1, 2. (a) Israela taudia dekenai Iehova ia hahedinaraia ia be edena bamona Diravana? (b) Inai stadi ai edena henanadai ena haere do ita tahua?

 NEHEMIA ena nega ai, Levi taudia haida be taunimanima vairadiai idia guriguri, bona idia gwau Israela taudia be Iehova ena “oda idia kamonai henia lasi.” To, Iehova ese edia kara dika ia gwauatao loulou. Iehova be dika gwauatao bona hariharibada Diravana, ia hebogahisi, ia badu haraga lasi, bona ena lalokau be bada. Iehova be hanaihanai Israela taudia dekenai hebogahisi hereadaena ia hahedinaraia.​—⁠Neh. 9:16, 17.

² Ita ta ta ese sibona ita nanadaia be namo, ‘Edena dala ai Iehova ena gwauatao karana amo namo lau davaria diba?’ Unai henanadai ena haere ita diba totona, Dirava ese King Davida bona King Manase edia dika ia gwauatao karana do ita stadilaia. Bona Iehova ena gwauatao karana amo namo idia davaria dalana do ita herevalaia danu.

3-5. Davida be dahaka kara dika badadia rua ia karaia?

³ Ena be Davida be Dirava ia gari henia, to kara dika badadia haida ia karaia. Unai kara dikadia rua be Uria bona Bataseba dekenai ia karaia. Unai dainai gabeai Davida, Uria bona Bataseba be dika idia davaria. To, Dirava ese Davida ena kerere ia hamaoromaoroa dalana ese ia hahedinaraia, Iehova be dika gwauatao Diravana. Mani ita itaia dahaka ia vara.

⁴ Davida ese Israela ena ami ia siaia Amono ena hanua badana, Raba idia tuari henia totona. Raba hanuana be Ierusalema ena ist kahana ai, Ioridane Sinavaina ena idiba kahana ai ia noho. Ierusalema amo Raba hanuana ena daudau be kilomita 80 bamona. Ierusalema ai, Davida be iena ruma badana ena guhi ai ia noho bona unuseni amo ia itaia, Bataseba be ia digu noho. Bataseba ena adavana be tuari totona ia lao. Davida be Bataseba ia ura henia dikadika dainai, iena hesiai taudia ia siaia bona Bataseba be iena ruma dekenai  idia abia lao, bena Bataseba ida ia heudahanai.​—⁠2 Sam. 11:1-4.

⁵ Davida ia kamonai Bataseba ia rogorogo neganai, ena tuari biaguna badana ia hamaoroa Uria be Ierusalema dekenai do ia siaia lou. Bena Davida ese Uria ia hamaoroa loulou, ena ruma dekenai do ia lao. Ia ura Uria be Bataseba ida do ia mahuta hebou, unai amo Uria do ia laloa Bataseba ese do ia havaraia natuna be iena natuna. To, Uria be ena ruma dekenai ia giroa lasi. Unai dainai, Davida ese hunia dalanai tuari biaguna badana dekenai revareva ta ia torea, bona ia hamaoroa Uria be tuari ia auka momokani gabuna ai do ia atoa, bona ia amo do idia raka siri. Bena Davida ena palani hegeregerena, edia inai taudia ese Uria idia hamasea. (2 Sam. 11:12-17) Oibe, King Davida be ia heudahanai sibona lasi, to kerere lasi tauna ia hamasea danu!

6. Davida ia kara dika murinai, Dirava be dahaka ia karaia? Bona unai ese ia hahedinaraia Iehova be edena bamona Diravana?

⁶ Momokani, Iehova be gau ibounai ia itaia dainai, ia ese Davida ia karaia gaudia ia diba. (Aon. 15:3) Ena be Uria ia mase murinai King Davida ese Bataseba ia adavaia, to “Lohiabada ese Davida ena kara dainai ia badu.” (2 Sam. 11:27) Vadaeni, Dirava be dahaka ia karaia? Ia ese Davida dekenai peroveta tauna Natana ia siaia. Iehova be dika gwauatao Diravana dainai, Ia ura Davida dekenai hebogahisi ia hahedinaraia. To, ia ura ia diba Davida be ia helalo-kerehai momokani, eiava lasi. Ita moale badina Iehova be unai bamona ia karaia. Iehova ese Davida ia doria lasi iena dika ia gwauraia hedinarai totona, to Natana ia hamaoroa king dekenai sivarai ta do ia gwauraia. Unai amo Davida do ia laloparara ia be kara dika badadia ia karaia. (2 Samuela 12:1-4 duahia.) Unai dala amo Iehova ese Davida ena lalohadai ia diba namonamo!

