palani idia karaia taoni murimurinai ai do idia alaia. To unai ia vara lasi. Basi amo lau diho neganai, draiva lau nanadaia: “Unai tatau be ai totona idia henanadai, a?” Ia haere: “Oibe, to idia lau hamaoroa, lau diba umui be daika. Umui laloa momo lasi. Dika ta do ia vara lasi.”

Lagani 1976 ai, Dublin ena distrik hebouhebou a ai, England amo ia mai spesel painia taihu ta ladana, Pauline Lomax lau hedavari henia. Ia be abidadama, manau bona taihu namona. Ia bona ena tadina Ray be hereva momokani lalonai idia bada. Lagani ta murinai, lau bona Pauline ai headava bona Northern Ireland ena taoni Ballymena dekenai spesel painia gaukara ai karaia.

Gabeai Belfast, Londonderry bona dagedage idia vara gabudia haida ai sekit gaukara ai karaia. Tadikaka taihu edia abidadama karana ese ai ia hagoadaia bada, badina Iehova idia tomadiho henia totona, idia ese guna idia badinaia tomadiho herevadia, lalohadai kereredia bona inai heheni karadia idia dadaraia. Iehova ese idia ia hanamoa bona gimaia!

Ireland dekenai lagani 10 lau noho. Bena 1981 ai, Gilead Sikuli ena klas 72 dekenai ai idia boiria. Ai gradueit murinai, Sierra Leone, West Africa dekenai ai idia siaia.

Tadikaka taihu 11 ida misinari ruma tamona dekenai ai noho. Kisini tamona, toileti toi, digu gabuna rua, telefon tamona, dabua huria masini tamona bona dabua hakaukaua masini tamona ai gaukaralaia. Nega ibounai paoa ia bodo. Guhi dekenai bita idia noho bona ruma henunai ena daiutu lalonai kobra gaigai ia vareai.

Ena be emai noho gabuna be namo momokani lasi, to haroro gaukara ai moalelaia. Taunimanima be Baibel idia matauraia bona idia kamonai namonamo. Momo idia stadi bona hereva momokani idia abia dae. Hanua taudia ese lau idia boiria, “Mista Robert” bona Pauline idia boiria “Misis Robert.” To gabeai, nega bada be brens ofesi dekenai lau gaukara dainai, haroro gaukara  lau lao momo lasi, bona taunimanima ese Pauline idia boiria, “Misis Pauline.” Lau idia boiria “Mista Pauline” bona Pauline be unai ia moalelaia!

Tadikaka momo be idia ogogami, to hanaihanai Iehova ese edia dabu gaudia ia henia, bona nega haida hoa dalanai unai ia vara. (Mat. 6:33) Taihu ta lau laloatao, iena moni be hegeregere unai dina ai ia bona ena natudia edia aniani ia hoia totona. To ia gorere tadikaka ta be moni lasi dainai, taihu ese ia dekenai unai moni ia henia malaria muramura ia hoia totona. Gabeai, hahine ta be unai taihu dekenai ia mai bona ena huina ia pania totona taihu dekenai davana ia henia. Unai bamona sivarai be momo.

Lagani 9 lalonai Sierra Leone dekenai ai noho. Bena Nigeria ena Betele dekenai ai idia siaia. Hari ai be brens ofesi badana dekenai ai noho. Sierra Leone dekenai lau karaia ofesi gaukara lau karaia lou, to Pauline ena asainmen ia idau bona ia hekwarahi bada. Guna, hua ta ta ai hora 130 ia haroro bona Baibel stadi namodia momo ia karaia. To hari, dina ibounai ia be idia darea dabua ia turia bona hanamoa. Unai asainmen matamata dekenai ia hekwarahi, to ia laloparara haida ese iena gaukara idia laloa bada, bona dala ia tahua Betele taudia ia hagoadaia.

Ai dekenai Nigeria mauri dalana be matamata, bona gau momo ai diba lasi. Nega ta, tadikaka ta ese Betele taihu matamata ta be egu ofesi dekenai ia hakaua mai. Lau ura ena imana lau udeudea neganai, egu aena badina ia tui diho. Lau hoa bada! Karaharaga siri rua, Kara 10:25, 26 bona Apokalupo 19:10 lau laloatao. Lau laloa, ‘Do lau hamaoroa unai do ia karaia lasi, eiava?’ To gabeai, lau laloparara ia be Betele dekenai idia abia dae, bona Baibel ena hadibaia herevadia ia diba.   

