ENDONEZI
Fason yo te konn preche
Emisyon radyo
AN 1933, frè yo te fè aranjman pou yon estasyon radyo nan Jakata pase anrejistreman kèk nan diskou frè Rutherford yo ann anglè. Gen yon mesye ki te enterese nan laverite ki te konn li kèk lòt diskou sou lèzond an neyèlandè. Emisyon sa yo te fè anpil moun vin enterese nan laverite e yo te ede frè yo bay plis piblikasyon nan tèritwa a.
Lè estasyon radyo a te pase kokenn diskou frè Rutherford te bay ki gen tit “Ane sakre a ansanm ak efè l gen sou lapè ak pwosperite”, klèje katolik la te wè se twòp atò *. Yo menm ak patizan yo te akize frè De Schumaker, ki te bay radyo a anrejistreman an, kòm “moun k ap fè medizans, k ap jwe ak figi moun e k ap ankouraje lahèn”. Frè De Schumaker te defann tèt li kont akizasyon sa yo avèk kran, men, yo te mande l pou l peye 25 floren * amann e l te dwe peye lajan pwosè a. Twa pi gwo jounal nan zòn nan te fè yon repòtaj sou pwosè a, sa ki te vin bay yon pi gwo temwayaj.
Bato ki rele Lightbearer a
Jou ki te 15 jiyè 1935 lan, bato Watch Tower Society ki te rele Lightbearer a (Sa k pot limyè a) te kite Sydney, ann Ostrali, e l te rive nan Jakata apre l te fin pase sis mwa sou dlo. Se yon bato ki te mezire 52 pye longè. Sou bato sa a, te gen sèt pyonye zele ki te detèmine pou yo simaye bon nouvèl la toupatou ann Endonezi, Sengapou ak Malezi.
Pandan plis pase dezan, pyonye ki te sou bato Lightbearer a te pase nan anpil gwo waf ak ti waf yo toupatou ann Endonezi e yo te distribye yon pakèt piblikasyon ki baze sou Bib la. Men sa sè Jean Deschamp fè konnen: “Sou chak waf bato a te rive, pyonye yo te konn ouvè fonograf la pou yo pase youn nan diskou J. F. Rutherford yo, ki te prezidan Watch Tower Society a nan epòk sa a. Imajine jan moun ki te abite byen lwen sou zile Malay yo te sezi lè yo wè yon gwo bato parèt sou waf la epi yo tande yon gwo vwa pisan konsa ki gaye toupatou. Menm yon avyon ekstraterès pa t ap ka kapte atansyon moun yo konsa!”
Piske klèje a te fache anpil dèske frè yo te bay temwayaj avèk kran, finalman, yo te fè presyon sou otorite yo pou yo entèdi bato Lightbearer a vin sou waf Endonezi yo. An desanm 1937, bato Lightbearer a te retounen ann Ostrali apre l te fin fè yon kokennchenn travay misyonè ann Endonezi.
Ekip ki te sou bato Lightbearer a.