7. Davida be Natana ena sivarai ia kamonai murinai, ena hemami be edena bamona?

⁷ Davida be Natana ena sivarai lalonai ia gwauraia taga tauna ena kara dekenai ia badu, bona ia gwau: “Mauri Lohiabada dekenai lau gwauhamata, unai bamona ia karaia tauna harihari do ia mase be namo.” Danu ia gwau, ena mamoe ia haboioa tauna dekenai davana idia henia be namo. To, Natana be Davida ia hamaoroa: “Unai kohu momo tauna be oi!” Davida ia hoa maragi lasi! Natana ese Davida ia hamaoroa ena kara dika dainai, ia bona ena famili taudia ese dika bada do idia davaria bona idia haida do idia mase. Danu, Davida ena kara dika dainai, Iehova ese Israela taudia vairanai ia do ia hahemaraia. Natana ena hereva dainai, Davida ia laloparara ia be kara dika badadia ia karaia. Ia sori bona ia gwau: “Lohiabada dekenai lau kara dika vadaeni.”​—⁠2 Sam. 12:5-14.

8, 9. Edena dala ai Salamo karoa 51 ese (a) Davida ena hemami ia hahedinaraia? (b) Iehova ena kara ia hahedinaraia?

⁸ Gabeai, King Davida ese Salamo karoa 51 ia torea. Unai karoa ena hereva ese idia hahedinaraia, Davida ena hemami ia dika bona ia sori bada. Mai ena ura ida Iehova ia noia do ia durua totona. Bona ena kerere ia gwauraia hedinarai sibona lasi, to ia helalo-kerehai danu. Ia ese ena hetura karana Dirava ida ia laloa bada. Ia gwau: “Lau ese oi sibona dekenai lau kara dika vadaeni.” Mai taitai ida Iehova ia noia: “Lauegu kudouna lalonai laloa goevagoeva do oi havaraia, bona lauma matamatana bona maoromaorona, be egu lalona dekenai do oi atoa.” Ma ia noinoi, ia gwau: “Guna be lau moale bada, oi ese lau oi hamauria dainai. Harihari lau ura inai oiemu hamauria ena moale, be lau dekenai do oi henia lou. Bona ura namodia, bona lauma namona, lau dekenai do oi henia.” (Sal. 51:1-4, 7-12) Oi be Davida bamona, mai momokani ida emu kerere be Iehova dekenai oi gwauraia hedinarai, a?

⁹ Davida ena kara dika dainai hekwakwanai idia vara neganai, Dirava be unai gaudia ia koua lasi. Davida ena kara dika dainai iena mauri  ibounai lalonai hekwakwanai momo ia davaria. To, Davida be “iena kara dika dainai ia lalohisihisi momokani, bona ia manau momokani” o ia helalo-kerehai dainai, Iehova ese ena dika ia gwauatao. (Salamo 32:5 duahia; Sal. 51:17) Siahu Ibounai Diravana be ta ese kara dika ia karaia ena badina bona ena hemami ia diba. Unai dainai, Dirava be diadi taudia dekenai gwaumaoro ia henia lasi, Mose ena Taravatu hegeregerena Davida bona Bataseba idia hamasea totona. (Lev. 20:10) To, Dirava sibona ese Davida bona Bataseba ia hahemaoro henidia, bona idia dekenai hebogahisi ia hahedinaraia. Danu gabeai, edia natuna Solomona be Israela ena king ai ia lao.​—⁠1 Siv. 22:9, 10.

10. (a) Iehova ese Davida ena dika ia gwauatao ena badina ma ta be dahaka? (b) Iehova ese tau ta ena kara dika ia gwauatao totona, kara dika tauna ese dahaka ia karaia be namo?

¹⁰ Reana Iehova ese Davida ena dika ia gwauatao ena badina ma ta be, Davida ese Saulo dekenai hebogahisi ia hahedinaraia. (1 Sam. 24:4-7) Iesu ia hahedinaraia ma haida ita kara henia hegeregerena, Iehova ese ita do ia kara henia danu. Ia gwau: “Ma haida umui hahemaoro henia lasi, vadaeni Dirava ese umui do ia hahemaoro henia lasi, badina ma haida umui hahemaoro henia hegeregerena, umui do idia hahemaoro henia. Bona ma haida dekenai umui henia sikele hegeregerena, umui dekenai unai bamona sikele do idia henia.” (Mat. 7:1, 2) Ita ia hagoadaia gauna be, ita diba Iehova ese iseda kara dika​—⁠kara dika badadia hegeregere, heudahanai o ala-ala karadia danu​—⁠do ia gwauatao! Iehova ese eda dika ia gwauatao diba, bema mai eda ura ida ma haida edia dika ita gwauatao, Ia dekenai eda kara dika ita gwauraia hedinarai, bona eda kara ita haidaua bona unai dala kererena ita dadaraia momokani. Kara dika taudia be idia helalo-kerehai momokani neganai, Iehova ese idia “dekenai goada matamata do ia henia,” anina be ia durudia lalomamina goevana idia abia totona.​—⁠Kara 3:19 duahia.

