New York City, Staten Island ai, Betele dekenai tadikaka be lagani ta mai kahana lalonai idia gaukara, WBBR reidio steiseni idia haginia totona. Gabu idia hagoevaia murinai, gaukara taudia totona ruma badana ta bona kohu atoa rumana ma ta idia haginia. Unai gaukara idia haorea murinai, tadikaka be kohu idia hegaegaelaia reidio brodkastin idia hamatamaia totona. To hekwakwanai haida idia hamaoromaoroa be namo.

Tadikaka idia hekwarahi steiseni ena antenna idia atoa totona. Unai antenna ena lata be 91 mita bona au rua edia lata 61 mita huanai do idia tauadae be namo. Nega ginigunana unai idia tohoa, to idia kwalimu lasi. To, Iehova ena heduru dainai dokonai idia kwalimu. Unai gaukara ia durua tadikaka ta, Calvin Prosser, ia gwau: “Bema nega ginigunana unai antenna ai atoa namonamo, reana sibona emai ladana do ai abia isi.” Tadikaka ese hanamoa ibounai be Iehova dekenai idia henia, to edia hekwakwanai ia ore lasi.

Reidio brodkastin be matamata, bona ena kohu ta be sitoa dekenai ai davaria diba lasi. To, tadikaka be ta ese ia gaukaralaia vadaeni gauna ta idia davaria. Idia ese maikrofon ta idia hoia lasi, to telefon idia gaukaralaia. February ena hanuaboi ta ai, tadikaka idia ura idia karaia gauna idia tohoa. Bona brodkastin idia matamaia totona, tadikaka ese Basileia anedia idia abia. Unuseni ia noho tadikaka ta, Ernest Lowe ese unai negai ia vara kiri gauna ta ia gwauraia. Ia gwau idia ane noho lalonai, Judge Rutherford b ia rini, ia be reidio  amo edia ane ia kamonai, ia be Brooklyn dekenai ia noho, ena daudau be kilomita 25 bamona.

Tadikaka Rutherford ia gwau: “Unai regerege umui hadokoa. Umui be pusikasi idia taitai bamona!” Tadikaka be idia hemarai bona karaharaga program idia hadokoa. To idia diba edia reidio be ia gaukara bona idia hegaegae edia brodkastin ginigunana idia hamatamaia totona.

February 24, 1924 ai, edia broakastin ginigunana idia karaia noho lalonai, Tadikaka Rutherford ese reidio steiseni ia hahelagaia bona ia gwau unai steiseni do idia gaukaralaia,“King Keriso ese ia henia gaukarana idia karaia totona.” Ia hahedinaraia unai steiseni idia karaia ena badina be “taunimanima idia durua Baibel ena hereva bona hari ita noho negana idia lalopararalaia totona.”

Unai brodkastin ginigunana be anina namona ia havaraia. Unai reidio steiseni be lagani 33 lalonai idia gaukaralaia, Iehova ena taunimanima edia reidio program idia halasia totona.

July 1924 ai, Bible Student taudia be Columbus, Ohio dekenai edia hebouhebou idia abia. Bona idia be tano momo amo idia mai bona edia gado ai tok idia kamonai, hegeregere Arabic, English, French, German, Greek, Hungaria, Italy, Lithuania, Polish, Russia, Scandinavia, bona Ukraine. Program ena tok haida be reidio amo idia halasia, bona palani idia karaia Ohio State Journal niuspepa ese hebouhebou program ena atikol idia torea totona.

Thursday, July 24 ai, hebouhebou idia lao tadikaka taihu 5,000 mai kahana be unai siti ai idia haroro. Idia ese buka 30,000 bamona idia hariharilaia bona Baibel stadi tausen momo idia hamatamaia. The Watch Tower ese unai dina ia gwauraia, “hebouhebou ena kahana namo hereana.”

