ATIK ETID 40
KANTIK 30 Papa m, Bondye m, Zanmi m
Jewova “geri moun kè yo ap fann yo”
“Li geri moun kè yo ap fann yo. Li bande blese yo genyen yo.” — SÒM 147:3.
PWEN KLE
Jewova gen anpil sousi pou moun ki dekouraje akoz yo soufri anpil nan lavi yo. Nan atik sa a, nou pral wè ki jan li soulaje lapenn nou e li ede n konsole lòt moun.
1. Ki jan Jewova wè sèvitè l yo?
KI SA Jewova wè lè l ap gade sèvitè l yo sou tè a? Li konnen lè nou kontan ak lè nou tris (Sòm 37:18). Lè li wè nou fè tout sa n kapab pou nou sèvi l malgre nou jwenn anpil pwoblèm sa dwe fè l kontan anpil! Epitou, se pa ti anvi li anvi ede n epi konsole n!
2. Ki sa Jewova fè pou moun ki gen kè yo ap fann yo, e ki jan nou ka benefisye tout fason l montre l gen sousi pou nou?
2 Sòm 147:3 di Jewova “bande blese” moun kè yo ap fann yo. Nan vèse sa a, yo montre Jewova gen anpil sousi pou moun ki dekouraje akoz yo soufri anpil. Ki sa n dwe fè pou n benefisye tout fason Jewova montre l gen sousi pou nou? Ann pran yon egzanp. Yon doktè ki gen anpil eksperyans ka fè anpil bagay pou l ede yon moun ki blese geri. Sepandan, pou moun ki blese a rive geri, li dwe byen suiv tout enstriksyon doktè a ba li. Nan atik sa a, nou pral wè ki sa Jewova di nan Pawòl li a pou moun ki dekouraje akoz yo soufri anpil e nou pral egzamine ki jan yo ka aplike konsèy ki plen lanmou li bay yo.
JEWOVA BAN NOU ASIRANS NOU GEN ANPIL VALÈ POU LI
3. Poukisa gen moun ki santi yo pa gen valè?
3 Malerezman, anpil moun nan monn nan pa gen lanmou. Se sa k fè yo maltrete lòt moun e yo fè yo santi yo pa gen valè. Men sa yon sè ki rele Helen a di: “Mwen te leve nan yon fanmi ki pa gen lanmou menm. Papa m te vyolan e chak jou li te konn fè nou santi nou pa gen valè.” Petèt, menm jan ak Helen, yo te maltrete w e yo te kritike w souvan oswa yo te fè w santi w pa gen valè. Si se ka pa w, ou ka twouve l difisil pou w kwè gen yon moun ki renmen w toutbon.
4. Selon Sòm 34:18, ki asirans Jewova ban nou?
4 Menmsi lòt moun te maltrete w, ou ka gen asirans Jewova renmen w e w gen valè pou li. Li “toupre moun kè yo ap fann”. (Li Sòm 34:18.) Si w santi ‘lespri w kraze’, sonje Jewova te wè bon bagay nan kè w e se li menm ki te rale w vin jwenn li (Jan 6:44). Li toujou pare pou l ede w paske li renmen w anpil.
5. Ki sa nou ka aprann nan fason Jezi te aji ak moun lòt moun te fè yo santi yo pa gen valè?
5 Nou ka aprann ki jan Jewova santi l lè nou egzamine egzanp Jezi. Lè Jezi te sou tè a, li te janti ak moun lòt moun te konn maltrete yo e li te aji avèk yo ak konpasyon (Mat. 9:9-12). Lè yon dam ki te gen espwa li t ap geri anba yon maladi terib li te genyen te touche rad Jezi, Jezi te konsole l e l te felisite l pou lafwa l (Mak 5:25-34). Jezi te imite Papa l yon fason ki pafè (Jan 14:9). Se sa k fè ou ka gen asirans Jewova ba w anpil valè e li remake bèl kalite w genyen, sa gen ladan l lafwa w genyen ak lanmou w gen pou li.
