“Oiemu hereva be momokani.”​—⁠IOA. 17:17.

1. Iehova ena Witnes tauna ta be nega ginigunana oi hereva henia neganai, dahaka ese emu lalona ia veria?

 IEHOVA ENA WITNES tauna ta be nega ginigunana oi hereva henia neganai, dahaka ese emu lalona ia veria? Reana ita momo ese ita laloatao gauna be, iseda henanadai ibounai ia haerelaia totona ia ese Baibel ia gaukaralaia. Bona ita moale badina Baibel amo Dirava ena ura tanobada totona, mase taudia dekenai dahaka ia vara, bona toreisi lou helarona ita dibaia!

2. Dahaka dainai Baibel ena hereva oi laloa bada?

² Ita stadi noho lalonai ita laloparara Baibel be mauri, mase bona nega vaira ai do idia vara gaudia sibona ia herevalaia lasi, to gau ma haida ia herevalaia danu. Tanobada ibounai buka ma ta be Baibel bamona lasi, badina ena sisiba ese ita ia durua bada. Ena hereva idia badinaia taudia be edia mauri lalonai idia kwalimu bona idia moale. (Salamo 1:1-3 duahia.) Keristani taudia momokanidia idia abia dae Baibel be “taunimanima edia hereva lasi, to ia be momokani Dirava ena hereva.” (1 Tes. 2:13) Inai stadi lalonai Dirava ena Hereva idia matauraia bona dadaraia taudia edia sivarai haida do ita itaia.

HEKWAKWANAI BADANA TA IDIA HAMAOROMAOROA

3. Edena hekwakwanai ese Keristani kongrigeisen ena lalotamona karana ia hadikaia? Bona dahaka dainai idia hamaoromaoroa be auka?

³ Dirava ese kopina ia utua lasi Idau Bese tauna Korenelio ia horoa, bena lagani 13 murinai, Idau Bese taudia ma haida be Keristani taudia ai idia lao. Unai nega ai, hekwakwanai ta ese Keristani kongrigeisen ena lalotamona karana ia hadikaia. Idau Bese taudia be bapatiso idia abia totona, Iuda taudia edia kastom hegeregerena kopina idia utua guna be maoro, a? Iuda tauna dekenai unai be henanadai aukana. Mose ena Taravatu idia badinaia Iuda taudia be Idau Bese taudia edia ruma lalonai idia  vareai diba lasi. Unai dainai, idia ese Idau Bese Keristani tauna be edia tadikaka bamona idia kara henia be auka! Iuda Keristani taudia be dagedage idia davaria, badina Iuda tomadiho idia rakatania. Unai dainai, bema idia ese kopina utua lasi Idau Bese taudia be edia Keristani tadikaka bamona idia abia dae, unai dagedage karana do ia bada. To, Iuda Keristani taudia bona Idau Bese taudia be tadikaka bamona idia kara heheni dainai, idia be Iuda tomadihona amo idia idau.​—⁠Gal. 2:11-14.

4. Hekwakwanai ta hamaoromaoroa totona, daidia idia hebou? Bona dahaka henanadai haida idia vara?

⁴ Lagani 49 C.E. ai, aposetolo taudia bona tau badadia, kopina idia utua Iuda taudia unai, be Ierusalema ai idia hebou “unai gaudia idia herevalaia totona.” (Kara 15:6) Unai hebou ai, idia be diba lasi taudia bamona idia hereva kava hereva kava lasi, to Baibel ena hahediba herevadia edia anina idia tahua namonamo bona herevalaia. Bona ibounai be edia lalohadai idia gwauraia hedinarai. To, unai hekwakwanai be edena bamona do idia hamaoromaoroa? Idia ta ta be edia lalohadai do idia badinaia sibona, bona Idau Bese taudia do idia inai henia noho, a? Do idia naria ela bona Israela ai ia vara dagedage karana ia doko bena abia hidi ta do idia karaia, a? Eiava edia lalohadai be idau to haida ese idia doria dainai, edia abia hidi do idia haidaua, a?

5. Ierusalema ai idia karaia hebou be edena dala ai dubu ma haida edia hebou amo ia idau?

⁵ Dubu gunalaia taudia edia hebou lalodiai, nega momo haida ese ma haida idia doria edia lalohadai idia abia dae totona. To, Ierusalema ena hebou ai unai bamona idia karaia lasi, aposetolo taudia bona tau badadia be mai lalotamona ida abia hidi idia karaia. Edena dala ai unai idia karaia? Ena be edia lalohadai be idauidau, to unai hebou ai idia noho taudia ibounai be Dirava ena Hereva idia matauraia bona idia gaukaralaia unai hekwakwanai idia hamaoromaoroa totona.​—⁠Salamo 119:97-101 duahia.

