1, 2. (a) Natudia idia do matamata neganai, tama sina momo be dahaka idia lalohekwarahilaia? (b) Matamata taudia be dahaka tahua gaudia idia atoa diba?

 KERISTANI tama sina idia itaia edia natuna ia bapatiso neganai, idia moale bada. a Berenice ena natudia be foa, edia mauri lagani be do 14 lasi neganai, idia bapatiso. Ia gwau: “Ai itaia emai natudia idia ura Iehova idia hesiai henia neganai, ai moale bada bona ai tai danu. To, ai diba emai natudia be idia do matamata dainai, hahetoho momo do idia davaria.” Reana oi danu be unai bamona oi mamia.

² Momokani, emu natuna ia matamata neganai, do oi hekwarahi bada ia oi naria totona. Diba bada tauna ta ia gwau: “Natudia edia matamata negana be idia ‘kara kava’ o ‘natu maragidia bamona idia kara’ negana lasi. To unai nega ai, idia be gau idauidau idia karaia diba, edia hemami ia goada, bona idia ura edia turadia ida idia loaloa.” Unai dainai emu natuna ia do matamata  neganai, ia ese Iehova ia tura henia bona haroro gaukara ai tahua gaudia ia atoa bona hagugurua diba. Danu, ena mauri ia gwauhamatalaia bona unai gwauhamata ia badinaia. Oibe, matamata negana be nega namona Iehova ia hesiai henia totona, Iesu ia matamata neganai, ia karaia bamona. (Luka 2:52 duahia.) To emu natuna be edena bamona do oi hadibaia Iehova ia hesiai henia totona? Iesu ese ena hahediba taudia dekenai lalokau, manau, bona laloa kehoa ia hahedinaraia. Edena dala ai iena kara do oi tohotohoa?

 3. Edena dala ai Iesu ese ena aposetolo taudia ia tura henia?

³ Iesu ese ena aposetolo taudia ia lalokau henia bona ia tura henidia. (Ioane 15:15 duahia.) Baibel negadiai, gaukara biaguna ese ena lalohadai bona hemami be ena igui hesiai taudia ida ia herevalaia lasi. To Iesu be unai bamona lasi, ia ese ena aposetolo taudia ia tura henia. Idia ida ia noho hebou, ena hemami ia herevalaia, bona edia lalona ai idia noho gaudia idia herevalaia neganai, ia kamonai namonamo. (Mar. 6:30-32) Unai bamona herevahereva karana ese Iesu bona ena aposetolo taudia huanai hetura karana namona ia havaraia bona do idia karaia gaukarana totona idia ia hegaegaelaia.

 4. Edena dala ai emu natuna oi tura henia diba? (Laulau ginigunana herevalaia.)

⁴ Micheal ena natudia be rua, ia gwau: “Ena be eda mauri lagani be eda natudia ida ia hegeregere lasi, to idia ita tura henia diba.” Tura namodia be idia moale hebou. Unai dainai emu moni gaukara eiava gaukara ma haida amo nega oi atoa, emu natuna ida oi moale hebou totona. Unai oi gurigurilaia bona lalohadailaia be gau badana. Danu, tura namodia be edia ura gaudia idia herevalaia hebou. Unai dainai, namona be emu natuna ese ia moalelaia gaudia, hegeregere miusiki, muvi, eiava spot oi moalelaia. Ilaria be Italy ai ia noho, ia gwau: “Egu tama sina be lau ura henia miusiki idia kamonai danu. Egu tamana be egu tura namona ai ia lao, bona ia ida egu hemami lau herevalaia diba.” Namona be emu natuna oi tura henia bona oi durua ‘Iehova ia tura henia’ totona. Unai amo umui hahedinaraia emu maduna umui laloa bada. (Sal. 25:14, BHḡ) Bona emu natuna do ia itaia oi be ia oi lalokau henia bona matauraia, bona do ia auka lasi oi ia hereva henia totona.

 5. Iesu ia ura ena hahediba taudia be dahaka idia karaia?

⁵ Iesu ia ura ena lalokau hahediba taudia bona turadia ese Iehova hesiai henia karana ena moale idia mamia. Unai dainai idia ia hagoadaia haroro gaukara bona hahediba taudia halaoa gaukarana do idia goadalaia! Bona ia gwauhamata idia do ia durua idia kwalimu totona.—Mat. 28:19, 20.

