1, 2. Dirava ena Basileia ese dahaka do ia hagugurua, bona dahaka dainai ita abia dae momokani unai Basileia do ia mai?

 LAGANI 31 C.E. ai, Kaperanauma ena ororo ta badinai Iesu ese aposetolo taudia ia hadibaia inai bamona do idia guriguri: “Oiemu Basileia do ia mai.” (Mat. 6:10) Hari, momo idia laloa Basileia be do ia mai lasi. To, ita abia dae momokani Dirava ese iseda guriguri do ia kamonai, bona ena Basileia be do ia mai.

² Iehova ese unai Basileia amo iena guba bona tanobada ruma besena do ia hatamonaia, bona ena ura do ia hagugurua. (Isa. 55:10, 11) Oibe, idia hanaia lagani 100 lalodiai idia vara gaudia ese idia hamomokania, Iehova be ia King vadaeni! Dirava be ena taunimanima milioni totona gaukara badadia bona namo hereadia ia karaia noho. (Sek. 14:9; Apok. 15:3) To, Iehova be King ai ia lao karana be Basileia do ia mai karana amo ia idau. Iesu ese ita ia hadibaia unai Basileia ia mai totona do ita guriguri. Edia idau be dahaka bona edena dala ai unai be mai anina bada?

3. (a) Iesu be edena nega ai bona edeseniai King ai ia lao? (b) Edena dala ai oi hamomokania diba Basileia be lagani 1914 ai ia lohia matamaia? (Futnout itaia.)

³ Lagani 1800 ena dokonai, Dirava ena hesiai taudia be lagani 2,500 gunanai Daniela ese ia perovetalaia herevana ta idia lalopararalaia matamaia. Ia gwau: “Unai basileia namba 4 ena nega lalonai [hari iseda nega], guba ena Dirava ese basileia ta do ia haginia,  inai basileia be do idia hadikaia diba lasi ela bona hanaihanai.” (Dan. 2:44) Lagani momo lalonai, Baibel Student taudia ese idia hahedinaraia lagani 1914 ai mai anina bada gauna ta do ia vara. Unai negai, momo be unai gauna idia naria noho. Toretore tauna ta ia gwau: “Lagani 1914 lalonai idia noho taudia be mai edia helaro bona vaira negana namona idia naria.” To, unai lagani ai Tanobada Tuarina Ginigunana ia vara neganai, Baibel ena peroveta herevadia idia guguru. Hitolo, tano mareremarere, gorere idauidau, bona peroveta herevadia ma haida idia guguru ese idia hamomokania, lagani 1914 ai Iesu Keriso be Dirava ena Basileia ia lohiaia matamaia. a Dirava ese ena Natuna Iesu be Mesia King ena dagi ia henia neganai, unai be hegeregere Iehova be King ai ia lao!

4. King matamatana ese ia karaia gauna ginigunana be dahaka? Bona unai murinai dahaka ia karaia?

⁴ King matamatana ese ia karaia gauna ginigunana be ena Tamana ena Inai Tauna badana, Satani ia tuari henia. Iesu bona ena aneru ese Satani bona ena demoni be guba amo idia negea diho. Unai dainai, guba ai moale bada ia vara to tanobada ai dika bada ia vara. (Apokalupo 12:7-9, 12 duahia.) Unai murinai, King ese ena taunimanima ia hagoevaia, hadibaia bona hegaegaelaidia, Dirava ena ura idia karaia totona. Mani ita itaia, edena dala ai idia ese Iesu ena hakaua dalana idia badinaia karana be haheitalai namona.

5. Lagani 1914 bona 1919 edia matamana kahanai, King Iesu be dahaka ia karaia?

⁵ Lagani 1914 ai Iesu be King ai ia lao neganai, guba ia hagoevaia bona Satani bona ena demoni be tanobada dekenai ia negedia diho. Unai murinai, Iehova ese ia hamaoroa tanobada ai ena murinai idia raka taudia do ia sekea bona hagoevaia. Peroveta tauna Malaki ese ia hahedinaraia, unai ena anina be Iesu ese ena taunimanima edia tomadiho karana ia hagoevaia. (Mal. 3:1-3) Histori ese ia hahedinaraia unai be lagani 1914 bona 1919 ena matamana kahanai ia vara. b Iehova ena ruma bese badana lalonai ita noho totona, namona be ita goeva o helaga. (1 Pet. 1:15, 16) Namona be tomadiho koikoi bona tanobada ena politikol karadia amo ita gini siri.

