Jan yo pale de mo sa a nan Bib la, “lafwa” vle di kwè nan yon bagay nou gen bonjan prèv pou li. Yon moun ki gen lafwa nan Bondye kwè Bondye ap reyalize tout pwomès li fè yo.

Moyiz te pran desizyon nan lavi l ki montre li te gen konfyans nan pwomès Bondye te fè yo (Jenèz 22:15-18). Moyiz te gen posiblite pou l viv nan liks ann Ejip. Men, olye l te fè sa, li te “pito yo maltrete l ansanm ak pèp Bondye a, olye pou l te pran plezi pou yon ti tan nan peche”. (Ebre 11:25.) Èske li te pran desizyon sa a sou kout tèt? Èske se yon desizyon li te regrèt pi devan? Non. Men sa Bib la fè nou konnen: “Li te rete tennfas, kòmsi li te wè Sila a ki envizib la.” (Ebre 11:27). Moyiz pa t janm regrèt chwa li te fè yo paske se lafwa li te gen nan pwomès Bondye yo ki te pouse l fè chwa sa yo.

Moyiz te fè efò pou l ede lòt moun gen yon lafwa solid nan Bondye. Pa egzanp, fè yon ti reflechi sou sa ki te rive lè Izrayelit yo te sanble bloke ant lame Farawon an ak lanmè Wouj la. Etandone Izrayelit yo te pè anpil pou malè yo te wè ki te san lè rive yo a, yo pran rele nan pye Jewova ak Moyiz. Kòman Moyiz t apral reyaji?

Petèt Moyiz pa t konnen si Bondye t apral fann lanmè Wouj la an de pou ouvri yon chemen pou Izrayelit yo ka chape. Sepandan, Moyiz te gen konfyans Bondye t ap fè yon bagay pou l pwoteje pèp Li a. E Moyiz te vle pou Izrayelit parèy li yo gen menm konfyans sa a. Men sa nou li: “Moyiz reponn pèp la: ‘Nou pa bezwen pè. Pran kouraj. Louvri je nou pou nou wè jan [Jewova] pral delivre nou jòdi a.’” (Egzòd 14:13). Èske Moyiz te ede Izrayelit parèy li yo vin gen yon lafwa solid nan Jewova? Nou ka di wi, paske men sa Bib la fè nou konnen sou Moyiz ak tout Izrayelit yo: “Grasa lafwa Izrayelit yo te genyen, yo te travèse lanmè Wouj tankou se sou tè sèk.” (Ebre 11:29). Lafwa Moyiz te genyen an te fè se pa li menm sèlman ki te jwenn byenfè, men tou, tout moun ki te konprann li enpòtan pou yo mete lafwa yo nan Jewova te jwenn byenfè.

Nou ka imite egzanp Moyiz lè n pran desizyon ki demontre nou gen konfyans nan pwomès Bondye fè yo. Pa egzanp, Bondye pwomèt l ap fè n jwenn sa n bezwen si n mete adorasyon n ap ba li a an premye nan lavi n (Matye 6:33). Se vre, nou ka ap goumen kont tandans pou n bay byen materyèl anpil enpòtans, jan anpil moun nan monn nan jodi a bay byen materyèl anpil enpòtans. Men, nou sèten lè n fè tout sa n kapab pou n mennen yon vi ki senp e lè n mete adorasyon n ap bay Jewova an premye nan lavi n, Jewova ap ban nou tout sa n bezwen. Men sa li pwomèt: “Mwen pap janm kite w, e mwen pap janm abandone w.” — Ebre 13:5.

Nou fè efò pou nou ede lòt moun vin gen yon lafwa solid. Pa egzanp, paran ki saj yo konprann yo gen yon kokennchenn posiblite devan yo pou yo ede pitit yo vin gen yon lafwa solid nan Bondye. Toutpandan timoun yo ap grandi, li enpòtan pou timoun yo konnen Bondye egziste e Li bay prensip sou sa ki bon ak sa ki mal. Anplis de sa, paran yo bezwen ede pitit yo kwè pi bon fason pou yo viv se lè yo suiv prensip Bondye yo nan lavi yo (Izayi 48:17, 18). Paran yo bay pitit yo yon kado ki gen anpil valè lè yo ede pitit yo kwè “Bondye egziste, e [...] Bondye rekonpanse moun k ap chèche li”. — Ebre 11:6, Bib Kreyòl La.