11. Manase be dahaka kara dikadia ia karaia?

¹¹ Baibel ese Iehova be mai ena ura ida kara dika badadia ia gwauatao ena badina ma ta ia hahedinaraia. Davida ia lohia bona lagani 360 murinai, Manase be Iuda ena king ai ia lao bona lagani 55 lalodiai ia lohia. Iehova ia gwau Manase be dika do ia davaria, badina ena lohia laganidia ai kara dika momo ia karaia. Hegeregere, Manase ese Bala dirava totona boubou patadia ia haginia, dina, hua bona hisiu ia tomadiho henia, iena natuna tatau be dirava koikoi totona ia bouboulaidia, bona taunimanima ia doria babalau bona meamea karadia idia karaia totona. Baibel ia gwau, Manase be “Lohiabada ena vairanai ia kara dika bada.”​—⁠2 Siv. 33:1-6.

12. Edena dala ai Manase be Iehova dekenai ia giroa lou?

 ¹² Gabeai, Manase be tuari taudia ese idia abia bona Babulonia dekenai dibura ruma ai idia atoa. Reana, unuseniai ia ese Mose ena hereva Israela taudia dekenai ia laloatao: “Gabeai dinadia, inai hisihisi ibounai umui dekenai idia vara neganai, Lohiabada emui Dirava dekenai do umui giroa lou, bona do umui kamonai henia.” (Deu. 4:30) Manase be Iehova dekenai ia giroa lou. Edena dala ai? Baibel ia gwau: “Manase be ia manau lao, bona ia ese Lohiabada, iena Dirava ia tahua, bona durua totona ia noinoi henia.” (Henunai laulau ai ia hedinarai bamona.) (2 Siv. 33:12, 13) Baibel ese Manase ena guriguri herevadia ia hahedinaraia lasi, to reana iena guriguri be King Davida ese Salamo karoa 51 ai ia torea herevadia bamona. Oibe, Manase ese ena kara ia haidaua momokani.

13. Dahaka dainai Iehova ese Manase ena dika ia gwauatao?

¹³ Manase ia guriguri neganai, Iehova be dahaka ia karaia? Iehova “ese Manase ena guriguri ia kamonai henia.” (2 Siv. 33:13) Manase ia laloparara ia be kara dika badadia ia karaia, bona Davida bamona ia helalo-kerehai momokani. Unai dainai, Dirava ese Manase ena kara dika ia gwauatao bona gwaumaoro ia henia Ierusalema dekenai ia giroa bona king dagina ia abia lou. Unai amo “Manase ia diba vadaeni [Iehova, NW] be Dirava.” (2 Siv. 33:13) Unai sivarai amo ita itaia, Iehova be idia helalo-kerehai momokani taudia ia hebogahisi henidia bona edia dika ia gwauatao!

14. Edena dala ai Iehova ese kara dika tauna ena dika ia gwauatao diba?

¹⁴ Momokani, hari inai negai Dirava ena taunimanima momo be Davida o Manase ese idia karaia kara dika idia karaia lasi. To, edia sivarai amo ita diba, bema kara dika badana ta ia karaia tauna be ia helalo-kerehai momokani, Dirava be mai ena ura ida ena dika do ia gwauatao.

15. Edena dala ai ita diba Iehova be taunimanima ibounai edia kara dika ia gwauatao lasi?

¹⁵ To, namo lasi ita laloa Iehova be hanaihanai taunimanima ibounai edia dika ia gwauatao. Davida bona Manase edia kara be kamonai lasi Israela  bona Iuda taudia edia kara amo ia idau. Davida ia kerere neganai, Dirava be Natana ia siaia bona Davida dekenai dala ia kehoa ia helalo-kerehai totona. Davida be unai ia laloa bada bona ia helalo-kerehai. Manase danu be dika bada ia davaria, bona ia laloparara iena kara dikadia dainai ia helalo-kerehai be namo. To, Israela bona Iuda taudia be Manase bona Davida bamona lasi. Ena be Iehova ese peroveta taudia amo idia ia sisiba henia, to idia helalo-kerehai lasi dainai, Iehova ese edia dika ia gwauatao lasi. (Nehemia 9:30 duahia.) Israela taudia be Babulonia amo Iuda dekenai idia giroa lou murinai, Iehova ese iena hesiai taudia, hegeregere hahelaga tauna Esera bona peroveta tauna Malaki ia siaia loulou. Israela taudia be Iehova ena ura idia badinaia neganai, idia moale bada.​—⁠Neh. 12:43-47.

