Sa Jezi aprann nou

Sou espwa ki genyen pou moun ki mouri yo

Jezi te resisite omwen twa moun. Sa se yon prèv ki montre gen espwa pou moun ki mouri yo (Lik 7:11-17 ; 8:49-56 ; Jan 11:1-45). Pou nou ka konprann espwa ki gen pou moun ki mouri yo, nou bezwen konprann ki rezon ki fè moun mouri e ki kote lanmò soti.

Poukisa nou malad e nou mouri ?

Lè Jezi te padone peche moun yo, moun sa yo te geri. Pa egzanp, yon lè yo te pote yon mesye ki paralize bay Jezi pou Jezi geri l. Men sa Jezi te di nan okazyon sa a : “ Kisa ki pi fasil pou m di : Peche ou yo padonnen, osinon : Leve mache ? Enben, m’ap fè nou konnen mwen menm, Moun Bondye voye nan lachè a, mwen gen pouvwa sou latè pou m padonnen peche. Li vire, li di nonm paralize a : Leve kanpe, pran kabann ou, ale lakay ou. ” ​(Matye 9:2-6). Pawòl sa yo montre nou se peche ki fè gen maladi ak lanmò. Nou eritye peche nan men Adan, premye òm nan. — Lik 3:38 ; Women 5:12.

Poukisa Jezi te mouri ?

Jezi pa t janm peche. Se sa k fè li pa t merite lanmò. Lefètke li te mouri nan plas nou, li peye pou peche nou yo. Li te di san l “ koule pou anpil moun jwenn padon pou peche yo ”. — Matye 26:28.

Men sa Jezi te di tou : “ Se konsa, mwen menm, Moun Bondye voye nan lachè a, mwen pa vini pou moun rann mwen sèvis, men mwen vini pou m rann moun sèvis. Wi, mwen vin bay lavi m pou peye delivrans [“ kòm ranson pou ”, NW] anpil moun. ” ​(Matye 20:28). Jezi te rele pri l te peye pou peche nou yo yon “ ranson ”, paske sa libere nou anba lanmò. Men sa l te di ankò : “ Mwen menm, mwen vin pou moun ka gen lavi, epi pou yo genyen l an kantite. ” ​(Jan 10:10). Pou nou byen konprann espwa ki gen pou moun ki mouri yo, nou bezwen konprann tou nan ki kondisyon yo ye.

 Sa k pase yon moun lè l mouri ?

Yon lè, gen yon zanmi Jezi ki te mouri. Li te rele Laza. Lè sa a, Jezi te montre sa k pase lè yon moun mouri. Li te di disip li yo pawòl sa yo : “ Laza, zanmi nou an, ap dòmi. Mwen pral [Betani pou m] leve li. [...] Men disip yo te konprann se dòmi Laza t’ap dòmi tankou tout moun konn fè. Lè sa a, Jezi di yo klè : Laza mouri. ” Konsa, Jezi te montre aklè moun ki mouri yo nan yon kondisyon ki sanble ak yon moun k ap dòmi, sètadi yo pa konn anyen. — Jan 11:1-14.

Lè Jezi te resisite Laza, zanmi l lan, kat jou te gentan pase depi l te mouri. Epoutan, nan Bib la, nou pa jwenn okenn istwa Laza rakonte sou sa k te pase l pandan kat jou sa yo. Pandan l te mouri a, li pa t konn anyen. — Eklezyas 9:5, 10 ; Jan 11:17-44.

Ki espwa ki genyen pou moun ki mouri yo ?

Moun ki mouri yo ap rejwenn lavi e y ap gen posiblite pou yo viv pou toutan. Men sa Jezi te di : “ Lè a pral rive : tout mò ki nan tonm yo pral tande vwa li [Jezi], yo pral leve sòti vivan nan tonm yo. ” — Jan 5:28, 29.

Espwa sa a se yon prèv ki montre lanmou Bondye genyen pou nou. Jezi te di : “ Bondye sitèlman renmen lèzòm li bay sèl Pitit li a pou yo. Tout moun ki va mete konfyans yo nan li p’ap pèdi lavi yo. Okontrè y’a gen lavi ki p’ap janm fini an. ” — Jan 3:16 ; Revelasyon 21:4, 5.

Pou w jwenn plis enfòmasyon, gade chapit 6 nan liv Ki sa Labib anseye toutbonvre ? a *.

[Nòt anba paj]