Inai Oi Diba, A?
Edena dala ai Babulonia gunana ai idia davaria biriki bona aveni ese idia hahedinaraia Baibel ena hereva be momokani?
AKIOLEJI taudia ese Babulonia gunana ai unai siti ena biriki milioni momo idia davaria. Akioleji tauna Robert Koldewey ia gwau, unai biriki idia gabua ena aveni be “siti murimurina ai ia noho, bona unai gabu ai raro namona ia noho bona au be momo lahi karaia totona.”
Rekodi gunadia haida ese idia hamomokania Babulonia ena lohia taudia ese unai aveni idia gaukaralaia kara dika idia karaia totona. Toronto ena University ai, profesa Paul-Alain Beaulieu, ia gwau: “Babulonia toretore gunadia ese idia hahedinaraia king ese oda ia henia ia idia kamonai henia lasi eiava helaga gaudia idia matauraia lasi taudia be aveni badana lalonai idia negea eiava idia gabua.” Hegeregere, King Nebukanesa ena nega ai idia torea herevana ta ia gwau: “Idia umui hadikaia, umui gabudia . . . nanadu tauna ena aveni lalonai . . edia kwalahu do ia daekau, lahi hururuhururu lalonai umui negedia idia mase totona.”
Baibel duahia taudia be unai hereva idia duahia neganai, Daniela karoa 3 ena sivarai idia laloa. Baibel ia hahedinaraia, King Nebukanesa be Babulonia ena siti murimurinai ia noho Dura kourana ai, golo kaivakuku badana ta ia haginia. Heberu memero matamata toi ladadia, Sataraka, Misaka bona Abetenigo be unai kaivakuku vairanai idia tui diho lasi neganai, Nebukanesa ia badu dikadika bona oda ia henia aveni badana ena lahi “ena siahu be nega 7 amo do idia habadaia, guna ena siahu ia hereaia” bona unai memero toi be “lahi badana lalonai idia negea.” Aneru goadana ta ese mase amo idia ia hamauria.—Dan. 3:1-6, 19-28.
© The Trustees of the British Museum. Licensed under CC BY-NC-SA 4.0. Source
Idia gabua biriki latanai Nebukanesa ena ladana idia koroa
Babulonia gunana ena biriki ese Baibel ena hereva idia hamomokania danu. Unai biriki momo dekenai king hanamoa herevadia idia koroa. Unai hereva ta ia gwau: “Nebukanesa, Babulonia ena King . . . Lau, King Badana ese egu ruma lau haginia . . . Mani egu tubudia ese ia lalonai do idia lohia ela bona hanaihanai.” Unai hereva be Daniela 4:30 ena hereva hegeregerena, unuseniai Nebukanesa be mai hekokoroku ida, ia gwau: “Egu noho gabuna bona egu lohia siahu ena hairai totona inai Babulonia siti badana lau haginia, bona egu goada amo unai lau karaia, ani?”
