1, 2. (a) Hari idau taudia be dahaka hekwakwanai idia davaria? (Laulau ginigunana herevalaia.) (b) Aposetolo Paulo be dahaka hadibaia hereva ia henia, bona edena henanadai do ita lalodia?

LAGANI 30 gunanai, Osei ^[1] be Witnes lasi tauna. Ia be Ghana amo Europe tanona dekenai ia mai. Ia gwau: “Gabeai lau laloparara taunimanima momo be lau idia laloa lasi. Bona lau hoa badina Europe be keru gabuna. Airport lau rakatania bona nega ginigunana paraka lau mamia neganai, lau tai matamaia.” Lagani ta lalonai Osei be gaukara ta ia davaria lasi, badina gado ia diba lasi. Ia be ena ruma bese amo ia noho daudau dainai, idia ia reaia bada bona ia lalometau.

² Bema unai be oi, oi ura ma haida ese edena dala ai oi do idia kara henia? Kingdom Hall ta dekenai oi lao neganai, oi ura ma haida ese oi idia welkam henia, herevana emu tano o kopina kala be idau, a? Momokani, Baibel ese Keristani taudia ia hadibaia, “heabidae karana do [idia] laloaboio lasi,” anina be idau taudia dekenai hebogahisi do idia hahedinaraia. (Heb. 13:2) Unai dainai  mani inai henanadai ita lalodia: Iehova ese idau taudia be edena bamona ia laloa? Dahaka dainai iseda lalohadai idau taudia dekenai ita haidaua be namo? Bona edena dala ai idau tano taudia ita durua diba, iseda kongrigeisen idia moalelaia totona?

3, 4. Esodo 23:9 hegeregerena, Israela taudia ese idau bese taudia be edena bamona idia kara henia be namo, bona dahaka dainai?

³ Iehova ese ena taunimanima be Aigupito amo ia ruhaia murinai, idia dekenai taravatu ia henia, unai amo idia ida idia lao idau bese taudia do idia laloa bada. (Eso. 12:38, 49; 22:21) Ena be idau tano taudia be vaia idia kara namo henidia lasi, to Iehova ese mai lalokau ida idia ia naria. Ia naridia dalana ta be maoro ia henidia uma gabu ai aniani idia gogoa totona.​—Lev. 19:9, 10.

⁴ Iehova ese Israela taudia ia oda henia lasi, idau bese taudia do idia matauraia, to ia hamaorodia edia hemami idia laloa totona. (Esodo 23:9 duahia.) Idia be “idau tauna ena mamina” idia diba. Oibe, idia be igui hesiai taudia ai idia do lao lasi neganai, Aigupito taudia ese idia dadaraidia, badina edia bese bona tomadiho dalana be idau. (Gen. 43:32; 46:34; Eso. 1:11-14) Ena be unai nega ai edia mauri ia auka, to Iehova ese ia haganidia idau bese taudia be edia “bese korikori” taudia hegeregerena do idia kara henidia.​—Lev. 19:33, 34.

5. Edena dala ai Iehova ena lalohadai idau tano taudia dekenai ita hahedinaraia diba?

⁵ Hari danu ita abia dae, Iehova be iseda kongrigeisen heboudia dekenai idia mai idau tano taudia ia laloa bada. (Deu. 10:17-19; Mal. 3:5, 6) Bema idia davaria noho hekwakwanai ita laloa, hegeregere ma haida ese idia lalodika henidia o edia gado be idau dainai idia hekwarahi, dala do ita tahua idia dekenai hebogahisi ita hahedinaraia totona.​—1 Pet. 3:8.

6, 7. Edena dala ai Keristani ginigunadia ese ma ta inai henia karana idia dadaraia?

⁶ Keristani ginigunadia ese Iuda taudia huanai ia noho inai heheni karana hanaia dalana idia dibaia. Pentekoste 33 C.E. ai, Ierusalema ai idia noho Keristani taudia ese Keristani dala idia badinaia matamaia taudia idia abia dae, herevana idia be idau tano taudia. (Kara 2:5, 44-47) Iuda Keristani taudia ese idau tano Keristani taudia be mai lalokau ida idia kara henia, unai amo idia hahedinaraia idia ese “heabidae karana” ena anina idia lalopararalaia.

⁷ To, Keristani kongrigeisen ginigunana ena namba ia bada daekau noho lalonai, idia huanai hekwakwanai ma ta ia vara. Grik gado ai idia hereva Iuda taudia idia maumau, badina edia vabu taudia be idia kara namo henidia lasi. (Kara 6:1) Unai hekwakwanai hamaoromaoroa totona, aposetolo taudia ese tatau 7 idia abia hidi, unai amo ibounai dekenai aniani idia haria namonamo diba. Unai tatau ibounai 7 be mai edia Grik ladadia, unai ese ia hahedinaraia aposetolo taudia idia ura Keristani taudia huanai ia vara hekwakwanai idia hamaoromaoroa.​—Kara 6:2-6.

