1, 2. a) Kòman Jezi te mete aksan sou enpòtans planifikasyon ? b) Nan ki domèn patikilyèman planifikasyon esansyèl ?

KONSTWI yon kay mande yon preparasyon ki fèt avèk swen. Anvan yo poze fondasyon an, fò yo achte tè a e fò yo desine plan an. Toutfwa, gen yon lòt bagay ki esansyèl. Jezi te di : “ Kiyès nan nou ki vle bati yon tou, ki pap chita dabò pou l kalkile depans lan, pou l wè si l gen dekwa pou l fini l ? ” — Lik 14:28.

² Sa ki vrè pou konstwi yon kay aplikab tou pou moun konstwi yon maryaj ki reyisi. Gen anpil moun ki di : “ Mwen vle marye. ” Men konbyen nan moun  sa yo ki pran tan pou yo reflechi sou sa sa ap koute ? Byenke Bib la pale an byen de maryaj, li atire atansyon tou sou difikilte ki gen ladan l (Pwovèb 18:22 ; 1 Korentyen 7:28). Se sa k fè, moun ki anvizaje marye yo bezwen gen yon pwennvi reyalis sou avantaj ak enkonvenyan ki gen nan maryaj.

3. Poukisa Bib la se yon èd ki gen anpil enpòtans pou moun k ap planifye pou yo marye, e ki twa kesyon l ap ede nou reponn ?

³ Bib la kapab itil nou. Konsèy ki ladan l yo se Jewova Dye, Sila ki vini ak dispozisyon pou gen maryaj la, ki enspire yo (Efezyen 3:14, 15 ; 2 Timote 3:16). Sou baz prensip ki nan liv ansyen sa a, men ki vrèman pratik pou jodi a, annou detèmine 1) Kòman yon moun ka konnen si l prè pou l marye ? 2) Ki sa yon moun ta dwe chèche lakay moun li anvizaje marye avè l la ? e 3) Ki sa yo ka fè pou renmen an rete onorab ?

4. Ki pwen ki esansyèl pou yon maryaj reyisi, e poukisa ?

⁴ Konstwi yon kay ka koute chè, men, fè antretyen ladan l ane apre ane koute chè tou. Se menm bagay la tou pou maryaj. Marye poukont pa l deja sanble yon defi. Toutfwa, yon lòt bagay moun ki anvizaje marye yo dwe pran an konsiderasyon, sèke mari ak madanm dwe prezève bon relasyon antre yo ane apre ane. Ki sa prezève yon relasyon konsa egzije ? Yon pwen ki esansyèl se pou yo totalman angaje youn anvè lòt. Men jan Bib la dekri relasyon ki gen nan maryaj la : “ Yon gason ap kite papa l ak manman l, e li dwe atache ak madanm li e yo dwe vin yon sèl chè. ” ​(Jenèz 2:24). Jezi Kris te bay sèl rezon biblik pou gen divòs ak posiblite pou yon moun remarye, se “ fònikasyon ”, sa vle di, relasyon seksyèl imoral andeyò maryaj (Matye 19:9). Si w anvizaje  marye, kenbe prensip biblik sa yo nan lespri w. Si w pa prè pou angajman solanèl sa a, konnen ou pa prè pou w marye. — Detewonòm 23:21 ; Eklezyas 5:4, 5.

5. Byenke angajman solanèl maryaj reprezante a fè kèk moun pè, poukisa se yon bagay ki dwe gen anpil enpòtans pou moun ki gen entansyon marye ?