Friday, July 25 ai, Tadikaka Rutherford be ena tok ta lalonai, mai gari lasi ida dubu gunalaia taudia ia hahemaoro henia revarevana ta ia duahia. Ia hahedinaraia, politikol, tomadiho bona bisinesi oreadia be taunimanima idia koua, Dirava ena Basileia ena hereva momokani idia dibaia totona, unai ese taunimanima dekenai namo do ia havaraia. Danu, ia hahedinaraia unai tatau be idia kerere, badina idia ese League of Nations idia durua bona idia gwau unai be Dirava ena lohia dalana. Bible Student be mai gari lasi ida taunimanima dekenai unai sivarai idia harorolaia be namo.

 Gabeai, The Watch Tower ena atikol ta ese ia hahedinaraia, Columbus ai unai hebouhebou ese tadikaka edia abidadama ia hagoadaia. Bona mai gari lasi ida idia haroro noho be namo, ena be dagedage do idia davaria. Tadikaka Leo Claus, be unai hebouhebou dekenai ia lao bona ia gwau: “Hebouhebou ia ore murinai, mai moale ida emai teritori dekenai unai hahemaoro sivaraina ai harorolaia.”

October ai, Bible Student taudia ese pepapepa ladana, Ecclesiastics Indicted ena kopi milioni momo idia hariharilaia, unai be Tadikaka Rutherford ese ia duahia revareva idia printaia ena kopi. Cleveland, Oklahoma ena taoni maragina ai, Frank Johnson be pepapepa ia hariharilaia murinai, miniti 20 bamona do ia naria tadikaka ese idia hedavari henia totona. To taunimanima ese idia itaia gabuna ai do ia naria lasi, badina ia harorolaia sivaraina dainai idia badu taudia be ia idia tahua noho. Unai dainai, Tadikaka Johnson be dubu ta lalonai ia hunia. Ia itaia unai dubu ai ta ia noho lasi dainai, Ecclesiastics Indicted pepapepa haida be pris ena Baibel lalonai bona sea ta ta dekenai ia atoa. Unai ia karaia haraga bona ia raka lasi. Bona ia itaia miniti haida idia do noho dainai, dubu rua dekenai unai bamona ia karaia danu.

Frank be karaharaga tadikaka ese do idia hedavari henia gabuna dekenai ia giroa lou. Ia be motuka edia petrol abia gabuna ena murinai ia hunia noho. Ia idia tahua taudia be motuka amo idia heau hanai bona ia idia itaia lasi. Idia lao murinai, Frank do idia udaia tadikaka taihu idia ginidae, idia danu be unai gabu kahirakahira idia haroro, ia idia udaia bona idia lao.

Tadikaka ta ia gwau: “Ai lao noho lalonai unai dubu toi ai hanaia. Bona unai dubu ta ta edia vairanai, taunimanima 50 mai kahana idia gini noho. Idia haida be unai pepapepa idia duahia noho bona ma haida be pepapepa idia abia isi pris ese do ia itaia totona. Oibe, nega maorona ai unai gabu ai rakatania! To Iehova, iseda Dirava ai tanikiu henia, badina ai ia gimaia bona mai aonega ida unai sivarai ai harorolaia bona ta ese ai ia dogoatao lasi.”

Tano ma haida ai, Bible Student taudia be mai gari lasi ida idia haroro. France ena not kahana ai, tadikaka Józef Krett be Poland amo idia mai mainin gaukara taudia ia haroro henia. Bona ia be tok ta do ia karaia, sinado be “The Resurrection of the Dead Soon.” Tadikaka taihu ese taunimanima dekenai invateisen idia henia neganai, unai taoni ai ia noho pris be ena tomadiho taudia ia hamaoroa do idia lao lasi. To ena hereva idia abia dae lasi. Taunimanima 5,000 mai kahana idia lao, pris tauna danu! Tadikaka Krett ese pris ia hamaoroa, ia abia dae gaudia do ia herevalaia, to ia ura lasi. Tok murinai, Tadikaka Krett be taunimanima dekenai ena pablikeisen ibounai ia hariharilaia, badina idia ura diba ma haida idia abia.—Amo. 8:11.

