MANMAN M te alèz ak tout moun e l te renmen Labib. Lè l te rankontre Gertrud Ott, yon misyonè nan Manado, Soulawesi dinò, li te aksepte yon etid Labib menm kote a e l te vin nan laverite. Men, Erwin, papa m, yon anplwaye labank konpetan e ki te vin direktè bous Jakata a, pa t dakò pou manman m etidye Labib.

Yon jou, papa m te bay manman m yon iltimatòm.

Ak kòlè, li te di l: “Ou dwe chwazi: swa w ret nan relijyon w lan, swa w ret ak mari w!”

Manman m fè yon bon ti tan ap reflechi. Epi, avèk jantiyès, li di: “M vle toude: Ni mari m ni Jewova.”

Papa m pa t jwenn anyen pou l di, e kòlè a te bese.

Pi devan, papa m te vin pi toleran paske l te renmen manman m anpil e l te apresye l pou sajès li ak bonsans li.

 Men, manman m te vle pou mari l vin adore Jewova avè l. Apre l te fin priye ak tout kè l sou sa, li te vin sonje papa m renmen aprann lang. Konsa, li te deside kopye kèk vèsè Labib ann anglè toupatou nan kay la. Li te di papa m: “M ap eseye amelyore m nan anglè.” Piske l te konnen papa m renmen pale an piblik, li te mande l tou si l ka ede l prepare diskou l gen nan Lekòl ministè teyokratik la. Li te dakò. Piske manman m te konnen l se yon moun ki renmen akeyi moun, li te mande l si l ka akeyi siveyan sikonskripsyon an. Li te dakò tou. E piske l te konnen papa m renmen fanmi l anpil, avèk jantiyès, li te fè l konnen li ta dwe la avèk nou nan kongrè yo. E se sa papa m te fè.

Tikras pa tikras, efò manman m te fè avèk pasyans ak prevwayans yo te kòmanse touche kè papa m. Pi devan, lè fanmi nou t al viv ann Angletè, li te asiste reyinyon yo e l te vin zanmi John Barr ki te vin yon manm Kolèj santral Temwen Jewova yo. Papa m te batize nan menm ane sa a e sa te fè manman m kontan anpil. Nan ane ki te vin apre yo, li te vin renmen manman m pi plis toujou.

Gen kèk zanmi nou ki te konn konpare manman m ak Lidi, yon kretyèn nan premye syèk la ki te renmen akeyi moun (Tra. 16:14, 15). Men, byen souvan, m renmen konpare l ak Sara ki te soumèt devan Abraram, mari l, ak tout kè l (1 Pyè 3:4-6). Manman m te yon moun ki gen bon moralite, ki respekte moun e ki vrèman espirityèl, yon dam ki te touche kè tout moun ki konnen l. Se egzanp li ki te ede papa m vin nan laverite. Pou mwen menm, li te yon vrè pitit fi Sara.