CHAPIT 38

Ki sa m pral fè ak lavi m?

“Okòmansman, mwen pa t konn enkyete m pou lavni. Men, tank mwen te prèske fini lekòl, mwen te vin rann mwen kont m t ap rantre nan lavi a toutbon, m t ap gen pou m travay e se mwen ki t ap gen pou peye pou depans mwen.” — Alex.

IMAJINE w ap planifye yon vwayaj kote w prale byen lwen lakay ou. Siman, premye sa w t ap fè se t ap pran yon kat jeyografi pou w wè ki wout k ap pi bon pou w fè. Se menm bagay la lè w ap planifye avni w. Men sa Michael, yon jèn gason k ap sèvi nan youn nan filyal Temwen Jewova yo, di: “Ou gen plizyè chwa devan w.” Ki jan w ap fè konnen sa pou w chwazi? Michael di ankò: “Tout bagay la depann de objektif ou.”

Se pou w wè objektif tankou yon kote w gen pou w rive. E l ap difisil pou w rive kote sa a si w annik aji konsa. Li t ap pi bon lontan pou w pran yon kat pou w ka gade wout ou pral fè yo. Konsa, ou t ap suiv konsèy nou jwenn nan Pwovèb 4:26 la ki di: “Fè chemen kote w ap met pye w la vin plat, e pap gen okenn danje sou wout ou.” Gen yon tradiksyon Labib (Contemporary English  Version) ki tradui fraz sa a konsa: “Konnen kote w prale.”

Nan ane k ap vini yo, w ap gen pou w pran anpil desizyon enpòtan anrapò ak adorasyon w ap bay Bondye a, anrapò ak maryaj, fanmi oswa lòt bagay enpòtan. L ap fasil pou w pran bon desizyon si w konnen kote w prale. E pandan w ap deside sa w ap fè ak lavi w, gen yon bagay enpòtan ou pa dwe bliye.

“Sonje Gran Kreyatè w la”

Pou w ka gen kè kontan toutbon, ou dwe sonje sa wa Salomon te di: “Sonje Gran Kreyatè w la, pandan w jèn nan.” (Eklezyas 12:1). Sa vle di, desizyon w ap pran nan lavi a ta dwe montre ou vle fè Bondye plezi.

Poukisa li enpòtan pou w sonje sa? Men sa Revelasyon 4:11 di: “Jewova, Bondye nou an, ou merite pou w resevwa glwa, onè ak pisans,  paske ou kreye tout bagay, e se paske w te vle ki fè yo vin egziste, e ki fè w te kreye yo.” Tout kreyati ki nan syèl la e ki sou tè a gen bonjan rezon pou yo gen Kreyatè a rekonesans. Èske w pa rekonesan dèske li ba w “lavi ak souf ak tout bagay”? (Travay 17:25.) Èske w pa santi ou oblije bay Jewova yon bagay pou tout sa l fè pou ou?

Gen anpil jèn Temwen Jewova ki sonje Kreyatè yo a, se sa k fè yo antre nan sèvis aplentan. Ann gade kèk nan bèl posiblite ou gen devan w pou w sèvi Bondye.

Sèvis pyonye. Pyonye pèmanan yo pase anpil tan nan predikasyon. Etandone yo jwenn fòmasyon e yo gen eksperyans, sa amelyore kapasite yo antanke anseyan.

Sèvi kote ki gen bezwen. Gen kèk jèn ki deplase al nan zòn kote ki pa gen anpil pwoklamatè. Gen lòt ki aprann yon lòt lang e k al sèvi nan yon kongregasyon ki toupre yo e ki pale lang sa a, e gen lòt menm ki deplase al nan yon lòt peyi *.

Sèvis misyonè. Pyonye ki kalifye ki gen sante e ki  gen fòs jwenn fòmasyon pou y al sèvi nan lòt peyi. Misyonè yo gen yon bèl vi ki gen sans.

Sèvis Betèl. Manm fanmi Betèl yo sèvi nan filyal Temwen Jewova yo. Nan kèk peyi, yo travay pou pwodui piblikasyon ki baze sou Bib la e yo voye yo ale lòt kote.

Sèvis entènasyonal. Sèvitè entènasyonal yo vwayaje nan lòt peyi pou y al ede nan konstriksyon Sal Wayòm, Sal asanble ak lokal filyal yo.

Lekòl pou evanjelizatè Wayòm nan. Pyonye ki kalifye jwenn fòmasyon pou yo fè plis nan travay predikasyon an e pou yo vin pi efikas antanke moun k ap preche bon nouvèl la. Gen kèk nan moun ki gradye yo yo voye nan lòt peyi.

Planifye sa w vle fè a

Sèvis aplentan se yon bèl objektif e li bay yon pakèt benediksyon. Men, li nesesè pou w planifye. Pa egzanp, mande tèt ou ki kapasite w genyen k ap ede w pran swen tèt ou.

Kelly te vle vin pyonye, kidonk li te planifye sa l te vle fè anrapò ak  travay li. Li di: “Mwen te gen pou m chwazi yon travay k ap pèmèt mwen pran swen tèt mwen pandan m pyonye a.”