8, 9. (a) Edena bamona do ita diba ita be bese ma ta ita lalodika henia kava? (b) Edena kara ita dadaraia be namo? (1 Pet. 1:22)

⁸ Ena be ita lalopararalaia o lasi, to ita ibounai be nega haida iseda kastom hegeregerena gau ita karaia. (Roma 12:2) Nega momo ita kamonai iseda dekena taudia, gaukara o sikuli turadia be ma haida idia gwauraia dika, badina edia bese, tano,  o kopina kala be idau. Ita danu be unai ita karaia, a? Bona bema ta be iseda tano o mauri dalana ia hevasehalaia, dahaka do ita karaia?

⁹ Nega sisina daudau lalonai, aposetolo Petero be Iuda lasi taudia ia lalodika henidia kava, to metairametaira ena kudouna amo unai hemami ia kokia. (Kara 10:28, 34, 35; Gal. 2:11-14) Unai hegeregerena, bema ita itaia ita be ma ta ita lalodika henia kava o iseda bese ita abia isi, namona be iseda kudouna amo unai hemami ita kokia haraga. (1 Petero 1:22 duahia.) Laloatao, ita be sibona iseda goada amo hahemauri ita abia diba lasi. Bona ena be iseda tano o bese be idauidau, to ita ibounai be goevadae lasi. (Roma 3:9, 10, 21-24) Unai dainai, dahaka dainai ita laloa ita be ma haida ita hereaia? (1 Kor. 4:7) Namona be aposetolo Paulo hegeregerena ita laloa, ia ese horoa Keristani taudia ia hamaoroa, idia be “idau taudia lasi bona idau bese taudia lasi, to . . . bese tamona bona Dirava ena ruma bese taudia.” (Efe. 2:19) Bema ita hekwarahi idau bese o tano taudia ita lalonamo henidia totona, ita be mauri matamata ita badinaia unai.​—Kol. 3:10, 11.

10, 11. Boasi ese Ruta ia kara henia dalana amo, edena dala ai Iehova ena lalohadai ia hahedinaraia?

¹⁰ Boasi ese Ruta ia kara henia dalana amo Iehova ena lalohadai idau bese taudia dekenai ia hahedinaraia. Boasi be ena uma sekea totona ia lao neganai, idau bese hahinena ta ia itaia, ia be bali utua taudia murinai bali momoru ia gogoa. Ena be Ruta be mai ena maoro bali ia gogoa totona, to ia be gwaumaoro ia abia guna. Boasi be unai ia kamonai neganai, iena tatau ia hamaoroa idia guia vadaeni bali haida do idia kokia bona Ruta ese do ia gogoa.​—Ruta 2:5-7, 15, 16 duahia.

¹¹ Ia vara gauna ese ia hahedinaraia Boasi be Ruta ia laloa, badina ia be idau bese hahinena. Maoro ia henia Ruta be hahine matamatadia ida do ia gaukara, unai amo uma ai idia gaukara tatau ese ia do idia hahekwakwanaia lasi. Danu, ia dekenai aniani bona ranu ia henia, uma ai idia gaukara taudia dekenai ia karaia hegeregerena. Ma danu, Boasi ese ogogami idau bese hahinena be mai manau ida ia hereva henia.​—Ruta 2:8-10, 13, 14.

12. Bema idau tano taudia dekenai hebogahisi ita hahedinaraia, dahaka ia vara diba?

¹² Boasi ia itaia, Ruta be ena ravana, Naomi, ia lalokau henia dainai, sibona ena ura ia dadaraia bona danu ia moale badina ia be Iehova ia tomadiho henia matamaia. Boasi ese ia hahedinaraia hebogahisi karana amo inai ita dibaia, Iehova be ena heduru idia noia taudia dekenai noho hanaihanai lalokauna ia hahedinaraia. (Ruta 2:12, 20; Aon. 19:17) Hari danu, bema “taunimanima idauidau” ita kara namo henia, hereva momokani do idia dibaia bona Iehova ena lalokau do idia mamia.​—1 Tim. 2:3, 4.

13, 14. (a) Dahaka dainai nega ginigunana Kingdom Hall dekenai idia mai taudia ita welkam henia be namo? (b) Dahaka ese oi ia durua diba idau tano taudia oi hedavari henia totona?

