Temwen Jewova yo pa oblije jwenn yon papye legal pou aktivite relijye yo a. Sepandan, lè n anrejistre legalman, sa ban n posiblite pou se nou ki posede kote nou konn reyini yo, pou n jwenn kote poun lwe e pou n enpòte piblikasyon relijye nou yo.

• An 2004, tribinal nan peyi Larisi yo te refize rekonèt asosyasyon legal Temwen Jewova yo ap itilize nan vil Moskou a. Kòm rezilta, frè nou yo nan vil Moskou te fè fas ak anpil difikilte ki pa sispann ogmante. Ofisye polis yo konn fè presyon sou yo, gen moun ki atake kèk nan yo pandan y ap preche e pwopriyetè kote nou reyini yo konn kanpe sou kontra nou gen avè yo, sa ki konn fè frè yo pa gen kote pou yo reyini pou yo adore. Nan yon jijman Cour européenne des droits de l’homme nan (CEDH) te fè nan ane 2010, li te fè konnen peyi Larisi vyole dwa Temwen  Jewova yo nan vil Moskou e l te bay lòd pou yo rekonèt yo legalman ankò. Nou kontan fè n konnen nan dat 27 me 2015, Depatman vil Moskou pou Federasyon ministè jistis peyi Larisi a te anrejistre yon nouvo Òganizasyon relijye Temwen Jewova yo nan vil Moskou.

An jeneral, menm jan ak pifò òganizasyon relijye ak òganizasyon k ap fè zèv sosyal, asosyasyon legal Temwen Jewova yo ap itilize toupatou sou tè a pa peye taks. Sepandan, pafwa, gouvènman yo konn refize rekonèt nou kòm òganizasyon ki pa dwe peye taks.

• Nan peyi Lasyèd, otorite yo te fè konnen Betèl la se yon biznis komèsyal ki bay Betelit yo “travay” e l pa yon kominote relijye ki gen sèvitè espesyal aplentan. Otorite yo te mande Betèl la ak chak Betelit pou yo peye plizyè dizèn milye ewo kòm taks. Pou regle pwoblèm sa a, Temwen nan peyi Lasyèd yo te depoze plizyè reklamasyon devan tribinal lokal yo e yo te voye sis demann diferan nan CEDH la.

Pèp Jewova a gen bonjan respè pou kòmandman Bib la bay ki mande pou yo “bat epe yo pou yo fè yo tounen zouti pou raboure latè” e pou yo pa “aprann fè lagè”. (Eza. 2:4.) Yo kenbe netralite yo menm lè kèk gouvènman pa ofri okenn posiblite pou yo fè sèvis sivil.

• Lalwa nan peyi Kore disid pa rekonèt dwa yon moun genyen pou l refize fè sèvis militè akoz konsyans li. Nan 60 ane ki sot pase yo, yo te met plis pase 18 000 frè nan prizon paske yo te refize fè sèvis militè. Prèske chak Temwen nan peyi a konn yon zanmi oswa yon manm fanmi yo ki te nan prizon. An 2004 ak 2011, Tribinal Konstitisyonèl Kore disid la te fè konnen konstitisyon an ba yo dwa pou yo met moun sa yo nan prizon. Nan mwa jiyè 2015, Tribinal la te fè yon sondaj pou l konn sa pèp la  panse sou sijè a ankò. Toupatou nan monn nan, Temwen Jewova yo ap priye pou yo pran yon rezolisyon favorab sou sijè sa a ki la depi byen lontan yon fason pou jèn frè nan peyi Kore disid yo pa oblije al nan prizon ankò akoz lafwa yo.

• Gen twa Temwen Jewova nan peyi Eritre ki sou 22^yèm ane yo nan prizon paske yo refize fè sèvis militè akoz konsyans yo. Yo pa t janm depoze yon plent fòmèl kont ni Paulos Eyassu, ni Negede Teklemariam, ni Isaac Mogos e frè yo pa janm gen opòtinite defann tèt yo devan tribinal. Yo menm ansanm ak plis pase 50 frè ak sè kontinye kenbe entegrite yo malgre move tretman y ap sibi ak move kondisyon prizon yo. Nou gen konfyans Jewova ‘tande prizonye sa yo k ap plenn’ akoz lafwa yo e l ap aji pou yo. — Sòm 79:11.