6. Edena dala ai Dirava amo idia mai herevadia ita abia, bona dahaka dainai unai be mai anina bada?

⁶ Iesu ese ena king siahuna ia gaukaralaia, “igui hesiai tauna mai ena kamonai bona mai ena kara maoromaoro” ia abia hidi totona. Unai igui hesiai tauna ese hanaihanai Dirava amo idia mai herevadia be Iesu ese ia naria “mamoe serina tamona” taudia dekenai do ia henia. (Mat. 24:45-47; Ioa. 10:16) Lagani 1919 amo, horoa tadikaka haida be “hesiai taudia” ma haida ubua ena maduna badana idia abia. Unai igui hesiai tauna ese Dirava amo idia mai hereva be ita dekenai ia hadibaia, unai amo eda abidadama do ia goada. Unai ese ita ia hagoadaia Dirava ena taravatu hegeregerena eda tomadiho, kara, lalohadai bona tauanina idia goeva be namo. Danu, orea ese ia halasia gaudia amo diba ita abia, unai amo do ita hegeregere, hari tanobada ai idia karaia mai anina bada gaukarana, haroro gaukara unai, ita karaia totona. Oi be hanaihanai Dirava amo idia mai herevadia oi abia dae, a?

7. Iesu be tanobada ai ia noho neganai dahaka gaukara ia hamatamaia, bona do idia karaia ela bona edena nega?

⁷ Iesu ese tanobada ai ena haroro gaukara ia hamatamaia neganai, ia gwau: “Taoni ma  haida dekenai danu Dirava ena Basileia ena sivarai namona lau harorolaia be namo, unai badina totona Dirava ese lau ia siaia.” (Luka 4:43) Iesu be lagani toi mai kahana lalonai, unai gaukara ia atoa guna. Ena hahediba taudia dekenai ia gwau: “Umui lao neganai umui haroro, umui gwau: ‘Guba Basileia be ia kahirakahira vadaeni.’” (Mat. 10:7) Iesu ia toreisi lou murinai, ia gwau iena murinai idia raka taudia ese sivarai namona be “tanobada ena daudau momokani gabudia” dekenai do idia harorolaia. (Kara 1:8) Bona ia gwauhamata, ia be unai gaukara do ia durua ema bona iseda nega.—Mat. 28:19, 20.

8. Edena dala ai King ese ena taunimanima ia hagoadaia idia haroro totona?

⁸ Lagani 1919 ai, “Basileia ena sivarai namona” dekenai mai anina bada gauna ta ia hedinarai. (Mat. 24:14) King be guba ai ia lohia vadaeni, bona tanobada ai ia hagoevaia orea maragina ta ia haboua. Unai orea be mai ena ura ida Iesu ena oda herevana ia badinaia, bona Dirava ena Basileia be guba ai ia gini vadaeni ena sivarai namona be tanobada ibounai ia harorolaia! (Kara 10:42) Hegeregere, September 1922 ai, Basileia ena kahanai idia gini taudia 20,000 bamona be Cedar Point, Ohio, U.S.A. ai, intanesinol hebouhebou idia karaia. Unai hebou ai tadikaka Rutherford ese tok ladana, “Basileia” ia henia, bona ia gwau: “Itaia, Pavapava ia lohia! Umui be iena hereva gwauraia taudia. Unai dainai umui haroro, haroro, haroro, Pavapava bona iena basileia umui harorolaia.” Kamonai taudia be idia moale bada. Unai dina murinai hebou taudia 2,000 be haroro gaukara idia karaia. Idia haida be hebouhebou gabuna idia rakatania bona kilomita 72 bamona idia lao haroro totona. Taihu ta ia gwau: “Lau be Basileia do ai harorolaia ena hadibaia hereva idia gwauraia negana, bona tadikaka taihu be mai edia ura ida idia haroro karana do lau laloaboio lasi!” Taunimanima momo danu be unai bamona idia mamia.

9, 10. (a) Edena sikuli amo treinini ita abia haroro gaukara ita karaia totona? (b) Unai sikuli amo dahaka namo oi davaria?

