“Lau laloa reana lau be anina lasi dainai Iehova kahirakahira lau lao be auka, to lau ura unai lalohadai kererena lau negea.” Unai be hahine ta ena hereva. Oi be unai bamona oi laloa, a? Bema oibe, reana oi sibona oi nanadaia: ‘Iehova be ena hesiai taudia ta ta ia laloa, a?’ Oibe! Iesu ena hereva ese ia hamomokania Iehova ese ita ta ta ia laloa.​—Ioane 6:44 duahia.

Iesu, Iehova ena kara bona ura ia diba namonamo tauna be dahaka ia gwau? (Luka 10:22) Ia gwau: “Tau ta be lau dekenai do ia mai diba lasi, bema Tamana, lau ia siaia tauna ese ia veria mai lasi.” Unai dainai, Keriso bona eda guba Tamana Iehova edia hesiai tauna ai ita lao totona, namona be Dirava ese ita ia veria mai. (2 Tesalonika 2:13) Bema Iesu ena hereva ena anina ita lalopararalaia, do ita hamomokania Dirava be ita ia laloa.

Iehova ese ita ia veria mai ena anina be dahaka? Greek herevana idia hahanaia “veria mai” be reke mai ena gwarume veria mai karana ia herevalaia danu. (Ioane 21:6, 11) Anina be Iehova ese ita ia doria ia ita hesiai henia totona, a? Lasi. Iehova ese ita dekenai ura kwalimu ia henia karana ese ia hahedinaraia, ia be ita ia doria lasi. (Deuteronomi 30:19, 20) Iehova ese tanobada taudia bilioni momo huanai ia tahua taudia be inai: Kudou-maoro taudia. (1 Sivarai 28:9) Dirava ese unai bamona tauna ta ia davaria neganai, ia veria mai bamona. Edena dala ai?

Iehova ese “kudou-maoro taudia” ta ta ena lalona ia hamarerea. (Kara 13:48) Iehova be dala rua amo unai ia karaia​—(1) Baibel ena sivarai namona, bona (2) ena lauma helaga. Iehova ia itaia ta ese Baibel ena hereva momokani ia ura henia neganai, Ia ese lauma helaga amo unai tauna ia durua ia dibaia hereva momokani ia lalopararalaia bona ena mauri lalonai ia badinaia totona. (1 Korinto 2:11, 12) Dirava ena heduru dainai, ita be Iesu bona Iehova edia hesiai tauna ta ai ita lao.

Ioane 6:44 ai, Iesu ese Iehova Dirava ia herevalaia karana amo dahaka ita diba? Iehova ese taunimanima ia veria mai badina edia kudouna ia namo bona idia ta ta ia laloa. Paragraf ginigunana ai ita herevalaia hahinena be unai hereva momokani ia lalopararalaia neganai, ena lalona ia goada. Ia gwau: “Iehova lau hesiai henia be hahenamo hereadaena. Bema Iehova ese lau ia abia hidi ena hesiai hahinena ai lau lao, anina be ia ese lau ia laloa.” Oi be edena bamona? Oi diba Iehova be ena hesiai taudia ta ta ia laloa dainai, oi ura Ia kahirakahira oi lao, a?