⁵ Ide angajman solanèl la fè anpil moun pè. Gen yon jèn gason ki te avwe : “ Lefètke mwen konnen nou de a ini ansanm pou lavi, sa fè m santi m limite, mwen santi m fèmen totalman nan prizon. ” Men, si w vrèman renmen moun ou gen entansyon marye avè l la, angajman sa a pap parèt yon chay pou ou. Okontrè, w ap konsidere sa kòm yon baz pou sekirite. Respè de moun marye yo genyen pou angajman maryaj reprezante a ap fè yo vle rete ansanm, kit se nan bon tan, kit se nan move tan, e youn ap yon sipò pou lòt kèlkeswa sa k rive. Pòl, yon apot kretyen, te ekri vrè lanmou an “ sipòte tout bagay ” e li “ andire tout bagay ”. (1 Korentyen 13:4, 7.) Men sa yon dam di : “ Angajman ki gen nan maryaj la fè m santi m pi an sekirite, mwen renmen byennèt mwen genyen lefètke nou toule de te deklare youn bay lòt, devan tout moun, entansyon nou genyen pou nou rete atache youn ak lòt. ” — Eklezyas 4:9-12.

6. Poukisa li pi bon pou yon moun pa kouri marye lè l twò jèn ?

⁶ Viv ann amoni ak yon angajman konsa mande matirite. Se poutèt sa, Pòl te bay kretyen yo yon konsèy kote li fè yo konnen li pi bon pou yo pa marye toutotan yo pa “ pase flè jenès ”, peryòd kote dezi seksyèl yo trè fò, e yo ka defòme jijman yon moun (1 Korentyen 7:36). Jèn moun chanje rapidman toutpandan y ap grandi. Anpil moun ki te marye lè yo te trè jèn rann yo kont apèn kèk ane apre,  bezwen yo ak dezi yo chanje, e se menm bagay la tou pou moun yo marye avè l la. Estatistik yo demontre moun ki marye nan adolesans yo gen plis risk pou kè yo pa kontan e pou yo divòse pase moun ki tann yon tikras pi lontan. Se sa k fè, pinga w kouri marye. Kèk ane w pase antanke jèn adilt ki selibatè ka ba ou eksperyans ki gen anpil valè, eksperyans k ap fè w gen plis matirite e k ap fè w pi kalifye pou w vin yon bon mari oubyen yon bon madanm. Anplis de sa, si w tann anvan w marye, sa ka ede w konnen tèt ou pi byen, yon bagay ki endispansab pou w devlope bonjan relasyon nan maryaj ou.

7. Poukisa moun k ap planifye pou yo marye dwe egzamine tèt yo dabò ?

⁷ Èske w twouve li fasil pou w site kalite ou ta renmen jwenn lakay moun ou anvizaje marye avè l la ? Pou pifò moun sa pa difisil. Men, e pou kalite pa w yo ? Ki trè nan pèsonalite w k ap ede w kontribye pou maryaj ou reyisi ? Ki jan de mari oubyen ki jan de madanm w ap ye ? Pa egzanp, èske w admèt fot ou san pwoblèm e èske w tou prèt pou w aksepte konsèy, oubyen èske w toujou ap defann tèt ou lè yo korije w ? An jeneral, èske w se yon moun ki ge e ki optimis oubyen èske w se yon moun ki gen tandans tris, ki toujou ap plenyen (Pwovèb 8:33 ; 15:15) ? Sonje, maryaj pap chanje pèsonalite w. Si w ògeye, ou siseptib, oubyen ou trè pesimis pandan w selibatè, se menm jan an w ap rete lè w marye. Piske li difisil pou nou wè tèt nou jan lòt moun wè nou, poukisa w pa mande yon paran oubyen yon zanmi ou fè konfyans pou l fè w kèk remak ak kèk sijesyon ki fran ? Si w aprann ou gen kèk chanjman ou ta dwe fè, fè yo anvan w pran inisyativ pou w marye.

8-10. Ki konsèy Bib la bay k ap ede yon moun prepare l pou maryaj ?