Emai herevahereva lalonai lau hemarai bona gabeai tahua gaukara haida lau karaia. Lau davaria taihu be iena gabu dekenai idia badinaia kastom karana ia karaia. Tatau danu be unai bamona do idia karaia. Unai be hemataurai toana. Ia be tomadiho karana lasi, bona Baibel lalonai unai bamona sivarai haida idia noho. (1 Sam. 24:8) Lau moale badina hereva kererena lau gwauraia lasi egu taihu lau hahemaraia totona.

Ai ese Nigeria taudia momo ai hedavari henia bona lagani momo lalonai idia hahedinaraia idia  be abidadama goada taudia. Mani Isaiah Adagbona ena sivarai ita laloa. b Ia be mero matamata neganai, hereva momokani ia diba, to gabeai ia be lepera gorerena ia abia. Lepera gorere taudia idia noho gabuna dekenai idia siaia, bona unuseniai ia sibona be Witnes tauna. Ena be idia dagedage henia, to ia ese lepera taudia ibounai 30 ia durua hereva momokani idia abia bona unuseniai kongrigeisen ia hamatamaia.

Lagani 1996 ai, Kenya brens dekenai ai idia siaia. Guna Kenya dekenai lau loaloa bona hari be nega ginigunana lau giroa lou. Betele dekenai ai noho. Bona vadivadi taudia huanai maniki danu idia noho. Taihu haida be au huahua idia huaia neganai, maniki ese idia henaoa. Dina ta Betele taihu ta be ena windo ia koua lasi. Ena daiutu dekenai ia giroa neganai, ia davaria maniki momo herea be ena aniani idia moalelaia noho. Ia boiboi badabada bona iduara amo ia heau raka-lasi. Maniki danu idia boiboi badabada bona windo amo idia roho.

Lau bona Pauline be Swahili kongrigeisen ai bamoa. Daudau lasi murinai, lau idia abia hidi Kongrigeisen Buka Stadi (hari ita gwau Kongrigeisen Baibel Stadi) lau naria totona. To, Swahili gado lau diba namonamo lasi. Nega bada lalonai stadi lau hegaegaelaia, unai amo henanadai lau duahia diba. To bema helai taudia edia haere be idia torea gauna amo ia idau, edia haere lau lalopararalaia lasi. Ia auka momokani! Tadikaka taihu lau hebogahisi henidia. Lau moale badina idia be mai manau ida buka stadi lau naria dalana idia haheaukalaia.

Kenya dekenai hua haida sibona ai noho, bena 1997 ai, Brooklyn, New York ena Betele dekenai ai idia boiria. Inai tano ai taunimanima be mai edia kohu momo, bona unai ese hekwakwanai haida ia havaraia diba. (Aon. 30:8, 9) To, unai bamona tano dekenai danu tadikaka taihu edia abidadama be ia goada. Iseda tadikaka taihu ese edia kohu idia gaukaralaia Iehova ena orea ena gaukara idia durua totona.

Idia hanaia lagani lalodiai, mauri daladia idauidau ai iseda tadikaka taihu edia abidadama karana ai itaia. Ireland ai, dagedage bada ia vara, to tadikaka taihu edia abidadama ia goada. Africa ai, ogogami bona gunika gabudia dekenai idia noho, to tadikaka taihu edia abidadama ia goada. United States ai, taga maurina idia noholaia, to edia abidadama ia goada. Iehova ia moale bada badina ia itaia mauri idauidau idia noholaia to tadikaka taihu idia hahedinaraia ia idia lalokau henia bada!

Lagani idia ore haraga, “ turituri tauna ese nila ia gaukaralaia haragaharaga bamona.” (Iobu 7:6) Hari, ai be Warwick, New York dekenai ai noho, bona ai moale ta ta idia lalokau henia tadikaka taihu ida ai gaukara. Ai moale bada emai noho dalana hegeregerena iseda King, Keriso Iesu ai durua totona, badina kahirakahira ena abidadama hesiai taudia dekenai ahuna do ia henia.​—Mat. 25:34.