⁹ Lagani 1922 ai, Basileia harorolaia taudia 17,000 mai kahana be tano 58 lalonai idia haroro. To, idia ese treinini idia abia be namo. Iesu, vaira negana ena King, be tanobada ai ia noho neganai, ena aposetolo taudia ia hadibaia dahaka do idia harorolaia, edeseni bona edena dala ai do idia haroro. (Mat. 10:5-7; Luka 9:1-6; 10:1-11) Unai hegeregerena, hari Iesu ese Basileia idia harorolaia taudia dekenai treinini bona tulu idauidau ia henia, edia haroro gaukara idia hanamoa totona. (2 Tim. 3:17) Keristani kongrigeisen amo Iesu ese ena taunimanima dekenai haroro gaukara totona treinini ia henia. Unai ia karaia dalana ta be Tiokratik Haroro Sikuli amo. Unai sikuli be tanobada hegegemadai kongrigeisen 111,000 mai kahana ai idia karaia. Pablisa seven milioni mai kahana be unai sikuli  amo diba idia abia noho dainai, idia hegeregere “taunimanima idauidau” idia haroro henidia bona hadibaia totona.—1 Korinto 9:20-23 duahia.

¹⁰ Unai sibona lasi, to Baibel sikuli haida idia haginia, unai amo kongrigeisen elda, painia, singul tadikaka, Keristani headava taudia, Brens Komiti bona adavadia, loaloa naria tadikaka bona adavadia, bona misinari taudia dekenai treinini idia henia totona. c Keristani Headava Taudia Edia Baibel Sikuli idia lao stiuden haida idia moale bona idia gwau: “Unai sikuli amo ai abia treinini ese ai ia durua, emai lalokau Iehova dekenai ai habadaia, bona ai hegeregere ma haida ai durua totona.”

11. Ena be dagedage idia davaria, to dahaka dainai Basileia harorolaia taudia idia haroro noho?

¹¹ Iseda inai tauna Satani ia itaia Basileia harorolaia bona hadibaia gaukarana be ia bada ia lao. Ia ese dala idauidau ia gaukaralaia Basileia ena sivarai bona idia harorolaia taudia edia gaukara ia koua totona. To do ia kwalimu lasi. Iehova ese ena Natuna be “gavamani, dagi bada taudia, siahu taudia, lohia taudia” edia ataiai ia atoa. (Efe. 1:20-22) King Iesu ese ena siahu amo ena hesiai taudia ia gimaia bona hakaua, unai amo ena Tamana ena ura do ia guguru. d Idia ese sivarai namona idia harorolaia bona kudou maoro taudia milioni momo dekenai Iehova ena dala idia hadibaia noho. Inai gaukara namona ita karaia be hahenamo badana!

12. Lagani 1914 amo, edena dala ai Iesu ese Dirava ena hesiai taudia edia gaukara dalana ia hagoevaia?

¹² Iesu be lagani 1914 ai ia lohia matamaia negana amo, Dirava ena hesiai taudia ese ena Tamana ena ura idia karaia dalana ia hagoevaia. (Isaia 60:17 duahia.) Lagani 1919 ai, kongrigeisen ta ta lalonai hesiai gaukara ia gunalaia tauna idia abia hidi haroro gaukara ia naria totona. Lagani 1927 ai, Sunday idia abia hidi haroro gaukara karaia totona. Lagani 1931 ai, Iehova ena hesiai taudia be Baibel amo inai ladana, Iehova ena Witnes taudia idia abia neganai, unai ese edia ura haroro gaukara dekenai ia habadaia. (Isa. 43:10-12) Lagani 1938 ai, kongrigeisen lalonai vouti dalanai elda abia hidi karana idia hadokoa, bona tiokratik dalanai idia abia hidi. Lagani 1972 ai, kongrigeisen naria tauna ena gabu be elda oreana ese ia abia. Idia hegeregere tadikaka idia hagoadaia elda bona hesiai taudia ai do idia lao, bona mai edia ura ida kongrigeisen idia naria totona. (1 Pet. 5:2) Lagani 1976 ai, Hakaua Oreana ena henunai komiti siks idia haginia, tanobada hegegemadai Basileia harorolaia gaukarana idia naria totona. Unai nega amo ema bona hari, Iesu be ena  taunimanima ia hegaegaelaidia tiokratik dalanai edia gaukara idia karaia totona.

