NAN ane 1989, mwen menm ak mari m te rankontre Temwen Jewova yo lakay yon vwazen nou. Frè Givi Barnadze, ki t ap etidye Labib avèk vwazen nou an, pa t gen bib paske nan epòk la li te difisil pou moun jwenn bib nan Jòji.

Nou te renmen sa nou te tande yo e nou te anvi gen yon bib. Lè mari m te rankontre ak gran frè l, li te di frè l la li t ap chèche yon bib. Li te sezi lè frè l la di l li fèk achte yon bib an jòjyen e l ap byen kontan fè l kado l.

Lè Badri tounen lakay, li te chita bò tab la e l te kòmanse li Labib pou jis li aswè. Nan demen, li leve e li kontinye li. Lè m tounen sot travay, m te jwenn li chita bò tab la, li t ap li Labib toujou. Li pa t ka sispann li! Mwen te di l  pou I pran kèk jou konje pou l fini lekti a. Yon ti tan annapre li te rive fin li tout Bib la.

Annapre, lè nou te kòmanse etidye liv Laverite k ap mennen nan lavi etènèl la avèk frè Barnadze, nou te byen kontan gen bib nou. Sa te byen tonbe paske nou pa t gen liv Laverite a e frè a pa t gen bib. Anviwon ennan apre, Badri avè m te batize.