Africa ai, Tadikaka Claude Brown be Gold Coast, hari idia gwauraia, Ghana, dekenai sivarai namona ia harorolaia. Ia ese tok ia henia bona pablikeisen momo ia hariharilaia dainai, taunimanima momo be hereva momokani idia kamonai. John Blankson, unai negai muramura ia stadilaia tauna be, Tadikaka Brown ena tok ta kamonai totona ia lao. Karaharaga ia laloparara, ia be hereva momokani ia davaria. John ia gwau: “Hereva momokani lau moalelaia dainai, mai ura ida egu sikuli gabuna ai lau harorolaia.”

John be Baibel amo ia diba Dirava be Toi Tamona lasi. Unai dainai dina ta, Anglican  dubu dekenai ia lao bona pris dekenai unai totona ia henanadai. Pris ese ia lulua bona mai boiboi ida ia gwau: “Oi be Keristani tauna lasi; oi be Diabolo ena taunimanima. Iniseni amo oi siri!”

John be ruma dekenai ia giroa lou neganai, pris dekenai revareva ta ia siaia, bona ia boiria pablik gabuna ta ai do idia hedavari bona Toi Tamona idia herevalaia. To pris be John ena sikuli gabuna ai sikuli ena tisa badana ia samania, unai dainai tisa ese John ia hamaoroa bema ia be pris dekenai revareva ta ia siaia.

John ia gwau: “Oibe, tisa.”

Unai dainai tisa ese John ia hamaoroa pris dekenai sori revarevana ta do ia siaia. Bona John ena revareva be inai bamona ia torea:

“Tau badana e, egu tisa ese lau ia hamaoroa oi dekenai sori revarevana ta do lau siaia, to unai do lau karaia bema oi hahedinaraia oi be hahediba hereva koikoi oi hadibaia.”

Tisa be ia hoa bona ia henanadai: “Blankson, oi ura inai bamona hereva oi torea, a?”

“Oibe, tisa. Lau torea herevadia be inai sibona.”

“Inai sikuli amo oi do ai kokia. Bema gavamani ese ia durua tomadihona ena pris oi hahemaoro henia, iniseniai do oi sikuli lasi.”

“To, tisa e, . . . ai dekenai leseni oi henia bona gau haida dekenai ai daradara neganai, oi ai nanadaia, ani?”

“Oibe, unai bamona umui karaia.”

“Tisa e, pris dekenai unai bamona lau karaia. Ia be ai dekenai Baibel ena hereva ia hadibaia bona henanadai ta lau henia. Bema ia be unai henanadai ia haerelaia lasi, dahaka dainai ia dekenai sori revarevana do lau siaia?”

Blankson be sikuli amo idia kokia lasi. Bona sori revarevana ia siaia lasi.

Unai lagani ai idia karaia gaukaradia totona The Watch Tower ia gwau: “Davida ida ita gwau diba: ‘Oi ese lau dekenai goada do oi henia lau tuari totona.’ (Sal. 18:39) Unai lagani lalonai goada bada ai abia, badina ai itaia Iehova ena gaukara lalonai ai ia durua. Ena hesiai taudia be mai moale ida sivarai namona idia harorolaia.”

Lagani ena dokona ai, tadikaka be palani idia karaia reidio steiseni ma ta idia karaia totona. Unai dainai, Chicago badinai gaukara idia hamatamaia. Unai steiseni matamata ena ladana idia gwauraia HEREVA. Unai steiseni totona idia gaukaralaia kohudia be mai edia goada dainai, daudau gabudia ai idia noho taudia ese Basileia ena sivarai idia kamonai diba.

Lagani 1925 ai, Iehova ese tadikaka ia durua dainai, Apokalupo karoa 12 ena hereva idia lalopararalaia. To unai diba matamata ese ma haida do ia hahekwakwanaia. Momo idia moale, badina guba dekenai ia vara gauna idia lalopararalaia namonamo bona unai ese tanobada ai Dirava ena taunimanima ia durua dalana idia itaia.