Inai haheitalai oi laloa, tamana ta be ena natuna mero—ena mauri lagani 7—ida ia herevahereva. Ia gwau: “Idaunegai, Dirava ese tanobada bona lalonai idia noho gaudia ibounai, bona dina, hua bona hisiu ia karadia.” Mero be nega sisina unai ia laloa bena ia henanadai, “Tamagu, daika ese Dirava ia karaia?”

Tamana ia haere: “Dirava be ta ese ia karaia lasi. Ia be ia noho hanaihanai.” Unai haere kwadogina ese ena henanadai ia haerelaia. To ia bada neganai, unai henanadai ia do laloa noho. Ia abia dae lasi Dirava be mai ena matamana lasi. To iunives be mai ena matamana. Unai dainai ia laloa, ‘Vadaeni, Dirava be edeseni amo ia mai?’

Baibel ena haere be dahaka? Haheitalai ai ia noho tamana ena haere hegeregerena. Mose ia gwau: “Lohiabada e, . . . ororo do oi karaia lasi neganai, tanobada bona motumotu oi do karaia lasi neganai, oi be unai bamona, bona unai bamona do oi noho ela bona hanaihanai.” (Salamo 90:1, 2) Unai hegeregerena, peroveta tauna Isaia ia gwau: “Umui diba lasi, a? Umui kamonai lasi, a? Lohiabada be noho hanaihanai Diravana. Ia be tanobada ena kahana ibounai ia karaia vadaeni Diravana.” (Isaia 40:28) Danu, Iuda ena revareva ia gwau Dirava ena noho be “gunaguna, hari, ela bona hanaihanai.”—Iuda 25.

Unai siri bona aposetolo Paulo ena hereva ese idia hahedinaraia, Dirava be “noho hanaihanai King.” (1 Timoteo 1:17) Unai ena anina be, Dirava be idaunega amo ema bona hari ia noho hanaihanai. Bona vaira negana ai ia be do ia noho danu. (Apokalupo 1:8) Unai dainai, iena noho hanaihanai karana ese ia hahedinaraia ia be Siahu Ibounai Diravana.

Dahaka dainai unai ita abia dae be auka? Badina iseda mauri be kwadogi dainai iseda laloparara nega ena daudau dekenai be Iehova ena amo ia idau momokani. Dirava be ia noho hanaihanai dainai, ia dekenai lagani 1,000 be dina tamona bamona. (2 Petero 3:8) Unai ita laloparara totona mani inai haheitalai oi laloa: Kwadi ena mauri ena daudau be dina 50 sibona, ia ese iseda mauri laganidia 70 o 80 ia duahia diba, a? Lasi! To, Havaraia Tauna Badana ida sibona ita hahegeregerea neganai, Baibel ia gwau ita be kwadi bamona. Iseda laloparara danu be mai ena hetoana. (Isaia 40:22; 55:8, 9) Unai dainai, taunimanima ese Iehova ena kara ibounai idia lalopararalaia diba lasi.

Ena be momo idia abia dae lasi Dirava ia noho hanaihanai, to unai haheitalai amo ita diba Dirava ia noho hanaihanai. Bema ta ese Dirava ia havaraia, anina be unai tauna be Havaraia Tauna. To, Baibel ena hereva hegeregerena, Iehova ‘ese gau ibounai ia havaraia.’ (Apokalupo 4:11) Ma danu, ita diba iunives be guna ia noho lasi. (Genese 1:1, 2) Iunives be edeseni amo ia mai? Ena Havaraia Tauna ia noho guna be namo. Danu, Havaraia Tauna ia noho vadaeni, gabeai ena Natuna tamona bona aneru idia noho. (Iobu 38:4, 7; Kolose 1:15) Unai ese ia hahedinaraia, Ia sibona ia noho guna. Ia be ta ese ia havaraia lasi, badina ta ia noho guna lasi unai ia karaia totona.

Taunimanima bona iunives ia noho karana ese ia hamomokania, Dirava ia noho hanaihanai. Danu, ia sibona ese iunives ena heau dalana bona iunives biagua taravatudia ia atoa karana amo ena noho ia hamomokania. Ia sibona ese gau ibounai dekenai mauri ia henia diba.—Iobu 33:4.