CHAPIT 2

Ki danje ki genyen nan renmen an kachèt?

Jessica gen yon gwo desizyon pou l pran. Sa kòmanse lè Jeremy, yon elèv nan klas li, te kòmanse montre l enterese avè l. Jessica di: “Li bèl gason e zanmi m yo di m m pap janm jwenn yon gason konsa ankò. Gen anpil timedam ki te eseye renmen avè l, men yo youn pa t enterese l. Se sèl mwen ki te enterese l.”

Sa pa t pran tan pou Jeremy mande Jessica renmen. Jessica esplike antanke Temwen Jewova, li pa t ap ka renmen ak yon moun ki pa Temwen. Men sa li di: “Men Jeremy te gen yon ide. Li di m poukisa nou pa renmen san paran nou pa konnen.”

SI YON moun ou enterese avè l ta di w sa, ki sa w t ap fè? Petèt w ap sezi aprann Jessica te dakò ak ide Jeremy te genyen an. Men sa li di: “Mwen te gen konviksyon si m renmen avè l, m ap ka aprann li renmen Jewova.” Ki jan bagay yo te pase? N ap wè sa pi devan. Men pou kounye a, ann wè kòman kèk moun fè pran nan pyèj pou yo renmen an kachèt.

 Rezon ki fè yo vle fè sa

Pou ki rezon kèk moun renmen an kachèt? David, yon jèn gason, esplike aklè sa k fè sa: “Yo konnen si yo di paran yo sa, paran yo pap dakò. Donk, yo pa di yo anyen.” Jane atire atansyon sou yon lòt rezon, li di: “Renmen an kachèt se yon fason pou yon moun montre li endepandan. Si w santi yo pa trete w tankou granmoun, alòske ou santi ou granmoun, ou deside fè sa w vle san w pa di paran w.”

Èske w ka jwenn lòt rezon ki fè kèk moun ka vle renmen an kachèt? Si w jwenn lòt rezon, mete yo pi ba a.

․․․․․

Nòmalman, ou konnen Labib mande pou nou obeyi paran nou (Efezyen 6:1). Si paran w pa dakò w renmen, yo dwe gen yon bon rezon. Donk, pa sezi si w wè w ap fè refleksyon ki vin apre yo:

 ● Mwen santi m manke yon bagay paske tout moun gen mennaj sof mwen menm.

● Mwen enterese nan yon moun ki pa nan menm relijyon avè m.

● Mwen vle renmen ak yon kretyen parèy mwen, menmsi m konnen mwen twò jèn pou m marye.

Siman, ou konnen sa paran w t ap di sou sa nou te pale pi wo yo. E nan fon  kè w, ou konnen paran w gen rezon. Anmenmtan, ou ka santi w menm jan ak Manami, yon jèn fi, ki di: “Presyon pou m renmen an fò anpil, pafwa sa konn menm fè m ap mande tèt mwen poukisa m pa renmen. Pou jèn jodi a, sa pa nòmal si yon moun pa renmen. Men, sa pa fasil vre non lè w poukont ou!” Gen kèk moun ki nan sitiyasyon sa a ki kòmanse renmen, e yo pa kite paran yo konn sa. Kòman?

“Yo te di nou pa di anyen”

Depi w tande ekspresyon “renmen an kachèt” la, ou deja wè w ap oblije bay manti pou moun pa rive konnen si w renmen. Gen moun pou yo ka pa kite moun konnen si yo renmen, yo sitou pale nan telefòn oswa sou Entènèt. Lè yo avèk moun, yo se zanmi sèlman, men nan imel ak mesaj tèks youn voye bay lòt, nan konvèsasyon yo genyen nan telefòn, li klè yo renmen.

Yon lòt bagay yo konn fè pou twonpe moun se òganize yon seri aktivite an gwoup jis pou yo ka ansanm. Men sa James di: “Yon lè, yo te envite yon gwoup nan nou yon kote, annapre nou te vin aprann, objektif envitasyon sa a se te pou de nan gwoup la te ka ansanm. Yo de a te di nou pou nou pa di pèsonn sa.”

