Gen yon koup pyonye espesyal ki t ap preche nan yon tèritwa izole o Brezil ki te tande pale de Valdira, yon dam ki t ap etidye Labib 13 ane anvan sa. Apre pyonye yo te fin fè yon vwayaj nan yon wout ki chaje pousyè e yo fin travèse plizyè rivyè ki danjere, yo te rive jwenn Valdira ki te chofe anpil pou l rekòmanse etid la. Etandone Valdira t ap viv  nan yon zòn nan peyi a ki lwen anpil, pyonye yo te oblije pran kèk dispozisyon espesyal. Aktout Valdira te gen yon telefòn selilè, se sèlman nan yon raje byen lwen lakay li li te ka jwenn bon siyal. Anplis de sa, se sèlman apre nevè diswa Valdira t ap ka fè etid la. Eseye imajine sèn nan: Yon jèn dam ki chita poukont li nan yon raje nan aswè k ap fè yon etid Labib nan telefòn ak yon balèn.

Valdira te suiv reyinyon dimanch lan nan telefòn tou. Li t al nan raje a ak Bib li, Toudegad li ak liv kantik li pou l ka suiv. Li te konn mache ak parapli l lè gen lapli.

Nan mwa mas, Valdira te vwayaje 96 kilomèt pou l al nan Sal Wayòm nan kote l te asiste reyinyon espesyal yo te fè lè vèsyon revize Tradiksyon monn nouvo a te parèt an pòtigè. Li te kontan resevwa nouvo Bib la. Men sa Valdira te di lè yo te felisite l pou tout efò l fè pou l etidye Bib la: “O! Sa pa tèlman difisil pase sa!”

Moun Youkpa yo se yon pèp amerendyen k ap viv nan peyi Kolonbi. Anvan Frank, yon pyonye espesyal, t al vizite youn nan kominote Youkpa yo, yo te pale l te de John Jairo, chèf zòn nan, ki te kouri dèyè anpil gwoup evanjelik ki te vle preche nan zòn nan. Nan youn nan fwa sa yo, lè John te rann li kont gen yon minis relijye ki t ap ranmase dim nan men moun yo, li te kouri dèyè l toutpandan l t ap tire katouch anlè.

Men sa Frank sonje: “Lè n te rive nan zòn nan, premye moun ki te koute nou se te youn nan pitit fi John Jairo yo! Apre n te fin montre l liv Ki sa Labib anseye toutbonvre? a, menm kote a, li te di: ‘Se nan relijyon sa a mwen vle ye!’ Epi, li kouri al fè papa l konnen nou rive.  Papa a te konvoke nou menm kote a. Nou te tou pè lè n te rankontre avè l. Anvan nou te di yon mo, li te di: ‘M konnen nou nan vrè relijyon an. Sa gen uit an, m te jwenn yon liv menm jan ak liv nou bay pitit fi m nan nan yon depotwa nan Becerril. M te li l, e depi lè sa a, m ap tann nou vin isit la. M te konnen nou t ap vini yon jou. Mwen vle pou n etidye Labib avè m, ak fanmi m ansanm ak moun nan kominote sa a. Pòt kay nou ouvè pou nou.’

“Pawòl sa yo te fè dlo koule nan je nou. Tout moun nan kominote a te rasanble pou yo koute nou k ap preche e John Jairo te entèprete sa n te di yo nan lang moun yo. Lè n t aprale, li te prete n yon ti bourik pou n  pote bagay nou yo. Kounye a, n ap kondui 47 etid biblik ak 120 moun Youkpa ki soti nan plizyè kominote, san wete John Jairo ak pitit fi l la.”

José, se yon ansyen katolik wouj k ap viv ann Ekwatè. Men sa l te ekri: “M te vrèman rayi Temwen Jewova yo. M te fè dizan ap pèsekite yo. M te konn rasanble foul moun pou bat Temwen yo, epi m te konn akize yo kòm vòlè. Nan pòs polis la, m te konn ensiste pou yo met kadna nan selil prizon kote yo mete yo a. Yon lè, nou te kraze machin yon Temwen. Yon lòt lè, nou te jete moto youn nan yo nan yon ravin.

 “Epi, nan ane 2010, m te vin gen maladi ki rele grip pòsin nan. Doktè te di m pou m kite kay kote m te abite nan mòn Lèzann yo pou m al viv sou kot peyi a nan yon klima ki pi cho pou m ka refè. M t al viv nan yon ti fèm ki pou yon fanmi m nan yon zòn sou kot peyi a, e finalman, se mwen ki te vin ap travay jaden an. Piske m te poukont mwen, m te vrèman anvi pale ak yon moun. E ki moun ki te vin nan fèm nan? Temwen Jewova yo! Piske m te vrèman santi m poukont mwen, m te pale ak yo e m te sezi wè jan yo konn Bib la. Pou m te ka konn kwayans yo, m te aksepte yon etid Labib. Apre m te fin fè sis mwa ap etidye, m te asiste reyinyon pou premye fwa. Jantiyès ak bonjan enterè yo te demontre anvè m te tèlman touche m, m te di tèt mwen: ‘Èske se pa moun sa yo k ap sèvi Bondye toutbonvre?’ M te fè pwogrè e m te batize nan mwa avril 2014.

“M regrèt dèske m te konn pèsekite Temwen yo. Sepandan, nan yon sans, Jewova te ban m okazyon pou m repare sa. Nan jou ki te 4 oktòb 2014 la, yo te entèvyouwe m nan yon asanble sikonskripsyon antanke yon ansyen opozan, e yo te mande m: ‘Si w te gen posiblite pou w mande nenpòt nan moun ou te konn pèsekite yo padon, kiyès ou t ap mande padon?’ San reflechi, m te reponn se t ap yon frè ki rele Edmundo, men, m pa t konn ki jan pou m jwenn li. San m pa t konnen, siveyan sikonskripsyon an te mande Edmundo pou l vin dèyè estrad la. Moun yo nan asistans lan te pran kriye pandan mwen menm ak Edmundo t ap bay youn lòt akolad e n t ap kriye ansanm sou estrad la.”

Solèy la te cho anpil lè yon gwoup sè nan vil Asunción, nan peyi Paragwe, te fèk fin preche tèritwa yo te  asiyen yo a a midi. Men, yo te deside fè yon gwo efò pou y al preche nan kèk kay ki toupre a. Gen youn nan Temwen yo ki te di: “Petèt gen yon moun k ap priye.” Lè yo rive toupre yon kay, gen yon jèn dam nan pòt lakay li ki salye sè yo ak yon souri epi l mande yo si yo se Temwen Jewova. Dam nan te fè yo konnen, akoz travay li, sa gen yon mwa depi l kite Bolivi pou l vin viv nan peyi Paragwe. Li t ap etidye Labib nan peyi Bolivi anvan l te vin Paragwe. Piske pèsonn nan zòn kote l rete a pa t ka di l ki kote l ka jwenn Temwen yo, li te deside priye konsa: “Tanpri Jewova, fè Temwen w yo jwenn mwen.” Sè yo te vizite l menm jou a e yo te pran randevou pou yo vin etidye Labib avè l.