Mai edia kara namo (moral values) taudia be maoro bona kerere edia idau idia lalopararalaia goevagoeva. Unai taudia be edia hemami hegeregerena abia hidi idia karaia lasi. To, maoro bona kerere dekenai idia dibaia gaudia ese idia ia durua kara namodia idia karaia totona​—ena be haida ese idia itaia eiava lasi.

Natudia be maoro bona kerere dekenai infomeisen kereredia idia abia, hegeregere sikuli turadia, miusiki, muvi bona TV program idauidau amo. Unai infomeisen idauidau ese idia dibaia gaudia, maoro bona kerere dekenai daradara ia havaraia diba.

Momokani natudia idia bada neganai unai ia vara. Buka ta ladana, Beyond the Big Talk ia gwau, unai nega lalonai, “namona be turadia edia laloani karadia bona TV program idauidau ese idia havaraia lada bada abia karana idia lalopararalaia, bona abia hidi idia karaia neganai namona be kara maorona idia badinaia, herevana edia turadia do idia lalotamona lasi.” Unai ese ia hahedinaraia goevagoeva, natudia be idia do maragi neganai treinini idia abia be namo.

Maoro bona kerere oi hahedinaraia goevagoeva.

BAIBEL ENA HAKAUA HEREVANA: “Taunimanima badadia . . . ese edia darana idia gaukaralaia karana amo, sibodia idia hadibaia, unai amo maoro bona kerere edia idau idia dibaia diba.”​—Heberu 5:14.

• Maoro bona kerere idia hahedinaraia herevadia gaukaralaia. Hanaihanai idia vara gaudia oi gwauraia bona edia idau oi hahedinaraia: Hegeregere, “Inai be momokani; unai be momokani lasi.” “Inai kara be maoro; unai kara be maoro lasi.” “Inai be kara namona; unai be kara namona lasi.” Gabeai, emu natuna be kara namodia do ia hahedinaraia.

• Maoro bona kerere edia badina oi gwauraia hedinarai. Hegeregere, inai bamona henanadai oi henia: Dahaka dainai mai momokani ida ita kara be gau badana? Edena dala ai koikoi karana ese hetura karana ia hadikaia diba? Dahaka dainai henaohenao be kerere? Haere maorodia oi henia unai amo emu natuna oi durua maoro bona kerere ia lalopararalaia totona.

• Kara namodia hahedinaraia ena namo oi gwauraia. Oi gwau diba: “Bema mai momokani ida oi kara, haida ese oi do idia ura henia” o “Bema kara namodia oi hahedinaraia, taunimanima do idia ura oi idia bamoa.”

Emu ruma bese lalonai kara namodia oi hahedinaraia.

BAIBEL ENA HAKAUA HEREVANA: “Do umui hamomokania noho umui be edena bamona taudia.”​—2 Korinto 13:5.

•   Emu ruma bese lalonai kara namodia oi hahedinaraia be namo, unai amo mai momokani ida oi gwau diba:

  • “Emai ruma bese lalonai ai koikoi diba lasi.”

  • “Haida ai botaia lasi eiava idia dekenai ai boiboi lasi.”

  • “Ai hereva auka lasi eiava ta ai gwauraia dika lasi.”

Unai amo emu natuna do ia diba kara namodia be taravatu sibona lasi, to idia be ruma bese taudia ese do idia badinaia diba karadia.

• Hanaihanai emu natudia dekenai ruma bese lalonai do umui badinaia kara namodia oi herevalaia. Dina ta ta ai idia vara gaudia oi gaukaralaia emu natudia oi hadibaia totona. Emu kara be TV ai idia hedinarai taudia eiava sikuli turadia ida oi hahegeregerea diba. Emu natuna dekenai inai bamona henanadai oi henia: “Oi be dahaka do oi karaia?” “Iseda ruma bese ese edena dala ai unai idia hamaoromaoroa diba?”

Idia oi durua kara namodia idia goadalaia totona.

BAIBEL ENA HAKAUA HEREVANA: “Namona be lalomamina namona umui dogoatao noho.”​—1 Petero 3:16.

• Edia kara namodia dainai idia oi hanamoa. Bema emu natuna be kara namodia ia hahedinaraia, ia oi hanamoa bona ena badina oi gwauraia hedinarai. Hegeregere, oi gwau diba: “Oi be mai momokani ida oi kara. Oi dekenai lau moale.” Bema emu natuna be ia karaia kerere ta ia gwauraia hedinarai, mai hemataurai ida oi hanamoa murinai ena kerere oi hamaoromaoroa.

• Kerere hamaoromaoroa. Emu natudia oi durua edia kara dainai ia vara dika idia abia dae. Natudia ese dahaka kerere idia karaia bona edena dala ai edia kara be edia ruma bese taudia edia amo ia idau karana idia dibaia be namo. Tama sina haida be idia ura lasi edia natudia idia hamaoroa idia karaia karana be kerere, badina idia ura lasi do idia lalohisihisi, to emu natudia ida edia kerere oi herevalaia karana ese edia lalomamina do ia treinia, maoro bona kerere idia dibaia totona.