BYEN bonè nan jou ki te 1^ye oktòb 1965 lan, nan yon tantativ pou fè yon koudeta, gen kèk gwoup moun nan Pati Kominis Endonezi a (PKE) ki te asasinen sis gwo jeneral. Gouvènman an te reponn yo san pitye e byen vit. Yo te touye anviwon 500 000 patizan kominis, yon aksyon yo dekri kòm pi gwo zak vyolans ki te fèt nan nasyon an.

Plizyè semèn apre tantativ koudeta a, gen yon gwo kòmandan militè ki te di m non m antèt nan yon lis chèf relijye zòn nan kominis yo te gen entansyon elimine. Li te menm di m li ka montre m ki kote yo te vle antere m, men, avèk jantiyès, m te refize. Nan yon moman ki te gen anpil tansyon politik, m pa t vle moun wè m ak kòmandan an pou yo pa t vin gen dout sou repitasyon m antanke yon kretyen ki pa nan politik.