 ⁸ Bib la ankouraje nou pou nou kite lespri sen Bondye travay nan nou, pou l pwodui kalite tankou “ lanmou, lajwa, lapè, pasyans, bonte, byenveyans, lafwa, dousè, metriz ”. Li di nou tou pou nou “ renouvle tèt nou nan fòs k ap anime lespri nou an ” e pou nou “ abiye ak nouvo pèsonalite a ki te kreye selon volonte Bondye nan yon jistis ak yon fidelite ki vrè ”. (Galat 5:22, 23 ; Efezyen 4:23, 24.) Lè w aplike konsèy sa yo pandan w toujou selibatè, se tankou lè w depoze lajan labank, se yon bagay ki pral itil ou anpil alavni, lè w marye.

⁹ Pa egzanp, si w se yon fi, aprann bay plis atansyon sou ‘ kalite moun ou ye nan fon kè w ’ pase sou aparans fizik ou (1 Pyè 3:3, 4). Modesti ak bonsans ap ede w gen sajès, yon vrè “ kouwòn bote ”. (Pwovèb 4:9 ; 31:10, 30 ; 1 Timote 2:9, 10.) Si w se yon gason, aprann trete fi avèk jantiyès e avèk respè (1 Timote 5:1, 2). Toutpandan w ap aprann pran desizyon e w ap aprann andose responsablite, aprann tou pou w modès e pou w enb. Yon konpòtman dominatè ap kreye pwoblèm nan yon maryaj. — Pwovèb 29:23 ; Mika 6:8 ; Efezyen 5:28, 29.

¹⁰ Byenke li pa fasil pou yon moun fòme karaktè l nan domèn sa yo, se yon bagay tout kretyen ta dwe travay sou li. Anplis de sa, sa ap ede w pou w yon pi bon mari oubyen pou w yon pi bon madanm.

11, 12. Kòman de moun ka konnen si wi ou non yo konpatib ?

¹¹ Èske selon koutim kote w ap viv la se moun ki ta renmen marye a ki chwazi moun pou l marye ?  Si se sa, ki sa pou w fè si yon moun lòt sèks atire w ? Toudabò, mande tèt ou : ‘ Èske m vrèman gen entansyon marye ? ’ Se mechanste pou yon moun jwe ak santiman yon lòt moun lè l ba li fo espwa (Pwovèb 13:12). Ansuit, mande tèt ou : ‘ Èske m anmezi pou m marye ? ’ Si repons de kesyon sa yo pozitif, pwochen etap pou w franchi yo ap depann de koutim kote w ap viv la. Gen kèk peyi, apre w fin suiv moun ki atire w la pandan yon tan, ou ka abòde l pou w di l ou ta renmen konnen l pi byen. Si repons lan negatif, pa ensiste opwen pou w vin ensipòtab. Sonje sa, lòt moun nan tou gen dwa pou l pran desizyon pa l nan domèn nan. Sepandan, si repons lan pozitif, ou ka pran dispozisyon pou nou pase tan ansanm nan aktivite ki pwofitab. Sa ap ba w opòtinite pou w wè si l saj pou w marye ak moun sa a *. Nan etap sa a, ki sa w ta dwe chèche ?

¹² Pou nou reponn kesyon sa a, imajine de enstriman mizik, petèt yon pyano ak yon gita. Si yo byen ajiste, yo chak ka pwodui yon bèl solo. Men, ki sa k ap rive si enstriman sa yo ap jwe ansanm ? Nan ka sa a, yo dwe akòde youn ak lòt. Se menm bagay la tou pou ou ak moun ou anvizaje marye avè l la. Nou chak bò kote pa nou ka te fè anpil efò pou nou “ ajiste ” pèsonalite nou. Men, kounye a kesyon an se : Èske nou akòde youn ak lòt ? Sa vle di, èske nou konpatib ?

