Èske bridsoukou ou vin gen yon pwoblèm sante? Si repons lan se wi, sandout ou konn jan sa ka afekte panse w ak santiman w e jan sa ka koute chè pou w jwenn swen. Ki sa k ka ede w? Ki jan w ka ede yon fanmi w oswa yon zanmi w k ap fè fas ak yon pwoblèm sante? Menm lè Bib la pa yon liv medsin, li gen bonjan prensip pratik ki kapab ede w fè fas ak sitiyasyon difisil ki genyen nan lavi a.

•   Chèche wè yon doktè

   Men sa Bib la di: “Se pa moun ki an sante ki bezwen doktè, men se moun ki malad ki bezwen doktè.” — Matye 9:12.

   Fason n ka aplike vèsè sa a: Chèchè èd yon pwofesyonèl nan domèn medikal.

   Eseye fè sa: Chèche jwenn pi bon swen ki disponib yo. Gendelè, li t ap bon pou w konsilte plis pase yon sèl doktè (Pwovèb 14:15). Pale yon fason ki klè ak pwofesyonèl yo pou yo byen konprann jan w santi w e asire w ou konprann sa yo di w (Pwovèb 15:22). Chèche konnen plis enfòmasyon sou maladi w genyen an ak tout tretman ki disponib yo. Lè w konnen sa pou w atann, w ap ka pi byen jere santiman w e w ap ka pran pi bon desizyon pou ede w jere sante w.

•   Kontinye gen bon abitid pou ede w jere sante w

   Men sa Bib la di: “Sa bon pou nou chache fè espò pou kenbe kò nou anfòm.” — 1 Timote 4:8, Bib La.

   Fason n ka aplike vèsè sa a: Nou jwenn byenfè lè n kontinye gen bon abitid tankou fè egzèsis fizik regilyèman.

   Eseye fè sa: Chèche kenbe yon woutin pou w fè spò, pou w manje manje ki bon pou sante w e pou w dòmi ase chak swa. Menm lè w ap eseye ajiste w ak maladi w la, pwofesyonèl yo dakò sa vo lapenn pou w chèche gen bon abitid sa yo. Sa ki klè, n ap toujou fè efò pou n chèche fè sa k ap bon pou sante n e n pap fè anyen ki t ap kontrè ak tretman medikal n ap suiv yo.

•   Chèche èd nan men lòt moun

   Men sa Bib la di: “Yon bon zanmi demontre lanmou toutan e li se yon frè yo ka konte sou li lè gen malè.” — Pwovèb 17:17.

   Fason n ka aplike vèsè sa a: Zanmi w yo kapab ede w fè fas ak pwoblèm w ap travèse yo.

   Eseye fè sa: Pale ak yon zanmi ou fè konfyans, yon moun ou santi w alèz pou w di sa k sou kè w. Lè w fè sa, sa ka ede w santi mwens strès, konsa w ap santi w pi byen. Zanmi w ak fanmi w ka vle ofri w èd yo men yo gendwa pa konnen ki jan pou yo ede w. Pale klè avèk yo pou w fè yo konnen fason yo ka ede w. Se pou w rezonab e toujou montre w rekonesan pou sa yo fè pou ou. Menm lè zanmi w yo vle ede w, petèt ou ka bezwen etabli kèk limit sou kantite moun ki vizite w e sou konbyen tan vizit yo ap dire, konsa ou pap santi yo anvayi w.

•   Ret pozitif

   Men sa Bib la di: “Kè kontan se bon remèd, Men, lè yon moun dekouraje nèt, sa fè l pèdi fòs.” — Pwovèb 17:22.

   Fason n ka aplike vèsè sa a: Lè w ret pozitif sa ka ede w rete kalm e sa ka ede w jere strès ou genyen akoz maladi a.

   Eseye fè sa: Toutpandan w ap adapte w ak nouvo sitiyasyon w lan, konsantre sou sa w ka fè olye w ret konsantre sou bagay ki pa sou kontwòl ou. Evite konpare tèt ou ak lòt moun oswa ak fason w te ye anvan w te malad la (Galat 6:4). Ou ka ret pozitif si w etabli objektif ou kapab atenn (Pwovèb 24:10). Chèche ede lòt moun selon sitiyasyon w. Kè kontan w ap jwenn lè w ede lòt moun ka ede w evite gen panse negatif. — Travay 20:35.

 Bib la montre n Jewova Dye a kapab ede yon moun fè fas ak pwoblèm sante. Menm lè nou pa atann pou Jewova fè yon mirak pou l geri nou, moun ki adore Bondye yo ka jwenn èd li nan fason ki vin annapre yo:

 Lapè. Jewova ka ban nou “lapè Bondye, ki depase tout sa moun ka konprann” ​(Filipyen 4:6, 7). Lapè oswa kalm sa a ka ede yon moun pou strès pa anvayi l. Bondye fè moun ki priye l yo jwenn lapè sa a paske yo fè l konnen enkyetid yo genyen. — 1 Pyè 5:7.

 Sajès. Jewova ka ban nou sajès pou ede n pran bon desizyon (Jak 1:5). Yon moun ap rive jwenn sajès sa a lè l aprann epi l aplike bonjan prensip ki nan Bib la.

 Yon bèl espwa alavni. Jewova pwomèt nou yon bèl avni kote ‘pap gen okenn moun k ap di: “Mwen malad”’ ​(Ezayi 33:24). Esperans sa a ede anpil moun pou yo ret pozitif malgre gwo pwoblèm sante yo genyen. — Jeremi 29:11, 12.