6, 7. Edena dala ai Toretore Helagadia amo kopina utua karana ena hepapahuahu idia hamaoromaoroa?

⁶ Amosa 9:11, 12 ena hereva ese idia ia durua unai hekwakwanai idia hamaoromaoroa totona. Amosa ena hereva be Kara 15:16, 17 ai, ia gwau: “Do lau giroa mai bona Davida ena ruma, ia moru vadaeni gauna, do lau haginia lou. Bona idia hadikaia gaudia do lau haginia bona do lau hanamoa lou. Unai amo inai bese taudia oredia, bona egu ladana idia abia idau bese taudia be mai edia ura bada ida Iehova do idia tahua. Unai be Iehova ena hereva.”

⁷ Unai siri amo Iuda Keristani taudia idia laloparara Idau Bese taudia be Keristani taudia ai idia lao totona, edia kopina idia utua be anina lasi. Dahaka dainai? Badina Iuda Keristani taudia ese kopina idia utua Idau Bese taudia be edia tadikaka bamona idia abia dae. (Eso. 12:48, 49) Hegeregere, Bagster ena Septuagint Baibel ai Eseta 8:17 ia gwau: “Idau Bese taudia momo be edia kopina idia utua, bona Iuda taudia ai idia lao.” Bona Kara bukana lalonai “inai bese taudia oredia” be Iuda taudia bona kopina idia utua Idau Bese taudia ia herevalaia. Danu, Toretore Helagadia ia hahedinaraia idia bona kopina idia utua lasi “idau bese taudia,” be Dirava ena ladana idia abia dainai idia be bese tamona ai do idia lao. Unai dainai, Idau Bese taudia be Keristani taudia ai idia lao totona edia kopina idia utua be anina lasi.

8. Dahaka ese Iuda Keristani taudia ia durua mai gari lasi ida abia hidi idia karaia totona?

⁸ Dirava ena Hereva bona ena lauma helaga ese Keristani taudia ia durua mai “lalotamona” ida abia hidi idia karaia totona. (Kara 15:25) Ena be unai abia hidi dainai, Iuda Keristani taudia be dagedage bada do  idia davaria to idia badinaia, badina unai be Baibel ena hereva hegeregerena.​—⁠Kara 16:4, 5.

EDIA IDAU IA HEDINARAI GOEVAGOEVA

9. Hahediba hereva koikoidia ese tomadiho momokani idia hadikaia ena badina badana be dahaka? Bona edena hahediba hereva badana idia mogea?

⁹ Aposetolo Paulo ia gwau aposetolo taudia ibounai idia mase murinai, hahediba hereva koikoidia ese tomadiho momokani do ia hadikaia. (2 Tesalonika 2:3, 7 duahia.) Kongrigeisen lalonai maduna idia huaia taudia haida danu be hahediba hereva momokanidia idia dadaraia. (2 Tim. 4:3) Paulo ese iena nega ai idia noho elda taudia ia sisiba henidia: “Umui huana amo tatau haida do idia toreisi bona hereva momokani do idia mogea. Bona hahediba taudia do idia hakaua siri, edia murinai idia raka totona.” (Kara 20:30) Buka ta (The New Encyclopædia Britannica) ese unai kara ena badina ia gwauraia: “Diba bada Grik Keristani taudia idia ura edia abidadama idia gwauraia hedinarai, bona idia ura dirava koikoi idia tomadiho henia taudia edia lalona idia veria dainai, Grik lalohadai idia gaukaralaia.” Hegeregere, Baibel ena hahediba hereva badana, Iesu Keriso be Dirava ena Natuna, be hahediba hereva koikoidia ida idia mogea. Baibel ia gwau Iesu be Dirava ena Natuna, to Grik lalohadai idia abia dae taudia idia gwau, ia be Dirava.

10. Dubu gunalaia taudia ese haere maorona be edeseniai idia davaria diba?

¹⁰ Gabeai, dubu gunalaia taudia be dubu hebou badadia dekenai unai hahediba herevana idia hepapahuahulaia. Bema Baibel ena hereva idia tahua namonamo, haere maorona idia davaria diba. To, momo idia laloa Baibel ena hereva be anina lasi. Hebou idia do matamaia lasi neganai, momo be edia lalona idia hadaia vadaeni, bona idia ura lasi do idia haidaua. Edia hebou ai idia karaia abia hidi ibounai be Baibel ena hereva hegeregerena lasi.