13. Poukisa li vrèman pa saj pou w chèche renmen ak yon moun ki pa gen menm fwa ak ou ?

¹³ Li trèzenpòtan pou nou toule de gen menm kwayans e pou nou atache ak menm prensip. Apot Pòl  te ekri : “ Pa mete tèt nou anba jouk miwomiba avèk enkwayan. ” ​(2 Korentyen 6:14 ; 1 Korentyen 7:39). Marye ak yon moun ki pa gen menm fwa ak ou nan Bondye fè gen plis risk pou gen gwo dezakò. Yon lòt bò, si nou toule de atache ak Jewova Dye se baz ki pi solid pou gen inite. Jewova vle pou w gen kè kontan e pou w gen relasyon ki pi entim posib ak moun ou marye a. Jewova vle pou w ini ak li e pou w ini ak moun ou pral marye a grasa yon kòd lanmou ki gen twa branch. — Eklezyas 4:12.

14, 15. Èske lè de moun gen menm fwa se sèl aspè pou gen inite nan yon maryaj ? Esplike.

¹⁴ Menmsi adore Bondye ansanm se aspè ki pi enpòtan pou gen inite, sa sèlman pa sifi. Pou ou menm ak moun ou anvizaje marye avè l la viv ann amoni, nou dwe gen menm objektif. Ki objektif nou genyen ? Pa egzanp, ki pwennvi nou de a genyen sou kesyon fè pitit ? Ki bagay nou bay priyorite nan lavi nou * (Matye 6:33) ? Nan yon maryaj ki vrèman reyisi, de moun yo se bon zanmi e youn renmen konpayi lòt (Pwovèb 17:17). Pou sa rive fèt, li nesesè pou yo enterese nan menm bagay. San sa, l ap difisil pou yo antretni yon amitye entim, alewè pou yo antretni yon maryaj. Toutfwa, si moun ou pral marye a renmen yon aktivite byen presi, tankou fè long pwomnad, e ou menm ou pa renmen bagay konsa, èske sa vle di nou pa dwe marye ansanm poutèt sa ? Pa fòseman. Petèt gen lòt bagay ki pi enpòtan nou toule de enterese ladan yo. Mete sou sa, ou ka fè moun ou pral marye a plezi lè w patisipe ansanm avè l nan  aktivite ki pwofitab paske li menm li renmen yo. — Travay 20:35.

¹⁵ Anfèt, konpatiblite a plis depann de jan nou adapte nou youn ak lòt pase jan nou sanble youn ak lòt. Olye pou nou mande tèt nou : “ Èske nou dakò sou tout bagay ? ” kesyon ki ta pi bon pou nou poze se : “ Ki sa k rive lè nou pa dakò ? Èske nou ka pale sou yon sijè avèk kalm, nan respè youn pou lòt e avèk diyite ? Oubyen èske byen souvan diskisyon an mennen kont ? ” ​(Efezyen 4:29, 31). Si w ta renmen marye, fè atansyon ak moun ki ògeye, ki twò kwè nan tèt li, moun ki pa janm dispoze fè konsesyon oubyen ki twò egzijan e ki toujou aranje l pou l jwenn sa l vle a.

16, 17. Ki sa yon gason oubyen yon fi ka chèche lakay moun li anvizaje marye avè l la ?

¹⁶ Nan kongregasyon kretyen an, moun yo konfye responsablite, yo “ teste yo dabò anrapò ak kapasite yo ”. (1 Timote 3:10.) Ou menm tou ou ka itilize prensip sa a. Pa egzanp, yon fi ka mande tèt li : “ Ki kalite repitasyon mesye sa a genyen ? Ki moun ki zanmi l ? Èske li demontre li gen metriz ? Kòman li trete moun ki aje ? Nan ki kalite fanmi li soti ? Ki jan de relasyon li genyen ak yo ? Kòman li konsidere lajan ? Èske li bwè bwason ki gen alkòl depase limit ? Èske se yon moun ki renmen fè kòlè, ki menm vyolan ? Ki responsablite li gen nan kongregasyon an, e kòman li akonpli yo ? Èske m ka gen gwo respè pou li ? ” — Levitik 19:32 ; Pwovèb 22:29 ; 31:23 ; Efezyen 5:3-5, 33 ; 1 Timote 5:8 ; 6:10 ; Tit 2:6, 7.

