Ki lè lagè Amagedon an ap fèt?

“Mwen gade, mwen wè yon gwo foul moun pèsonn pa t ka konte ki soti nan tout nasyon, nan tout tribi, nan tout pèp ak nan tout lang [...] ki soti anba gwo tribilasyon an.” — REVELASYON 7:9, 14.

KOUNYE A, sèn nan prepare pou lagè Amagedon an. Nan ki sans?

Depi kounye a, gen yon gwoup moun nan lemonnantye k ap sèvi Jewova e k ap viv ann amoni ak prensip moral wo nivo ki nan Bib la. Grasa èd Bondye, gen plizyè milyon moun ki soti nan tout nasyon, nan tout tribi ak nan tout lang k ap rasanble pou yo viv nan tèt ansanm antanke yon fanmi ki gen lanmou. Relasyon sa a egziste pami Temwen Jewova yo. — Jan 13:35.

Talè konsa, Satan pral rasanble lame l yo pou l lanse pi gwo atak li kont pèp sa a ki pezib e ki parèt san defans (Ezekyèl 38:8-12; Revelasyon 16:13, 14, 16). Ki jan w ka sèten sa ap fèt? Labib pale sou yon seri evènman byen presi ki ede nou konnen ki lè batay Amagedon an ap fèt. Anpil nan evènman sa yo deja ap reyalize.

Evènman nou wè k ap reyalize

Disip Jezi yo te mande Jezi ki jan moun ap fè konnen lè “fen sistèm nan” toupre rive (Matye 24:3). Jezi te fè yo konnen t ap gen yon peryòd kote “nasyon pral leve kont nasyon, e wayòm pral leve kont wayòm. Pral gen rate manje ak tranblemanntè nan yon zòn apre yon lòt.” Apre sa, li te di yo: “Tout bagay sa yo se kòmansman doulè yo.” ​(Matye 24:7, 8). Apot Pòl te pale de menm peryòd sa a kòm “dènye jou yo”, li te di jou sa yo t ap “difisil pou moun sipòte”. (2 Timote 3:1.) Èske w pa wè pwofesi sa yo ap pale de evènman k ap rive jodi a?

Sa k fè peryòd sa a t ap difisil konsa a? Apot Jan bay rezon an. Li te fè konnen  Satan ak demon l yo t ap ka aji sèlman sou tè a pandan “yon tikras tan”. Li te di Satan t ap “an kòlè anpil” pandan tan sa a (Revelasyon 12:7-12). Èske w pa santi moun yo gen tandans fè kòlè e yo gen tandans vyolan jodi a, e èske w pa wè se pa yon sèl kote moun yo konsa, men se tout kote?

Anplis de sa, Jezi te di pandan peryòd sa a ki t ap difisil anpil, gen yon kokenn travay k ap gen pou fèt. Li te di: “Yo pral preche bon nouvèl sa a konsènan wayòm [Bondye a] sou tout tè a, kòm yon temwayaj pou tout nasyon. Apre sa, lafen an ap vini.” ​(Matye 24:14). Jodi a, nan plis pase 235 peyi, Temwen Jewova yo ap preche bon nouvèl Wayòm Bondye a nan plis pase 500 lang. De peryodik ki baze sou Bib la yo pibliye yo, anpalan de Toudegad ak Réveillez-vous!, se peryodik yo plis distribye nan lemonn. Epitou, Temwen Jewova yo tradui Bib la nan anviwon 100 lang. Yo pa touche pou travay y ap fè a e se sèlman ofrann moun bay ki finanse travay sa a. Èske kokenn kanpay predikasyon sa a k ap fèt la se pa reyalizasyon pwofesi Jezi te bay la?

Bib la pale tou de evènman k ap mennen dirèkteman nan gè ki pral fèt ant Jewova Dye ak moun ki opoze avè l yo. Ann egzamine twa nan pwofesi sa yo nou pral wè k ap reyalize.

Evènman nou pral wè k ap rive talè konsa

Pwofesi 1. Labib di nasyon yo pral fè yon gwo deklarasyon kote yo va di: “Lapè! Sekirite!” Petèt moun yo panse yo nan yon epòk kote gwo pwoblèm limanite ap rankontre yo ap resi jwenn solisyon. Sepandan, evènman k ap rive apre deklarasyon sa a pap gen anyen pou l wè ak lapè. — 1 Tesalonisyen 5:1-3.

Pwofesi 2. Apre sa, plizyè gouvènman pral deside aji kont òganizasyon relijye ki gen nan monn nan. Bib la pran egzanp yon bèt sovaj pou reprezante gouvènman sa yo e li pran egzanp yon fi ki chita sou do bèt la pou reprezante fo relijyon ki nan monn nan (Revelasyon 17:3, 15-18). Bèt senbolik la pral fè sa Bondye vle l fè a, san li pa rann li kont, lè l detwi relijyon ki fè konprann yo reprezante Bondye.

Apot Jan itilize yon seri senbòl pou l pale de sa k pral pase a. Men sa l di: “Dis kòn ou wè yo, ansanm ak bèt sovaj la, pral rayi pwostitye a, y ap dechèpiye l, y ap mete l toutouni, y ap manje chè l, e y ap boule l nèt nan dife. Paske, Bondye mete lide l nan kè yo pou yo akonpli volonte l.” — Revelasyon 17:16, 17.

Pwofesi 3. Apre yo fin detwi fo relijyon yo nan atak sa a, Satan pral pouse nasyon yo atake moun k ap adore Jewova Dye yo. — Revelasyon 7:14; Matye 24:21.

Ki efè sa ap gen sou ou?

Si w pa t gen posiblite pou w etidye Labib afon, li ka difisil pou w kwè evènman nou sot pale de yo la a ap rive vre. Men, gen yon bon rezon pou w kwè chak detay ap akonpli e evènman sa yo pral rive talè konsa. Tout pwofesi nan Bib la ki deja reyalize yo bay asirans sa a *.

Li ta bon pou w pran yon ti tan pou w chèche konnen poukisa Temwen Jewova yo gen konviksyon “lagè ki gen pou fèt nan gran jou Bondye a, li menm ki Toupisan an” toupre rive e poukisa ou pa bezwen pè gè sa a. Ou ka mande yo pou yo ede w konprann sa Labib di ou dwe fè pou w pami moun Jewova Dye ap pwoteje yo (Revelasyon 16:14). Sa w ap aprann nan ka chanje fason w wè lavni.

[Nòt anba paj]

[Antrefilè nan paj 8]

Èske travay Temwen Jewova yo ap fè a se pa reyalizasyon yon pwofesi ki nan Bib la?