6, 7. Dahaka dainai tama sina ese natudia do idia durua stadi, hebou, bona haroro gaukara idia laloa bada totona?

⁶ Oi ura emu natuna be Iehova ia tura henia. Iehova danu ia ura emu natuna dekenai “ena matahakani bona sisiba” oi hadibaia. (Efe. 6:4) Ia ese oi dekenai unai maduna ia henia. Unai dainai namona be emu natuna oi durua, sibona ena stadi bona hebou lao henia karana ia goadalaia totona. Hegeregere: Emu natuna be sikuli dekenai oi siaia, badina oi ura diba ia abia. Unai hegeregerena, oi ura emu natuna be hebou maragidia bona badadia amo ‘Iehova ena sisiba’ ia kamonai. Oibe, Iehova amo idia abia dibana ese idia ia hamauria diba. Unai dainai emu natuna oi durua, Dirava tomadiho henia karadia ia goadalaia bona ia abia aonegana ia laloa bada totona. (Aon. 24:14) Danu, ia oi hadibaia do ia haroro hanaihanai. Bona Iesu  hegeregerena, oi durua Dirava ena Hereva hadibaia karana ia moalelaia totona.

⁷ Edena dala ai sibona stadi karana, hebou, bona haroro hanaihanai karana ese emu natuna do ia durua? South Africa ai ia noho taihuna, Erin ia gwau: “Baibel stadi, hebou, bona haroro negadia ai moale lasi bona ai maumau. Nega haida emai ruma bese stadi negana ai gau idauidau ai karaia, stadi ai reaia totona. To unai ese emai tama sina ia koua lasi.” Ma ia gwau: “Unai amo haheauka karana lau dibaia. Bona bema —hebou eiava haroro dekenai lau lao lasi, do lau ura lasi gabeai unai lau reaia. Lau moale badina emai tama sina ese ai idia durua emai stadi karana, hebou, bona haroro gaukara ai laloa bada totona. Bema unai idia karaia lasi, ai ese unai gaudia do ai laloa maragi.”

 8. (a) Edena dala ai Iesu ia hahedinaraia ena goada be mai hetoana? (b) Iesu ena manau karana ese edena dala ai ena hahediba taudia ia durua?

⁸ Ena be Iesu be ia goevadae, to mai manau ida ia hahedinaraia ena goada be mai hetoana bona Iehova dekenai ia tabekau. (Ioane 5:19 duahia.) Iesu ia manau dainai, iena hahediba taudia ese ia idia matauraia. Oibe, Iehova dekenai ia tabekau dainai, ena hahediba taudia ese ia idia abidadama henia. Bona gabeai iena manau karana idia tohotohoa.—Kara 3:12, 13, 16.

 9. Bema oi manau, edena dala ai unai ese emu natuna ia durua?

⁹ Ita be Iesu bamona lasi, ita be goevadae lasi bona kerere momo ita karaia. Unai dainai mai manau ida do ita hahedinaraia, iseda goada be mai hetoana bona iseda kerere ita gwauraia hedinarai. (1 Ioa. 1:8) Vadaeni daika do oi matauraia? Ena kerere ia gwauraia hedinarai biaguna eiava ia sori lasi tauna? Bema emu natuna ia itaia oi be oi karaia kererena dainai oi sori, ia ese oi do ia matauraia. Gabeai ia danu be iena kerere do ia gwauraia hedinarai. Rosemary be sina ta mai ena natudia toi, ia gwau: “Emai kerere ai gwauraia hedinarai karana ese emai natudia ia durua, edia hekwakwanai idia herevalaia totona.” Ma ia gwau: “Ai diba emai laloparara be mai hetoana dainai, emai natudia be heduru idia noia neganai, Baibel bukadia amo idia ai durua bona ai guriguri hebou.”

