IEHOVA be hariharibada Diravana. (Iam. 1:17) Guba gaudia bona tanobada ai idia noho mauri gaudia be Iehova ena hariharibada karana dainai, ia idia hanamoa.—Sal. 65:12, 13; 147:7, 8; 148:3, 4.

Salamo torea tauna be ena Havaraia Tauna ese ia karaia gaudia ia laloa bada dainai, Iehova ia hanamoa. Salamo karoa 104 ai unai ane oi itaia diba. Ia gwau: “Lauegu mauri dinadia idia do noho neganai, lau ese Lohiabada dekenai ane do lau abia. Lau ese ane dekenai Lohiabada do lau hanamoa noho, ela bona lau mase.” (Sal. 104:33) Oi danu be unai oi mamia, a?

Iehova ia ura iena hariharibada karana ita tohotohoa. Bona unai ena badina ia gwauraia danu. Iehova ese aposetolo Paulo ia hasiahua inai hereva ia torea, ia gwau: “Inai nega oromana ai idia taga taudia do oi hadibaia idia hekokoroku lasi totona, bona idia dika haraga kohu do idia abidadama henia lasi, to Dirava do idia abidadama henia, ia ese ita dekenai gau momo herea ia henia ita moalelaia totona. Idia do umui hamaoroa kara namodia bona gaukara namodia momo do idia karaia, hariharibada karana do idia hahedinaraia bona idia dekenai idia noho gaudia do idia haria, unai dala amo idia be vaira negana totona badina namona idia haginia, unai be dava bada kohuna bamona idia haboua, unai amo mauri korikorina idia dogoatao auka.”—1 Tim. 6:17-19.

Paulo ese Korinto kongrigeisen dekenai ena revareva iharuana ia torea neganai, ia ese henia karana ena namo ia herevalaia. Ia gwau: “Namona be ta ta ese edia kudouna ai idia laloa vadaeni gauna hegeregerena do idia henia. Namo lasi mai lalohisihisi ida eiava ta ese ia doria dainai idia henia, badina mai moale ida ia henia tauna be Dirava ese ia lalokau henia.” (2 Kor. 9:7) Bena ia gwau, henia karana amo dabu taudia be heduru idia abia bona heduru idia henia taudia be Dirava ese ia hanamoa.—2 Kor. 9:11-14.

Iena hereva dokonai, ia ese Iehova ena hariharibada karana ia herevalaia. Ia gwau: “Dirava ena davana lasi harihari gauna dainai ia ita tanikiu henia, inai harihari gauna be hereadae.” (2 Kor. 9:15) Oibe, Iehova ese Iesu Keriso amo iena taunimanima dekenai ena hariharibada kara hereadaena ia hahedinaraia. Unai harihari gauna dainai idia ita tanikiu henia be namo.

Iehova bona ena Natuna ese hari bona nega vaira ai do idia karaia gaudia dainai, edena dala ai idia do ita tanikiu henia? Dala ta be iseda nega, goada, bona kohu ita gaukaralaia Iehova ena tomadiho momokani ita durua totona, herevana ia be maragi eiava bada.—1 Siv. 22:14; 29:3-5; Luka 21:1-4.