¹³ Idau tano amo idia mai taudia be nega ginigunana Kingdom Hall dekenai idia mai neganai, idia ita welkam henia be namo, unai dala amo hebogahisi ita hahedinaraia. Idia be nega haida idia hemarai bona idia ura sibona idia noho. Reana edia mauri dalana o edukeisen dainai, nega haida do idia laloa tano ma ta taudia amo idia be maragi herea. Unai dainai namona be ita hahedinaraia idia ita laloa bada. JW Language app ese oi ia durua diba idau tano taudia be  edia gado ai oi welkam henidia totona. —Filipi 2:3, 4 duahia.

¹⁴ Reana nega haida do oi hemarai idau bese taudia oi hedavari henia totona. Unai bamona hemami oi hanaia totona, reana idia ida emu famili eiava noho dalana oi herevalaia diba. Reana do oi davaria gau haida dekenai umui be hegeregere—herevana ia be momokani eiava oi lalohadailaia gauna sibona—bona tano o bese ta ta edia mauri daladia be mai edia namo bona manoka gaudia.

15. Edena dala ai idau tano taudia ita kara henia be namo?

¹⁵ Bema oi ura kongrigeisen lalonai ma haida oi durua, namona be sibona oi nanadaia, ‘Bema lau be idau tano dekenai lau noho, lau ura ma haida ese edena bamona lau do idia kara henia?’ (Mat. 7:12) Namona be idau tano taudia edia kara ita haheaukalaia. Matamanai, reana edia kara eiava lalohadai do ita lalopararalaia lasi. To namo lasi idia ita doria iseda mauri dalana idia manadalaia totona, namona be edia noho dalana hegeregerena idia ita abia dae.—Roma 15:7 duahia.

16, 17. (a) Idau tano taudia ita dibaia totona, dahaka ita karaia diba? (b) Edena dala ma haida ai iseda tadikaka taihu ita durua diba?

¹⁶ Bema idau tano taudia edia tano bona kastom ita dibaia, do ia auka lasi idia ida ita herevahereva o gaukara hebou totona. Reana iseda ruma bese tomadiho lalonai nega ita atoa diba tahua gaukara ita karaia totona, unai amo iseda kongrigeisen o teritori ai idia noho taudia do ita diba namonamo. Idau tano taudia ita dibaia dalana ma ta be aniani totona iseda ruma dekenai idia ita boiria diba. Iehova be “idau bese taudia dekenai abidadama ena iduara ia kehoa” dainai, iseda ruma ena  iduara be “iseda abidadama tamona tadikaka bona taihu,” idau tano taudia unai, dekenai ita kehoa, a?​—Kara 14:27; Gal. 6:10; Iobu 31:32.

¹⁷ Bema nega ita atoa idau tano taudia ita bamoa totona, edia hekwarahi karana do ita laloa bada. Reana idia hekwarahi gado idia dibaia totona, bona ita durudia diba. Danu, bema idia be ruma o moni gaukara idia tahua, idia ita durua diba. Unai dala amo iseda tadikaka taihu ita durua bada diba. —Aon. 3:27.

18. Idau tano taudia ese daika ena haheitalaia idia tohotohoa be namo?

¹⁸ Momokani, idau tano taudia be idia ura bada idia noholaia tano taudia edia mauri dalana idia manadalaia. Ruta be haheitalai namona. Ia karaia gauna ginigunana be, unai tano taudia edia kastom ia matauraia, bali gogoa totona gwaumaoro ia abia guna. (Ruta 2:7) Ia ese unai maoro ia gaukaralaia kerere lasi. Gau iharuana be, ia dekenai idia hahedinaraia hebogahisi karana be mai moale ida ia abia dae. (Ruta 2:13) Idau tano taudia be unai idia karaia neganai, unai tano taudia bona edia tadikaka taihu ese do idia matauraidia.

19. Dahaka dainai idau tano taudia ita welkam henia be namo?

¹⁹ Ita moale badina Iehova ena hebogahisi karana dainai, bese idauidau taudia be sivarai namona idia kamonai diba. Edia hanua ai, reana ia auka Baibel idia stadilaia o Iehova ena taunimanima idia bamoa totona. To hari, idia be ita idia bamoa diba, unai dainai namona be iseda bese korikoridia bamona idia ita durua. Ena be tauanina dalanai ita dabu, to idia ita hebogahisi henia neganai, Iehova ena lalokau idia dekenai ita hahedinaraia. ‘Dirava ita tohotohoa’ dainai, namona be ita hekwarahi idau tano taudia ita welkam henia totona.—Efe. 5:1, 2.