11. Dubu gunalaia taudia be daidia edia hereva idia abia dae? Bona dahaka dainai unai bamona idia karaia?

¹¹ Dahaka dainai dubu gunalaia taudia be abia hidi idia karaia negadiai, Baibel idia gaukaralaia lasi? Diba bada tauna, Charles Freeman ia gwau, Baibel idia gaukaralaia lasi badina “edia hahediba herevana Iesu be Dirava, be Baibel ese ia hamomokania lasi.” To, Iesu be ena hereva amo ia hahedinaraia Dirava ese ia ia hereaia. Dubu gunalaia taudia ese Iesu ena hereva idia hakoikoia diba lasi dainai, dubu ena tau badadia edia hereva idia abia dae bona Evanelia bukadia edia hereva idia dadaraia. Hari inai negai danu, haroro taudia momo idia laloa dubu ena tau badadia edia hereva be mai anina bada, to Baibel be anina lasi! Pris taudia edia sikuli ia lao tauna ta ida Toi Tamona oi herevalaia neganai, reana unai kara oi itaia danu.

12. Pavapava Constantine be edena dala ai dubu gunalaia taudia ia biagua?

¹² Roma pavapavadia ese dubu heboudia momo idia biagua. Hegeregere, Profesa Richard Rubenstein be Nicaea Ena Hebou ai ia vara gauna ia herevalaia, ia gwau: “Pavapava matamatana Constantine ese bisop taudia be taga taudia ai ia halaodia. Lagani tamona lalonai, ia ese edia dubu, edia gaukara bona edia dagi ia henidia lou. Guna dirava koikoi edia pris dekenai ia henia hahenamo be bisop taudia ia henidia. Unai dainai, Constantine be Nicaea Ena Hebou ia biagua bona edia abia hidi ia haidaua diba.” Charles Freeman ia gwau: “Unai hebou murinai Constantine ese dubu gunalaia taudia dekenai siahu ia henia bona hahediba herevadia ia haidaua danu.”​—⁠Iamesi 4:4 duahia.

13. Dahaka dainai dubu gunalaia taudia be Baibel ena hereva momokanidia idia abia dae lasi?

¹³ Dubu gunalaia taudia idia ura lasi abia dae Iesu Keriso be Dirava ena Natuna, to  hanua taudia momo edia lalohadai be idau. Idia be Toretore Helagadia idia lalopararalaia bona ena hereva idia abia dae. To, dubu gunalaia taudia be Constantine ese ia henidia moni bona dagi idia ura henia bada dainai, Baibel ena hereva idia dadaraia. Unai nega ai tomadiho stadilaia tauna ta, Nyssa tauna Gregory be hanua taudia dekenai ia badu badina dabua hoihoilaia taudia, moni senisia taudia bona maketi taudia ibounai be Baibel idia herevalaia. Danu, ia moale lasi badina idia gwau Natuna be Tamana amo ia idau, Tamana ese Natuna ia hereaia, bona Dirava ese Natuna ia havaraia. Oibe, hanua taudia ese idia abia dae hahediba herevadia be Baibel amo. To, dubu gunalaia taudia bona Gregory be unai idia karaia lasi. Momokani, idia ese hanua taudia edia hereva idia kamonai be namo!

“AVA DIKADIA” BONA “WITI” IDIA TUBU

14. Edena bamona ita diba aposetolo edia nega murinai, horoa taudia haida be tanobada ai idia noho?

¹⁴ Iesu ena parabole ta ese ia hahedinaraia, aposetolo edia nega amo horoa taudia haida be tanobada ai do idia noho. Ia gwau idia be “witi” bamona “ava dikadia” huanai do idia tubu. (Mat. 13:30) Momokani, aposetolo taudia idia mase murinai, ita diba lasi edena tatau eiava orea be horoa taudia. To, ita diba haida be gari lasi ida Dirava ena Hereva idia badinaia, bona hahediba hereva koikoidia idia dadaraia. Mani tatau haida edia sivarai ita herevalaia.

15, 16. Dirava ena Hereva idia matauraia tatau haida be daidia?

¹⁵ France ena Bisop Badana Agobard, (779 C.E. ia vara bona 840 C.E. ia mase) be kaivakuku tomadiho henia karana, seint edia dubu, bona tomadiho karadia idauidau ia inai henia. Unai nega ai ia noho tauna ma ta be Bisop Claudius. Ia danu ese seint guriguri henidia karana, bona kaivakuku tomadiho henia karana ia inai henia. Lagani 1000 C.E. lalodiai, France ena Diakono Badana Berengarious, be Katolik dubu amo idia lulua, badina ia ese, paraoa bona wain be Iesu ena tauanina bona rarana korikorina ai ia lao hahediba herevana ia dadaraia. Danu, ia abia dae Baibel ena hereva ese dubu ena tau badadia edia hahediba herevadia ia hereaia.