• Nan peyi Ikrèn, yo te konvoke Vitaliy Shalaiko nan mwa out 2014 pou l fè sèvis militè pandan peryòd mobilizasyon an. Li te refize fè sèvis militè akoz konsyans li, men, li te fè konnen li dakò pou l fè sèvis sivil nan plas li. Komisè gouvènman an te akize frè Shalaiko kòm moun k ap kouri pou mobilizasyon militè a, men, tribinal koreksyonèl la ak tribinal apèl la te di li pa koupab. Tribinal apèl la te fè konnen menmsi sekirite peyi a menase, sa pa  met yon limit sou dwa yon moun genyen, epi, “yo pa ka neglije dwa yon moun genyen pou l refize fè sèvis militè akoz sekirite nasyonal”. Komisè gouvènman an te fè yon lòt apèl. Nan dat 23 jen 2015, pi gwo tribinal nan peyi Ikrèn ki espesyalize nan zafè sivil ak zafè kriminèl te dakò ak desizyon tribinal ki pi piti yo. Konsa, yo rekonèt dwa yon moun genyen pou l refize fè sèvis militè akoz konsyans li se yon dwa ki dwe respekte menm lè gen ijans nasyonal.

Men sa frè Shalaiko te di anrapò ak desizyon pozitif yo te pran nan ka pa l la: “Pawòl ki nan Jeremi 1:19 la te ankouraje m anpil. M te prepare pou nenpòt sa k rive a, men sa k pi enpòtan an se ret fidèl ak Jewova. Mwen sèten li pa t ap janm abandone m e l t ap ban m fòs pou m ret fidèl. Sepandan, mwen pa t janm atann ak yon desizyon konsa. Yo te deklare m inosan nan toule twa tribinal yo. E pandan tout jijman sa yo, m te santi èd frè yo. M pa t janm santi m poukont mwen.”

Anrapò ak netralite kretyen yo, seremoni patriyotik yo reprezante yon lòt eprèv. Jèn yo sitou ka jwenn presyon pou yo fè konpwomi ak fidelite yo anvè Jewova lè responsab lekòl yo ap eseye fòse etidyan yo chante im nasyonal oswa salye drapo.

• Nan distri Karongi nan peyi Wannda, responsab lekòl yo te akize plizyè etidyan Temwen kòmkwa yo pa respekte im nasyonal la paske yo refize chante l. Yo te met etidyan yo deyò nan lekòl yo e yo te menm mete yo nan prizon. Nan dat 28 novanm 2014, tribinal entèmedyè Karongi a te deklare etidyan yo inosan e l te fè konnen lefètke yo refize chante im nasyonal la sa pa montre yo derespekte im nan. Nan lòt peyi ann Afrik yo, tankou Kamewoun, Repiblik Demokratik Kongo, Gine ekwatoryal ak Malawi, jèn Temwen yo ap fè fas ak menm pwoblèm nan e nan kèk ka, yo mete yo deyò nan lekòl yo tou. Frè nou yo nan peyi sa yo ap fè gwo efò pou fè otorite nan gouvènman yo ak responsab lekòl yo konnen netralite yo antanke Temwen Jewova.

