Ki sa m ka fè pou m gen bon zanmi?
CHAPIT 8
Ki sa m ka fè pou m gen bon zanmi?
“Lè m fache, mwen bezwen yon moun pou m pale. Lè m tris, mwen bezwen yon moun ki pou remonte moral mwen. Lè m kontan, mwen vle pataje kè kontan sa a ak yon moun. Pou mwen menm, se yon nesesite pou m gen zanmi.” — Brittany.
LÈ W te timoun ou te bezwen lòt timoun pou w jwe. Timoun sa yo te la pou w pa t santi w poukont ou. Men, kounye a, ou bezwen bonjan zanmi, moun ki pa sèlman la pou pase tan avè w men ki gen menm prensip avè w.
Mete sou sa, Labib fè konnen: “Yon bon zanmi demontre lanmou toutan, e li se yon frè yo ka konte sou li lè gen malè.” (Pwovèb 17:17). Zanmi yo pale nan vèsè sa a se pa zanmi w te konn jwe avè yo lè w te piti yo.
Sa ki verite: Tank w ap vin pi gran, ou bezwen zanmi ki:
1. Gen bèl kalite
2. K ap suiv bon prensip
3. Ki gen bon enfliyans sou ou
Kesyon: Ki jan nou ka jwenn zanmi ki konsa? Ann egzamine pwen sa yo.
1ye bagay pou w chèche: Bèl kalite
Sa w dwe konnen. Se pa paske yon moun di li se zanmi w ki vle di li se yon bon zanmi pou sa. Dayè, Bib la di “gen zanmi ki prèt pou kraze youn lòt”. (Pwovèb 18:24.) Sa ka parèt dwòl, men fè yon ti reflechi: Èske sa poko janm rive w ou gen yon zanmi ki byen avè w pou avantaj? Oubyen yon zanmi ki pale sou do w oswa ki pale w mal? Yon sitiyasyon konsa ka fè w vin pa fè zanmi konfyans *. Toujou sonje: se pa kantite zanmi ou genyen an ki enpòtan men se ki moun ou genyen kòm zanmi!
Sa w ka fè. Chwazi moun ki gen bèl kalite pou w fè zanmi.
“M gen yon zanmi ki rele Fiona e tout moun pale an byen de li. M ta renmen yo pale de mwen menm jan an. M ta renmen gen menm repitasyon avè l. M twouve se yon bèl bagay.” — Yvette, 17 an.
Eseye fè ti egzèsis ki vin apre a.
1. Li Galat 5:22, 23.
2. Mande tèt ou: ‘Èske zanmi m yo gen kalite ki fè pati “fwi lespri a”?’
3. Ekri non pi bon zanmi w yo pi ba a. Epi bò kot chak non, ekri ki premye bagay moun plis wè lakay li.
Non
․․․․․
Bagay moun wè lakay li
․․․․․
Sonje sa: Si se bagay negatif sèlman ki vin nan lespri w lè w panse ak zanmi sa a, ebyen li t ap bon pou w kòmanse chèche pi bon zanmi.
2yèm bagay pou chèche: Bon prensip
Sa w dwe konnen. Plis ou bezwen gen zanmi, se plis ou gen chans pou w fè move zanmi. Bib la di: “Moun ki annafè ak moun ki sòt, sa ap mal pou li.” (Pwovèb 13:20). Lè Bib la di “moun ki sòt”, li pap pale de moun ki pa fò lekòl oswa ki pa entèlijan. Men, l ap pale de moun ki pa vle suiv prensip moral yo. Se pa kalite zanmi sa yo ou bezwen.
Sa w ka fè. Pa kouri fè zanmi ak nenpòt moun (Sòm 26:4). Sa pa vle di pou w gen prejije. Sa vle di pito lè w ap chwazi zanmi ou dwe gen bon konprann pou w “wè diferans ant yon moun ki jis ak yon moun ki mechan, ant yon moun k ap sèvi Bondye ak yon moun ki pap sèvi Bondye”. — Malachi 3:18.
“Mwen gen paran m rekonesans paske yo te ede m fè zanmi ak moun laj mwen men k ap suiv prensip Bondye yo.” — Christopher, 13 an.
Reponn kesyon ki vin apre yo:
Lè m avèk zanmi m yo, èske m pè pou yo pa fòse m fè yon bagay ki mal?
□ Wi
□ Non
Èske m yon jan jennen pou m prezante zanmi m yo bay paran m paske m pè pou paran m pa renmen kalite zanmi m genyen yo?
□ Wi
□ Non
Sonje sa: Si w reponn wi pou kesyon ki pi wo yo, li t ap bon pou w chèche zanmi ki gen pi bon prensip, zanmi ki bay bon egzanp antanke kretyen.
3yèm bagay pou chèche: Bon enfliyans
Sa w dwe konnen. Labib di: “Move frekantasyon fè moun pèdi bon abitid yo genyen.” (1 Korentyen 15:33). Men sa yon jèn ki rele Lauren di: “Elèv lekòl mwen yo t ap aksepte byen avè m sèlman si m fè sa yo vle m fè. Donk, pou m pa t ret poukont mwen, mwen te deside aji menm jan avèk yo.” Lauren te vin konprann lè yon moun konfòme l ak prensip lòt moun, ou vin tankou yon pyon nan jwèt echèk moun deplase jan yo vle. Ou pa merite pou yo trete w konsa!