16. (a) Israela taudia be edia kara dika amo idia helalo-kerehai lasi dainai, dahaka ia vara? (b) Dirava ese Israela taudia korikoridia ta ta edia dika ia gwauatao diba, a?

¹⁶ Iesu be tanobada ia mai bona ena mauri goevadaena ia bouboulaia murinai, Iehova be Israela taudia ese idia bouboulaia animal ia abia dae lasi. (1 Ioa. 4:9, 10) Iesu be tanobada ai ia noho neganai, Ierusalema ia herevalaia dalana ese Iehova ena lalohadai ia hahedinaraia. Ia gwau: “Ierusalema e, Ierusalema e, peroveta taudia oi alaia mase bona oi dekenai idia siaia taudia be nadi amo oi hodoa mase. Nega momo lau ura emu natudia lau haboua, kokoroku ese ena natudia be ena apena henunai ia haboua hegeregerena! To umui ura lasi.” Unai dainai, Iesu ma ia gwau: “Emui dubu helaga be do ia noho kava.” (Mat. 23:37, 38) Israela taudia idia kara dika bona idia helalo-kerehai lasi dainai, Dirava ese idia ia dadaraia bona lauma Israela o “Dirava ena Israela” besena ia abia hidi. (Mat. 21:43; Gal. 6:16) To, Dirava ese Israela taudia korikoridia ta ta edia dika ia gwauatao diba, a? Oibe. Iehova ese idia ia hebogahisi henia bona edia dika ia gwauatao diba, bema idia ese Dirava bona Iesu Keriso ena mauri davalaia boubouna idia abidadama henia. Danu, Paradaiso ai idia helalo-kerehai lasi taudia do idia toreisi lou neganai, Iehova ena hebogahisi bona gwauatao karana amo hahenamo do idia abia.​—⁠Ioa. 5:28, 29; Kara 24:15.

17, 18. Edena dala ai Iehova ese eda dika ia gwauatao diba?

¹⁷ Iehova ia ura iseda dika ia gwauatao dainai, dahaka ita karaia be namo? Namona be Davida bona Manase bamona ita helalo-kerehai. Namona be ita abia dae ita be kara dika taudia, ita helalo-kerehai, Iehova ita guriguri henia eda dika do ia gwauatao, bona ita do ia durua eda ura dikadia ita rakatania totona. (Sal. 51:10) Bema ita be kerere badana ta ita karaia, namona be elda taudia dekenai unai ita gwauraia hedinarai, unai amo ita do idia durua. (Iam. 5:14, 15) Ena be kara dika badana ta ita karaia, to ita moale badina Iehova ‘be hebogahisi bona hariharibada Diravana, ia badu haraga lasi, to hebogahisi bona lalokau dekenai ia haraga. Taunimanima momo herea ia hebogahisi henidia noho, bona kara dika bona kara kerere idauidau ia gwauatao noho.’ Idaunega amo ema bona hari Iehova ena kara idia idau lasi.​—⁠Eso. 34:6, 7.

¹⁸ Iehova ese idia helalo-kerehai Israela taudia ia hamaoroa, edia kerere do ia gwauatao momokani. Ia gwau edia kara dika ena miro be ia kakakaka herea, to ia ese do ia hagoevaia bona “sinou” bamona do ia kurokuro. (Isaia 1:18 duahia.) Edena dala ai Iehova ena dika gwauatao karana amo namo ita abia diba? Bema Iehova ena dika gwauatao karana ita laloa bada bona ita helalo-kerehai, ia ese eda dika do ia gwauatao momokani.

19. Wiki vaira ena stadi ai dahaka do ita stadilaia?

¹⁹ Edena dala ai Iehova bamona mai eda ura ida ma haida edia dika ita gwauatao diba? Bema ta be kara dika badana ta ia karaia bona ia helalo-kerehai momokani, edena dala ai ia ita gwauatao diba? Wiki vaira ena stadi ese ita do ia durua eda lalona ita tahua namonamo, unai amo eda Tamana, Iehova ita tohotohoa diba, badina ia be ‘mai ena hebogahisi, bona kara dika ia gwauatao noho.’​—⁠Sal. 86:5.