•   Nan mwa desanm 2013, gen yon lekòl piblik nan Lepaera, nan peyi Ondiras, ki te refize bay de etidyan Temwen diplòm yo paske yo te refize chante im nasyonal la e yo te refize salye drapo a. Pou rezoud pwoblèm sa a, de avoka ki Temwen Jewova te rankontre ak yon reprezantan Ministè edikasyon an e yo te pale avè l sou sa k te pase nan lòt peyi kote yo te dakò ak pozisyon etidyan Temwen yo. Reprezantan an te janti e l te dakò pou etidyan yo ak paran yo ekri yon lèt pou esplike direktè jiridik Sekretarya edikasyon peyi Ondiras la ka a. Apre l te fin egzamine sa yo te ekri a, li te pibliye yon deklarasyon nan dat 29 jiyè 2014 ki fè konnen “[tout moun nan] sosyete a dwe jwenn edikasyon san okenn diskriminasyon sou kèlkeswa fòm nan”, e l te bay lòd pou etidyan Temwen yo jwenn diplòm yo.

Toupatou sou tè a, antanke Temwen Jewova, nou obeyi lòd Jezi te bay pou n pataje bon nouvèl Wayòm nan ak pwochen nou, pou n reyini ansanm ak kwayan parèy nou yo nan adorasyon n ap bay Jewova a e pou n etidye Pawòl Bondye a regilyèman. Anplis de sa, nou pran kòmandman Bib la bay pou n fè lwa Jewova yo antre nan kè timoun nou yo e pou n “evite [...] san” an trèzoserye (Tra. 15:20; Det. 6:5-7). Lefètke n respekte kòmandman sa yo,  sa konn fè otorite nan gouvènman yo, ki petèt pa fin byen konprann pozisyon nou, vin gen pwoblèm ak nou.

• Nan eta Florid, Ozetazini, gen yon jij nan yon tribinal ki te bay yon manman ki pa Temwen dwa pou se sèl li menm ki bay twa timoun li yo fòmasyon nan zafè relijye. Yo te bay papa a ki Temwen lòd pou l pa bay timoun yo okenn fòmasyon relijye ki kontrè ak kwayans Katolik yo. Papa a te fè apèl pou yo rejte lòd tribinal la te pran an, epi, nan dat 18 out 2014, tribinal apèl la te rejte desizyon premye tribinal la. Men sa tribinal la te ekri sou baz yon ka ki te pase deja: “Yo toujou rejte entèdiksyon yo met sou dwa yon paran ki pap viv menm kote ak pitit li genyen pou l anseye pitit li kwayans relijye l yo si pa gen bonjan prèv ki montre aktivite relijye paran sa a se yon bagay ki danjere pou timoun nan.”

  Desizyon sa a te bay timoun yo dwa pou yo resevwa yon fòmasyon konplè anrapò ak konsèy ak direksyon Jewova Dye yo. Yo tout ap fè gwo pwogrè nan domèn espirityèl nan kongregasyon nan zòn yo abite a. Men sa papa a di: “M te jwenn bonjan fòmasyon lefètke m te andire sitiyasyon sa a. Pi devan, m te vin jwenn kèk difikilte ki te pase lafwa m anba eprèv, men, Jewova te ede m rete fèm! Mwen konnen lè n pran desizyon pou n sèvi Jewova, nou tou chwazi pèsekisyon.”

• Sè Efigenia Semente, se yon manman twa pitit k ap viv nan peyi Namibi, e l te jwenn anpil eprèv pou l kenbe entegrite l. Li te jwenn anpil konplikasyon pandan l t ap akouche twazyèm pitit li a nan lopital e kèk moun nan staf medikal la ansanm ak fanmi l ki pa Temwen te jwenn yon lòd nan tribinal pou yo fòse l pran san. Avèk kouraj, sè Semente te rete fèm pou l pa pran san e l te fè apèl devan tribinal pou l defann dwa l genyen pou l chwazi pwòp tretman l. Nan dat 24 jen 2015, pi gwo tribinal peyi Namibi a te pran pozisyon pou sè Semente e l te fè konnen “dwa yon moun genyen pou l chwazi sa yo ka fè oswa yo pa ka fè ak pwòp kò l, kit moun nan gen pitit, kit li pa genyen, se yon dwa nòmal tout moun genyen”. Men sa sè Semente te di: “Nou te santi men Jewova yon fason nou pa t janm santi l anvan sa. Se pa ti  bèl sa bèl pou n fè pati fanmi entènasyonal frè sa a! Jewova vrèman ap pran swen nou.”