Li te nan yon lekòl pwofesyonèl. Sa te ede l atenn objektif li. Li di: “Mwen te toujou vle antre nan sèvis aplentan. Tout lòt bagay yo te vin apre.” Kelly kontan se chwa sa a li te fè, li di: “Mwen santi se pi bon desizyon mwen te ka pran.”

Mande èd pou w jwenn wout ou

Si w t ap gen pou w vwayaje nan yon zòn ou pa fin konnen, gen moman kanmenm kote ou t ap bezwen mande èd pou w jwenn wout ou. Ou ka fè menm bagay la lè w ap planifye avni w. Chèche konsèy lòt moun. Men sa Pwovèb 20:18 di: “Kote ki gen dyalòg, plan yo ap mache.”

 Paran w se moun ki plis ka ede w. Men, ou ka chèche konsèy nan men lòt kretyen ki gen matirite tou, kretyen ki demontre yo saj paske yo suiv sa Bondye di. Men sa Roberto ki nan ventèn li e ki fè pati fanmi Betèl di: “Imite moun nan kongregasyon w lan oswa nan lòt kongregasyon ki bay bon egzanp.”

Jewova se moun ki plis vle ede w fè bon chwa k ap fè w pi kontan yo. Kidonk, mande l ede w ‘konprann ki sa volonte l ye’ anrapò ak avni w (Efezyen 5:17). Suiv konsèy nou jwenn nan Pwovèb 3:5, 6 la nan tout domèn nan lavi w, li di: “Fè Jewova konfyans ak tout kè w, e pinga w konte sou entèlijans ou. Sonje l nan tout sa w ap fè, e l ap fè tout bagay mache byen nan lavi w.”

Pou w jwenn plis enfòmasyon, gade videyo “Les jeunes s’interrogent... Que vais-je faire de ma vie?” a. Li disponib nan plis pase 30 lang.

[Nòt anba paj]

VÈSÈ KLE

“‘Teste m pou n wè si m pap ouvri vàn ki nan syèl la pou nou pou m vide benediksyon sou nou jiskaske nou pa manke anyen.’ Se sa Jewova, Chèf lame yo, di.” — Malachi 3:10.

MEN YON IDE

Pale ak yon moun ki gen plizyè ane nan sèvis aplentan. Chèche wè rezon ki fè li te chwazi antre nan sèvis aplentan e ki benediksyon li santi l jwenn.

ÈSKE W TE KONNEN?

Kouran elektrik ka fè yon aparèy mache. Menm jan an tou, lespri sen Bondye ka pouse w fè anpil bagay nan sèvis li a. — Travay 1:8.

SA M KONTE FÈ

Men ak ki moun m ap pale pou m ka gen plis kè kontan nan predikasyon ․․․․․

Men sa mwen ta renmen mande paran m sou sijè sa a ․․․․․

KI SA W PANSE?

● Ki sa w konn fè byen?

● Ki jan w ka sèvi ak sa w konn fè pou w louwe Jewova?

● Ki fòm sèvis aplentan yo te pale nan chapit sa a ki plis enterese w?

[Antrefilè nan paj 313]

“Mwen gen anpil respè pou paran m. Fason yo andire nan travay predikasyon an, fason yo te fè fas ak gwo pwoblèm ekonomik e ankourajman yo te ban m pou m antre nan sèvis aplentan, tout bagay sa yo te gen yon gwo efè sou mwen.” — Jarrod.

 [Kare nan paj 314]

Fich aktivite

Objektif mwen

Tcheke ki objektif ou ta renmen fikse, ranpli espas vid yo. Oswa ekri lòt objektif ou ta renmen fikse.

Predikasyon

□ Ogmante kantite tan m preche. M ap preche ․․․․․ èdtan chak mwa.

□ M ap kite ․․․․․ plasman chak mwa.

□ M ap sèvi ak Bib la lè m ap pale de kwayans mwen.

□ M ap fè ․․․․․ nouvèl vizit chak mwa.

□ M ap kòmanse yon etid biblik.

Lòt objektif: ․․․․․

Etid

□ M ap li ․․․․․ paj nan Bib la chak jou.

□ M ap prepare reyinyon yo.

□ M ap fè rechèch sou sijè ki vin apre yo: ․․․․․

Kongregasyon

□ M ap fè omwen yon kòmantè nan chak reyinyon.

□ M ap kòmanse konvèsasyon ak yon moun ki pi gran pase m pou m ka konnen l pi byen.

□ M ap vizite yon moun aje oswa yon moun ki enfim nan kongregasyon an.

Lòt objektif: ․․․․․

Dat jodi a ․․․․․

Nan sis mwa, gade l ankò pou w ka wè sa w te fè pou w atenn objektif ou yo. Fè yon ti pase men ladan yo oswa ajoute sou yo si sa nesesè.

[Foto nan paj 312]

Lè w gen objektif sa ap evite w depanse enèji pou granmesi.