Jan James di sa a, souvan pou gen renmen an kachèt fò gen zanmi ki konplis. Men sa Carol di: “Byen souvan, gen omwen yon zanmi ki konn bagay la men ki pa di anyen pou yo pa fè zanmi yo a fache.” Pafwa, jèn yo bay manti aklè. Beth, ki gen 17 an, di: “Anpil jèn pa di paran yo laverite lè y ap soti pou yo ka kenbe renmen an an sekrè.” Misaki, ki  gen 19 an, te fè sa: “Mwen te konn envante yon seri istwa bay paran m. Mwen te pran anpil prekosyon pou m pa bay okenn lòt manti yon fason pou paran m te ka toujou fè m konfyans.”

Danje ki genyen nan renmen an kachèt

Si w anvi renmen an kachèt, oswa si w renmen an kachèt, poze tèt ou kesyon ki vin annapre yo:

Ki kote sa ap mennen m? Èske w gen entansyon marye ak moun sa a anvan lontan? Evan, ki gen 20 an, di: “Lè w renmen ak yon moun san w pa gen entansyon marye avè l se kòmsi w ap fè reklam pou yon bagay ou pap vann.” Ki sa k ka pase? Pwovèb 13:12 di: “Lè yon moun ap tann yon bagay e sa pa rive lè l t ap tann li an, sa fè l pèdi espwa.” Si w renmen yon moun toutbon èske w vle fè l pèdi espwa? Yon lòt danje: lè w renmen an kachèt paran w oswa lòt granmoun ki gen sousi pou ou pap ka ede w. Konsa, li ka pi fasil pou w tonbe nan pyèj imoralite seksyèl. — Galat 6:7.

Ki jan Jewova santi l? Labib di: “Tout bagay ekspoze aklè, san anyen pa kouvri yo, devan je Sila a nou gen kont pou nou rann nan.” (Ebre 4:13). Kidonk, si w pa kite moun konnen ou renmen, oswa si w kache sa pou yon zanmi, Jewova li menm konn sa. E si nou nan bay manti akoz sa, ou gen rezon pou w enkyete. Jewova pa konsidere manti kòm yon bon bagay. Anfèt, “lang moun k ap bay manti” pami lis bagay Labib fè nou konnen Jewova rayi. — Pwovèb 6:16-19.

Pale pawòl la

W ap fè vrèman byen si w pale ak paran w oswa yon kretyen ki gen matirite konsènan renmen an kachèt la. E si yon zanmi w renmen an kachèt, pa tounen konplis li  lè w pa pale sa (1 Timote 5:22). Dayè, ki jan w t ap santi w si yon bagay mal ta rive zanmi w lan? Èske w pa t ap yon ti jan responsab?

Ann pran yon egzanp: Ann sipoze yon zanmi w fè sik epi l ap manje bagay dous an kachèt. Si w vin dekouvri sa men zanmi w lan sipliye w pou w pa di sa, ki sa k t ap pi enpòtan: Pou w kouvri pou zanmi w lan oswa fè yon bagay ki ka sove lavi l?

Se menm bagay la si w konnen yon zanmi w renmen an kachèt. Pa bay tèt ou pwoblèm pou amitye w gen avè l la. Gen yon lè k ap rive, si l se yon bon zanmi, l ap vin rann li kont se nan enterè l ou te ye ki fè w te fè sa. — Sòm 141:5.

Sekrè oswa vi prive?

Natirèlman, se pa paske moun pa okouran yon renmen ki vle di moun yo bay manti. Pa egzanp, imajine yon jèn gason ak yon jèn fi ta vle konn youn lòt pi byen, men yo poko vle pou anpil moun konn sa. Petèt, jan yon jèn gason ki rele Thomas di sa, “yo pa vle moun ap plede poze yo kesyon tankou, ‘ki lè n ap marye?’”