¹⁶ Bruys tauna Peter bona Lausanne tauna Henry be 1100 C.E. ai idia noho. Idia ruaosi be Baibel ena hereva momokani idia laloa bada. Peter be pris gaukara ia rakatania, badina Katolik dubu ena hahediba herevadia ia dadaraia. Hegeregere ia gwau, beibi bapatisoa karana, paraoa bona wain be Iesu ena tauanina bona rara korikorina ai ia lao karana, mase taudia totona guriguri karana, bona korosi tomadiho henia karana be Baibel ena hereva hegeregerena  lasi. Lagani 1140 C.E. ai, Peter be lahi amo idia gabua mase, badina ia ese unai hahediba herevadia ia abia dae lasi. Katolik monk tauna ta Henry, be dubu ai idia karaia tomadiho karadia ia abia dae lasi. Lagani 1148 C.E. ai idia dogoatao bona dibura ruma dekenai idia atoa bona unuseniai ia noho ela bona ia mase.

17. Waldo bona ia murinai idia raka taudia be dahaka gaukara badana idia karaia?

¹⁷ Peter idia hamasea neganai, tau ta ia vara bona ia ese Baibel ena hereva momokani harorolaia gaukarana ia habadaia. Unai tauna ena ladana be Valdès, eiava Waldo. a Ia be pris tauna lasi to Dirava ena Hereva ia laloa bada dainai, kohu momo maurina ia rakatania bona France ena sautist hanuana ta ena gado ai Baibel ena kahana haida ia hahanaia. Unai hanua taudia be edia gado ai Baibel idia duahia dainai idia moale bada, bona idia danu ese edia kohu idia rakatania bona Baibel ena hereva idia harorolaia. Idia haroro goadagoada tatau bona hahine edia orea ladana be Waldenses. To, dubu gunalaia taudia be unai orea idia inai henia. Lagani 1184 ai, pope ese dubu amo idia ia lulua bona bisop ese oda ia atoa edia hanua dekenai do idia giroa lou lasi. To, unai dala amo Baibel ena sivarai be gabu ma haida dekenai idia harorolaia. Unai nega ai, Europe ena tano momo dekenai Waldo, Peter, bona Henry idia badinaia taudia bona taunimanima ma haida be dubu idia rakatania. Baibel ena hereva idia badinaia taudia ma haida be: John Wycliffe (1330 ia vara bona 1384 ia mase), William Tyndale (1494 ia vara bona 1536 ia mase), Henry Grew (1781 ia vara bona 1862 ia mase), bona George Storrs (1796 ia vara bona 1879 ia mase).

“DIRAVA ENA HEREVA BE IDIA GUIA LASI”

18. Lagani 1870 ai, haida be edena dala ai Baibel idia stadilaia? Bona dahaka dainai unai be dala namona?

¹⁸ Baibel inai henia taudia ese hereva momokani harorolaia gaukarana idia koua diba lasi. Timoteo Iharuana 2:9 ia gwau: “Dirava ena hereva be idia guia lasi.” Lagani 1870 ai, Baibel idia laloa bada taudia haida be Baibel ena hereva momokani idia stadilaia matamaia. Edena dala ai Baibel idia stadilaia? Ta ese henanadai ta ia gwauraia guna, bona idia herevalaia hebou murinai, idia ese unai hereva ia durua siridia ibounai idia duahia. Unai siri ibounai idia hahegeregerea murinai, henanadai ena haere idia torea. Unai be stadi dalana namona, badina aposetolo taudia bona tau badadia be unai bamona idia karaia danu. Ita moale badina Iehova ena Witnes taudia edia histori lalonai, unai abidadama taudia edia hahediba herevadia ibounai be Baibel amo idia hamomokania.

19. Lagani 2012 ena siri badana be dahaka, bona dahaka dainai ia be siri namona?

¹⁹ Iseda hahediba herevadia be Baibel amo ita hamomokania. Unai dainai, Iehova ena Witnes taudia edia Hakaua Oreana ese lagani 2012 ena siri badana be Ioane 17:17 amo idia abia. Iesu ia gwau: “Oiemu hereva be momokani.” Bema ta ia ura Dirava ese do ia lalonamo henia, namona be ena mauri lalonai hereva momokani ia badinaia. Oibe, namona be ita ibounai ita hekwarahi Dirava ena Hereva ese ita ia hakaua noho totona.

[Footnote]

[Study Questions]

[Blurb on page 8]

Lagani 2012 ena siri badana: “Oiemu hereva be momokani.”​—⁠Ioa. 17:17.

[Picture on page 7]

Waldo

[Picture on page 7]

Wycliffe

[Picture on page 7]

Tyndale

[Picture on page 7]

Grew

[Picture on page 7]

Storrs