13. Mesia Basileiana ena lohia lagani 100 lalodiai ia karaia gaudia ese edena dala ai oi idia durua?

¹³ Lagani 100 lalonai Mesia King ese ia karaia gaudia mani oi laloa. Ia ese taunimanima haida ia hagoevaia Iehova ena ladana idia abia totona. Ia ese tano 239 lalonai, sivarai namona harorolaia gaukarana ia gunalaia, bona Iehova ena dala be taunimanima milioni momo dekenai ia hadibaia. Iesu ese ia idia badinaia taudia seven milioni mai kahana ia hatamonadia, bona idia be mai edia ura ida iena Tamana ena ura idia karaia. (Sal. 110:3) Oibe, Iehova ese Mesia Basileiana amo gau badadia momo ia karaia vadaeni. Bona vaira negana ai ia ese gau badadia ma haida do ia karaia danu!

14. (a) Dirava ena “Basileia do ia mai” ita gurigurilaia neganai, ita be Dirava ita noia dahaka ia karaia totona? (b) Lagani 2014 ena siri badana be dahaka, bona dahaka dainai ia be siri maorona?

¹⁴ Ena be lagani 1914 ai, Iehova ese ena Natuna, Iesu Keriso be Mesia King ai ia halaoa, to unai ese iseda guriguri, “Oiemu Basileia do ia mai,” ena kahana ibounai ia hagugurua lasi. (Mat. 6:10) Baibel ia peroveta Iesu be ‘ena inai taudia edia huanai do ia lohia.’ (Sal. 110:2, BHḡ) Satani ese ia biagudia gavamani be Basileia idia inai henia noho. Unai dainai, Dirava ena Basileia do ia mai ita gurigurilaia neganai, anina be Dirava ita noia Mesia King bona ia ida idia lohia taudia do idia mai bona Basileia idia inai henia taudia do idia kokia. Unai ese Daniela 2:44 ena peroveta herevana do ia hagugurua. Unai siri ia gwau Dirava ena “basileia ese basileia ibounai do ia hamakohia, bona haorea momokani.” Ia ese Basileia idia inai henia gavamani ibounai do ia haoredia. (Apok. 6:1, 2; 13:1-18; 19:11-21) Unai do ia vara negana be ia kahirakahira dainai, lagani 2014 ena siri badana Mataio 6:10, ia gwau: “Oiemu Basileia do ia mai.” Lagani 1914 amo ema bona hari, Iesu be guba dekenai lagani 100 ia lohia vadaeni!

15, 16. (a) Keriso ena Lagani 1,000 Lohia Negana lalonai dahaka do ia vara? (b) Mesia King ese do ia karaia gau ginigabena be dahaka? Bona Iehova ena ura dekenai unai ese dahaka do ia hagugurua?

¹⁵ Mesia King ese Dirava ena inai taudia do ia hadikaia murinai, ia ese Satani bona demoni be guri dobu masemasena lalonai do ia negedia bona unuseniai lagani 1,000 do idia noho. (Apok. 20:1-3) Satani Diabolo ia haorea murinai, Basileia ese Adamu amo ia mai kara dika do ia kokia, bona Iesu ena mauri davalaia boubouna ena hahenamo be taunimanima dekenai do ia mailaia. King ese idia mase vadaeni taudia milioni momo do ia hatorea isi lou, bona dala do ia hegaegaelaia Iehova idia dibaia totona. (Apok. 20:12, 13) Tanobada ibounai be Eden umana ena paradaiso bamona ai do ia lao, bona abidadama taudia ibounai be do idia goevadae.

¹⁶ Keriso ena Lagani 1,000 Lohia Negana ena dokonai, Mesia Basileiana ese Iehova ena ura tanobada totona do ia hagugurua. Bena Iesu ese Basileia be ena Tamana dekenai do ia henia. (1 Korinto 15:24-28 duahia.) Unai nega ai, Iehova bona tanobada natudia huanai maino karaia tauna ta ia noho be anina lasi. Dirava ena natudia guba bona tanobada ai, be mai lalotamona ida edia guba Tamana ena ruma bese badana lalonai do idia noho.

17. Oi ura Basileia totona dahaka do oi karaia?

¹⁷ Basileia ia lohia laganidia 100 lalonai idia vara gaudia ese idia hahedinaraia, Iehova be ena lohia siahuna ia gaukaralaia noho, bona ena ura tanobada totona be do ia guguru momokani. Unai dainai, namona be Ia ita badinaia bona King bona ena Basileia ita harorolaia noho. Ita abia dae momokani, Iehova be kahirakahira iseda guriguri, “Oiemu Basileia do ia mai” do ia hagugurua!