6. Ki sa yon moun ki santi l pa gen valè ka fè?
6 Ki sa w ka fè si w konn santi w pa gen valè? Li vèsè nan Bib la ki ka ba w asirans ou gen valè pou Jewova epi medite sou yo b (Sòm 94:19). Si w pa reyisi reyalize yon objektif ou genyen oswa w dekouraje paske w pa ka fè sa lòt moun ap fè, pa ret konsantre sou sa w pa ka fè. Jewova pa atann pou w fè plis pase sa w ka fè (Sòm 103:13,14). Si yo te maltrete w yon lè, ou pa responsab sa k te rive a. Ou pa t merite pou yo te fè w sa! Sonje se moun ki fè sa ki mal la Jewova ap jije, se pa ou menm (1 Pyè 3:12). Men sa Sandra yo te maltrete lè l te timoun di: “Se toutan m ap priye Jewova pou l ede m wè tèt mwen fason li wè m nan.”
7. Ki jan eksperyans nou te fè nan lavi nou kapab itil nou nan sèvis Jewova?
7 Pa janm gen dout Jewova kapab sèvi avè w pou ede lòt moun. Li ba w privilèj pou w konpayon travay li nan travay predikasyon an (1 Kor. 3:9). Akoz move eksperyans ou te fè nan lavi w, li ka pi fasil pou w konprann ki jan moun k ap soufri yo santi yo. Ou kapab fè anpil bagay pou w ede yo. Helen nou te pale de li pi wo a te jwenn èd li te bezwen, e kounye a li pi fasil pou l ede lòt moun. Men sa l di: “Jewova te fè ‘pa itil’ la tounen yon moun ki santi yo renmen l e ki santi l itil.” Helen kontan sèvi kòm pyonye pèmanan.
JEWOVA VLE N AKSEPTE LI PADONE NOU
8. Ki asirans Jewova ban nou nan Ezayi 1:18?
8 Gen kèk sèvitè Jewova ki santi yo boulvèse anpil akoz peche yo te fè anvan yo te batize e menm apre yo fin batize. Men, nou pa dwe bliye Jewova te bay ranson an paske l renmen n anpil. Pa gen dout, li vle n aksepte kado li bay la. Jewova ban n asirans apre nou fin “ranje bagay yo” c avè l, li padone nou nèt. (Li Ezayi 1:18.) Nou gen Jewova, Papa nou an ki plen lanmou, anpil rekonesans poutèt li bliye peche nou te fè yo. Anmenmtan, li pa janm bliye bon bagay nou te fè yo. — Sòm 103:9, 12; Ebre 6:10.
9. Poukisa nou pa dwe kontinye ap panse ak peche nou te fè nan tan lontan?
9 Si sa w te fè lontan toujou ap boulvèse w, fè tout sa w kapab pou w ret konsantre sou sa w ap fè kounye a ak sa w pral fè alavni olye w ret konsantre sou sa k te pase a. Ann pran egzanp apot Pòl. Li te regrèt li te konn pèsekite kretyen yo avèk vyolans. Men, li te konnen Jewova te padone l (1 Tim. 1:12-15). Èske apre sa li te kontinye ap reflechi sou peche l te fè lontan yo? Pa gen dout li te refize fè sa, menm jan li pa t ret ap panse ak sa l te reyalize lè l te nan relijyon juif la (Flp. 3:4-8, 13-15). Okontrè, Pòl te kontinye fè tout sa l te kapab nan travay preche ak fè disip la e l te kontinye ap reflechi sou lavni. Menm jan ak Pòl, ou pa ka chanje sa w te konn fè nan tan lontan. Men, ou ka bay Jewova louwanj e fè l plezi kounye a, epi panse ak bèl pwomès li fè w pou lavni.
10. Ki sa nou kapab fè si aksyon n te fè nan tan lontan yo te fè moun soufri?
10 Petèt ou ka dekouraje akoz move aksyon ou te fè ki te lakòz lòt moun soufri. Ki sa w ka fè? Fè tout sa w kapab pou repare sa k te pase a, sa gen ladan l mande padon ak tout kè w (2 Kor. 7:11). Mande Jewova pou l ede moun ki te sibi move aksyon w te fè yo. Jewova kapab ede ni ou menm ni moun ou te fè soufri yo pou n kontinye sèvi l e pou n gen lapè ankò.