¹⁷ Yon gason ka mande tèt li : “ Èske fi sa a demontre  li gen lanmou ak respè pou Bondye ? Èske li kapab pran swen yon kay ? Ki sa fanmi li ap atann de nou ? Èske l gen sajès, èske l renmen travay, èske l ekonòm ? Ki sijè konvèsasyon l ? Èske li vrèman sousye l de byennèt lòt moun oubyen èske li egoyis e li renmen mele nan zafè lòt moun ? Èske li diy de konfyans ? Èske li dispoze soumèt li anba otorite, oubyen èske li toujou dèyè fè sa l vle, petèt li menm rebèl ? ” — Pwovèb 31:10-31 ; Lik 6:45 ; Efezyen 5:22, 23 ; 1 Timote 5:13 ; 1 Pyè 4:15.

18. Si nou remake kèk defo ki pa gen gwo enpòtans pandan peryòd nou renmen an, ki sa nou dwe sonje ?

¹⁸ Pa bliye se ak yon moun enpafè ou gen afè, yon desandan Adan. Ou pa gen afè ak yon ewo pafè ki nan yon woman damou. Tout moun gen defo, e gen kèk nan defo sa yo w ap oblije pase sou yo, kit se defo pa w, kit se pa moun ou anvizaje marye avè l la (Women 3:23 ; Jak 3:2). Mete sou sa, yon feblès moun remake ka bay opòtinite pou gen pwogrè. Pa egzanp, sipozon pandan frekantasyon an nou gen yon dezakò. Reflechi : Menm moun ki gen lanmou e ki gen respè youn pou lòt konn pa dakò kèk fwa (gade Jenèz 30:2 ; Travay 15:39). Petèt, èske nou toule de pa jis bezwen aprann ‘ kontwole lespri nou ’ yon tikras plis, e èske nou pa jis bezwen aprann kòman pou nou regle pwoblèm yo avèk plis kalm (Pwovèb 25:28) ? Èske moun ou anvizaje marye avè l la montre li gen dezi pou l amelyore ? E ou menm ? Èske w pa ka aprann pou w pa fache fasil, pou w vin mwens siseptib (Eklezyas 7:9) ? Lè nou aprann rezoud pwoblèm yo, sa ka etabli yon kominikasyon fran antre nou, yon bagay ki endispansab si nou de a ta rive marye ansanm. — Kolosyen 3:13.

19. Ki sa li saj pou nou fè si gen pwoblèm grav pandan peryòd renmen an ?

 ¹⁹ Bon, ki sa w ap fè si w remake gen kèk bagay ki twouble w anpil ? Ou ta dwe egzamine dout sa yo seryezman. Kèlkeswa jan w santi w damou e kèlkeswa jan w anvi marye, pa fèmen je w sou fot ki grav yo (Pwovèb 22:3 ; Eklezyas 2:14). Si w renmen ak yon moun e ou gen bonjan dout sou li, li saj pou w kraze renmen an e pou w evite angaje tèt ou ak moun sa a.