10. Edena dala ai Iesu ese ena murinai idia raka taudia dekenai manau ia hahedinaraia?

¹⁰ Iesu be mai ena maoro ena murinai idia raka taudia ia hagania totona. To, hahegani ta ia do henia lasi neganai, mai manau ida unai hahegani ena badina ia gwauraia. Hegeregere, ia ese ena murinai idia raka taudia ia hamaoroa Basileia bona Dirava ena kara maoromaoro do idia tahua guna, bena ia gwau: “Bona unai gaudia ibounai be umui dekenai do ia henia.” Ma ia gwau, “Ma haida umui hahemaoro henia lasi,” bona ena badina ia gwauraia: “Vadaeni Dirava ese umui do ia hahemaoro henia lasi, badina ma haida umui hahemaoro henia hegeregerena, umui do idia hahemaoro henia.”—Mat. 6:31–7:2.

11. Dahaka dainai oi atoa taravatu eiava oi karaia abia hidi ena badina oi gwauraia be namo?

¹¹ Taravatu ta eiava abia hidi ta umui karaia neganai, namona be ena badina umui gwauraia danu. Bema emu natuna ese unai oi karaia ena badina ia lalopararalaia, ia be mai kudouna ibounai ida oi do ia kamonai henia. Barry be mai ena natudia foa. Ia gwau: “Bema oi karaia taravatu eiava abia hidi edia badina oi gwauraia, emui natudia ese oi do idia abidadama henia, badina idia diba oi karaia abia hidi be maoro.” Gabeai emu natuna ia bada neganai, ia ese ena “darana” do ia gaukaralaia. (Roma 12:1) Barry ma ia gwau: “Namona be matamata  taudia idia diba, abia hidi ta idia ura karaia neganai, namona be ia be mai ena badina maorona.” (Sal. 119:34) Bema oi karaia abia hidi ena badina be mai manau ida oi gwauraia hedinarai, emu natuna do ia laloparara oi be ia oi matauraia bona oi diba ia bada neganai, sibona ena abia hidi ia karaia diba.

12. Edena dala ai Iesu ese laloa kehoa ia gaukaralaia Petero ia durua totona?

¹² Iesu be laloa kehoa ia hahedinaraia bona ia laloparara edena negai ena hahediba taudia do ia durua. Hegeregere, Iesu ese ia do idia hamasea sivaraina be ena hahediba taudia dekenai ia gwauraia neganai, Petero ese Iesu ia hamaoroa ia sibona do ia hebogahisi henia. To, Iesu ia diba Petero ena lalohadai be kerere. Unai dainai ia bona hahediba taudia ma haida durua totona, Iesu ese Petero ia sisiba henia. Unai murinai sibona laloa karana ena dika bona sibona henia karana ena namo ia herevalaia. (Mat. 16:21-27) Petero be unai amo gau ta ia dibaia.—1 Pet. 2:20, 21.

13, 14. (a) Edena bamona do oi diba emu natuna ena abidadama be ia manoka ia lao? (b) Edena dala ai emu natuna oi durua diba?

¹³ Iehova oi guriguri henia oi dekenai laloa kehoa do ia henia, unai amo do oi diba edena negai emu natuna do oi durua. (Sal. 32:8) Hegeregere, edena bamona do oi diba emu natuna ena abidadama be ia manoka ia lao? Reana oi itaia ia be ia moale lasi, eiava tadikaka taihu ia gwauraia dika, eiava oi amo gau haida ia hunia. Namo lasi oi laloa emu natuna be hehuni ai kara kerere ta ia karaia noho. b Bema unai bamona toa oi itaia, namo lasi unai oi laloa maragi, to emu natuna oi durua ena abidadama ia hagoadaia lou totona.

¹⁴ Iesu hegeregerena, namona be mai manau bona hemataurai ida emu natuna ena lalohadai oi tahua. Mani inai oi laloa, bema ranu guri amo ranu mai ena baketi oi veria daekau haraga, ranu be do ia bubua. Unai hegeregerena, bema mai badu ida emu natuna dekenai henanadai momo oi henia, bona oi doria ia haere totona, ia ese  ena lalohadai bona hemami korikorina do ia gwauraia lasi. (Aonega Herevadia 20:5 duahia.) Ilaria, matamanai ita herevalaia taihuna, ia gwau: “Lau matamata neganai, lau ura egu nega bada be egu sikuli turadia ida lau haorea, to lau diba unai be kerere. Unai lau lalohekwarahilaia dainai egu kara ia idau bona egu tama sina be unai idia itaia. Unai dainai hanuaboi ta, lau idia nanadaia bema lau be mai egu hekwakwanai ta. Lau tai bona egu hekwakwanai lau gwauraia, bona lau noidia lau idia durua totona. Idia ese lau idia rosia bona idia hagoadaia.” Oibe, Ilaria ena tama sina ese ia idia durua kongrigeisen lalonai tura namodia ia davaria totona.