11. Ki sa n ka aprann nan egzanp pwofèt Jonas? (Gade foto ki sou paj a.)
11 Aprann nan erè w te fè lontan yo, epi kite Jewova sèvi avè w kèlkeswa fason li chwazi a. Ann pran egzanp pwofèt Jonas. Olye li te vwayaje al Niniv jan Bondye te mande l la, li te kouri al nan yon lòt direksyon. Jewova te disipline Jonas e li te aprann nan erè l te fè a (Jon. 1:1-4, 15-17; 2:7-10). Jewova pa t dekouraje ak Jonas. Bondye te ba l yon lòt posiblite pou l t al Niniv, e li te obeyi lapoula. Jonas pa t kite remò l te genyen akoz erè l te fè a anpeche l aksepte misyon Jewova te ba li a. — Jon. 3:1-3.
Apre pwofèt Jonas te fin soti anndan vant gwo pwason an, Jewova te di l yon lòt fwa ankò pou l al Niniv pou l al bay mesaj Li a. (Gade paragraf 11.)
JEWOVA BA NOU LESPRI SEN POU KONSOLE NOU
12. Ki jan Jewova ban nou lapè lè yon bagay terib rive nou? (Filipyen 4:6, 7).
12 Jewova ba nou lespri sen pou konsole nou lè yon bagay terib rive nou. Ann wè sa k te rive Ron ak Carol. Malerezman, pitit gason yo a te touye tèt li. Yo te di: “Se vre nou te konn jwenn anpil eprèv, men sa se eprèv ki te pi rèd nou te jwenn. Pandan plizyè nuit nou pa t ka dòmi, nou te priye Jewova, e vrèmanvre nou te santi lapè Filipyen 4:6, 7 pale de li a.” (Li vèsè yo.) Si w santi kè w ap fann akoz yon bagay mal ki te rive w, ou ka di Jewova egzakteman ki jan w santi w e w ka priye l toutotan ou santi w bezwen fè sa (Sòm 86:3; 88:1). Kontinye mande Jewova lespri sen, l ap toujou ede w. — Lik 11:9-13.
13. Ki jan lespri sen kapab ede n kontinye adore Jewova fidèlman? (Efezyen 3:16).
13 Èske w te jwenn yon eprèv ki difisil anpil e kounye a ou prèske pa gen fòs pou w fè anyen ankò? Lespri sen kapab ba w fòs pou w kontinye sèvi Jewova fidèlman. (Li Efezyen 3:16.) Ann pran egzanp yon sè ki rele Flora. Li menm ak mari l t ap sèvi kòm misyonè lè mari l te vin pa fidèl avè l e yo te divòse. Men sa l di: “Mwen tèlman te santi m tris akoz li pa t fidèl avè m, mwen pa t ka panse ak okenn lòt bagay ankò. Mwen te priye Jewova pou l te ban m lespri sen pou m kontinye andire. Jewova te ban m fòs mwen te bezwen pou m geri e pou m te sipòte yon bagay okòmansman mwen te panse m pa t ap ka sipòte.” Flora santi Bondye ede l vin gen plis konfyans nan li e l ap kontinye ede l nan tout eprèv li yo. Men sa l ajoute: “Pawòl ki nan Sòm 119:32 yo te aplike nan sitiyasyon pa m. Vèsè a di: ‘M ap prese suiv kòmandman w yo paske w fè plas pou yo nan kè m.’”
14. Ki jan n ka kite lespri Bondye ede n?
14 Ki sa w bezwen fè lè w fin mande Jewova lespri sen? Fè aktivite k ap pèmèt lespri Bondye ede w. Sa gen ladan l asiste reyinyon yo epi preche lòt moun. Li Pawòl Bondye a chak jou, sa ap ede w pou w medite sou panse l yo (Flp. 4:8, 9). Pandan w ap li, reflechi sou moun Bib la pale de yo ki te jwenn anpil tribilasyon epi medite sou fason Jewova te ede yo andire. Sandra nou te pale de li pi wo a te soufri akoz yon pakèt gwo pwoblèm li te genyen. Men sa l di: “Istwa Jozèf la vrèman ankouraje m. Li pa t kite eprèv ak enjistis li te sibi yo febli relasyon l te gen ak Jewova a.” — Jen. 39:21-23.