20. Ki sa de moun ki renmen ka fè pou yo toujou gen yon konduit moral ki san repwòch ?

²⁰ Ki sa nou ka fè pou renmen an rete onorab ? Toudabò, asire nou nou gen yon konduit moral ki san repwòch. Èske kote n ap viv la yo konsidere sa kòm yon bagay ki konvnab pou de moun ki poko marye kenbe men, pou yo bo oubyen pou youn vlope lòt nan bra l ? Menmsi an jeneral moun yo pa dezapwouve jan de temwayaj afeksyon sa yo, nou ka pran libète fè yo sèlman lè relasyon an rive nan pwen kote maryaj la fin planifye avèk sètitid. Veye pou temwayaj afeksyon sa yo pa dejenere pou yo mennen nou nan konduit imoral oubyen menm nan fònikasyon (Efezyen 4:18, 19 ; gade Chan Salomon 1:2 ; 2:6 ; 8:5, 9, 10). Etandone kè a trèt, nou toule de ap montre nou gen sajès lè nou evite izole tèt nou nan yon kay, nan yon apatman, nan yon machin ki estasyone oubyen nenpòt lòt kote ki ta ka ban nou opòtinite pou nou gen yon move konduit (Jeremi 17:9). Lè nou veye pou renmen an rete pwòp moralman, sa pwouve nou gen metriz, e avèk abnegasyon, nou mete byennèt lòt moun nan anvan dezi  pa nou. Sa k pi enpòtan, sèke yon renmen ki pwòp ap fè Jewova Dye plezi, li menm ki bay sèvitè li yo kòmandman pou yo evite salte ansanm ak fònikasyon. — Galat 5:19-21.

21. Pou renmen an rete onorab, sou ki sa moun yo bezwen pale franchman ?

²¹ Ansuit, yon renmen ki onorab gen ladan l tou yon kominikasyon fran. Toutpandan renmen an ap pwogrese pou l abouti nan maryaj, gen kèk sijè n ap bezwen pale franchman sou yo. Ki kote n ap rete ? Èske nou toule de pral fè yon travay pwofàn ? Èske nou vle gen timoun ? Anplis de sa, li toutafè onèt pou youn revele bay lòt bagay petèt li te fè lontan ki ka gen efè sou maryaj la. Se kapab gwo dèt oubyen obligasyon enpòtan li genyen, se ka pwoblèm sante, tankou yon maladi grav oubyen nenpòt lòt pwoblèm grav li genyen. Piske gen anpil moun ki enfekte ak VIH (viris ki bay sida a) ki pa gen okenn sentòm pou lemoman, pa gen okenn mal pou ou menm oubyen yon paran ki sousye de ou mande moun nan pou l fè yon tès sida, si lontan li te konn gen relasyon seksyèl ak plizyè moun oubyen li te konn pran dwòg nan venn. Si tès la pozitif, moun ki enfekte a pa dwe fè presyon sou moun li t apral marye avè l la pou l kontinye renmen an si kounye a moun nan vle kraze sa. Anfèt, nenpòt moun ki t ap mennen yon stil de vi ki gen risk dwe fè yon tès sida volontèman anvan li kòmanse yon frekantasyon.

22, 23. a) Kòman sa ka rive nou manke ekilib lè n ap fè preparasyon pou nòs la ? b) Ki pwennvi ekilibre nou dwe toujou genyen anrapò ak nòs la e maryaj la ?

²² Pandan dènye mwa anvan maryaj la, nou toule de ka okipe anpil nan preparasyon pou nòs la. Nou  ka evite anpil tansyon si nou gen moderasyon. Yon nòs granpanpan ka fè paran ak zanmi kontan, men li ka kite nouvo marye yo ak fanmi yo fatige fizikman e nan domèn ekonomik li ka kite yo blanch. Petèt, li rezonab pou nou respekte kèk koutim nan zòn nan. Men, si nou suiv tradisyon san reflechi e petèt, si nou gen espri konpetisyon, sa ka vwale siyifikasyon reyèl evènman an e sa ka retire jwa nou ta dwe genyen nan okazyon an. Byenke nou dwe pran santiman lòt moun an konsiderasyon, se mesye ki pral marye a prensipalman ki gen responsablite pou l deside ki sa k ap fèt nan nòs la. — Jan 2:9.

²³ Sonje sa, nòs la ap dire yon sèl jou, men maryaj la se pou tout lavi. Evite konsantre nou twòp sou jou nòs la. Olye de sa, chèche direksyon nan men Jewova Dye, epi fè pwojè pou nou marye pou lavi. Konsa n ap byen prepare nou pou maryaj nou reyisi.