• Temwen nan peyi Laswis yo renmen patisipe nan temwayaj an piblik nan anpil gwo vil. Sepandan, otorite nan vil Jenèv yo te pase yon lòd ki entèdi moun sèvi ak “stann pou gaye enfòmasyon ki gen rapò ak relijyon nan yon zòn piblik, kit se dirèkteman kit se endirèkteman”. Temwen yo te depoze yon plent devan tribinal pou fè konnen zafè entèdi yon moun sèvi ak yon stann pou l gaye enfòmasyon ki gen rapò ak relijyon se yon “vyolasyon kont libète moun nan genyen pou l pratike relijyon l ak libète l genyen pou l bay opinyon l”. Tribinal la te dakò ak Temwen yo e Temwen yo jwenn bon rezilta nan fason y ap travay ak otorite yo pou yo jwenn yon zòn ki apwopriye ak yon bon lè pou yo sèvi ak stann lè y ap bay temwayaj an piblik.

• Otorite gouvènman yo nan peyi Azèbayidjan kontinye ap fè plis efò toujou pou yo kanpe aktivite Temwen Jewova yo. Se toutan Ministè sekirite nasyonal la ap konvoke kèk Temwen pou poze yo kesyon. Anplis de sa, ministè sa a konn fouye kay Temwen yo pou chèche piblikasyon otorite yo pa dakò antre nan  peyi a. Kominote entènasyonal la te choke lè yo te aprann, nan mwa fevriye 2015, ajan Ministè sekirite nasyonal yo te arete de Temwen, anpalan de Irina Zakharchenko ak Valida Jabrayilova, tou senpleman paske yo t ap pataje ansèyman biblik yo ak pwochen yo. Byenke sa fè n tris pou tout move tretman sa yo, nou kontan anpil dèske pwoklamatè nan peyi Azèbayidjan yo kontinye kenbe fèm e yo met kouraj sou yo pou yo pataje ‘bon nouvèl konsènan Wayòm nan’ ak pwochen yo. — Mat. 24:14.

• Nan peyi Larisi, Temwen Jewova yo pa janm sispann jwenn pwoblèm nan men gouvènman an akoz aktivite relijye yo. Jis jounen jodi a, Federasyon Larisi a deklare 80 piblikasyon Temwen Jewova kòm piblikasyon ki “ekstremis”. Sa vle di li pa legal pou yon moun distribye oswa posede okenn nan swadizan piblikasyon “ekstremis” sa yo, tankou Liv istwa biblik mwen an. Anplis de sa, an desanm 2014, pi gwo tribinal Federasyon Larisi a te deklare sit Entènèt jw.org nou an kòm yon sit “ekstremis”. Toupatou nan peyi a, konpayi ki bay aksè Entènèt yo bloke sit jw.org la e yo konsidere sa ilegal pou yon moun fè piblisite pou sit la. Depi mwa mas 2015, fonksyonè dwàn yo pa otorize okenn kagezon piblikasyon Temwen yo antre nan peyi a menmsi se Bib ak piblikasyon tribinal Larisi yo te deja egzamine e yo te deklare yo pa gen okenn siy ki montre yo se piblikasyon ki ekstremis.

Gen aksyon legal ki kontinye ap fèt nan vil Taganrog kote otorite yo akize 16 pwoklamatè kòm kriminèl lefètke yo òganize epi yo asiste reyinyon relijye. Nan vil Samara, otorite yo te jwenn lòd nan yon tribinal pou yo entèdi asosyasyon legal nou an kòmkwa li se yon asosyasyon “ekstremis”. Malgre tout difikilte sa yo, frè ak sè nan peyi Larisi yo pran detèminasyon pou yo “bay Bondye sa k pou Bondye” e pou yo pa kite difikilte sa yo bloke yo. — Mat. 22:21.