JEWOVA SÈVI AK KWAYAN PARÈY NOU POU L KONSOLE NOU
15. Nan men kiyès nou ka jwenn konsolasyon, e ki jan yo kapab ede nou? (Gade foto a tou.)
15 Lè n ap soufri, kwayan parèy nou yo kapab vin “yon gwo rekonfò” pou nou (Kol. 4:11). Frè n ak sè n yo se youn nan fason Jewova montre li renmen nou. Yo konsole nou lè yo pase tan avè n e lè yo koute n k ap di yo jan n santi n. Yo ka ankouraje n lè yo li yon vèsè nan Bib la avè n oswa lè yo priye avè n d (Wom. 15:4). Pafwa yon frè oswa yon sè ka fè n sonje fason Jewova panse e sa ka ede n kontinye andire. Kwayan parèy nou yo ka ban nou èd ki pratik, pa egzanp yo ka ofri n manje lè n dekouraje.
Zanmi nou kapab fè konfyans e ki gen matirite kapab konsole nou e yo kapab ede n. (Gade paragraf 15.)
16. Ki sa n ka bezwen fè pou lòt moun ede n?
16 Pafwa nou ka bezwen mande lòt moun pou yo ede n. Frè n ak sè n yo renmen nou e yo vle ede n (Pwo. 17:17). Men, yo ka pa konnen ki jan nou santi n oswa ki jan pou yo ede n (Pwo. 14:10). Si w santi w dekouraje akoz yon bagay ki fè w soufri, ou ka pale ak bon zanmi w epi fè yo konnen ki jan w santi w. Fè yo konnen ki èd ou bezwen. Petèt ou ka chwazi pale ak youn oswa de ansyen ou santi w alèz avè yo. Gen kèk sè ki twouve lè yo pale ak yon sè ki gen matirite sa ede yo.
17. Ki sa k ka anpeche n jwenn ankourajman, e ki sa n ka fè pou sa?
17 Pa izole tèt ou. Pafwa, ou ka tèlman santi w dekouraje, ou ka pa anvi ret bò kot lòt moun. Frè ak sè yo ka pa vrèman konprann jan w santi w oswa yo ka di pawòl ki blese w (Jak 3:2). Men, pa rete lwen frè ak sè w yo. Jewova ka sèvi avè yo pou ankouraje w. Men sa yon ansyen ki rele Gavin, ki soufri depresyon di: “Souvan m pa vle pale oswa pase tan ak zanmi m.” Men, Gavin fè efò pou l rete ansanm ak frè l ak sè l yo, e souvan sa ede l santi l pi byen. Men sa yon sè ki rele Amy di: “Akoz move eksperyans mwen te fè, li difisil pou m fè lòt moun konfyans. Men, m aprann pou m renmen frè m ak sè m yo e pou m fè yo konfyans jan Jewova fè sa. Mwen konnen lè m aji konsa, sa fè Jewova kontan e sa fè m kontan tou.”
PWOMÈS JEWOVA FÈ POU LAVNI YO KAPAB KONSOLE NOU
18. Ki sa n ka espere pou lavni, e ki sa n ka fè kounye a?
18 Talè konsa, Jewova pral retire tout sa ki lakòz nou dekouraje e k ap fè n soufri (Rev. 21:3, 4). Lè sa a, move souvni yo pap vin nan kè nou (Eza. 65:17). Menm kounye a Jewova pran swen nou lè n ap soufri. Jewova fè anpil bagay pou l konsole n e pou l ede n. Nou bezwen aksepte èd li ban nou. Nou pa dwe janm gen dout “li gen sousi pou nou”. — 1 Pyè 5:7.
KANTIK 7 Jewova se fòs nou
a Yo chanje non moun yo.
b Gade kare ki gen tit “ Jewova ba w valè”.
c Pou n “ranje bagay yo” avèk Jewova, nou bezwen montre l nou repanti toutbon lè n mande l padon pou peche n yo e lè n chanje fason n aji. Si nou fè yon peche grav, nou bezwen chèche èd ansyen yo nan kongregasyon an tou. — Jak 5:14, 15.
d Gade, pa egzanp, vèsè yo site anba ribrik “Enkyetid” ak anba ribrik “Konsolasyon; rekonfò” ki nan piblikasyon ki gen tit Vèsè pou ede nou viv antanke kretyen.