Sa w ka fè. Rale kò w sou moun ki vle w chanje fason w ye pou w vin menm jan avèk yo. Si w fè sa, ou ka wè w vin gen mwens zanmi, men w ap santi w pi byen e w ap vin gen posiblite gen pi bon zanmi, zanmi k ap gen bon enfliyans sou ou. — Women 12:2.
“Clint se bon zanmi m, li gen bon konprann e li konn mete l nan plas lòt moun e kalite sa yo fè li se moun ki te plis ankouraje m.” — Jason, 21 an.
Mande tèt ou:
Èske m vin abiye mal, pale mal oswa aji mal jis pou m fè zanmi m plezi?
□ Wi
□ Non
Èske m konn al yon seri kote moun ki gen bon prensip pa t ap janm met pye yo, jis paske zanmi m yo al la?
□ Wi
□ Non
Sonje sa: Si w reponn wi pou kesyon ki pi wo yo, al chèche konsèy nan men paran w oswa nan men yon lòt granmoun ki gen matirite. Si w se Temwen Jewova, ou ka al kot yon ansyen nan kongregasyon an epi mande l ede w chwazi zanmi k ap gen pi bon enfliyans sou ou.
LI PLIS BAGAY SOU SIJÈ SA A NAN VOLIM 2, CHAPIT 9.
Èske yon swadizan zanmi, oswa kè w, ap pouse w fè sa k pa bon? Gade pou w wè ki jan w ka reziste devan tantasyon an.
[Nòt anba paj]
^ § 12 Natirèlman, tout moun fè erè (Women 3:23). Donk, si yon zanmi fè w yon bagay ki fè w mal men apre sa li montre li vrèman regrèt sa l fè a, sonje “lanmou kouvri yon pakèt peche”. — 1 Pyè 4:8.
VÈSÈ KLE
“Gen zanmi ki pi fidèl pase yon frè.” — Pwovèb 18:24.
MEN YON IDE
Si w suiv prensip ki wo nivo, lòt moun k ap fè efò pou yo fè menm jan an ap pi fasil chèche w kòm zanmi. Moun konsa se pi bon zanmi ou te ka genyen.
ÈSKE W TE KONNEN?
Bondye pa gen patipri, men se pa nenpòt moun li ‘envite nan tant li’. — Sòm 15:1-5.
SA M KONTE FÈ
Men sa m konte fè pou m jwenn bon zanmi ․․․․․
Men kèk moun ki pi gran pase m mwen ta renmen pi byen konnen ․․․․․
Men sa mwen ta renmen mande paran m sou sijè sa a ․․․․․
KI SA W PANSE?
● Ki kalite ou plis renmen lakay yon zanmi, e poukisa?
● Ki kalite ou plis bezwen travay pou w genyen pou w ka yon pi bon zanmi?
[Antrefilè nan paj 60]
“Lè paran m te konseye m pou m pa fè zanmi ak yon seri moun, mwen te di tèt mwen se ak moun sa yo menm mwen vle fè zanmi. Men konsèy paran m te ban m nan te bon, e lè m te vin byen reflechi sou sa, m te rann mwen kont gen anpil bon moun mwen ka fè zanmi avè yo pito.” — Cole.
[Kare nan paj 61]
Eseye fè sa
Pale ak paran w konsènan amitye. Mande yo ki kalite zanmi yo te genyen lè yo te nan laj ou. Èske yo regrèt se moun sa yo yo te chwazi kòm zanmi? Si se wi, poukisa? Mande yo ki sa w ka fè pou w evite kèk nan pwoblèm yo te jwenn.
Prezante zanmi w yo bay paran w. Si w jennen pou w fè sa, mande tèt ou: ‘Sa k fè sa?’ Èske gen kèk bagay paran w pap renmen lakay zanmi w yo? Si se sa, ou ka bezwen pi byen chwazi moun ki pou zanmi w.
Aprann koute. Demontre w enterese ni nan sa ki fè zanmi w kontan ni nan sa ki ba yo pwoblèm. — Filipyen 2:4.
Aprann padone. Pa atann zanmi w yo pap janm fè w anyen. Bib la di: “Nou tout nou bite tanzantan.” — Jak 3:2.
Bay zanmi w yo tan. Pa panse fò w toujou avèk zanmi w yo. Moun ki bon zanmi w yo ap toujou bò kote w lè w bezwen yo. — Eklezyas 4:9, 10.
[Foto nan paj 63]
Lè w konfòme w ak prensip lòt moun, ou vin tankou yon pyon nan jwèt echèk moun deplase jan yo vle.
Lòt sijè ki enteresan
JÈN YO
Kesyon jèn yo konn poze
Kesyon jèn yo konn poze sou zafè sèks, zanmi, paran, lekòl, ak lòt bagay ankò.