 Lè lòt moun ap fè presyon sou nou sa ka bay gwo pwoblèm (Chante Salomon an 2:7). Se sa k fè, gen anpil moun ki chwazi, lè yo fèk renmen, pou yo pa fè anpil moun konn sa (Pwovèb 10:19). Anna, ki gen 20 an, di: “Sa bay de moun yo tan pou yo konnen si y ap kontinye renmen an. Si y ap fè sa, lè sa a, yo ka fè moun konnen.”

Anmenmtan tou, li pa t ap bon pou w pa mete moun ki gen dwa konnen okouran, tankou paran w oswa paran moun ou renmen avè l la. Anfèt, si w pa ka fè moun konnen ou renmen, ou ta dwe mande tèt ou poukisa. Èske petèt, nan fon kè w, ou konnen paran w t ap gen bonjan rezon pou yo pa dakò ak renmen an?

“M te konn sa pou m fè”

Jessica, yo pale de li nan kòmansman chapit la, te vin chanje lide konsènan renmen li te renmen an kachèt ak Jeremy an lè l te tande gen yon kretyen ki te nan menm sitiyasyon an men ki te kraze renmen pa l la. Jessica di: “Lè m  fin tande li te kraze renmen an, m te konn sa pou m fè.” Èske kraze renmen an te fasil? Non! Jessica di: “Se sèl tigason mwen te vrèman renmen. Mwen te kriye chak jou pandan plizyè semèn.”

Jessica te konnen li renmen Jewova. E malgre li te fè yon detounen nan vrè chemen an, li te vrèman vle fè sa ki byen. Rive yon lè, lapenn li te genyen akoz renmen ki te kraze a pa t menm jan an ankò. Jessica di: “Kounye a, m vin gen yon pi bon relasyon ak Jewova. M vrèman rekonesan dèske li ban nou direksyon nou bezwen nan bon moman.”

NAN LÒT CHAPIT LA:

Ou pare pou w renmen e ou jwenn yon moun ou renmen. Men, ki jan w ka konnen si moun sa a ap bon pou ou?

VÈSÈ KLE

“Nou vle konpòte nou yon fason ki dwat nan tout bagay.” — Ebre 13:18.

MEN YON IDE

Ou pa bezwen mache fè tout moun konnen w renmen. Men, moun ki gen dwa konnen yo, fè yo konn sa, tankou paran pa w ak paran moun ou renmen avè l la.

ÈSKE W TE KONNEN?

Pou yon relasyon dire fòk gen konfyans. Lè w renmen an kachèt, ou trayi konfyans paran w e w febli baz relasyon ou genyen ak moun ou renmen avè l la.

SA M KONTE FÈ

Men sa m ap fè si m renmen ak yon lòt kretyen an kachèt ․․․․․

Men sa m ap fè si yon zanmi m renmen an kachèt ․․․․․

Men sa mwen ta renmen mande paran m sou sijè sa a ․․․․․

KI SA W PANSE?

● Fè yon ti reflechi sou  sitiyasyon ki ekri an lèt fonse yo te pale de yo nan paj 22 a. Èske gen youn ladan yo ki sanble ak fason w konn santi w pafwa?

● Ki jan w ka jere sa san w pa renmen an kachèt?

● Si w ta konnen yon zanmi w renmen an kachèt, ki jan w ap jere sitiyasyon an, e poukisa se konsa w t ap chwazi fè l?

[Antrefilè nan paj 27]

“M te kraze renmen an. Sa te difisil pou m wè tigason sa a chak jou nan lekòl la. Men, Jewova wè tout detay nan yon sitiyasyon e li ka wè solisyon yo, alòske nou menm nou pa kapab. Nou jis bezwen fè l konfyans.” — Jessica.

[Foto nan paj 25]

Lè w kouvri pou yon zanmi w ki renmen an kachèt se kòmsi ou kouvri pou yon zanmi w ki fè sik men k ap manje bagay dous an kachèt.