LAGANI 1914 ai, “Photo-Drama of Creation” idia halasia negana amo ema bona hari, lagani 100 idia hanaia vadaeni. Unai piksa ese taunimanima ia durua bona idia abia dae Baibel be Dirava ena Hereva. Unai negadiai evolusen lalohadaina bona Baibel hakoikoia herevadia ese momo edia abidadama ia hamanokaia, to “Photo-Drama” ese Havaraia Tauna, Iehova, ena ladana ia abia isi.

Bible Student taudia ia gunalaia tadikaka, Charles T. Russell, be nega ibounai hereva momokani halasia haraga daladia ia tahua. Bible Student taudia be lagani 30 mai kahana lalonai idia printaia pablikeisen idia gaukaralaia. To, hari dala namo hereana ta idia davaria​—muvini piksa.

Lagani 1890 lalodiai, taunimanima be regerege be lasi muvini piksa idia itaia matamaia. Lagani 1903 ai, New York City ena dubu ta dekenai tomadiho ena muvini piksa ta idia halasia. Bena lagani 1912 ai, bisinesi haida be muvini piksa idia karaia matamaia neganai, tadikaka Russell ese “Photo-Drama” ia hegaegaelaia matamaia. Ia laloparara unai dala matamatana amo hereva momokani be taunimanima momo dekenai idia harorolaia diba. Idia printaia pablikeisen amo unai idia karaia diba lasi.

“Photo-Drama” be hora 8 lalonai idia hahedinaraia. Ia be kahana foa ai idia halasia, bona idia rekodia Baibel tok ibounai 96 be momo ese ena gadona idia diba tauna ta ese ia duahia. Idia hedinarai piksa ta ta be mai edia miusiki danu. Rekodi masini gaukaralaia namonamo tadikaka ese miusiki bona gado regena be kala slaid bona Baibel sivarai edia drama ida nega korikori ai idia gadaralaia hebou.

Idia gaukaralaia muvi bona galasi slaid momo be kampani ma haida amo idia hoia. Philadelphia, New York, Paris, bona London ai, laulau penia  taudia ese piksa bona galasi slaid ta ta idia penia. Betele ena Art Room tadikaka danu be unai gaukara idia durua, bema slaid ta ia makohia, idia ese matamata idia karaia. Danu, Yonkers, New York ai, Betele famili taudia haida be muvini piksa ta idia karaia. Idia ese Isako, Aberahamo, bona Aberahamo ia koua Isako do ia bouboulaia lasi aneru ena kahana idia hahedinaraia.​—Gen. 22:​9-12.

Tadikaka Russell ida ia gaukara tauna ta ese nius taudia ia hamaoroa, unai piksa matamatana dainai “taunimanima tausen momo be do idia ura Baibel idia dibaia, guna bamona lasi.” Kerisendom ena dubu gunalaia taudia be “Photo-Drama” idia hanamoa, a? Lasi, to idia gwauraia dika. Hehuni dalanai bona taunimanima vairadiai kara haida idia karaia, taunimanima be “Photo-Drama” idia itaia lasi totona. Gabu ta dekenai, dubu gunalaia tauna ta ena orea taudia haida ese paoa idia utua.

To, taunimanima momo herea be “Photo-Drama” itaia totona idia mai bona davana be lasi. United States ai, siti 80 lalonai idia halasia. Momo idia hoa badina unai be nega ginigunana idia itaia piksa lalonai ta ia herevahereva. Nega daudau lalonai piksa momo ia abia diba kamera idia gaukaralaia dainai, taunimanima ese flaoaflaoa ia kehoa bona kokoroku maragina be gatoi ia makohia bona ia raka-lasi ena laulau idia itaia. Saiens taudia ese idia davaria gaudia edia laulau idia hahedinaraia karana ese ia hamomokania, Iehova be aonega bada Diravana. Matamanai ai hereva bamona, tau ta be “Photo-Drama” ai tadikaka Russell ena laulau ia itaia bona ia gwau: “Unai tau ena toana be Tadikaka Russell bamona!”

Buka torea bona piksa ena histori ia diba momo tauna ta ladana, Tim Dirks ia gwau: “ ‘Photo-Drama’ be piksa ginigunana miusiki, taunimanima edia gado regena, bona kala slaid be nega tamona ia hahedinaraia.” Guna piksa haida idia karaia, to idia be “Photo-Drama” bamona lasi. Danu, “Photo-Drama” idia karaia ena lagani ginigunana ai North America, Europe, Australia, bona New Zealand ai taunimanima nain milioni bamona ese idia itaia!

January 11, 1914 ai, “Photo-Drama” be nega ginigunana New York City ai idia halasia. Bena, hua seven murinai Tanobada Tuarina Ginigunana ia vara. To, tanobada hegegemadai hutuma idia haboua “Photo-Drama” idia itaia totona. Basileia ese do ia mailaia hahenamo idauidau idia itaia neganai, idia ia hagoadaia bada. Oibe, lagani 1914 ai, “Photo-Drama” be taunimanima ese idia ura henia muvini piksa namo hereana.