15. Iesu ese taunimanima ia kara henia neganai, edena bamona laloa kehoa ia hahedinaraia?

¹⁵ Iesu ese ena hahediba taudia edia kara namodia ia itaia neganai, laloa kehoa ia hahedinaraia danu. Hegeregere, Natanaela ia kamonai Iesu be Nasareta amo ia mai neganai, ia gwau: “Gau namona ta be Nasareta amo ia mai diba, a?” (Ioa. 1:46) Bema oi be unuseni oi noho bona unai oi kamonai, dahaka do oi laloa? Do oi laloa Natanaela be ia laloa kerere, Nasareta taudia ia gwauraia dika eiava ia be abidadama lasi? Iesu be mai laloa kehoa ida Natanaela ena kara namodia ia laloa. Unai dainai Iesu ia gwau, Natanaela “be Israela tauna, ia dekenai koikoi ta be lasi momokani.” (Ioa. 1:47) Iesu be taunimanima edia kudouna ia itaia dainai, taunimanima edia kara namo ia gwauraia diba.

16. Edena dala ai emu natuna oi durua diba kara namodia ia hahedinaraia totona?

¹⁶ Oi be ta ena kudouna oi itaia diba lasi, to Dirava ese oi do ia durua laloa kehoa oi hahedinaraia totona. Unai amo emu natuna ena kara namodia oi itaia diba. Bema emu natuna ese oi ia habadua, namo lasi ia oi gwauraia, “kerere karaia momo natuna,” eiava “gwau-edeede natuna,” eiava “kavakava natuna.” Namo lasi emu natuna be unai bamona oi laloa. To, ia oi hamaoroa oi be iena kara namodia oi itaia bona oi diba ia be ia ura kara maorona ia karaia. Bema ena kara haida ia hanamoa, namona be ia oi hanamoa. Bema hegeregere, maduna ma haida oi henia, unai amo ena kara namodia oi itaia diba. Iesu be unai bamona ia karaia. Ia ese Natanaela ia hedavari henia bena lagani ta mai kahanai ia hanaia murinai, Natanaela ia abia hidi ena aposetolo tauna ai ia lao totona, gabeai ia be Keristani tauna goadana ai ia lao. Natanaela ena ladana ma ta be Batolomeo. (Luka 6:13, 14; Kara 1:13, 14) Bema emu natuna ia karaia karana dainai ia oi hanamoa bona oi hagoadaia, emu natuna do ia laloparara ia be Iehova ia hesiai henia diba.

17, 18. Bema oi gaukara goada emu natuna oi durua totona, dahaka namo do ia vara?

¹⁷ Korinto kongrigeisen lalonai idia noho taudia momo dekenai aposetolo Paulo be tama ta bamona. Idia dainai ia ‘lalohisihisi bada bona ena kudouna ia metau,’ badina idia ia “lalokau henia bada.” Reana oi danu be nega haida unai oi mamia. (2 Kor. 2:4; 1 Kor. 4:15) Victor ena natudia be toi. Ia gwau: “Egu natudia idia matamata neganai, lau hekwarahi bada. To ai mamia moalena ese ai davaria hekwakwanai ia hanaia. Iehova ese ai ia durua dainai, ai moale bona emai hetura karana ia goada.”

¹⁸ Namona be oi gaukara goada emu natuna do oi durua Iehova ia hesiai henia totona. Unai amo oi hahedinaraia ia oi lalokau henia. Bema oi itaia ia ese hereva momokani ia abia dae bona ‘hereva momokani ai ia raka noho,’ do oi moale bada, ani?—3 Ioa. 4.